قبل ماتسجل .تولم للمقابلة

[ريـال فسحة]

قصة من اختراعي :) وترى كلها مزح في مزح

طرت لي اسجل في منتدى سدير

وكان فيه شي عندهم اسمه مقابلة شخصية عشان القبول للعضوية

ووكان فيه لجنة للمقابلة تتكون من 7 اشخاص معظمهم من المشرفين

دخلت وسلمت:) وردوا السلام ورحبوا ثم بدت الاسئلة

وكان اول سؤال موجه لي من تابط شرا ومضمونة مالهدف من تسجيلك في منتدى سدير ؟

بصراحة ارتعت لان صوته يروع:p

قلت ابد طال عمرك بس حبيت في منتدى اسمه يحمل اسم ديرتي

مادريت الا ويطمر غويمض ويقول الجواب هذا (دزد )نزل هنا وكان حجاجة معقود>>>كذا:mad:

وتابط شرا يقول بصوت ضعيف : هو صادز غويمض هو صادز

بس اشوى ان فيه اسز قال لي ماعليك منه كمل جوابك

((((وين اكمل جوابي ياعم ؟؟؟عقب صرخة غويمض نسيت كل الكلام اللي مصفصفة وكنت ابي اقوله )))))

واثر ربى الجنان معها غضارة مليانه (عصفر ) عطتني وقالت هد نفسك ولا ترتاع وخذ مني هالنصيحة : قبل ما تجاوب اي جواب سو بحث على الاجوبة في المنتدى ثم حط جوابك :)

السؤال الثاني من راعي الاولة: هل لك اهتمامات شعرية؟؟

يوم بغيت ارد واقول لا تذكرت طمرات غويمض

رحت على طول وبحثت في الاجابات لقيت ان كلمة (لا) موجودة في 6588940 موضوع

المهم قدرت اجاوب راعي الاولة وقلت له (كلا) وخفت انها مكررة قلت له (نهي<<<بالهندي)

يوم درى اني مامن زود في الشعر ضاق صدره شوي بس قال ما يخالف يكفي لو انك متذوق للشعر :) وعلى طول خش قلبي هالمشرف

المهم وانا قاعد شفت في صدر الطاولة اللي مجتمعين هم فيها شفت شويب معه عصا ويتنافض واسمه الملتمس.وقال ياوليدي اكيد انك سمعت عن المنتدى وعن الاشيا الزينة والشينة فيه .صح ؟؟

بغيت اقول صح يطمر علي غويمض ويقول اجابة مكررة

اكتفيت بهز راسي فوق تحت .يعني ايه سمعت

قال قل لي وش الزين فيه قلت كلش زين

قال والشين وشو؟ قلت كلش. قال وشلون فسر لي

مادريت الا وواحد اسمه وراء الكواليس واقف عند راسي ومعه ورقة وقلم وناوي يكتب كل الملاحظات اللي ابقولها

قلت له :الشين اللي شفته هو اني اذا بغيت اكتبكم رد على كم موضوع يطلع لي واحد يقول اصبر ثلاث دقايق بين كل رد ورد.

يعني يضيع وقتي وانا احتري هالثلاث دقايق تروح عشان ارد على كاتب او احط موضوع .

قال الملتمس هو صادز .
طمر تأبط وقال بلاك والله ماتدري ياريال فسحة . لو خليناها بدون وقت كان شفت العالم مايمديها تكتب موضوع الا وهو رايح للصفحة الثانية من كثر الردود اللي جت لمواضيع ثانية ((فهمتوا شي:confused: ))

المهم قام اسز وشرح لي فكرة تابط شرا

واثرها في دخلة صب زيروا وعاشقة سدير والحلوة ومعهم فصفص وحب قرع وبسكوت شاهي وبقل غير االزمزميات

اانتهت الحلقة الاولي



################


ااكمل موضوعي هنا في رد ثاني اذا لقيت لموضوعي قبول وان صار ماله طعم وبايخ اكتفيت بالحلقة هذي :)

[ربى الجنان]

الله يرجك يريال فسحه

كمل كمل...............

[الصحراوية]

مووضووع خياااااااالي مره مره يا ريال فسحه يعطيك العافيه:D :D
بسرعه تكفئ كمل ترانا علئ احر من الجمر:(

[ريـال فسحة]

واثرها في دخلة صب زيروا وعاشقة سدير والحلوة ومعهم فصفص وحب قرع وبسكوت شاهي وبقل غير االزمزميات

اانتهت الحلقة الاولي



##########

اللي فوق مقطع من الحلقة الاولى ونسخته عشان يكون فيه تسلسل للقصة الخيالية هذي :)

المهم:

اللي جابوا معهم الفصفص (البنات ) دخلوا ومحد انتبه لهن الا انا . وقعدوا ورى اخر الصالة اللي كنا فيها

وبعد مافهمت قصد تابط شرا (طبعا عقب ماشرح لي اسز )

قال لي الملتمس كمل ياوليدي قل لنا وش اللي ما اعجبك.

((وراء الكواليس ماسك القلم ينتظر مني اي كلمة عشان يحطها في الملاحظات))

قلت له ياخالي الملتمس ولا يهونو الربع . قالوا لي :لاهنت.

(اثر فيه غير اللي قاعدين في الطاولة قالوا بعد لا هنت ) طبعا عرفتوها :) راعين الفصفص والشاهي

سمعوهم اللي في الطاولة وتركوني اتكلم وراحوا يتقهوون وصارت نهابة بينهم اللي يتهاوش على الفصفص واللي يتطاق مع الشويب على البقل واالي يحجز له بيالة( جوفانشي )<<< كل بيالاتهم بادريق الا وحدة من نوع جيوفانشي ومدري ليه بيالاتهم مشكلة والغريب ليه يتطاقون على هالبيالة وش فيها زود عن غيرها


(((معليش تحملوني على طلعتي من الموضوع الاساسي واتجاهي لبعض التفاصيل ))))

المهم قلت خلوني اكمل ملاحظاتي

قالوا كلهم بصوت واحد كمل انحن كلنا نسمعك (((بالمناسبة ترى كلمة انحن ماركة سديراوية مسجلة ))<<<هذي الملاحظة لغير الناطقين باللهجة السديراوية

المهم قلت في نفسي ابكمل ماعلي منهم

وقلت: بعض اقسام المنتديات مالها مشرفين وبعضهن مالهن الا مشرف واحد مع ان الاعضاء ماشاء الله واجد وكلهم فيها خير وبركة .

رد علي تأبط شرا وقال :
(تك ) وانت (تك) وش رايك (تك ) في هالقضية <<<قالها وهو يقشم حب

قلت له كل قسم لا يقل المشرفين عن ثلاثة الزود ولا النقص ((ما امداني اكمل جملتي الا وسمعت صرخة الملتمس اوجعته سنونه لان البقل اللي كله صار يابس )) ومع الوجع حرك رجله وكب بيالة غويمض وصرخ عليه غويمض .

توقعوا وش قال؟؟؟

قال طريقة كبتك للبيالة مكررة لاتمعط تحياتي:D

وعلى طول قالت ام عبدالله الله يهديك ياشويبنا وراك ماسويتا بحث في المنتدى عن طريقة كب البيالات؟؟؟؟

الملتمس طارت شوشته من استغرابه للسؤال وقال حتى كب البيالات يبيله بحث؟؟؟

ردتابط شرا ايه وش زودك عن العالم ابحث ثم سو اللي تبي .

قال رشح لي اللي تشوفه مؤهل للاشراف

قلت كل اللي هنا مرشحين وكل الاعضاء مرشحين

(((وراء الكواليس مبسوط مني ويقول في نفسه تمام كذا ..نرتقي بالمنتدى ..))

اها عندك شي ثاني تبي تقوله؟؟؟<<<هالجملة جت من واحد بعيييييييد مبطين ما سمعنا صوته تدرون منهو؟؟؟



###########

لمعرفة قائل الجملة السابقة انتظرونا في الحلقة القادمة

:D

###########

ربى الجنان والحلوة مشكور لتشجيعكم لي :)

[سنمار]

حلللللللوه منك ياريال فسحه هالسوالف السنعه
وانا بهالمناسبة قررت اني ازيدك اربعة ريالات زود على ريالك
عشان تصير خمسة وتستسغني عن التغذية الله يذكرها بالخير.

على طاري التغذية اتحدى غويمض يقول انها زد نزلت:rolleyes:

[تأبط شرًا]

ريال فسحه ..
هذا الموضوع من المفترض أن لايطرح في شباب سدير ..





ولكن ..








يكون في..









قسم خاص بالمواضيع المميزه ..



والله يعطيك العافيه ..
وننتظر البقيه .. لاتتأخر علينا ... <<<< يلمح عشان تخف عليه شوي :)

[بن جعيثن]

موضوعك هاذا كنه وجهك





















الزين طبعا!!!!!!!

[سعود الخليل]

واصل يا ريال فسحه وانا متابع معك ،،،،

تحياتي لك ولتميزك بهذا الإسلوب السديراوي الرهيب ..

[ربى الجنان]

هههههههههههههههههههههههها

ماشء الله عليك ريال فسحه ...

أسلوب يجنن ...
كمل ولاتبطي علينا....

[وراءالكواليس]

هالحين وش جايك طاب علينا...يا كافي...(تك تتتك.تتك)>>>معهم حب قرع سنع



يومنك ما خليت مشرف الا و نفضته نفض...حتى الحكومه...ما سلمت منك************************يقصد حكومة المنتدى >>>عارفكم ما تكذبون خبر تدورون شي تمسكونه....اهبوا..

لكن بصراحه من هالحين صرتا صديقي ...تعجبني والله...كلامك واجد اعجب انا


لكن ترا والله مساكين يتعبون ومجتهدين...

لكن التجديد والتغيير مطلوب والدم الجديد في المنتدى اكيد يحرك الجو...ويفيده


وانشاء الله بتشوف الي يسرك ************************>هذي يقولها تابط شرا


وما ودي اكثر بربره وهذر يحوم التسبد ..

اخلص علينا وكمل باتزي الحتسيات>>باقتباس من مشاركة رحال الله يذكره بالخير

وترى ياويلك ويا سواد ليلك انتسانك مثل رحالوه...الي ما عمره كمل هرجته من جاء للمنتدى


القف تحياتي
:p

[الملتمس]

ريال فسحة 000 مسيك بالخير 000

اولآً يازين حتسياتك وسويليفاتك 00 ماودك تسير علينا في المشراق وتقعد معنا 00 ترا سواليفك ما تنمل 00

ثانياً ودي اصحح بعض معلوماتك عني يوم المقابلة 00

#(شفت شويب معه عصا ويتنافض واسمه الملتمس)000 يالحبيب انا ما كنت اتنافض اصلاً انا طبعي كذا قبلي ملتمس 00 انت ما تشوف التوقيع وتشوف فيش الكهرب لاعبن في حسبتي

# (وسمعت صرخة الملتمس اوجعته سنونه لان البقل اللي كله صار يابس00) اصلن انا مالي ضروس 00 واذا بغيت آكل بقل لازم اربصه في الشاهي الين يلين بعدين آكله والقهر انهم كلو الحب وانا ما اقدر اقشمه 0 بس بصراحة الله يخليلي تأبط شراً صار يقشم لي ويعطيني قروص وانا ما غير اجرعهن 00 والصرخة اللي تقول عنها هي صادره من غويمض 00 لأني وطيت رجله بالعصا وانا ما ادري 00


#(ومع الوجع حرك رجله وكب بيالة غويمض00) وترا الي كابن البيالة غويمض يوم جر رجله من حدر عصاي 00 بس ابن الذين آمنو لطها في وورطني ويبي يصرف عمره وقال لي انك يالشايب كبيتا البياله وعلى طول زبن عبارته المشهوره عشان يلهون فيها وما يهاوشونه على توسيخ الفرشة لأنها ما خوذه من سيارة وراء الكواليس وتسنه ضاق صدره 00

#(وعلى طول قالت ام عبدالله الله يهديك ياشويبنا وراك ماسويتا بحث في المنتدى عن طريقة كب البيالات؟؟؟؟) صدقت ومشت عليها لعبت غويمض وورطوني حسبي الله على بليسهم 00

#( الملتمس طارت شوشته 00) اسعد الله ان لي شوشه 00 وخلها تطير قبل 00 بس الي انت شفت هو طرف شماغي وتحسب انه شوشة 00 وهو ما طار من السؤال طار من القهر والظليمه 00 وانقهرت من غويمض هاللي ما يعطي للشيبان قدر 00


آسف على الإطالة بس كان لابد من تويح بعض الملابسات اللي صارت في المقابلة 000


وتراني احتري الحلقة الجاية 00 اها عاد لا تبطي 000


لك تحياتي

[ريـال فسحة]

معليش كل اللي رديتوا ابعقب على ردودكم بس مهوب الحين اعذروني اكمل لكم ثم التفت لردودكم

########
وقفنا عند الجملة هذي :)

(((اها عندك شي ثاني تبي تقوله؟؟؟<<<هالجملة جت من واحد بعيييييييد مبطين ما سمعنا صوته تدرون منهو؟؟؟))))



##########



هذا اول عضو في المنتدى اسمه (سدير )هو المشرف على المنتدى سابقا ولكن كثرة اشغاله خلته يبتعد عن المنتدى

عاد تدرون وش اشغاله؟؟؟

محل ابو ريالين فاتحه في حفر الباطن وكل يوم يتردد من سدير للحفر وفي المواسم يبيع فقع يجيبه من هناك ببلاش ويبيعه كرتون صغير بخمسمية اهب اهب @@.

على طول انا قلت له هلالالالالالالالالالا وغلالالالالالالالالا حيالله سدير

قال من انت ؟

قلت ريال فسحة .

قال ادري بس انت تعرفني؟؟ قلت معلوماتي عنك ما تتعدى الكلام اللي كتبته عنك تو .


قال اشوى . المهم قل لي يا ريال فسحة وش بعد وش عندك؟؟

قلت اسمع يا سدير .ولا يهونون الربع ؟

هالمرة كلهم قالوا لاهنت الا غويمض عيا يقول ان هالكلمة مكررة وطبعا حجاجه معقود كذا >>>:mad:

قلت طال عمرك تذكر ربعنا الاولين اللي اختفوا عن المنتدى؟؟؟

قال ايه اذكرهم

قلت وش الدنيا بهم وش اخبارهم؟؟

قال انت وش دراك عنهم؟؟ انت عضو جديد وش سالفتك؟؟

قلت له لا انا عضو قديم بس مشاركاتي قليلة ذيك الايام وانقطعت فترة طويلة ويوم بغيت ارجع لقيت اني ناسي الباسوورد.

قال وش اسمك عشان ارجع اسمك الاول لك؟؟؟

قلت مابيه اصلا من زين مشاركاتي الاولة؟؟كلهن 9 او عشر مشاركات ومافيهن زود ملح.

المهم لاتغير الموضوع ياكابتن سدير خلني اكمل لك الصورة.

قال لي اسلم كمل قل مافي جعبتك

(((بصراحة مدري وش قصده بكلمة جعبتك :confused: مدري هي مدحة والا سبة )))
قلت في نفسي بكمل واخلي سالفة الجعبة بعدين.

ثم قلت له
ربعنا الاولين ماتدري عنهم؟نسيتهم؟

ناس خدموا في هالمنتدى ورى ما تسألون عنهم تشوفون اخبارهم تتصلون عليهم ترسلون ايميلات لهم تنادونهم تكرمونهم ترشحونهم لستار اكاديمي.؟؟؟

((يؤ يؤ يؤ شكلي خربت موضوعي وش جاب طاري هالبرنامج الخايس في موضوعي؟؟)))

اشوى انه مايدري وش سالفة ستار اكاديمي والا كان رجفني

بس قال لي وش ستارته اللي تتكلم عنها قلت ابد انا قصدي ان الاعضاء والمشرفين القداما انصكت عليهم ستارة ولا صرنا نشوفهم <<<اشوى اني قدرت اصرف السالفة:)


قال ايوالله ياريال فسحة والله انك صادز

ثم التفت لتابط شرا وقال شف هالاقتراح ونفذه

رد تابط شرا وقال سم ابشر طال عمرك ((وبينه وبين نفسه يقول وين جانا هالريال ذا منه يبي يشغلنا الله يشغله بالطاعة .....الحين انا بلشان بالمنتدى ويبيني اطامر ورى الناس اللي تركوا المنتدى ؟؟))

ثم قال لي ( تـك ) وش اقتراحك طيب ياريال (فو ) <<< تـك= تقشيمة ...فو = تفلة قشرة

قلت سوو نداء لهم وثبتوا موضوع فيه اساميهم وتراهم اذا دروا يبون يجون طايرين لانهم بيدرون ان ربعهم في المنتدى مانسوهم


تدخلت ربى الجنان وقالت ايوالله هو صادز (((عسى ما اتعبتي عمرك :))) :D


<<<ياويلك منها بتجيب ربعها وعصابتها ويطبون فيك زي ماطبوا في ابا المياه :D


المهم
لقيت تأييد من الموجودين

لكن طمر اسز وقال ياااااااااااااقووووم ياااااااااااااقوووووم النصر بمن حظر:eek: عفوا اقصد المنتدى بمن حظر

اللي موجودين كلهم خير وبركة ((انتهت جملة اسز ))

<<<هو قصده اننا مانربط تقدم المنتدى بناس اختفوا ((وهو صادز بهالكلمة ))

بس انا يوم قلت له ان رجوعهم فيه دعم للمنتدى خاصة وانهم يعتبرون المؤسسين للمنتدى اقتنع

وقلت له انهم هم اللي حطو اللبنة الاولى في المنتدى

وياليتني ماقلت له ...صار الرجال مايواطن اللبنة وبس يحب الجبن وعش العصفور

وضاع نصف وقتي وانا اشرح له كلمة لبنة وانها تعني جمشة <<<<الحين بدال ما اعطيه معنى يسهل له قلت له جمشة وصعبت عليه زود :(

بس الملتمس جا بسرعة وفهمه معنى كلامي :)

((في هذه الاثناء كانت الزيروووة مسيكينة ماغير تصب شاهي وقهوة للموجودين ولا تهنت بالفصفص وحب القرع ولا ذاقت البقل .ابلشوها العالم :صبي صبي هاتي قربي الفصفص قربي البقل )))

وجنبها وحدة تقول لها قشمي يالزيرووة قشمي ترا ( الرجاجيل التماسيح ) ماراح يخلون لك شي <<<<طبعا عرفتوها :)

وانا قاعد اراقب الموجودين دخل علينا حالم ليل جاي متاخر

ومعصب ومطنقر وضايق صدره


##################

بتدرون ليه ضايق صدره؟؟

تابعونا في الحلقة القادمة

[سعود الخليل]

2

[بن جعيثن]

الظاهر موضوعك بصير له أحد امرين:


1/ يحذف وهذا الظاهر اللي يمكن يصير..
لتعديك على المشرفين وكب عفشهم.













2/ يثبت . وهذا اللى أيده انا..

[الوحش]

أخخخخخخخخخخخ

موضوع حلو أخوي ريال فسحة <<<<< خل عنك الطفرة شينة .

ترانا نحتري الحلقة الجاية .

[عاشقة سديـــر]

اهلين اخوي ريال فسحه :D

مشكووووور جدا على الابداع ...وماشاءالله عليك قصه رائعه بمعنى الجمله ...

بس في شيء قاهرني من قصتك مررررره

:mad:

:mad:

:mad:

:mad:

:mad:

:mad:


تراااااااني احب الافلام اكثر من المسلسلات ...قصدي لو تكملها في عشر صفحات وتحطها مره وحده

ازين من كل يوم حلقه <<بتسوي فيني خير لاني ما اقدر اصبر للحلقه الجايه ...متحمسه مع القصه بقوه :D

*ملاحظه ..
(وجنبها وحدة تقول لها قشمي يالزيرووة قشمي ترا ( الرجاجيل التماسيح ) ماراح يخلون لك شي <<<<طبعا عرفتوها )

اكيد عرفناها :D بس تراها عقلت ...وماعد تقول لكم تماسيح ;)

انتظر الحلقه الجايه بفارغ الصبر .........:( :(

سلااااااااااااااااام

[من يفهمني]

بل بل بل عليك شكلك غني ريال عاد مو مثلي نصف ريال ويخب عليه
بس مشاء الله عليك انتظر الحلقه الجاي على احر من الجمر

[ريـال فسحة]

عقب هالتشجيع بكمل القصة بس والله اني خايف يزعل احد مني

خاصة غويمض واسز .
ترى مثل ماقلت لكم قصة خيااالية واعتبروها كاركتير من واحد يمون

ها يا سز انت وغويمض انا ضيفكم الحين وفي منتداكم .

ابي ( دحجة ) توجهونها لي للسير الى نهاية القصة :)


((((في انتظار تعقيب اسز وغويمض)))

[غويمض]

:) :( :o :D ;) :p :mad: :rolleyes: :cool: :eek: :confused:
بكل معاني الصور ياريال فسحه اهنيك بهذا الموضوع الرائع وصدقني انك اعدت الحياه لهذا المنتدى...ولا يهون شايبنا الملتمس
وسع صدرك فيني
بس فيه نقطه الموضوع مازد نزل
بس زد نزل موضوع مشابه له تماما:mad:
لروعه الموضع ابشرك بانه سوف ارشحه لافضل موضوع لهذا الشهر واباثبته
امعط تحياتي:mad: :mad:

[الصحراوية]

ابداااااااااااااااااااااااااااع ماله حدود ريال فسحه:D :D :D
اهنيك علئ ها الموهبه اللي عندك مشاء الله عليك:)
ننتظر الحلقه الجايه ونكفئ يا اخوي لا تكثر فواصل اعلانيه:D

[ابو عبد العزيز]

ريال فسحه مساء الخير .
قصة حلوة بس طقتنا الجغوه وانت ماكملتها فاكملها يافتى ولا تترددا فنحن بنتتظار ابدعاتك الحلوه

[ريـال فسحة]

((( ملحوظة صغيرة : ترى حلقة اليوم محزنة شوي وان قلت فيها مصالة ما ابالغ .بس ابيكم تفكرون في الاشياء اللي تجي بين سطور الحلقة هذي )))

###################

وقفنا عند الجملة هذي :


وانا قاعد اراقب الموجودين دخل علينا حالم ليل جاي متاخر

ومعصب ومطنقر وضايق صدره


##################

دخل حالم ليل وما سلم مدري وشفيه

وراح وقعد في (الربعة )

وتلطم وقعد يكلم نفسة ويتمتم بكلمات وطلاسم ما فهمناها ((بالله عليكم دققوا على كلمة يتمتم وكلمة طلاسم ترى من زمان ودي اكتبهن ومالقيت فرصة الا الحين )) :D

المهم راح له ابا المياه وقال عسى ماشر وشفيك متضايق:confused:

(((بالمناسبة ترى ابا المياه هو واسز اكثر الناس هنا يراعون انهم مايزعلون احد ))

رد عليه حالم وقال : تكفى خلني بروحي .انا من جد مالي خلق احد .

قال ابا المياه : افاااااا . وش صار؟؟؟؟؟؟

قال حالم ليل : ابقول لك سالفة وابي رايك فيها

(( بالمناسبة ترى الكلام اللي بينهم ماسمعه الا انا بس والباقين لاهين في الفصفص والشاهي ))

المهم اكمل لكم وش قال حالم ليل لوادي ابا المياه . قال له :

تخيل لو معك كيس حلاو من نوعية حلاو بقر مثلا .. او معك كيسة قريض مخلوط معها حلاو صعو .

قال ابا المياه : كمل انا الحين اتخيل .

(( بيني وبينكم انا بعد قعدت اتخيل . بس ودي اعرف وشوله قال له تخيل ))

قال حالم ليل : تخيل انك قمت توزعها على ربعك . وانك حطيتها عندهم وقلتا لهم اللي يبي ياخذ ياخذ . وفعلا كلهم خذوا .


قال ابا المياه : كمل لازلت اتخيل .

قال حالم : تخيل ان من بين 30 واحد اخذوا منك ما شكرك الا اربعة اشخاص . بالله عليك ما يضيق صدرك؟؟؟
قال ابا المياه يمكن نسوا ما شكروك

قال حالم ليل . اي نسوا ياعم ؟؟ كل يوم على نفس الحال. معقولة ينسون كلي يوم؟؟؟؟


عرفت انا وقتها وش كان يقصد حالم ليل .

<<<تدرون متى بالضبط عرفت ؟؟؟ يوم قال حالم ليل : تدري يا وادي ابا المياه وش خلا مهاجر وهاردوير يتركون الاشراف في المنتدى؟

بلاهم والله مالقوا تشجيع من الاعضاء. <<< هالجملة قالها بصوت قوي . سمعوها الموجودين كلهم اللي في الصالة واللي خارج الصالة . ووقفوا شوي عن التقشيم ومرت بالضبط خمس ثواني ثم كملوا تقشيم وتربيص البقل :)

ثم استطرد قائلا ((ولكن بصوت منخفض ))

رح شف اي موضوع وناظر عدد الردود اللي فيه قسم بالله شي يخلي الواحد يتحطم

يخوي معظم الاعضاء الله يهديهم يقرون موضوع ويمكن يستفيدون منه في قسم الحاسب ومع ذلك يبخلون بكلمة مشكور :(

<<<< بالنسبة لي انا خنقتني العبرة وخفت ان سالفة المقابلة تفركش

وقلت في نفسي وين وراء الكوابيس عفوا...J الكواليس وينه عن سالفة حالم ليل .ووراه معيي لا يصير مشرف معه في نفس القسم؟؟


(((وفجأة سمعنا صوت تغرة قوية من واحد توه جاي متغدى )))

التغرة هذي قطعت سالفة حالم ليل وابا المياه .


(((ان كان تبون اوصف لكم التغرة والاشياء اللي طلعت معها انا مستعد بس اخاف تحوم كبودكم خاصة اننا كلنا عارفين ان رحال رقيق وما يتحمل صوت تغرة :) )))



من صاحب هذه التغرة؟؟؟؟

وهل فعلها متعمدا ؟؟

وهل ستؤثر تغرته على تقدم منتدى سدير؟؟؟؟

هذا ما ستعرفونه في الحلقة القادمة :)

#########################

الحلقة القادمة ستكون مثيرة وحافلة بالاحداث المشوقة ...كونوا معنا

[ابو عبد العزيز]

نحن بالانتظار يا ريال فسحه ولك مني جزيل الشكر على هيك سواليف حلوه

[الــوافــي]

الله يعافيك على هذا الموضوع
وما قصرت في ابداعك على هذا الأسم (ريال فسحة) بس ما خبرت ان فيه
احد ياخذ ريال واحد للفسحة الا ان كانك تا خذ فسحتك ريال في اليوم
:D :D :D :D :D

[ربى الجنان]

ياخيي يريال فسحه..متأكد نك عضو قديم له أربع مشاركات بس!!!

صراحه نقد وإبداع ..يعنى أنت بتنقد المنتدى بإسلوب إبداع...


بس مشاء الله تعرف المشرفين كلهم....

بس تدري حلوه طريقتك ...تخلينا نقراء فكاهه ومنها نصحح عيوبنا...

كمل ...
:rolleyes: :rolleyes:

[ريـال فسحة]

((وفجأة سمعنا صوت تغرة قوية من واحد توه جاي متغدى )))

التغرة هذي قطعت سالفة حالم ليل وابا المياه .


(((ان كان تبون اوصف لكم التغرة والاشياء اللي طلعت معها انا مستعد بس اخاف تحوم كبودكم خاصة اننا كلنا عارفين ان رحال رقيق وما يتحمل صوت تغرة )))



من صاحب هذه التغرة؟؟؟؟

وهل فعلها متعمدا ؟؟

وهل ستؤثر تغرته على تقدم منتدى سدير؟؟؟؟

هذا ما ستعرفونه في الحلقة القادمة

@@@@@@@@@@@@@@@

معليش يا اخوان لاني استخدمت تشبيه مجازي لانسان يصدر صوتا بغيضا على جميع الانفس . وكان الاولى ان استخدم تشبيها لشخص يصدر اصواتا اسوأ من ذلك ولكن احتراما لكم ولنفسي اكتفيت بهذا الوصف لهذا الشخص

<<<< لا تسألوني وش معنى الكلام اللي قلته انا تو J لاني انا نفسي مدري وشو :D


نرجع لموضوعنا .

من هو صاحبها ؟؟((التغرة )) .. هو عضو دخل للمنتدى للافساد وللتخريب لشيء في نفسه

وهل فعلها متعمدا ؟؟..... اتوقع انه فعلها متعمدا

وهل ستؤثر تغرته على مسيرة منتدى سدير ؟؟؟.... ربما نعم وربما لا وهذا ما سترونه في احداث الحلقة هذي

..................................

المهم دخل علينا ابو تغرة وسلم وردينا كلنا السلام ورحبنا . مع ان مافيه احد مننا قد شافه

وكان معه ( باغة ) مليانة مدري وش كان فيها وكان لابس ثوب ابيض نظيـــــــــــــــــــــــــف <<< لاتنسون ثوبه الابيض ترى بنرجع له في نهاية الحلقة هذي

قال انا ضيف عليكم احبكم اموت فيكم وقام يمدح فينا .

المهم شوي قال وين دورة المياة ( وانتم بكرامة ) قلناله شفها هناك اخر السيب

((على طاري دورة المياه . ابي تعليق أي واحد منكم عن الفرق بين دورات المياه اول والحين J وابي اعرف سر البزبوز الاصفر اللي مافي امل يغيرونه وسر الغضارة الكبيرة اللي تتوسطه))

المهم رجع لنا مغير وجهه شوي وقعد ينصحنا ويعلمنا اشياء بديهية عن الادب ومعاملة الغير.
وطبعا من باب المجاملة قلنا له جزاك الله خير

ثم قال بروح مرة ثانية لدورة المياه قلناله خذ راحتك


رجع ((مرتن لوخ )) <<<يعني رجع مرة ثانية بلهجة اهل العراق :)
وقام يعذرب في لبس بعض الموجودين

ما امدانا نرد عليه . الا وهو قايم وقال ابي اروح لدورة المياه

((((انا وقتها قلت في نفسي من اللي حخاط له زيت خروع؟؟وشفيه ذا؟؟؟ )))

المهم رجع لنا بشكل ثاني . لكن هالمرة قام يمدح سنون اسز ويحلف انها ازين من سنون غويمض اللي كنها حبل غسيل <<<على حد تعبيره ((يعني مالي دخل انا :D ))

وقام يمدح الزيروة ويقول ان بكلتها اكشخ من بكلة ربى الجنان

وقام يمدح بقايا امل ويقول ان خمخمتها ازين من خمخمة عاشقة سدير

وان ريحة الملتمس ازين من ريحة عمرو الندى وان فلان احسن من فلان وفلنتان ازين من فلنتان . (((فلنتان تراه مهوب عيد الحب :D اخاف يطلع لي ابو تغرة يقول اني اروج له ))

يوم بغوا يردون عليه قال عن اذنكم بروح لدورة المياة.

راح ورجع وقال .الحين ورى بزبوزكم ما ينصك ورا المسئولين ما يشوفون حل له والله انكم ناس همج وما تعرفون تديرون الصالة هذي وكانت خشته كذا.

((اثر فيه اثنين من اهل المنتدى الاولين نايمين وقاموا على ازعاج ابو تغرة .))

تدرون منهم؟؟

ذيب طويق وsamoda وابن ماضي
هالاعضاء على ان اكثر وقتهم نوم الا انهم يموتون عند شي اسمه منتدى سدير .

قاموا على ابو تغرة وقالوله :
الحين يوم انك طاير بهالباغة كل شوي رايح للحمام وراجع . تعال هنا وش فيها هالباغة؟؟ واخذوها منه.

لقوا فيها اقنعة كثيرة .
اللي شكلها مرعب واللي شكلها رومنسي واللي شكلها كوميدي واللي شكلها بريء <<<<هذي اشكال الاقنعة اللي يستخدمها ابو تغرة.

عرفنا عقب ماشفنا اللي في باغته انه يستخدم هالاقنعة عشان يوهمنا مرة انه حبيب ومرة انه كوميدي يعني نصصصصصصصصصااااااب

وسالفة مدحه لفلان وفلانه كان هدفه منها انه يشعلل بين الموجودين ويبيهم يتهاوشون

بس الحمد لله كانت عقولهم اكبر من تصرفات ابو تغرة.

قام تابط شرا ومسكه مع علباه وسحبه الين شاته في الشارع ويوم طاح في الارض بانت ملابسه الداخلية واثر كلها خرايط من القذارة والوساخة اللي مغطيها بثوبه الخارجي .

عاد اسمع صراخه وهو يقول . انتم ما تعطون الواحد حريته في الكلام . انتم ماتعرفون الديموقراطية انتم وانتم وماخلا شي الا وقاله عننا


((بالمناسبة والله لو سألته عن معنى ديموقراطية والله ماراح يعرفه . اعرفهم اهل النشقات ذولي ماغير يرددون كلام مايدرون وشو ولو تدرون عن مؤهلاتهم وشي؟؟ قلة حيا مع عدم احترام للنفس مع عدم احترام للاخرين مع هشاشة فكر وكيبورد بخمطعش ريال)))

ماعلينا

قلت لراعي الاوله . الله يالدنيا الله من كم واحد وواحد من الاعضاء راحوا بسبب ابو تغرة واشباهه

قال لي : اصلا الواحد اذا هو واثق من نفسه ماعليه لا من ابو تغرة ولا من غيره.

قلت له بس تراهم بشر واذا ما صمختوا ابو نشقة طراق من اول يوم والله ان تشوف سعابيله مربصتن اسياب المنتدى كله

قال اجل ظنك كذا؟؟

قلت ايه . الكتاب يبين من عنوانه . اول ما يخمنبق شوووووت على طول. اما انك تقعد تلاسن انت وياه قدام العالم فهي والله مشكلة.

ربى الجنان سمعتني وقالت . اي واللــــــــــــــــــــــــــــــــــــــــــــــ ـــــــــه ((قالتها وهي تتذكر ايام مضت ))

والله بيدري ليه قالت كذا يسألها بالرسايل الخاصة <<<تورطت ام عبدالله :D


ومادريت الا وسنمار يضرب بوري في الشارع يبي احد مننا يطلع

طلعت انا وقلت هلا والله

قال واحد شورما وواحد ببسي .

قلت وشو؟؟

قال اسف والله متعود اطلب عشاي وانا في السيارة ونسيت .

قلت له المهم وش تبي؟؟؟

قال ابي صيدلية وين اقرب صيدلية

نقف عند هذا الحد والبقية في الحلقة الاخيرة من هذا المسلسل J




عذرا للاطالة فموضوع ابو تغرة واشباهه يحتاج اكثر من ذلك ولكن هذه قدراتي واعتذر ان كنت مقصرا في ذلك

كما اعتذر او وجدتم اخطاء املائية وقد يكون لتسرعي في الكتابة سبب او لعدم تمكني من هذه المهارة

$$$$$$$$$$$$$$$$$$$$$$$$$

في الحلقة القادمة سنعرف ماذا يريد سنمار من الصيدلية

وسيتذكر ريال فسحة اسمه السابق (في المنتدى )حين تأتيه اصابة مباشرة في رأسه:D

ومفاجآت اخرى سترونها باذن الله


كونوا معنا ولا تغادروا هذه الصفحة <<<<<بيذبحني حالم ليل ويبي يقول خل العالم تسير علينا في منتدى الحاسب :D


@@@@@@@@@@@

ملاحظة ورجاء ارجو فك التثبيت لان لي رأي في ان تثبيت المواضيع الحيوية يضرها اكثر مما ينفعها . والامر عائد لمشرفي القسم :)

[ابو عبد العزيز]

انت تامر ياريال فسحه وانحن نجيك نطامر ولك مني جزيل الشكر والتقدير

[ريـال فسحة]

تسلم يالغالي

واكرر اعتذاري للجميع من عقب على هذا الموضوع واقول لهم .بخلي ردودي عليكم بعد انتهاء المسلسل

تحياتي للجميع وانتظروا قريبا الحلقة الاخيرة من هذا المسلسل

[الأصيل]

تشكر أخوي ريال فسحة على هالبداية القوية وابنصحك نصيحة >>>طالع حكيم هاليومين لو ما وقفت عن السب والتقطيع في المشرفي اظنهم بيقفلون جميع الأقسام ويبيتفرغون لك ويا ويلك وذيك الساعة ما فية يمة أرحميني:D :D وواصل الأبداع في منتدى الأمتاع>>طالع أديب هاليومين:D :D

[عاشقة سديـــر]

انتظر الحلقه الاخيره بفارغ الصبر ....

مع اني ما ودي القصه تخلص ....بس هذي حال الدنيا :(

ومشكور على الابداع ;)

[Sub_Zero]

ياهووووووه وش هالحركات

ريال الفسحه انت تسذا ( يد مسكره والاصبع الصغير مرفوع )

وقسم قصه خطيييييييره ورهييييييبه وابداع ماله حدود << لاطشتها، وتستاهل كل خير << مضيعه

المهم تحياتي لك ولو بحتسي في هالموضوع منيب مخلصه

وفي انتظار الحلقه الاخيره :) :D :) :D :cool:

[ريـال فسحة]

((( ابشركم هذي هي الحلقة الاخيرة وبتفتكون من مصالتي وبالمناسبة اكرر اعتذاري للاخوان اللي ردوا .ولا رديت عليهم لاني بسوي رد خاص بالاخوان اللي عقبوا على موضوعي وزادوه اشراقا ))



جرت العادة ان تكون الحلقة الاخيرة طويلة ...لذا لا اريد ان اشذ عن هذه العادة وتحملوا طول الحلقة هذي
:D

################################

ومادريت الا وسنمار يضرب بوري في الشارع يبي احد مننا يطلع

طلعت انا وقلت هلا والله

قال واحد شورما وواحد ببسي .

قلت وشو؟؟

قال اسف والله متعود اطلب عشاي وانا في السيارة ونسيت .

قلت له المهم وش تبي؟؟؟

قال ابي صيدلية وين اقرب صيدلية

#####################

((( هذا ماوقفنا عنده في الحلقة السابقة )))

قلت له الصيدلية قريبة امش قدام الين ينتهي الخط ويجيك حرف (t ) ثم لف يمين وطول الين يجيك حرف ( q )

من عنده لف يسار الين تلقاها على اليمين

قال لي شف انت و توصيفك اللي يوجع الراس تعال اركب معي عشان نروح سوا للصيدلية

قلت له بس انا عندي الان مقابلة ولازم اجتازها عشان يقبلوني في منتدى سدير

قال ياعم وسع صدرك الدعوى ما يبيلها مقابلة . انت شكلك (صحيح ) <<بتشديد الياء

ثم اردف قائلا : كل اللي يبيلك ايميل وتسجل وبس <<< (((ثم اردف قائلا ))) <<<<هالجملة عصرت كل مخي وطرشت كل اللي تعلمته الين طلعتها ..:)


قلت اجل توكلنا على الله

ركبت معه في سيارته البيجو وكان معلق على مراية السيارة ورقة مثلثة مرسوم عليها قارب لونه سماوي وتطلع من المثلث ريحة .قلت وش ذي قال مدري كل العالم تركبها في سياراتهم .

ثم قلت له وش انت كاتب على القزازة اللي ورى ؟؟

قال كتبت : جملتين حرصت ان الي يكتبها احسن خطاط.

((القلب يعشق كل جميل )) والجملة الثانية (( عين الحسود فيها عود )) وعلى الصدام اللي ورى كاتب (( انما سميتك سالم لتسلم ))

<<<بصراحة اول مرة اشوف احد مسمي سيارته باسم سالم .....لكن مادام انه سماها لسبب مقنع فأكيد هو ابخص

وفي نفسي قلت من زينك انت وهالقوطي اللي راكبه من يبي ينظلك

لا ومن زين الطبايع حاط صورة سميرة توفيق في الطبلون :D

المهم وصلنا للصيدلية.

وقبل ما ننزل قلت له وش تبي بالصيدلية

وبكل بساطة قال لي : مهوب شغلك

<<<<<طاح وجهي :o

المهم قعدت احتريه يطلع من الصيدلية لكنه ابطا .وكتمتني ريحة المثلث اللي هو معلقه

(((ولولا خوفي من الاطالة لقمت بتوصيف مدرعته (سالم ) توصيفا دقيقا )))

المهم

يوم ابطا قمت انا ونزلت ودخلت الصيدلية واثره يتهاوش مع راعي الصيدلية يقول ابي اكبر منها وراعي الصيدلية يقول هذي اكبر شي ..

وانا تدخلت وقلت وش اللي تبي منه ؟؟

رد علي راعي الصيدلية وقال ذبحنا هذا يبي قطرة عيون كبيرة وعطيته اكبر شي ولا اعجبته .

وشوي مادرينا الا ابو دجانة ومسافرجايين يبون قطرة عيون .:confused:

<<< وش جاهم على القطرات ؟؟:confused:

وعقبه على طول ابو عبد المحسن جاي هو وابو ريان بس ابو ريان كان يبي لزقة جروح

الغريب ان كلهم يبون قطرات عيون. <<<طبعا باستثناء ابو ريان

وجا ابو عمر وغريب الدار والراسي وابو بدران وابو دحيم وعاشقة سدير وناس كثيرين كلهم يبون قطرة عيون.


بصراحة انا خفت ان القطرات تخلص وشريت مثلهم مع اني ما احتاجها بس شفت العالم كلهم يتطاقون على القطرات . قلت اكيد ان هالقطرات فيها سر عجيب ويمكن عليها سحب سيارة ويمكن فيها رقم اللي يحصله تجيه ثروة . رحت واخذت عشر قطرت مثلهم .. وش زودهم عني

وكنت ناوي اعطي امي وحدة منهن وابيع الباقي في السوق السودا في حال صار عندنا ازمة قطرات .

طلعنا انا وسنمار وركبنا السيارة

قلت له وش سالفة هالقطرات ووراكم تتناهبونها من الصيدلية ؟؟؟

قال بكل برود : مهوب شغلك

قلت تعال هنا وش سالفتك كل شوي تفشلني؟؟؟ :mad: شف ترا والله ما انزل الين اعرف وش سالفة القطرة هذي؟

يوم شافني صادق في تهديدي قال لي :

شف هالعلبة اللي معي افتحها.

فتحتها لقيت فيها قارورة مليانة طيب وريحته زينة.
قلت له وش دخل هذي في القطرة؟؟؟؟؟

قال لاني استخدم القطرة هذي واخذ من القارورة نقطة من الطيب واحطها في المنتدى يعني ما احط في المنتدى الا بالقطارة . وكل الناس اللي شفتهم في الصيدلية مثلي.فهمتا؟؟؟


بصراحة مافهمت وان كان احد منكم فهم يفهمني :confused:


وطبعا حنا في طريقنا للعودة للصالة لقيت كل اللي شفتهم في الصيدلية وكل واحد منهم معه قارورته وتشم من كل قارورة عطر يختلف عن الثاني وماغير يدخلون القطارة في قواريرهم ويحطون (نقيـــــــــــطة طيب ) ثم يمشون .
وحسب مصادرنا انهم يبطون مايجون ... يقعدون ايام واحيانا اسابيع وهم ماجوا

نزلت من سيارة سنمار وقلت ياحسافة فلوسي الي حطيتها في هالقطرات لو اني داري انكم شارينها للغرض هذا كان ماشريت .

ورجعت وركبت الهوندا حقتي <<<<ماوده يقول الونيت

وقلت في نفسي : ارجع للصيدلية ارجع هالقطرات ورجعت فعلا وقلت لراعي الصيدلية يسلم عليك كل اللي يحبون منتدى سدير ويقولون لك لا عمرك تبيع قطرات للاعضاء .وان كنت ناوي تبيعهم شي بع عليهم مساحي والا دركترات والا قلابيات (((بغيت اقول : دنبر بس ماظنتي احد يعرفه )))

ويوم بغيت اطلع زلقت بقشرة موز حطها ابو تغرة في طريقي عشان ازلق واطيح وفعلا زلقت وطحت وجا راسي على طرف الدرجة حقت الصيدلية .

((طبعا ابو تغرة داري ان كل زباين هالصيدلية من منتدى سدير وهو جاي ينتقم من الشوته اللي جته من تعرفط شرا .اقصد تأبط شرا ))


نرجع لطيحتي وسالفتها :

تجمعوا العالم

وتجمهروا حولي .وكل واحد منهم قام يحلل سبب طيحتي .

اللي يقول اني طايح من سطح العمارة ..ويحلف انه شايفني اطيح منها ..واللي يقول ان سيارة اسمها سالم صدمتني وطحت عند باب الصيدلية …واللي يقول انا شايفه مقربع له قارورة خرش قبل ما يجي ثم داخ وطاح ..وكل واحد يطلع سالفة على كيفه ..

مافكني من تجمهرهم الا ابو ريان يوم جاب لزقات الجروح اللي كان شاريها لنفسه بس شافني طايح عطاني اياها . وجنبه واحد مفهي (بس خفيف دم ) ضيق صدري مررررررة . يشوفني طايح والدم يخرخر وهو قاعد يغني . واذكر من اغنيته كلام فيما معناه :

هي خاربة خاربة ……خلينا نعميها


ايه صح اسمه معميها
.ودكم تسمعون اي شي منه الا ضحكته اللي تحوم الكبد يضحك كذا (( قهقهقهقهقهقه))

ابو ريان بلش بالجرح وانا قمت اسلي نفسي وقعدت اعد الموجودين حولي من الملاقيف اللي اهم شي عندهم في الحياة انهم يتجمهرون عند اي واحد طايح او اي حادث ويقعدون يحللون اسباب وكيفية ومتى ومن سبب الحادث ولماذا واين وكيف ولعل ومتى واخوات كان واخوات صار واخوات ان وادوات الجزم وحروف العلة (((جعلهم العلة ))

قعدت اعد : 1……2……3…………………………45…………….69….70

يؤ يؤ يؤ ......سبعين واحد متجمعين حولي ؟؟؟؟؟


فجأة حسيت ان مخي تحرك يوم نطقت كلمة سبعين وبديت احس ان الذاكرة بدت ترجع

وقعدت اقكرر بشويش كلمة :سبعين . سبعين . سبعين (((ثم بدا الصوت يرتفع وانا اكرر ))

الين ولعت فوق رسي لمبة صفرا :eek:

ايـــه صح انا السبعين

انا السبعين انا اللي كنت اكتب في المنتدى . ورقمي السري 70707070

واطمر من مكاني واصرخ ذيك الصرخة انـــاااا الـــــسبعيـــن<<<< لاين كنق على غفلة:D

واقوم اركب الموتر وابو ريان يقول اصبر ماخلصت من جرحك

قلت بعدين بروح انا مستعجل فيه ناااس واجد مشتاااااااق لشوفتهم

وادخل الصالة والقاهم كلهم واسلم عليهم كلهم وقلت وين الغلا؟ وين اتيكا وين مفتون صيد ؟؟مالقيتهم؟؟ وينهم والله مشتااااااق لهم؟

ردوا الموجودين وقالوا كلهم بخير وهم معنا لكن ظروفهم الايام هذي ما تسمح


ثم التفت يمين يسار وارقى فوق الدور الثاني في الصالة وانزل واطلع وادخل ..وانا اقول وينه تكفون وينه؟؟


قالوا من تدور ؟؟؟


قلت الزلمة... ..... الزلمة ولك ((شو هاظ))؟؟ ما بيصير نسيتوه


قالوا أي زلمه وش تخربط انت؟؟ وراك تتكلم مثل الاشوام؟؟؟؟

قلت وين خالي ؟؟؟

قالوا وش خالك؟؟

قلت السلمان (((كنت دايم اسميه خالي ومع اني ماقد شفته بحياتي الا اني والله احبه))

وقعدت ضايق صدري:(

على كثر فرحتي برجوع الذاكرة الا اني حزنت لاني ماشفت مراسلنا في الاردن

. وقعدت اتذكر ايام تزاملنا هنا في المنتدى .انا وياه وناس كثيرين امثال المقلع معن والعصبي ملاعب الاسنة ومحمد العوهلي والجريوي وشيخ شمر ومحمد الاخوان وناس واااااجد لو عندي وقت ذكرتهم كلهم.

ثم رحت اتمشى في اسياب المنتدى لقيت شوق القلوب ماشاء الله عليها مشعللة المنتدى نشاط وفي كل قسم تلقى لها بصمة. وتذكرت ذيك الايام

وشفت ابو بدران والمتوكل على الله والراااااسي وعشيراوي والعندليب الابيض وغيرهم . يستغلون اقلامهم المبدعة في كتابة كل ماهو مفيد لنا (((وبصراحة استصغر نفسي والله اذا شفت كتاباتهم ..هم المبدعين ..هم اللي اذا بغى الواحد يستفيد يدخل أي موضوع لهم ...هم اللي اذا شفت تعليقاتهم على المواضيع تدري ان ان سدير لا يمكن ان تجف منابع ابداعات ابنائها ))

واليوم اشوف الوحش بكل شجاعة يتحمل مسئولية النهوض مع حالم ليل بقسم الحاسب . واشوف س ق م هنادي ما يكتب شي الا وهو عارف وش يبي يقول وصراحته وتشجيعه للاعضاء..



وتذكرت ذيب طويق . اللي بجد استمتع بكتاباته .ايام كان وزير خارجية المنتدى :)

وايام ابن ماضي اللي تحمل ضغوط كثيرة في بدايات المنتدى وقدر يواجهها الين صار المنتدى له مكانة بين المنتديات المعروفة

وكان معه تعرفط شرا يسانده في كل خطوة ولكن ظروف ابن ماضي خلته يستقيل ويسلم الراية لمن يستحقها بجدارة واكمل المسيرة على خير ما يرام ولاحظنا تطور كبير في المنتدى في وقته

((وهنا لابد من قول كلمة حق : طموح هذا الرجل كبيرة وينتظر من الجميع المساندة ولا اظنهم سيبخلون ))



طلعت من الصالة

ركبت السيارة

وصلت البيت

نمت

وفجأة ((((طرااااخ ))) <<<<< صوت طيحة السبعين من فوق السرير على راسه


‌‌‌‌‌‌‌#############

انتهت الحلقة الاخيرة

اعترف ان بها الكثير من القصور من الناحية الاملائية والتسلسل الدرامي وبها تجاوزات كثيرة

ولكن اعتمد على سعة صدوركم في تجاوز هذه العلل .


كما اعتمدت على ذكائكم وفطنتكم عند اختياري لبعض التشبيهات والقصد منها


كما اعلم انكم تستحقون افضل مما كتبت انا

لكن هذه قدراتي المحدودة واعتذر لكم ان كانت اقل مما تطمحون اليه


اخوكم ريال فسحة ((السبعين سابقا ))

ولي عودة للتعقيب على تعليقاتكم

[ريـال فسحة]

0

[تأبط شرًا]

!!
http://www.asmilies.com/smiliespic/psmilie/008.gif
والله حرام عليك يالسبعين .. وين كل هالغيبه عن اللي يحبونك ..؟؟
لكن أهنيك على الأسلوب الرائع في العوده وفي التعريف بإسمك السابق بطريقة فريده وأسلوب متميز كتميز السبعين الذي عهدناه ..

http://www.asmilies.com/smiliespic/psmilie/012.gif

[بن جعيثن]

فجأة حسيت ان مخي تحرك يوم نطقت كلمة سبعين وبديت احس ان الذاكرة بدت ترجع

وقعدت اقكرر بشويش كلمة :سبعين . سبعين . سبعين (((ثم بدا الصوت يرتفع وانا اكرر ))

الين ولعت فوق رسي لمبة صفرا

ايـــه صح انا السبعين

انا السبعين انا اللي كنت اكتب في المنتدى . ورقمي السري 70707070

واطمر من مكاني واصرخ ذيك الصرخة انـــاااا الـــــسبعيـــن<<<< لاين كنق على غفلة


ياهلا والله وغلا ياهـــــــــــــــــــــــــــــــــــــــــــــــ ــــــــــلا اسفرت وانورت


ياهلا ياهلا

لو اكتب من اليوم ياهلا إن كان ماكفت للتحية لشخص عظيم مثلك............

[غريب الدار]

الله الله يالسبعين...أثرك يالخبيّث تقص علينا كل هالأيام على انك واحد عليمي ما يعرف.. وحنا ياغافلين لك الله ندربي روسنا وراك وحنا ماندري...

لكن هاذي بحق ( نبي تيس ) ونكشت به في ترابيع الشوكي بعد...

اي والله.. لكن شف هذا علماً ياصلك ويتعداك...ان طولت الغيبه مرتاً ثانيه ياويلك :mad: :mad: ...

بس تبي الصتس يازينها من رجعه..ويازينها من مفاجئه....يا ريال مدريد (فسحه)..

:D :D :D



ودمتم سالمين...

[ربى الجنان]

:mad: :mad:

معقوله هذا أنت ؟؟

لحظه شوووووووووووووي


=======>راحت تدخل لمنتدى باسمك السبعين ماحد قل لك تحط الرقم السري

:cool: :cool:

أسلوب رهيب ...

[سنمار]

ركبت معه في سيارته البيجو وكان معلق على مراية السيارة ورقة مثلثة مرسوم عليها قارب لونه سماوي وتطلع من المثلث ريحة .قلت وش ذي قال مدري كل العالم تركبها في سياراتهم .

ثم قلت له وش انت كاتب على القزازة اللي ورى ؟؟

قال كتبت : جملتين حرصت ان الي يكتبها احسن خطاط.

((القلب يعشق كل جميل )) والجملة الثانية (( عين الحسود فيها عود )) وعلى الصدام اللي ورى كاتب (( انما سميتك سالم لتسلم ))

هذي اخرتها يا ابوريال مشقوقhttp://air4x4.jeeran.com/grumpy.jpg
خليتني مصري معي سيارة بيجو ومرة زيدي معلق صور فيروز وسميرة توفيق لا وكاتب ( القلب يعشق كل جميل )
خبرك عتيق يالشايب يالسبعين انا الحين صرت الحين اعلق صور شاكيرا و برتني سبيرزhttp://air4x4.jeeran.com/ابتسامة.gif


ما اقول الا ياهلابك والله عدد ما زقزقت العصافير:rolleyes:
تسلم ايديك على هالموضوع اللي ( انعشتااااا ) فيه المتدى

[ابو عبد العزيز]

والله منتب هين ياريال فسحه قصدي السبعين على ذالاسلوب القصصي الرائع واحب ان ازيدك من الشعر بيت ان غويمض قد كشف لي شخصيتك قبل ما تكشفا ب 24 ساعه وقال لي بالحرف الواحد ان هذه الشخصيه 90% شخصية السبعين و 10% شخصية الملتمس .
اخي السبعين ارجو ان لا تحرمنا من مشاركاتك الحلوه فالمنتدا بامس الحاجه لجميع اعضائه فلقد فقدنا الكثيرين منكم وارجو ان يعودون لمنتداهم من جديد ( المقلع, معن, ملاعب الاسنة ,ومحمدالعوهلي ,والجريوي, وشيخ شمر, ومحمد الاخوان,اتيكا,ابن ماضي,السلمان,ذيب طويق,) وارجو المعذره من البقيه اللذين لم تسعفني الذاكره لذكر اسمائهم والف الف شكر للسبعين اللذي رجع لنا مرة ثانيه وباسلوب رائع ودمتم سالمين وغانمين

[ريـال فسحة]

قالت ربى الجنان في اول رد:


الله يرجك يريال فسحه

كمل كمل...............



وقلت انا : تسلمين على التشجيع :)

###################

وقالت الحلوة :مووضووع خياااااااالي مره مره يا ريال فسحه يعطيك العافيه
بسرعه تكفئ كمل ترانا علئ احر من الجمر

وقلت انا : فعلا خيالي ولكنه قريب للواقع ولولا الله ثم تشجيعك ما تجرأت اكمل هالسالفة وماقصرتي :)

##################

وقال سنمار في رده الاول :
حلللللللوه منك ياريال فسحه هالسوالف السنعه
وانا بهالمناسبة قررت اني ازيدك اربعة ريالات زود على ريالك
عشان تصير خمسة وتستسغني عن التغذية الله يذكرها بالخير.

على طاري التغذية اتحدى غويمض يقول انها زد نزلت .

واقول انا بعد اتحداه ياسنمار (((شكلنا بنسوي عصابة ضد غويمض خخخخخخخخ))

ومشكور على تشجيعك

#################

وقال تأبط شرا :
ريال فسحه ..
هذا الموضوع من المفترض أن لايطرح في شباب سدير ..





ولكن ..








يكون في..









قسم خاص بالمواضيع المميزه ..



والله يعطيك العافيه ..
وننتظر البقيه .. لاتتأخر علينا ... <<<< يلمح عشان تخف عليه شوي :)

..........

واقول انا :

والله اول ماقريت اول سطر من ردك قلت بس شكل موضوعي تقفل

ويوم كملت اتضح لي انك راعي تسحيبات <<ياقدمك من زمااااان وهو راعي تسحيبات

<<<يعني قام المشرف وهو المشرف يسحب فينا اجل ماعلينا شرهه اذا سوينا سواته خخخخخخخخخخخخخخخخخخخخخخخخخخخ

تسلم اخوي على مجاملتك

########################

وقال : ابو فارس hotmail :
يأخ ريال فسحة....
موضوعك هاذا كنه وجهك





















الزين طبعا!!!!!!!



خخخخخخخخخخخخخخخخخخخخخخ والله تسحيبتين في الراس توجع .ومشكور ابو فارس على تشجيعك ومهوب مشكور على تسحيبتك خخخخخخخخخ ((بجد انسحبت على وجهي ))

####################

وقال راعي الاولة :
واصل يا ريال فسحه وانا متابع معك ،،،،

تحياتي لك ولتميزك بهذا الإسلوب السديراوي الرهيب

واقول انا : تسلم يالغالي راعي الاولة . وهذا انت من عرفتك ماغير تشجيع لكل الاعضاء .
اكرر شكري لك

###################


ووراء الكواليس اقول له :

مانيب شارب قهوتك الا اذا وافقت على طلبي ((بعد اذن المراقب والمشرف )) ابيك تقبل ترشيحنا لك بالاشراف في احد الاقسام وافضل انا قسم الحاسب تشرف انت عليه

غير الكلام هذا ماعندي <<<<<صاير السبعين ينافخ :D

القف مني احلى تحية :)


###############

وادي ابا المياه :
تسلم ياخوي على تشجيعك وبالمناسبة ترى اسلوبك مو غريب علي .

ستبدي لك الايام ماكنت جاهلا يالسبعين :)

تحياتي لك

##############

الملتمس :

تصدق عاد اني قريت ردك يجي عشرين مرة وكل مرة اقراه افطس من الضحك

والله اني اتوقع ان موضوعي كلة مايجي شي عند ردك خخخخخخخخخخ

((((# (وسمعت صرخة الملتمس اوجعته سنونه لان البقل اللي كله صار يابس00) اصلن انا مالي ضروس 00 واذا بغيت آكل بقل لازم اربصه في الشاهي الين يلين بعدين آكله والقهر انهم كلو الحب وانا ما اقدر اقشمه 0 بس بصراحة الله يخليلي تأبط شراً صار يقشم لي ويعطيني قروص وانا ما غير اجرعهن 00 والصرخة اللي تقول عنها هي صادره من غويمض 00 لأني وطيت رجله بالعصا وانا ما ادري 00)) <<<لو ما جا من ردك الا ذي

ههههههههههههههههههههههههههههههههههههههههههههههههه

والعين ماتعلى على الحاجب


<<<<ماتلاحظ صاير ذرب في ردودي :)

تسلم جدي على اضافتك الرهيييييبة

###################

ابو فارس يقول :

ياويلك ياريال فسحه.
الظاهر موضوعك بصير له أحد امرين:


1/ يحذف وهذا الظاهر اللي يمكن يصير..
لتعديك على المشرفين وكب عفشهم.


2/ يثبت . وهذا اللى أيده انا
.................

هلا والله ابو فارس هوت ميل

بالنسبة للنقطة الاولى اللي ذكرتها وهي الحذف فهذا لا يمكن يصدر من مشرفي منتدى سدير .

لكن عقب ماقريت ردك رحت على طول اقرا الموضوع ادور شي فيه تعدي على المشرفين ومالقيت والحمد لله

اما عن كبة العفش يمكن (تدودل )بعض العفش بس ما انكب

وبالنسبة للنقطة الثانية فأنا والله اشكرك على موقفك من موضوعي ومطالبتك بالتثبيت

القف مني احلى تحية


...............

تعقيب على باقي الردود في الحلقة القادمة

<<<<<< :confused: انت ووجهك يالسبعين تراها خلصت المسلسلة . وش حلقته اللي تقول؟

قال السبعين اقصد في رد ثاني لاني مضطر اطلع الان


تحياتي للجميع

[عاشقة سديـــر]

رووووووووووووعه الحلقه الاخيره ...

خصوصا المقطع اللي عرّفت فيه عن نفسك ...

اسلوبك في صياغته رهيب (ما شاء الله عليك )...

صراااحه انا ما أقدر اقول اهلا بك بيننا يأخ السبعين (ريال فسحه ) (لان المنتدى منتداك قبل لا اكون انا عضوه فيه ..;) ) لكن اقووول اهلا بعودتك لمنتداك ..;)

ومشكوووور على القصه (النقديه ) الرائعه جداااا

سلام:D

[وراءالكواليس]

ثلاث مرات كل ما جيت اكتب رد يروح ويمسح....

وقلت خيره....


مانيب كاتب الين يخلص هالعشرين قرش حق الفسحه....


والله انا فرحنا بعودتك ...ورجوعك يا السبعين... او يا ريال فسحه


وتصدق عاد لك وحشه...

والبركه في .....تخربط شرا...او وشسمه... تعرفط شرا....الي هو


دايم يدعوا وينادي... ويصرخ ويزاعق....عودوا



وفيه بعد العضو الرائع رحال الي اختفى ...كان ينادي... ورجع واختفى مره ثانيه..


الله يعقلهم ويرجعون مثل اول...


واحسنت صنعا يا اخ العرب ايها السبعين...

[Sub_Zero]

:eek: :confused: :eek: :confused:

مش معئوووووووووووووووول


السبعين هنيا :D :D

مرحباااااااااا الف

ياخي ليه تترك المنتدى وتخلي ابو تغره ياخذ راحته

تحيااااااااتي لك ياريال الفسحه مدري السبعين اختار الاجابه الصحيحه

على العموم قصه رووووووووووعه

[سعود الخليل]

حياك الله أخوي السبعين وعوداً حميداً وسجل إعجابي بإسلوبك الرائع في تصوير أوضاع المنتدى ،،،،

تقبل تحياتي يا بعدي ..

[وراءالكواليس]

في ابداع اخوي الغالي ريال فسحه قصدي في حلم الاخ السبعين...


تذكرت هذه الكلمات...



رح شف اي موضوع وناظر عدد الردود اللي فيه قسم بالله شي يخلي الواحد يتحطم

يخوي معظم الاعضاء الله يهديهم يقرون موضوع ويمكن يستفيدون منه في قسم الحاسب ومع ذلك يبخلون بكلمة مشكور

<<<< بالنسبة لي انا خنقتني العبرة وخفت ان سالفة المقابلة تفركش







وقلت في نفسي وين وراء الكوابيس عفوا...J الكواليس وينه عن سالفة حالم ليل .ووراه معيي لا يصير مشرف معه في نفس القسم؟؟


انشاء الله اني ما راح اقصر بشيء يخدم المنتدى...


فاذا المنتدى محتاج وراء الكواليس مشرف لمنتدى الحاسب ...اكثر منه عضو ...

ما راح ارفض....او احرم الاعضاء واحرم اخواني من شيء فيه فايده
او يكونون بحاجه لي... في المنتدى..لمساعدتهم..

فاي واحد منا يفرح ...ويتمنى انه يساعد ويقدم اي خدمه يقدر عليها....

وخاصة لمنتدى مثل منتدانا...

هذا ما حبيت اضيفه..

مع اني اشوف انهم فيهم خير وبركه....والوحش مشاء الله عليه ماقصر يركض ليل ونهار يلبي الطلبات ويتحفنا دايم بالجديد...

واخوي حالم ليل الله يعينه....يبذل مجهود رائع..

وبصراحه انا ما احس انهم محتاجين مشرف كثر ما هم محتاجين تفاعل ....وزياره وتنشيط لمنتدى الحاسب...

والمطلوب اشياء بسيطه...

تجربة برامج....وابداء الراي حولها...

والاستفسار والسؤال عن اي شي تحتاجونه..

والمرور على المشاركات والتعقيب عليها ....بس بكلمة شكرا


تحياتي

[الملتمس]

اخوي السبعين سابقاً 000 ريال فسحة حالياً 00 السبعين لاحقاً 000 مسيك بالخير 00

قبل البداية احب ان اسجل كلمة اعجاب باسلوبك الرائع 00 وان ندمت على شيء فهو انني لم اكن متواجداً في المنتدى في الوقت الذي كنت فيه 00 قبل فقدان الذاكره 00 والتي اتمنى الا تفقدها مرة اخرى 00

انا لم يحصل لي الشرف في الترحيب بك سابقاُ والآن يطيب لي ان اقول لك حياك الله في بيتك وبين اهلك واخوانك 00 واتمنى ان لا نفقدك 00 وسوف نسامحك على غيبتك الآولـى لآن المثل يقول ( من رد ما كنه شرد ) 00

عزيزي 000 اذا كان هناك مرض او اصابه 00 ولم يكن هناك علاج او مكافحة فان هذا المرض سوف يتفاقم 00 والاصابة سوف تزداد 00 اذا لابد من وجود المضادات الحيوية التي تقضي بإذن الله على المرض ومسبباته 00 واقصد هنا 00 ان صاحبك ( ابو تغره ومن على شاكلته من اصحاب الأقنعة المختلفة والمتخلفة) هم الداء والمرض 00 وانت وبقية الأعضاء الكرام انتم العلاج والمضادات الحيوية للقضاء على اي مرض 00

اهنئ نفسي اولاً والمنتدى ثانياً برجوعك 00 واكرر النداء والدعاء لعودة بقية الشرفاء 000

تحياتي لك وللجميع 00

[فهد المنيع]

يالله يالسبعين ضربتني في المقتل وقعدت خمس دقايق مدري وش اقول !!!


الموضوع ما دريت عنه الا تو وقريته كله وانجنيت من الاسلوب والتصوير الفني !!


ياااااااااااااخي وراااااك كذااااااااااا !!

وراك تركت المنتدى كل هالمده ؟؟؟؟؟؟

وصراحه اشكرك من كل قلبي يوم دخلت منتدى الحاسب في روايتك ----> تاجر البندقيه خخخخ

شف ياخوي يالسبعين انا بعد هالمده الطويله اكتشفت شي لابد منا كلنا نتحلى به وهو الصبر ..

صدقني اني اول كرهت المنتدى من قلة الردود في منتدى الحاسب وما كان فيه اي تفاعل وكنت متحطم نفسيا وبغيت اسوي مثل المشرفين السابقين لمنتدى الحاسب وهو الاعتذار بسبب عدم وجود التفاعل لكن صبرت والحمد لله الحين عوضنا الله خير باعضاء قمه في التفاعل والاخلاق والعلم والاخوه ورقنا الله في مشرف رائع اسمه الوحش وفي عضو اعتبره اعلى من مرتبه الاشراف وهو الاخ المبدع وراء الكواليس ولا انسى تفاعل باقي الاعضاء مسافر ووادي ابا المياه واعضاء كثيرين متفاعلين ..

وفي النهايه اقولك ارجع يالسبعين وبتشوف منتديات سدير في القمه باذن الله لان التغييرات الجديده كلها مدروسه بعنايه والمعنويات مرتفعه والكل قلبه على المنتدى وايام المشاكل راحت والحمد لله ما ناقصنا الا الاعضاء القداماء يرجعون ..

وتحياتي لك واسف على التأخير في الرد ..

وتقبل مني ارق واعذب تحيه ..

حالم ليل ..

[ريـال فسحة]

اكمل باقي الردود على الاخوان

اخوي الوحش مشكور على تشجيعك

ووالله انك صادز الطفرة شينة خخخخخخخخخخخخخخخخخ

تسلم يالغالي


#############

عاشقة سدير
*ملاحظه ..
(وجنبها وحدة تقول لها قشمي يالزيرووة قشمي ترا ( الرجاجيل التماسيح ) ماراح يخلون لك شي <<<<طبعا عرفتوها )

اكيد عرفناها بس تراها عقلت ...وماعد تقول لكم تماسيح

خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخخخخخخخخخخخخخخخخخخخخخ

الله يرج شيطانك ..
اجل عرف اسز يخليك تتوبين وما تسمينهم تماسيح خخخخخخخخخخخخخ

بس والله موضوع الرجاجيل التماسيح رهييييييب وتشكرين عليه

وعلى طاري الشكر .اقول مشكور مرتن لوخ على تشجيعك


################

الاخ من يفهمني :

تنظلني على ريال يابو نصف ؟؟؟خخخخخخخخخخخخخخخخ

مشكور لردك وتشجيعك
وبالمناسبة جهودك في منتدى الاسرة يعجبني

وتسلم يالغالي

###################3

غويمض المشرف المحبوب من الجميع

هلا والله وغلا وتشكرات كثيرات من عندنا ندربيها لعندكم .

حاول تمعط تحياتي المكررة خخخخخخخخخخخخخخ


###############

الاخت الحلوة
اشكرك مرتن لوخ على تشجيعك

بس الفواصل الاعلانية هي اللي مخليتن الموضوع مقبول عشان كذا كثرنا منها خخخخخخخخخخخخخخخخخخخخخخخخخ

حلوة ذي فواصل اعلانية خخخخخخخخخخخ الله يرج مندوب سعادتكم

################

وادي ابا المياة يقول :

<<== ريـال فسحة <<== اسلوبك يذكرني بسلوب واحد يكتب الى الحين في المنتدى مايهم

واقول انا :

((( ودي احط الوجه اللي يجي في المسنجر اللي دالع لسانه بس ما اعرف )))


لا وتبي تشوف الحلقات بين عشاوين؟؟؟ خخخخخخخخخخخخخخخخخخخ

الله يرج شيطانك


تسلم يالغالي على تشجيعك

###############

اسز :

تدري اني متمدن ولا اعرف وش معنى جغوة ..كانها مثل سالفة جعبتك اللي قالها سدير في القصة عز الله توهقنا

خخخخخخخخخخخخخخخخخ

تسلم والله على (الدحجة ) اللي دفعتني للامام


#############
الوافي :

مشكور على مرورك وتشريفك للموضوع

تقبل تحياتي


##############
الاصيل :
حياك الله اخوي .

أي سب واي تقطيع ؟؟؟؟؟

خليتني ارجع اقرا الموضوع مرة ثانية . وقعدت ادور على اللي تقول عليه ومالقيت !!

عموما مشكور على تشريفك وتعقيبك .

القف تحياتي J

#############
صب زيرو ((الزيروة ))
تقول :
ريال الفسحه انت تسذا ( يد مسكره والاصبع الصغير مرفوع )

رحت على طول سكرت يدي ورفعت الاصبع الصغير (العصقول ) ومافهمت وش تقصدين

قلت يمكن تقصد حركةابو عنتر اللي يجي مع غوار . اذا صك يده ورفع اصبعه الصغير قبل ما يصفق ياسين

<<<استيعاب السبعين بطيء خخخخخخخخ

وبعد دوخة يومين اتضح لي انك تقصدين يد مسكرة والاصبع الدبي مرفوع خخخخخخخخخخخخخخخخخخخخخخخخخخخخخخخخخخخخخخخخخخ

الله يرجك زيروة اجل تقولين تستاهل كل خير خخخخخخخخخخ ((اثر فيه غيري مضيعين ومهوب انا لحالي ))

تحياتي لك


############

تأبط شرا :
مشكور على اهتمامك
وسالفة الابتعاد المؤقت اللي حصل بتعرفها في احد الردود القادمة

تسلم على تشجيعك

##############

هوت ميل ابو فارس

هلا والله وغلا

تسلم حبيبي على ترحيبك وماقصرت ومن جد والله افرحني ردك

###############


غريب الدار :

طبعا الاعضاء القديمين كلهم يعرفون منهو غريب الدار وكيف كانت مشاركاته وكيف سوى فراغ بانقطاعه عن المنتدى

رجعتك اكيد غريب الدار بتنعش المنتدى وبتخليه افضل .

اما سالفة التيس والحق . اقول لك فيها ( تعرف تقول ما اطولك ياليل خخخخخخخخخ )

يعني مافي امل خخخخخخخخخخخخخخخ

بعدين تعال هنا .
انت اللي مطلوب حق و تيس وين غيباتك ؟؟؟؟؟

<<<توهق غريب الدار خخخخخخخخخخخخ


تسلم يالغالي على ترحيبك ونبي نشوف غريب الدار مثل اول . اوكي؟؟

القف تحياتي


#############

ربى الجنان :

تقول : لحظه شوووووووووووووي


=======>راحت تدخل لمنتدى باسمك السبعين ماحد قل لك تحط الرقم السري


<<<

مهبول انا احط رقمي السري اللي هو 12121212

((( تلقونها الحين رايحة تجرب الرقم خخخخخخخخخخخخخخخخخخ))


##############

سنمار يقول :
ما اقول الا ياهلابك والله عدد ما زقزقت العصافير

واقول انا :

الحين يالهيس (( ترى انا امون عليه عشان كذا عادي اقول له يالهيس ))

اعيد كلامي واقول :

الحين يالهيس مالقيتا تعبير ازين من قولة (( زقزقة العصافير ))

خخخخخخخخخخخخخخخخخخخخخخخخخخخخ

قل تغريد العصافير قل مواء العصافير بس فكنا من تعبيرك ذا

تشاو J

##############

اسز

تسلم حبيبي على ترحيبك وعساي اكون عند حسن ظنك بي

((( ضيعت كل كلامي اللي كنت بقوله لك )))
بس انت تدري مكانتكم عندي

تحياتي لك

###########3

عاشقة سدير :

مشكور لترحيبك الاخير وبجد وجودك وطرحك للمواضيع الجادة والمشوقة .اثرت كثيرا منتدى سدير

وبصراحة انا متابع لمواضيعك كلها اللي اهنيك عليها

واعتذر اني ماقدرت اساهم في مواضيعك لظروف راح اقولها في احد الردود

تشكرات كثيران من لدن ريالات فسحات متجهة نحو اخوات اسمهم عاشقات سديرات J


###########

وراء الكواليس

والله يفرحني أي رد يصدر منك

<<< ياجماعة هالانسان خاش مزاجي

مايوحشكش غالي

(((والله وانا اكتب هالرد تبخرت كل الكلمات اللي مفروض اكتبها لك )))

لكن الله يعلم مكانتك عندي

وتسلم على تقبلك لطلبي

##############

صب زيرو هلا والله مرتن لوخ

تقول الزيروة : تحيااااااااتي لك ياريال الفسحه مدري السبعين اختار الاجابه الصحيحه

واقول انا : والله ماقدرت اختار لكن اعتمد على مساعدة الجمهور خخخخخخخخخخخخخخخخخ

اما سالفة الابتعاد بقولها في اخر الرد هذا

تسلمين والله على ترحيبك
###########

راعي الاولة :
تسلم والله ياغالي
وعساي قدرت اقدم شي تستاهله انت والاخوان

تحياتي لك
###########

اخوي الملتمس :

الشرف والله لي اني تعرفت عليك وعلى الاخوان

وكلامك في الرد الاخير لا غبار عليه لكن سبب ابتعادي ماله دخل في ابو تغرة ولا غيره بتشوفه في اخر الرد

تحيتي واعجابي لشخصك الكريم

#############


حالم ليل

تصدق عاد وانا اخوك .
اني كل يوم ادخل فيه للمنتدى اقول يارب القى تعقيب لحالم ليل

واعترف لك اني اول المقصرين من الاعضاء في قسم الحاسب .وفي بعض الاقسام الثانية.

لكن حبيت اعتذر بطريقة يكون فيها دعم لهذا القسم من ناحية وضع الاصبع على الجرح من خلال حلقة كاملة تتعلق بهذا القسم وارجو ان اعتذاري يكون مقبول منك ومن الوحش وان شاء الله من افضل الى افضل



#############

لبقية الاخوان اللي سألوا عن غيابي الفترة الاخيرة اقول لهم :

كانت ظروف ابتعادي لعدم تمكني من الدخول للنت لعدم وجود خط اتصال في بيتنا الجديد

<<<<<<احلىىىى سكنوا بيت جديد خخخخخخخخخخخخ

وبصراحة انا ما اواطن اروح لمقاهي النت . من جد ما اتحمل اقعد فيها ولا دقيقة وانقطعت عن المنتدى للسبب هذا بس

لكن اخبار المنتدى تجيني من احد الاخوان

اما ابو تغرة واشباهه والله ماقاموا عندي ولا قعدوا .

الان الحمد لله عندنا خط اتصال ((تلفون اسقاط بس ما يخالف و في انتظار الدي اس ال <<<<صفقنيJ ))


##########

في الرد القادم: السبعين يقوم بنقد موضوعه واختصارما اراد قوله
فكونوا معنا

[السلمان]

لعاد بالله هاااااااااااااااااااااااااااااااااااااظ حتشي يازلمة
شو بتقوووووول .... انحرق المحصووووووووووووول
منو هااااااظظظ اللي يدور علينا ماودنا نفشله
صعب ان احد يوصل لمستواك و يصير مثلك يا الــ70 .
والحمد لله على سلامتك ورجعتك للمنتدى بعد طول غيبة وبموضوع رائع وقوي كما عهدنا مواضيعك تجمع الطرفة والفائدة ماشاء الله عليك.

ياشيخ روووووح والله انك تحمس الواحد يكتب في منتدى انت فيه فلا تقاطعنا ثانية
وتقبل تحياتي ,,,

[المحبوبة]

منوّر المنتــــدى برجعك يـا عشرين قرش...


ومــوضوعك


ولا أحلــــى منه علــى إنه طويل...

[ريـال فسحة]

هلالالالالالالالالالالالالالالا والله وغلالالالالالالالالالا

هلا بالسلمان

لالالا ما انحرق المحصول خخخخخخخخخخخخخخخخ:D

الحمد لله على السلامة

المهم شد حيلك وخلص دراسة وتعال ترانا في انتظارك

القف مني احلى تحية

@@@@@@@@@@@@@@

هلا والله اختي المحبوبة حياتس الله

ومشكور والله على ترحيبك

تحياتي لك :)

[ريـال فسحة]

في الحلقة الاولى :

بغيت ابين ان الاعضاء والمشرفين مايقصرون في مسألة الترحيب بالعضو الجديد .

بس فيه اشكالية بسيطة وهي كيفية تشجيعه على الكتابة ووضع المواضيع ...وشلون اشكالية ؟؟انا اقول لكم

يعني لو حط موضوع قد نزل في المنتدى . لاتقولون له تراه مكرر . يعني بصراحة بيتحطم ويقول في نفسه اللي هذا اوله ينعاف تاليه .

مشوها له . وش عاد لو تكرر موضوع والا موضوعين .ماظنتي الدنيا بتخرب .

واصلا هو ماحط هالموضوع الا لانه يظن ان موضوعه جديد عليكم


##############

في الحلقة الثانية :

بغيت ابين ان زيادة المشرفين من صالح المنتدى لاننا كلنا عارفين انهم يشتغلون لمصلحة المنتدى مجانا وكل واحد تمر عليه ظروف تخلية يبتعد عن المنتدى ايام


##############

في الحلقة الثالثة :

بغيت اذكر الاخوان بناس خدموا في المنتدى .وان وجودهم ودعوتهم في صالح المنتدى خاصة انهم كانوا مميزين جدا

############3

وفي الحلقة الرابعة :

كنت موجه الرسالة في الحلقة الرابعة للاعضاء وضرورة تشجيعهم للمنتديات الثانية وضربت مثال لمنتدى الحاسب
والقصد مهوب منتدى الحاسب لحالة . جميع المنتديات الاخرى


############

وفي الحلقة الخامسة :

بغيت انبه لشيء مهم واللي هو الناس اللي تسجل ونيتهم تخريب المنتدى

وحطيت المسئولية على المشرف في المقام الاول .

وانه مايتهاون معهم .

والله امورنا ماشية تمام بدون مايجي احد يبربر علينا بحجة الحرية في الكلام.

يا اخوان لو عطيتوهم فرصة الملاسن والردود معهم .فأنتم بالطريقة هذي تعطونهم اكبر من حجمهم

الا احسن شي الشطب والتوقيف اول ما يخنبقون <<<هذا رايي وقد يكون صح وقد يكون خطأ


وبعد فيه مسئولية على الاعضاء :
ان طلع لكم واحد من ربع ابو تغرة لاتعطونه اهتمام مايستحقة . والمثل يقول الحقران يقطع المصران

ولا تخلونه يفرح اذا تركتوا المنتدى بسببه


############

وفي الحلقة الاخيرة عتاب على الاخوان اللي يبخلون علينا ولاينزلون مشاركات الا بالقطارة


(((ولا استثني نفسي منهم فما انا الا عود من عرض حزمة )))

@@@@@@@@@@@@@@@



عيوب الموضوع كثيرة

:ان الموضوع طويل

بعض الاخطاء الاملائية

نسيان اسماء كثيرة خدمت المنتدى وماذكرتها

عدم اعطاء بعض المشرفين الموجودين حقهم وعلى رأسهم الاخت شمعة سدير اللي بصراحة استطاعت في وقت قياسي مع شوق القلوب وام عبد الله انهم يخطفون الاضواء في المنتدى من خلال قسم الاسرة

واشياء كثيرة اكيد انكم كاشفينها ومابغيتوا تفشلوني وتقولونها في ردودكم J

تحيتي لكم

[عمروالندى]

الاخ ريال سلف : موضوع مميز وظريف للاسف اني لم اطلع عليه الا مؤخرا ...تحياتي لك