ديوان الشاعر/ الـود طبعــي ..

[حمد ولد أبو حمد]

بسم الله الرحمن الرحيم


السلام عليكم ورحمة الله وبركاته ..

أقدم لكم الديوان الشعري للشاعر القدير الـود طبعــي ،، والذي يضم قصائده الرائعة ،،


أوقات ممتعة ..


--------------------------------



قصـــيدة " ياما دفنت " ..



أنا وجرح القلب خلان وأقراب=لو ما يجيني الجرح رحت ونصيته
مودة تبنى على حب وعتاب=أعاتبه لو صد و بالقلب بيته
يزهم خفوقي لا بعد عنه وغاب=بيني و بينه فزعة لا نخيته
لا شك سر الحب له علم واسباب=وسر المحبة قبل عام خذيته
محبة اللي تسرق عقول الالباب=اللي رجيته ليتني مارجيته
ما عاد أنا حمل العنا وشد الاعصاب=كم جرح في وسط الضماير نعيته
شيدت في قلبي مقابر لها باب=شي قديم وشي توني بنيته
ياما دفنت جروح من ذاقها شاب=تحت الثرى ولا من ذكرته بكيته
أدفن ثلاث تراب وتراب وتراب=واركي نصايب كل جرح جنيته
اركي ودمعي من على الخد سكاب=بيدي أرش القبر حتى رويته
وليا انتهى دفني لفى جرح الاحباب=ياصل يعزيني و انا ما هقيته
يالله تبري جرح من جاك منصاب=و ترحم جروح ماضيات مميته



الشاعر/ الـود طبعــي ..

نشرت قصيدته هذه في بوح القوافي يوم الأربعاء 4 جمادي الآولى 1430هــــ

إضغط هنا للإطلاع على القصيدة.. (http://www.sudeer.com/vb/showthread.php?t=78001)

[حمد ولد أبو حمد]

السلام عليكم ورحمة الله وبركاته ..



قصــــيدة .. " مسرح الجرم " ..



جرح جديد وداخلي مسرح الجرم =تجمعوا والله كفشهم بعيني
على الهوى ومن تاه بالجو مغرم=واللي تخبط من سوى فعل شيني
هذي مشاعر قلب في داخله خرم=تجري الخيانة فيه في كل حيني
فديت ثم أعطيت ولي نفس تكرم=عن الردى وعن طبع ماهوب فيني
ليه اتطبع واجعل بداخلي شرم=طبعي على الفطرة وعقلي رزيني
دام الحضارة كبر والغدر لك قرم=وش لون أبسعد واهتني في سنيني
كبدي من اسبابك تقل تنفرم فرم=والدمع بعيوني وقف يحتويني
معك شبابي ضاع والعمر يهرم=ودرب السعادة حلت بينه وبيني
تتبع هوى نفس لها ابليس محرم=تخوض في رايك وثم(ن) تجيني
ماعدت أنا لك خافقي دوم يكرم=عن الردى وعن طبع ماهوب فيني


الشاعر/ الـود طبعــي ..

نشرت قصيدته هذه في بوح القوافي يوم الأحد 29 جمادي الآولى 1430هــــ

إضغط هنا للإطلاع على القصيدة.. (http://www.sudeer.com/vb/showthread.php?t=79701)

[حمد ولد أبو حمد]

السلام عليكم ورحمة الله وبركاته ..



قصــــيدة .. " أمنـي الخاطـــر ........ " ..



ودي أحلق بالسماء واعتلي فوق=ودي أهاجر للديار البعيده
ودي أشل القلب من كل معلوق=ينبض بنبض الحب صافي وريده
في ديرة ماداسها كل مخلوق=بمضي وحيد بفعل اللي أريده
بنثر غرامي بالسماء وانثر الشوق=وانثر همومي والحظوظ العنيده
واترك هوى العشاق لو إني معشوق=شربت من كاس العنا ومن صديده
وبخرج اللي في الحشا دام مطبوق=وابدى حياة تبتسم لي جديده
ببدى أرتبها على الكيف والذوق=وارسم معالم فرحة مستبيده
أبنتشي من مزنة تضوي بروق=نور يجيب النور يمي ويعيده
لا هل ماطرها على قلبي يفوق=حظ تنكر لي ولا اقدر أكيده
وآخذ من الاشجار ومن ذيك العروق=ثباتها يوم الهبايب شديده
تشوقني شمس الضحى عند الشروق=تظهر بحلم وآخذ الحلم بيده
ولامن لمحت الطير في همه سبوق=يمدني بعزمه وهمه يصيده
واللي على وضح النقى طبعه صدوق=بمشي على صدقه وطيبي يزيده
واصبر على حملي كما تصبر النوق=واودع حياتي في خيالي سعيده
أمني الخاطر مع النفس واتوق=واعيش حلمي والفكر وش يفيده
أنا اشهد إن الحب مامنه معتوق=لو اعتلي وارحل سنين مديده



الشاعر/ الـود طبعــي ..

نشرت قصيدته هذه في بوح القوافي يوم الخميس 19 جمادي الآولى 1430هــــ

إضغط هنا للإطلاع على القصيدة.. (http://www.sudeer.com/vb/showthread.php?t=79064)

[حمد ولد أبو حمد]

السلام عليكم ورحمة الله وبركاته ..


مناسبة هذه القصيدة / زيارة إلى مدينة أشيقر وبيوتها القديمة ..

أترككم مع القصيدة .. راجياً ان تحوز رضاكم ..



قصــــيدة .. " بـصــمة الصــبر " ..



ياليت هاك الوقت عشناه ياليت=وقت البيوت الشامخات القديمه
جيل الوفا والطيب والعز والصيت=جيل القلوب الطاهرة والرحيمه
وقفت بالسكة و بيحت وابديت=مشاعر تشبه مشاعر يتيمه
في شوقها للي بذرها وهو ميت=قامت توجد في حياة ظليمه
شاهدت وامعنت النظر ثم سجيت=بريح الندى اللي ريحته مستديمه
هذي هي القهوة وذا مطبخ البيت=والسطح يثبت لك قلوب سليمه
ياهم رجال اعزومهم كالدناميت=تاريخهم يشهد على ارض عديمه
عادت بي الذكرى مع السوق قفيت=ذكرت انا اللي له مكانه وقيمه
ابوي ذكرك باقي(ن) لو تناسيت=لك الدعاء والحب وقدر وحشيمه
دنيا كفى الله شرها كل مااضحيت=كم واحد نفسه سببها سقيمه
أطلالكم يا بصمة الصبر تثبيت=وفي ظلكم تبقى حياة كريمه


الشاعر/ الـود طبعــي ..

نشرت قصيدته هذه في بوح القوافي يوم الأحد 7 جمادي الأخـــر 1430هــــ

إضغط هنا للإطلاع على القصيدة.. (http://www.sudeer.com/vb/showthread.php?t=80138)

[حمد ولد أبو حمد]

السلام عليكم ورحمة الله وبركاته ..



قصــــيدة .. " بيـض الله وجـهـــك " ..



والله إن الهم فيني معتليني لين راسي=طب في بستان قلبي تاجد أنواع الهموم

تاجد الغبن المصفى ناقع من وقت قاسي=تاجد اشراب الجروح و نزفها في كل يوم

عزتي للقب كيفه محتمل كل هالمآسي=أربع سنين يرص الهم بادراج الحلوم

وانت ياللي بالجفاء ضيعتني وامسيت ناسي=حبنا اللي ما جنينا منه ياكود السموم

إيه يا قلب على درب الوفاء ماهوب راسي=ما صفت نفسه إذا مر الهوى عجل يقوم

يا حبيبي كنت أغلى من هلي واعز ناسي=وش هو عذرك يوم تدعي الجرح نزفاته تدوم

ما تخاف بيوم تشرب من مرارة مر كاسي= السماء لامن صفت لابد تطغاها الغيوم

بعتني يا صاحبي وارخصت فيني طيب ساسي=بيض الله وجهك اللي الحياء فيه معدوم

ببتعد واصنع أمل دامن بدى بالقلب ياسي=ببتعد علي أزيل هموم في قلبي تحوم



الشاعر/ الـود طبعــي ..

نشرت قصيدته هذه في بوح القوافي يوم السبت 17 شعـــبان 1430هــــ

إضغط هنا للإطلاع على القصيدة.. (http://www.sudeer.com/vb/showthread.php?t=85446)

[حمد ولد أبو حمد]

السلام عليكم ورحمة الله وبركاته ..



قصــــيدة .. " أغويتـــــــــني " ..




ما عاد أبي حسك وشوفك وطريــــاك=أمد لك يدي وتضرب بها عــــــرض

هذا جـــزى قلب عن الكل بـــداك=اللي فداك بكل من داج بـــــالارض

أغويتــني و خليتــني أتبــع رضــــاك=وقلت المحبة طوع ماتنفرض فـــــرض

عقب الجفا وعقب العناء وعقب فرقاك=لا تحسب إني بعتني لك واقول إرض

أتعبتني ويــاك وتعـــبـــــت ذكــــــراك=والخاط ر المكسور مما جرى مرض

وش ذنب من هو تاه شوق لعيناك=وش ذنبي أتبع خافق دوم معرض

ودعتك الله علك تــــشوف دنيــــاك=منها تعلم كيف تقرض جمر قرض





الشاعر/ الـود طبعــي ..

نشرت قصيدته هذه في بوح القوافي يوم الثلاثاء 18 رمضــــــان 1430هــــ

إضغط هنا للإطلاع على القصيدة.. (http://www.sudeer.com/vb/showthread.php?t=88092)

[حمد ولد أبو حمد]

السلام عليكم ورحمة الله وبركاته ..



قصــــيدة .. " الــــربـــكــــــة " ..



تصيبني الربكة و ينتابني خوف=وادور الكلمة وداري زلــــلـــها
واسمع بقاع القلب طيران ودفوف=خطر(ن) على سمعي يتفجر سمعها
ناس بوسط القلب و تلعب بالكتوف=تجلب معاشيق الهوى في طرقها
في شوفة اللي شوفته طعنة سيوف=اللي عيونه تشتكي من هدبها
ما جيتها قاصد ولا جيت ملهوف=صدفة وحطت في ضميري سهمها
تشتت كلمات و افتلت حروف=ضاع الفكر من حسن رزة جسدها
قلبي خضر تايه مع اوقات وصدوف=ما يحتمل شوف الظبى في وهدها
نار المحبة نارها تشعل الجوف=لو هي طفت لابد يبقى اثرها
بعض الصدف خطر(ن) توردك الحتوف=لا قابلك موت تموت بسببها
لا قابلك زين على جسم و ........ =تفوح كبدك كنه احد لذعها
الله يجبر خاطري منه ويروف=ويسلي الخاطر إلى من ذكرها


الشاعر/ الـود طبعــي ..

نشرت قصيدته هذه في بوح القوافي يوم الأثنين 9 شـــوال 1430هــــ

إضغط هنا للإطلاع على القصيدة.. (http://www.sudeer.com/vb/showthread.php?t=89294)

[معشي الذيب]

اخي / حمد ولد أبو حمد


يعطيك الف عافيه على المشاركه


وبارك الله فيك على الجهود


وتقبل مروري على المشاركه



تحيااتي

[حمد ولد أبو حمد]

السلام عليكم ورحمة الله وبركاته ..



قصــــيدة .. " الله يعيدك ياهوى البال " ..



واحسرة اللي طار من عينه النوم=واصبح يفكر في حبيبه ولا نام

الشوق يلعب به وفي قلبه يحوم=يحوم كنه وافي الريش لا حام

البال تايه والرجل عيت تقوم=غديت مثل العود بالهون لا قام

عود مضت دنياه حرات وهموم=بين العنا وفي حب من حبها وهام

بينه وبينه حالت اطباع وسلوم=فيه الوفاء ومن الشرف حاز الوسام

يا غايب قلبي من البعد معدوم=مثل السجين اللي حكم فيه باعدام

غفيت لحظة واستعدت لي حلوم=طيفك يناجيني على مر الاحلام

شفتك كما بدر وتزهاك النجوم=بدر ضوى لي والجم الهم إلجام

صحيت وياليت الحلوم تغدي علوم=حظي معاندني على حلم واعلام

الله يعيدك ياهوى البال كل يوم=واشوف زولك يبتسم كل الايام


الشاعر/ الـود طبعــي ..

نشرت قصيدته هذه في بوح القوافي يوم الاربعاء 17 شوال 1430هــــ

إضغط هنا للإطلاع على القصيدة.. (http://www.sudeer.com/vb/showthread.php?t=90176)

[حمد ولد أبو حمد]

السلام عليكم ورحمة الله وبركاته ..



قصــــيدة .. " علمــــــــي و علمــــــــــه " ..




ياعيد عدت وعاد عيدك يعادي = عود يعادي عد ما عاد عيدك

والهم هام بهمتي ما يهادي =والفود ما به فود ولا من يفيدك

قاد المقيد قادني ما يقادي=أكيد له ويكيد كيد ٍ يكيدك

افديه وافدي فدوة له فؤادي=ويزيد ما ينزاد زودٍ يزيديك

ابدي له المبدا ويبدا يمادي=مبداه بادٍ بالمبادي يبيدك

علمي وعلمه عند رب العبادي=قادر يفك قيود قيدي وقيدك




الشاعر/ الـود طبعــي ..

نشرت قصيدته هذه في بوح القوافي يوم الاحد 1 شوال 1430هــــ

إضغط هنا للإطلاع على القصيدة.. (http://www.sudeer.com/vb/showthread.php?t=88818)

[حمد ولد أبو حمد]

السلام عليكم ورحمة الله وبركاته ..



قصــــيدة .. " ينتابني شــــك " ..




فكرت بالدنيا وانا خاطري شين=افكر واناظر في زمان العجايب

تمضي بنا ايام وتركض بنا سنين=ومافات من عمرك يدني النصايب

مجمل حياة العبد شين بها وزين=يلقاه في ماقف له الكل هايب

ينتابني شك ٍ لبعض المحبين=يظهر غلا لكن له قلب عايب

يبدي لك البسمة وبقفاك سكين=يدور الزلة و كثر السبايب

ما فكر بدنيا لها الخلق مقفين=ما فكر بلحظة تجيه المصايب

ما فكر بهادم يجي بغمضة العين=ولا ينفعه إني عن الغي تايب

عزي لمن هو يجعل النار نارين=حاسد وعاشق للعناء والطلايب

الرزق بينه الولي خير تبيين=اطلب ولي العرش منشي السحايب

قادر يفك الهم ويفرج لك الدين=وينير عقل اللي له الظن خايب

مهما الفتى يصبر على الغبن والبين=إلا إن ناره بالضماير لهايب




الشاعر/ الـود طبعــي ..

نشرت قصيدته هذه في بوح القوافي يوم السبت 5 من ذي القعده 1430هــــ

إضغط هنا للإطلاع على القصيدة.. (http://www.sudeer.com/vb/showthread.php?t=91406)

[حمد ولد أبو حمد]

السلام عليكم ورحمة الله وبركاته ..



قصــــيدة .. " فاح الصبر ياسعود " ..




فاح الصبر يا سعود وادنيت له جمر=فاح وتعلى فوق نار سعيره
وادعيت صبري يلهبه واهج السمر=يطبخ على الراحة وانا له واديره
يغلي ويغلي داخل القلب ما مر= يوم طفت ناره ورمد جميره
صارت حنايا الصدر مركاز أحمر=من حر ما بالجوف وادعته نيره
ابيضْ من صالي الجمر ماتذمر= الصبر منهاج القلوب ومسيره
ولا من تبخر قمت له واتشمر=وازيد قلبي صبر واقول خيره
ذقت العسل ممزوج في داخله مر=تخالطت بين الوصل والهجيره
يا صاحبي قصر الوفاء ماتدمر=باقي ولو طال العناء والمريره
دام الغلا مزروع وبه غصن مثمر=أسق الغلا وارحم عيون سهيره
لو طالت الفرقاء بك النار تعمر=ويبقى الصبر يغلي وازيده واديره




الشاعر/ الـود طبعــي ..

نشرت قصيدته هذه في بوح القوافي يوم الاحد 20 من ذي القعده 1430هــــ

إضغط هنا للإطلاع على القصيدة.. (http://www.sudeer.com/vb/showthread.php?t=92551)

[حمد ولد أبو حمد]

السلام عليكم ورحمة الله وبركاته ..

شارك الشاعر/ الود طبعي بهذه القصيدة .. في مسابقة قصيدة المليون في بوح القوافي .. بمناسبة تجاوز عدد المشاركات في المنتدى لـ مليون مشاركة

قصــــيدة .. " الشكر موصول لكم ياهل سدير " ..




الشكر موصول لكم ياهل سدير=مروركم بالمنتدى زاده إشراق
1000000 ماهي هينة دمتم بخير=هذي نتاج افعال واقوال واخلاق
مشرف عضو زائر على حب وتقدير=محبةٍ بنيت على شرع وميثاق
جميع نفخر نحتفل ندفع السير=لسدير يا ديره لها الكل يشتاق
حب الوطن واجب وحبي لها غير=اسس محبتها (أبي) واتبع الساق
يا ماحلا لا عبرّن المعابير=والخير من فضله رعودٍ وبراق
يلفي عليها من جميع المسايير=كل ٍ يبل الريق لا نشفت ارياق
وبالمنتدى تاخذ علوم وتباشير=علم بأحلى اسلوب ويصاغ بلباق
لاهنت يا واضع لنا ساسة البير=ولا هان طاويها على بعد الاعماق
الخير فيها والرجا بالله كبير=والكل ينهل مااشتهى منَّها وراق
1000000 ماهي هينة ياهل الخير=هذي نتاج افعال واقوال واخلاق



الشاعر/ الـود طبعــي ..

نشرت قصيدته هذه في بوح القوافي يوم الاثنين 27 من ذي القعده 1430هــــ

إضغط هنا للإطلاع على القصيدة.. (http://www.sudeer.com/vb/showthread.php?t=93161)

[حمد ولد أبو حمد]

السلام عليكم ورحمة الله وبركاته ..



قصــــيدة .. " هــــــانـــت " ..




هانت ارددها على الدوم هانت=هانت ولا شي ٍ على ربي بعيد
مهما الليالي اشغلتني وشانت=يبقى الأمل بالله وفي قلبي يزيد
ليل المواجع طال والنفس عانت=فرقاء الحبيب اللي على قلبي يكيد
روحي تحبه بالوفاء ما تثانت=أقفى وغديت بدنيتي كني وحيد
وجدي عليها وجد أم ٍ تفانت=ترجي من عيال لها شوفة بعيد
تنكروا عنها وهي يوم كانت=تبسم وتتأمل بهم حظ سعيد
دنياك لا من جت لك بيوم خانت=ابسم وسلمها ولك رب ٍ يريد
دنيا غريبة كل ما قلت زانت=جد الجديد وهام بي هم جديد



الشاعر/ الـود طبعــي ..

نشرت قصيدته هذه في بوح القوافي يوم الخميس 2 ذي الحجه 1430هــــ

إضغط هنا للإطلاع على القصيدة.. (http://www.sudeer.com/vb/showthread.php?t=93345)

[حمد ولد أبو حمد]

السلام عليكم ورحمة الله وبركاته ..



قصــــيدة .. " ياليتني ماشفت ذاك الذي شفت " ..




ياليتني ما شفت ذاك الذي شفت=أبو العيون اللي بجسمه تمايل
شفته وانا من عقبها حالتي زفت=والقلب يرعد وامطر الجوف سايل
والشوق كنه ياعرب راكبٍ لفت=ساسه على كبدي ومرقاه طايل
ياما رقى وياما نزل لين انا عفت=حمل الهوى واللي من الروح نايل
ناظرني بعينه ومن نظرته طفت=خضر الهضاب ونوض برق تخايل
لا ياحسين العود مشكور ماضفت=مع الذي بالقلب غير الثقايل
ولا انت نظره وصوب قلبك فلا رفت=قلبي مع اللي عالق به وشايل



الشاعر/ الـود طبعــي ..

نشرت قصيدته هذه في بوح القوافي يوم الخميس 16ذي الحجه 1430هــــ

إضغط هنا للإطلاع على القصيدة.. (http://www.sudeer.com/vb/showthread.php?t=94242)

[حمد ولد أبو حمد]

السلام عليكم ورحمة الله وبركاته ..



قصــــيدة .. " نصيحة مني عساها مفيدة " ..



النوم جاني والمسافه بعيده=ومن ثقل راسي اومي يمين ويسار

أردد طروق قديمة جديده=عله يطير ويبتدي سرد الافكار

ياقو باس النوم نفسه شديده=ماهمه إن اغمضت وإن صار ماصار

كم نفس راحت بالمعاند عنيده=تطاوع النفس العصية بالاجبار

في خط سيره ثم يلقاه صيده=إما سلم ولا مع النافذة طار

نصيحة مني عساها مفيده=لا حان نومك لبق وطف الانوار

غفوة ربع ساعه وثم هم سيده=على رجاء الله تاصل الحي والدار

ثم الفراش ونومك اللي تريده=ماعاد يحصل طار في غفوتك طار



الشاعر/ الـود طبعــي ..

نشرت قصيدته هذه في بوح القوافي يوم الخميس 30ذي الحجه 1430هــــ

إضغط هنا للإطلاع على القصيدة.. (http://www.sudeer.com/vb/showthread.php?t=95543)

[حمد ولد أبو حمد]

السلام عليكم ورحمة الله وبركاته ..



قصــــيدة .. " ماودي إن نفسك تعذب جزوعه " ..



يا شاكي المحبوب وابديت لوعه=لو المحبة ( رجل ) لا ارميه ما هاب
يبطي على الهجران ويحب كوعه=يبطي أداري خاطره لو جفا وغاب
أجرع من جروحه وانا اسد جوعه!=أغفر له الزلات ويزيدني عتاب!
ماهي محبة والوعد في رجوعه=إما محبة قلب أو صكة الباب
أشعل شموع الحب ويطفي شموعه=لا راحةٍ في بعد ولا راحه أقراب
كلٍ لاجل غالي يعدل طبوعه=ومال الشفايف ذنب في عضة الناب
كلٍ بقلبه حب ويفرق بنوعه=وحب يورد ضيم يابنت تعاب
أقولها والضيم قد مد بوعه=ولا حصلت نفسي سوى قلب كذاب
اللي نساني ضمن قشة بتوعه=ليه ابكى لعينه واعرك بالاهداب؟
ياما وفينا واحتوينا دموعه=حط المشاعر بين خنصر وسباب
مسباح يومي به ويرضي ميوعه=وانت الضحية بين صادق ولعاب
صدام يوم ٍ العبو به ربوعه=صامد وقف في وجه ظالم ونصاب
والذيب لامنه قنب حر جوعه=لا بد يطفي حرته طيب ونهاب
ولا لوم طيرك لا وقفت له ضلوعه=لكن خله يحتمل فعل الاسباب
داره على هونك وركد فزوعه=واللي يحبك يقطع سهول وصعاب
يبطي سنة واسبوع يردف سبوعه=الامر راجع لي وانا ادعيه يرتاب
ماقولها لاجل إن نفسك تزوعه=ولا بفرق بين خلان واحباب
ما ودي إن نفسك تعذب جزوعه=وتعيش عمرك كله أحزان وانشاب



الشاعر/ الـود طبعــي ..

نشرت قصيدته هذه في بوح القوافي يوم الجمعه 14 صفر 1431هــــ

إضغط هنا للإطلاع على القصيدة.. (http://www.sudeer.com/vb/showthread.php?t=98892)

[حمد ولد أبو حمد]

السلام عليكم ورحمة الله وبركاته ..



قصــــيدة .. " شكراً على حسن التعامل " ..



الله يكثر خيرك السابق على مر السنين=شكرا على حسن التعامل والنوايا الصادقه
تحياتي أقدمها وانا ياصاحبي مدين= مدين لك بافعالك اللي بالضماير عالقه
تقدم لي شري وانا اقدم لك خوخ وتين=واحاول ارضي فرحة في وسط عيني غارقه
اسوق لك كل الوفاء واعاملك لطف ولين=واسعى أكون بدنيتك اي حاجة فارقه
بريت حالي بالجفاء بريت حالي بالونين=حتى لذيذ النوم خذته بالتعني سارقه
والله كني سمرة من حدرها جمر دفين=توقد طوال الليل في برد تعاقب بارقه
يسمر عليها راعي الكشتات من حين لحين= تبدي لظاها بالدفى والليل صبحه طارقه
حسبي على الحظ الردي حسبي على الراي اللعين=الثمرة اللي صنتها بالطول فازت باسقه
ماعدت انا اقطف ثمرها ولاعاد يجذبني الحنين=في تركها اولى وهو في الخير خيره سابقه
الله على الدنيا يصبر خافقي والله يعين=والله يبعث من جدار الياس شمس شارقه



الشاعر/ الـود طبعــي ..

نشرت قصيدته هذه في بوح القوافي يوم الخميس 7 المحرم 1431هــــ

إضغط هنا للإطلاع على القصيدة.. (http://www.sudeer.com/vb/showthread.php?t=96178)

[حمد ولد أبو حمد]

السلام عليكم ورحمة الله وبركاته ..



قصــــيدة .. " شبعت من عذرك " ..



يا ما على شانك تحملت وانهنت=يا ما على شانك شربت المذله
فديتك بقلبي ونفسي لك امنت=واليوم تجفاني وقلبي تعله
نسيت وقتٍ فات بالحب يوم انت=تقسم بربك خافقي ماتتله
تبدلت نيتك ومن اول كنت =اشوف في ضحكتك فرحي ومحله
يا نابث قلبي لك الله لاهنت=خله على طمامه لك الله خله
اخذت من جرحي ألين إني ادمنت=أتوب وانت تزود قلبي وتسله
كم من قبر للجرح بالجوف دفنت=واقفلتها خوفي غريب يدله
عقب البطى ومن عقب مابالوفاء خنت=تقول لي آسف ودمعك تهله
شبعت من عذرك وانا منك ايقنت=إن المحبة هم وضيق ومذله



الشاعر/ الـود طبعــي ..

نشرت قصيدته هذه في بوح القوافي يوم السبت 23 المحرم 1431هــــ

إضغط هنا للإطلاع على القصيدة.. (http://www.sudeer.com/vb/showthread.php?t=97440)

[حمد ولد أبو حمد]

السلام عليكم ورحمة الله وبركاته ..



قصــــيدة .. " لا تقول لـــي مشتـــاق " ..



لا تقول لي مشتاق لا تقول وينك=لا تقول لي آسف وتبدي لي اعذار

تبي الصراحة عفت ماضي سنينك=والمقبل ألمح به عواصيف وغبار

لا يكون أنا ذابح احد والدينك=ولا مذوقك الشقا وكاس الامرار

سلمت لك قلبي براحة ايدينك=وامضيت ميثاق الغلا دون مااختار

كله برجوى ضمة من حنينك=تعدني طفل فطم طيب واجبار

ماتذكر اللي دار بيني وبينك=يوم افهق القصة وفينا الهوى ثار

تقول احبك واتأمل بعينك=وتبسم وانا شارد بحسنك ومحتار

الله على الذكرى يعين ويعينك=لا ابعدت عن عينك وصار الذي صار

احبس دموعك واكتم اقسى ونينك= واعرف ترى قلبي مع الكل ماجار



الشاعر/ الـود طبعــي ..

نشرت قصيدته هذه في بوح القوافي يوم الأحد 21 ربيع الأول 1431هــــ

إضغط هنا للإطلاع على القصيدة.. (http://www.sudeer.com/vb/showthread.php?t=101400)

[زخة مطر]

سلام عليكم و رحمة الله و بركاته

قصيدة:"فل الحجاج"،

يافكري اللي سارح بالهواجيس=فل الحجاج وخل عنك التمني
اترك هوى اللي يتبع الشك وابليس=وابسم ترى عمر الفتى في تدني
وش عاد لو عشت العمر في وساويس=هل ياترى تمضي الحياة امتهني؟
ياعمري اللي بالهوى ماله ونيس=عيشة وحيد ولا حبيب يعني
دامي على وصله من اهل المتاعيس=كني يتيم عايش في تبني
راعي الوفاء يبسم وينفض له الكيس=رغم الوفاء لكن قلبه يوني
مايهتني من بت بأمره بلا قيس=يغرق لو انه عارف كل فني
لو ان قلبي به حديد ومتاريس=مايحتمل جرح بقلبي مكني
مير أطلب الله واتعوذ من ابليس=ولا الفكر ياما وياما امتحني
للشاعر: الود طبعي -حفظه الله-
28/8/1431هـ
::

[زخة مطر]

سلام عليكم و رحمة الله و بركاته

قصيدة:"إنس مانيب ناسيك "،


لا غبت عنك لا تظني نسيتك=والله ورب الكون مانيب ناسيك
يافرحة ايامي بعمري فديتك=ياراس مالي لاجلك المال يفديك
مهما من إحساسي ووقتي عطيتك=ماتدري إنك محتوي قلب معطيك
كيف الظنون تسوقك إني جفيتك!=ياللعجب ! أخسر حياتي واجافيك!
القلب لايبست عروقه نصيتك=الماء حياة ورطبة أرض ناصيك
والله كني من حشايه غذيتك=واناظرك واسهر لعينك واغذيك
ياما ذكرتك ياحبيبي وطريتك=حتى بصلاتي مشغل البال طاريك
مجرد التفكير إني نسيتك=والله و والله إنس مانيب ناسيك
للشاعر: الود طبعي -حفظه الله-
14/5/1431هـ
::

[زخة مطر]

سلام عليكم و رحمة الله و بركاته

قصيدة:"دامي اشوف امي فأنا اسعد إنسان "،

الـحـمــد لله دامــنــي بـصـحــة وخــيــر=ودامي اشوف امي فانا اسعد إنسان
إذا مشـى همـك بجسمـك كمـا السيـر=أقـــول هـونـهـا ولـــو خـاطــرك شــــان
رزقـك علـى اللـي رازق فرخـة الطـيـر=فـي عشهـا مـع فـجـة الـنـور لا بــان
خــل الألــم والـهـم فــي قـاعــة الـبـيـر=وخذها نصيحة واذكر القول لا حـان
أمـــك وأمـــك ثـــم أمـــك وهــــي غــيــر=هي جنتك هي ضحكتك مـر الازمـان
تنـقـل تـــرى هـمــك ولـــو إنـــك كـبـيـر=واقــل واجــب يـاهـل الـعــرف إحـســان
وأنـا احمـد الله دامنـي بصحـة وخيـر=ودامي اشوف امي فانااسعـد إنسـان
للشاعر: الود طبعي -حفظه الله-
27/12/1431هـ
::

[زخة مطر]

سلام عليكم و رحمة الله و بركاته

قصيدة:"من كثر شوقي كن بالراس وشه "،

مشتاق لك والشوق وردنـي الجنـون=ومـن كثـر شوقـي كـن بالـراس وشــه
ياللـي بقلبـي كنـت وفـي كلـي تمـون=ياللـي جمعـت بقلبـي ريـشـك وعـشـه
شفني ألعلع وازعج الصـوت محـزون=واتـنــى خـفـوقــي بالـمـشـاعـر تــرشــه
طفل صغيـر فـي حشـى ابـوه مفتـون=مبطـي ويرجـي لحظـة الشـوف بـشـه
يـزهـمـه باللـحـظـة ويـرقــب بـالـعـيـون=والـلـي مـعـه سـاعــة قـدومــة يـطـشـه
شوقي ترى شوق الطفل كان تدرون=مــن غـبـت وقلـبـي كــل شــي يـدشــه
تفنجـلـت فــي داخـلـه صـــد وطـعــون=ومـاجـاه فـــي خـافــي كنـيـنـه يـخـشـه
الله يـجـيـب الـخـيـر والـكـايـن يــكــون=والله يـحـفـظ مـــن بـنــى فــــي عــشــه

للشاعر: الود طبعي -حفظه الله-
1/7/1432هـ
::

[زخة مطر]

سلام عليكم و رحمة الله و بركاته

قصيدة:"كذااااااب "،


إن قلت لك يابنـت مـا اشتقـت كـذاب=لا بالله إلا الشـوق مـن رحـت فيـنـي
طيفـك علـى بالـي ومـن بـد الاحبـاب=وبـي لهفـة فـي وسـط قلـبـي تجيـنـي
امشـي ولا كنـي علـى زفـت وتـراب=كنـي علـى سـطـح القـمـر ياضنيـنـي
ترفعني اشواقـي وتهبـط بـي اسبـاب=وظـروفـك الـلـي بداخـلـي تحتـويـنـي
أحب انا شوفـك علـى ذيـك الاهـداب=واطـرب لصوتـك ياشـقـاي وحنيـنـي
من غبت والبسمة ترى صكت الباب=لاعـــاد تستـقـبـل ولا هــــي تـبـيـنـي
تعـال وارحـم خافـق جــاك منـصـاب=تـعـال وارحــم دمعـتـي مــع ونـيـنـي
القـلـب يـــوم انـــه تـنـقـاك مـاخــاب=اختـار مـن يبهـج لـه احلـى سنيـنـي
وادري قسيت وكل زلـه لهـا حسـاب=والـلـوم لا مـاانــلام وربـــك يعـيـنـي
لـولا المحبـة ماتحمـلـت انــا عـتـاب=ولا قمت احاتي النفس حيـن وحينـي
بـس الوكـاد القلـب مـن لهفـتـه ذاب=واكبر دليل الشوق مـن رحـت فينـي
للشاعر: الود طبعي -حفظه الله-
22/1/1432هـ
::