المساعد الشخصي الرقمي

مشاهدة النسخة كاملة : أكلات شعبيه لاهل سدير


طالبة الشهاده
24-06-2005, 06:44 PM
السلام عليكم ورحمة الله
أعضاء المنتدى الكرام هنا نضع جميع الاكلات الشعبيه المشتهره لاهل سدير الله يحفظهم وياليت يخصص للاكلات الشعبيه فقط وكل من عنده طبق شعبي يضيفه وياليت تكون مدعمه بالصور
و راح ابدأ بالمرقوق للاخ وادي سدير وجميع الاعضاء

المرقوق أكله عريقه و صحيه
ومقاديره

دقيق بر من النوع الجيد تقريبا 4كاسات
لحم بعظم
فصين بصل يقطع مكعبات بحجم كبير او الحبات الصغار كامله
خضار (قرع وهو اهم شيء في الطبخه- كوسه- باذنجان مقطع شرائح طوال وبعروقه لازم لان الطعم فيها -فاصوليا -)
4 حبات طماطم احمر مطحون وممكن يكون مقطع
صلصه حسب الحاجه
لومي
بهارات
قرون فلفل اخضر (حبحر)
الطريقه

طبعا قبل ما ابدأ
الصور ماخذتها من عالم حواء للاخت دردشه مطابخ
لكن الطريقه طريقتي ونتيجته تكون نفس الشكل بالضبط
وان شاء الله باقي الاطباق بتصير من مطبخي الخاص

اولا نبدا بالعجينه نملحها اذا صار الطحين غير مملح ونضيف الماء الدافئ بالتدريج الى ان تصير العجينه متماسه. ونشونظها يعني نخليها مدوره بحجم البرتقاله ونغطيها ترتاح الى وقت استخدامها. طبعا اللي بتفردها بدينها احسن تصير خفيفه واللي بتفردها بالفراده الافضل تكون قاسيه شوي وتفردها برشها بالماء


احمس البصل بالزيت إلى ان يصفر بعدين اضيف اللحم بعد غسله ونحمسه الى ان يشرب الحم مويته
http://www.s999s.com/pic/marquoug1.jpg


نضيف الطماط المطحون او المقطع والصلصه و نتركه الى ان يتسبك ونضيف البهار واهم شيء الفلفل الاسود
http://www.s999s.com/pic/marquoug2.jpg

نصب عليه المويه الفايحه وقرون الفلفل ونتركه يطبخ الى ان تقارب اللحمه في الاستواء يعني نص استواء ونضيف الخضار واللومي الا القرع لانه بسرعه تستوي، في الصوره وضع الجزر بدل القرع لكن القرع احسه مهم جدا في المرقوق
http://www.s999s.com/pic/marquoug3.jpg

نبدأ بفرد العجينه طبعا السنعه اللي تشونظها و ترفعها بدينها لكن اختكم تفردها بالفراده وتؤدي الغرض ولازم تصير العجينه رهيفه يعني ما تصير متينه ونحط العجينه المفروده حبه ونغطي القدر لحد ما تتماسك بعدين نحركها شوي ونحط القرص او العجينه الثانيه وهكذا الى ان تخلص العجينه وبعد ما تنتهي من الفرد نضع القرع ونحرك بخفيف ونغطي القدر ونقصر عليه النار لمدة ساعه الا ربع بعدين ممكن ترشي بالزبده او السمنه واتركيه لمدة ربع ساعه أو الى ان يستوي زين
http://www.s999s.com/pic/marquoug4.jpg


http://www.s999s.com/pic/marquoug7.jpg

اغرفيه وكليه بالعافيه وممكن ترشين الوجه بالبصل المقطع مكعبات صغار و عليه فلفل اسود و كركم ولومي بودره والزبده وذوقي الطعم وشمي الريحه اللي تشق الخشم

http://www.s999s.com/pic/marquoug9.jpg

miss sudeer
25-06-2005, 01:41 AM
الله عليك طالبه الشهاده..

وش هالزين وش هالسنع..

يعطيك الف عافيه ..

طالبة الشهاده
25-06-2005, 01:51 AM
هلا بك مس سدير
ما عليك زود
حبيبتي هذه الصور مو مطبخي بس الطريقه طريقتي
وابشري بالزين ان شاء الله عيوني

جورية
25-06-2005, 02:24 AM
وااااااااااااااااااااااااااااااااااااااااااااااااا و

قسم بالله يا هووووووووووو شي يسيل اللعاب

الله يسلم هاليدين يا طالبة الشهادة

وجعل ربي يطعمك من ثمار الجنه

ولا تحرمينا الموووووووووووووووووور من هالابداع

طالبة الشهاده
25-06-2005, 02:35 AM
هلا بك عيوني الجوريه
اللهم امين ولك بمثله
ابشري بالقادم ان شاء الله

فهد المنيع
25-06-2005, 03:20 AM
يا ربيييييييييييييه يازين المرقووووووق


وش هالحراكات الحلوه ... طبخه حلوه اختي عاشقة الشهادة والصور روعه عقبال ما تطبخينها ..


وحياتس الله في المنتدى ..

طالبة الشهاده
25-06-2005, 03:49 AM
اخوي وادي ابا المياه
شكرا لمرورك والله يجزاك خير الجزاء... آمين

طالبة الشهاده
25-06-2005, 03:52 AM
يا ربيييييييييييييه يازين المرقووووووق


وش هالحراكات الحلوه ... طبخه حلوه اختي عاشقة الشهادة والصور روعه عقبال ما تطبخينها ..


وحياتس الله في المنتدى ..

الله يحييك اخوي حالم ليل
وترى انا طبختها كثييير بس ما صورتها واعطيتكم طريقتي وهي مضبوطه والصور شفت نتيجتها نفس مرقوقي وحطيتها للامانه
وان شاء الله تشوفون تطبيقي قريبا

البريئـــــة
25-06-2005, 04:47 AM
يم يم يم يم يم

عاد والله احب المرقوق مره

لو موب حنا الفجر لاخلي امي تسويه لوووووووووووول <<<<<ماتعرف تصلحه تهئ تهئ

يسلموووووو اختي طالبه الشهاده على الطريقه

دمتي بخير

وادي سدير
25-06-2005, 06:50 AM
اختي طالبة الشهاده

مرقوق سنع ماعليه كلاام

وطريقه تصليح من مره ظفره

احسنتي

اكله مرقوقيه ماقاصر عليها شئ

كلش تمام

المقادير تمام

والخضار تمام...خاصه انك مانسيتي القرع وعروق البيدجان

والطريقه تمام التمام

الله يعافيك وتسلم ايدينك


وبانتظار طبقك الشعبي القادم


وموضوع يستاهل التثبيت

أبو إبراهيم
25-06-2005, 01:34 PM
انا مدري وش دخلني منتدى الطبخ في ذا الوقت :)

والله شكلها موووووووووت

يعطيك العافيه اختي طالبة الشهاده

طالبة الشهاده
27-06-2005, 06:14 PM
أخي وادي سدير
اشكرك على مرورك واطرائك



اختي famous
أشكرك على مرورك

وانتظروا القادم إن شاء الله
على نفس الصفحه لانها ستكون للاكلات الشعبيه

النبع
27-06-2005, 06:26 PM
شكرا اختي الكريمه على الطبخه الحلوه 0

اخر صيحه مرقوق على لحمة حاشي ماينقصها الا فلفل احمر من حق الخرج اوشقراء

ثم سم بالرحمن الرحيم وطب الين المرفق 0

امطخ وجب حالم ليل وباقي الشله قصيد وموالات ومرقوق يالله منفضلك الجنه 0

طالبة الشهاده
30-06-2005, 05:30 PM
الطبق الشعبي القادم من مطبخي هو ....

ابترككم مع الصور لتتعرفوا عليه و نشوف من يعرفه

طبعا راح اكتب لكم بالخطوات والصور

http://www.s999s.com/pic/DSC00009.JPG

طالبة الشهاده
30-06-2005, 07:22 PM
بسم الله نبدأ

طبعا الطبق هو العصيد و هو يعتمد على حبيبات الدخن المطيبه اي المنقاه من الشوائب ثم غسله و نشره ليجف و من ثم حفظه و يفضل ان لا يطحن الا وقت الحاجه ليُحتفظ بنكهته المميزه وهي اكلة عريقه ومفضله لدى الكثير من اهالي سدير حفظهم الله

مقاديره كما هو واضح في الصوره

حبوب الدخن المطحونه ويفضل ان لا يكون الطحن ناعما جدا بل يكون خشنا نوعا ما وطبعا في القديم كان يدق
و بصله مقطعه باي حجم
لحم قطع متوسطه (العصيد الحقيقي يستخدم له لحم القفر) لكن ما عندي واستخدمت لحم عادي و يفضل هبر بلا عظم
طحين بر ( وليس ضروريا)
قرون فلفل احمر او اخضر
الحمسه او الكشنه او الديكوريشن
4 فصوص بصل كبار مقطع بحجم صغييير مرشوش بالكركم والفلفل الاسود وشوية ملح
زبده مذابه

وهذه صورة المقادير
http://www.s999s.com/pic/DSC00030.JPG

هنا صبيت ماء مغلي في القدر ووضعت عليه البصل و بديت الت او اكب من دقيق الدخن مع التحريك المستمر و بخفه حتى لا يتعقد
http://www.s999s.com/pic/DSC00031.JPG

وهذا الشكل بعد ما اضفت كل الدخن
http://www.s999s.com/pic/DSC00032.JPG

هنا اوطي النار وا ستمر في التقليب واضيف الفلفل واذا كان الفلفل حار فلا تتطبخيه معاه كثير حتى ما ينفتح ويحرقكم وممكن اضافة مكعب ماجيhttp://www.s999s.com/pic/DSC00041.JPG

يوم لا حظت انه بدى يثقل غطيته وتركتهhttp://www.s999s.com/pic/DSC00041.JPG

بعد مرور ساعه تقريبا على طبخ العصيد احمس اللحمه في قدر واضبف عليها البهارات والملح مع ملاحظه تكثير الملح عها نوعا ما وتقليل الملح في العصيد لان اللحم مع كثرة الملح والبهار راح يكتسب نكهة القفر
http://www.s999s.com/pic/DSC00036.JPG

واطبخه فقط نصف استواء لانه راح يستوي مع العصيد
http://www.s999s.com/pic/DSC00038.JPG

هنا اضفت اللحم والهدف اني ما اطبخ اللحم مع العصيد في البدايه حتى لا ياتصق بقاع القدر ونخسر اللحم على قولة امي الله يحفظها
http://www.s999s.com/pic/DSC00043.JPG

واستمر في التحريك واتركه على نار هااااديه لمدة ما تقل عن 4ساعات او اكثر والدقيق قد احتاج منه تقريبا ثلاث ملاعق كبار اذا صار خفيف ليعطيه تماسك
http://www.s999s.com/pic/DSC00055.jpg

الان جهز للغرف
http://www.s999s.com/pic/DSC00003.JPG

و نكون مجهزين اساس الطبخه اللي هو الكشنه وهو البصل المقطع صغاار مع رشة ملح وكركم و فلفل اسود والزبده الذائبه
ونبدأ نرش الصحن او القدر اللي بيقدم فيه العصيد بكم ملعقه من الصل ثم الزبده
http://www.s999s.com/pic/DSC00004.JPG

و نغرف العصيد ثم طبقة حشوة البصل والزبده ثم طبقوة العصيد وهكذا
http://www.s999s.com/pic/DSC00006.JPG

http://www.s999s.com/pic/DSC00008.JPG

وهذا الشكل النهائي
http://www.s999s.com/pic/DSC00011.JPG

http://www.s999s.com/pic/DSC00016.JPG

ملحوظه
نسيت اقول اني اضيف شوي زيت على العصيد

ولا تنسوني من صالح دعائكم ووالدي وزوجي وذريتي

طالبة الشهاده
30-06-2005, 07:25 PM
الطبق القادم هو

الرصيع أو المراصيع

[size=3][font=Arial]المبلوله باللبن والبصل

طالبة الشهاده
02-07-2005, 05:04 PM
[font=Arial][size=3]أفا أفا
كلكم ما تعرفون العصيد يا اهل سدير!!!!
والا خلاص حل محله البرجر والماش بوتيتو
يا سفاب التعب
خلاص أجل ابحط لكم طريقة البانكيك بدل المراصيع والا وش رايكم

نوض سدير
03-07-2005, 03:03 AM
لبى قلبك ياطالبة الشهاده

تسلم اناملك

ولاشلت يمناك

ولاعدمتك

نوض سدير

وادي سدير
03-07-2005, 05:26 PM
اختي طالبة الشهاااده

طبق رااااااااااااااااااااااااااااااااااااااااااااااااا ااااااااااااااائع


افضل طبق في منتدى الطبخ الى الآن


تسلمييين

اقترح عليك وضع كل طبق في موضوع خاااص

وتسمين الموضوع باسم الطبق

يعني يكون العنوان


المرقووووق


العصيد


وهكذا

علشان ياخذن حقهن من الدعايه




اكررر

تسلم يديك وبانتظار باقي الاطباق الشعبيه

طالبة الشهاده
03-07-2005, 05:43 PM
أختي نوض سدير
مشكوره حبيبتي على الرد والله يجزاك خير رفعتي معنوياتي يالغاليه
الله يرزقك الجنه ووالديك يالغاليه
ولك بمثل ما دعيتي عيوني

طالبة الشهاده
03-07-2005, 05:48 PM
الاخ وادي سدير
الله يسلمك على التشجيع ويجزاك خير ووالديك
صراحة فكرت اني افرد كل موضوع لوحده
لكن قلت اني اجمع كل الاكلات الشعبيه بموضوع واحد ومدعمه بالصور حتى تصير مرجع لمن يريد الاكلات الشعبيه ويسهل على الاعضاء الوصول الى اي طبق شعبي بدون بحث ولا غيره
والا وش رايكم؟؟؟
لان الجريش والقرصان والرصيع والصبيب في الطريق ان شاء الله

الامل المتجدد11
03-07-2005, 08:13 PM
009966طبقه البصل كثيره موبين بس اضن انه مطازيزtvm:

طالبة الشهاده
03-07-2005, 08:41 PM
يا هلا بك اختي الامل المتجدد
جزاك الله خير على المرور حبيبتي
عيوني العصيد ما يطعمه الا طبقة البصل مع الفلفل والزبده
و يمكن تقصدين انك حسبتيه صبيب لانه فعلا شكله في الصوره يشبهه
لكن المطازيز (القبابيط) شكلها يختلف تماما وهي مشابهه للمرقوق بس المطازيز حبات صغار مطززه يعني مقبطه :)
ومشكوره يالغاليه مره ثانيه

الصحافة
06-07-2005, 07:53 PM
تشكوراااااااااااااااااااااات

طالبة الشهاده
07-07-2005, 04:54 AM
العفو اخوي الصحافه
شكرا على المرور

بن جعيثن
07-07-2005, 10:02 AM
مار مرور ...

بس أشوف ...

لأني جوعااااااااااااااان ...

طالبة الشهاده
08-07-2005, 05:47 AM
شكرا على المرور اخوي بن جعيثن

وادي سدير
21-07-2005, 03:32 PM
اختي طالة الشهاده

احلى اطباق شعبيه

المرقوق والعصيد ولا يهون الجريش هي اهم اطباق الاولين

المرقوق والجريش معوفات الى هالحين والكثير يصلحونها

اما العصيد فانتهى والقله من الناس اللي تعرفه

ممكن يكون بسبب ان العنصر الاساسي فيه هو الدخن واللي الناس معد ياكلونه ولا يحبونه والكثير مايدخل بيوتهم


اشكرك مره اخرى على هالاطباق الرائعه واللي قيمتها التراثيه والثقافيه اهم من اي شئ ثاني

المنتظر
21-07-2005, 05:36 PM
طالبة الشهادة ..

موضوع جميل وتستحقين الشكر عليه

والأكلات الشعبية لها قيمة عند الأباء والأجداد

ويجب أن نستمر عليها كي تكون ممتدة مع الحياة

ولقد أعجبني تفاعل الأعضاء مع هذا الموضوع

أتمنى للجميع سفرة هنية


تحياتي

.

طالبة الشهاده
08-08-2005, 09:14 PM
حياك الله اخوي المنتظر
وجزاك الله خير على المرور