المساعد الشخصي الرقمي

مشاهدة النسخة كاملة : (( ينصى ديار سدير ))


ابن شارخ
28-03-2005, 09:06 PM
مساكم الله بالخير ياهل سدير

اسمحوا لي على طول الغياب، وانتم وافين وكريمين

تقبلوا مني هذه البويتات المتواضعه:

جمس ٍ على المطلوب يازين دله
------------------------- شبكة ذهب من مصنعه فيه تنقيش

لونه حمر درب السفر غيةٍ له
------------------------- لا مر مع مركز ولا مر تفتيش

يرقى الطعوس وراكبه مايمله
------------------------- مثل الحصان اللي يبي بس تهويش

فوقه غلامٍ والسفر منوةٍ له
------------------------ خلقه مشيش ما يبي زود تشييش

مستعجل ٍ من فرحته وش حصله
----------------------- ما كد شعره صاير ٍ فيه تنفيش

شال الصقر والشوزن مصرحٍ له
---------------------- فرده بجيبه مانحينه له الجيش

ماخذ فناجيلٍ وتمرٍ ودله
--------------------- وبراد شاهي يدوش النوم تدويش

ينصى ديار سدير دربه يدله
--------------------- اهل الكرم اهل السيوف المعاطيش

من يوم نجدٍ بالمطر مضمحله
-------------------- يوم الفقر والناس ماعندها ايش

يلقى الرجال وكل شخصٍ يتله
------------------- وكلٍ يعزمه اقلط الحين عالعيش

كلٍ تسابق له ووده يشله
------------------- فقيرهم يفرح بشوف المطاريش

روح على ( حمـّاد) وانصى محله
------------------- عسى السحايب فوق داره مراشيش

عطه السويك وماحوى الجمس كله
------------------ خصه سلامي جعلك تدوم وتعيش

اليا انشدك عني مريضٍ تقله
----------------- وش فيه ؟ قله في خفوقه حواشيش

عيا ولا يرضى يبيح بسجله
------------------ في وسط صندوقٍ مسكر ولا يطيش

من يوم ابوناصر رحل عنه خله
------------------ مثل ( الملوّح ) صايرٍ فيه تشويش

اخوكم
ابن شارخ

تأبط شرًا
28-03-2005, 09:52 PM
tsf:tsf:tsf:tsf:tsf:

صح لسانك يابن شارخ
ومن طول الغيبات جاب الغنايم

حياك الله في منتداك وبين أخوانك

وبالفعل عوده رائعه بقصيدة جزله من شاعر جزل غني عن التعريف

وسأبقى منتظرًا جديدك بشغف

ولك مني أحلى التحايا

جورية
28-03-2005, 10:22 PM
الله يصح لسانك اخوي ابن شارخ وبصراحه شي خيااااااااااااااااااااال


سمعت عنك كثير بس اول مره ادري انك معنا بالمنتدى


الله مير والنبي يحيك بين اهلك واخوانك

ومن جد اخي الكريم قصيدة اكثر من رائعه

ويعطيك الف عافيه

سعود الخليل
28-03-2005, 11:31 PM
ابن شارخ


هلا ومرحبا بك يالغالي .. الظاهر انك دريتا بغلاك عندنا وقمت تغلى علينا ..

هههههههه قصيدة جزله من شاعر جزل نستمتع دائماً بقصائده ...

أرجو أن لا تبخل على محبيك بقصائدك الرائعه ...

لك الود ...

عبدالله بن سعود
29-03-2005, 07:26 AM
الشاعر ابن الشارخ
اهلا بكم وفي عودتـــــــــك
وهذا الحضور الرائــــــع
الذي امتتعنا في هذه الجزلة
التى لا تأتي الا من جزل
0
0
صح لسانك
وسلم بنانك

راعي الروضة
29-03-2005, 01:39 PM
ينصى ديار سدير دربه يدله=اهل الكرم اهل السيوف المعاطيش

.................................................. .........


أخوي / بن شارخ


صح لسانك يالغالي .


حضورك دائمٍ يحمل بصمة لاتشابهها أي بصمة .


فكر رائع .. وأنتقاء فــذ .. ومفردةٍ جــزلــة .


كل المنى أن لايستمر أنقطاعك عنا .


وثــق بأننا في شــوقٍ لجــديــدك .


دمت بخير وعافية .


وتقبل صادق ودي .


أخــــوك / راعــي الــروضـــة ؛؛؛

ابن شارخ
11-04-2005, 11:19 AM
هلا وغلا اخوي تأبط شرا


صح بدنك والله يحيييك من مشيت لين لفيت يالغالي

اشكرك على كل حرف سجلته تحت ابياتي المتواضعه
الله لا يهينك وابشر بسعدك ياغالي

تقبل التحية
اخوك
ابن شارخ

ابن شارخ
11-04-2005, 11:23 AM
هلا وغلا اختي جورية

صح بدنك والله يحييك من مشيتي لين لفيتي

اشكرك على الاطراء وعلى قراءة ابياتي المتواضعه
ويشرفني ان اقدم ما يليق باذواقكم الراقية

تقبلي التحية
اخوك
ابن شارخ

ابن شارخ
11-04-2005, 11:28 AM
هلا وغلا والله يحييك من هنيا الى مكة المكرمة مرورا بالمدينة المنورة رايح جاااااااااااااااااااااااااااي

هلا بخوي الحبيب راعي الاولة

يا اخي احرجتني بطيبتك وتواضعك وكرمك
واشكرك على تواصلك وسؤالك عني هنا وهناك

واشكرك على تخصيص شئ من وقتك لقراءة ابياتي المتواضعه
فاعلم اخي الكريم انك غالي وانك على البال دائما وانت هذا اللي محببني بك وووووووووووووافي دائما

الله لا يحرمك جنات النعيم ووالديك ومن يعز عليك واللي يقراء هذا الموضوع

تقبل التحية
محبك
اخوك
ابن شارخ

ابن شارخ
11-04-2005, 11:29 AM
هلا وغلا اخوي عبدالله بن سعود

صح بدنك ياغالي

اشكرك على كل حرف سجلته تحت مشاركتي ولا تحرمنا من تواصلك
الله لا يخلينا منك

تقبل التحية
اخوك
ابن شارخ

ابن شارخ
11-04-2005, 11:32 AM
هلا وغلا اخوي راعي الروضة

صح بدنك يالغالي

اشكرك على تكرمك بقراءة ابياتي المتواضعة
ويشرفني ان اكون احد اعضاء هذا المنتدى الراقي اللي انت فيه
ابشر بسعدك يالغالي

تقبل التحية
اخوك
ابن شارخ