تجارب عمليه اتمنى تعجبكم <<<ولا تنسون الردود

[جمانه رائعه]

السلام عليكم
كيفكم ان شاء بخييييييييييييييير
والشهر عليكم مبارك والله يجعلنا من صوامه وقوامه والله يجعلنا من المعتوقين من النار :24 :24
طبعا انا قلت في مره سابقه ان الله قدر علي وصرت معلمة وينطبق علي المثل الي يقول ماكوله ومذمومه *@:
ويالله لك الحمد على كل حال

فكرت اني اشارك معكم ببعض التجارب العملية الي طبقتها مع طالباتي وحسيت انها مفيده وطريقة تصرفي معها وبعض الأفكار المفيده للمعلمين والمعلمات الجدد من معلمة متميزة وخبره مثلي <<<<ايه هين افلقني

وعلى فكره تراني جربت تدريس جميع المواد ماعدا الانجليزي موب شطارة فيني بس لقافه كل سنة مادة واحيانا مادتين في السنه

المهم نبدا سرد التجارب وابي منكم التجاوب ولا تراني ماعاد اكتب <<<طقي راسك في الجدار se:

التجربة الأولى :
هذا انا عندي معاناة من طالبات المدرسة بخصوص لبس العبايه وعجزت وانا اتكلم وانصح بس ماشفت ذاك الحماس والرغبه عند البنات لحد مافكرت في هالفكرتين وحده شرحتها للصف الخامس والثانيه للصف السادس :
الأولى :
جبت حبتين شوكلاته وفكيت وحده منهم وخليت البنات كلهم يلمسونها ....
طلعت وحده من البنات وسألتها :ممكن تاكلين الشوكلاته هذي ؟؟
قالت :طبعا لا
وسالت السؤال لكل الفصل وكان الرد طبعا لا لدرجة وحده قالت حتى لو تموتوني ماكلتها وععععععع
قلت :طيب لو اعطيتك الحبة الثانية ممكن تاكلينها ؟؟
قالوا:ايه
قلت ليش :قالوا (بعدة طرق مختلفة لكن اتفقوا )ان هذي مغطيه ومحد لمسها علشان كذا نقبلها اما الثانيه الكل لمسها ومانبيها علشان تقرف
ومن هالزاويه بديت ربط الحادثة بالحجاب ان البنت الكاشفة الكل يطالعها الاجنبي والعامل والسواق وكل انواع الرجال حتى الي مايعجبونها ولا ترضى يكونون قرايبها بس ماتقدر تمنعهم لانها هي الي عارضه نفسها قدامهم ولاحد يبيها لكن البنت المتستره حافظه نفسها من عيون الرجال الي دايما يحاولون يطالعون فيها (وهنا استخدمت بعض انواع الفواكه وخاصة الموز وبينت ان الله خلق اغلب الأشياء بغطاء يحميها فالأولى ان الانسان يحمي نفسه)
الثانية :
جبت بيت مجسم بدون سور ولا باب وسئلت :
هل من الممكن للحرامي دخول هذا البيت ؟
قالوا الكل :طبعا ممكن
قلت :ليه ؟؟
قالوا :لان ماعليه باب ولاسور يحميه
قلت :طيب ممكن يجلسون اهله يحمونه طول الليل والنهار
قالوا :بيملون وبعدين بيطلعون وينامون
قلت :طيب ايش الحل ؟
قالوا :يركبون له با بوسور علشان يحميه
ومن هنا بديت الكلام عن الحجاب بأنه مثل السور والباب الي يحمي البنت من نظرات الرجال وعيونهم ومن شر شياطين الأنس الي يحاولون يطالعون بكل وسيله
وزياده على الشرح احاول في كل مناسبة اثني على البنت الحريصه على الحجاب وأحاول اعاتب البنت الي تهمله بدون تجريح وبعيد عن الناس بطريقة تبين للبنت اني خايفه عليها وحريصه عليها
وش تتوقعون كانت النتيجه ؟؟
انا بعطيكم مثال عن وحده من الطالبات كانت بنت موظفة عندنا وكانت امها تقول لي دايما اذا امرت البنت بالحاجب ان البنت تحلف وتقسم انها ماتلبس عبايه بعد الكلام الي قلته البنت راحت لامها وألحت عليها انها تشتري لها عبايه علشان تلبسها وما اقول الا الحمد لله رب العالمين والله يهدي الجميع
اتمنى تنول رضاكم وانتظروني

[مشــاعر]

ماشاء الله عليك..

طرق خطيــــره وخاصه حقت الشيكولاته..

جزاك الله الف خير..

http://www.0zz0.com/2005/09/17/720031767.gif

[أبو يزيد]

لله درك ؟؟؟

[Computer GirL]

ماشاء الله عليك

أفكارك حلوة ,, وخصوصاً مع بنات صغار ,,, يكون التأثير عليهم قوي في هالسن

جزاك الله ألف خير

[جمانه رائعه]

جزاكم الله خير والله رفعتوا معنوياتي واعطيتوني اكبر من حقي
ومعك حق اختي كمبيوتر قيرل البنات الصغار يكون التاثير عليهم اكبر وخاصة لو احبوا معلمتهم
واليوم كان عندنا احتفال بيوم المعلم والبنات كانوا كاتبين بطاقات للمعلمات كلام يجنن يخلي الواحد ينسى كل التعب والغثا الي شافه في السنين الي راحت
و بتكلم عن التجربة الثانية :
كان عندنا بنت نقلت جديد لمدرستنا في الصف السادس ماتتخيلون كيف مستواها هالبنت من الكسل والاهمال وزيادة شقيه وكل يوم مسويه مضاربه مع وحده من البنات لدرجة تعبنا من كثرة مانعاقبها مره بالنزول للمشرفه ومره باستدعاء الام وعلى هالحال
في يوم جابت البنت دفترها علشان اصححه لها طبعا كله ناقص والواجب الله اعلم به لكن خطرت على بالي فكره لما شفت خطها وكان متميز جدا على بنت في عمرها
ناديتها وسألتها :هذا المكتوب خطك ؟؟
قالت :ايه
قلت :ماشاء الله تبارك الله والله اني تفاجأت بجمال الخط المكتوب والله انك كنز عندنا ومادرينا عنك من اليوم ورايح راح نخليك تشتركين في مسابقات الخط باسم المدرسة علشان اكيد ان شاء الله بتفوزين
البنت ماتتخيلون وشلون كانت تعابير وجهها فرحه مااقدر اوصفها ماتصدقون ولما جاء الحفل الختامي اشركتها في دور رئيسي في مسرحيه وايضا اكتشفت عندها موهبة التمثيل ولا أروع المهم البنت تغيرت المستوى تحسن الدفاتر ترتبت والنشاط ماتتخيلون والأدب شي صراحه لايصدق والسبب الثناء على الخط بس تخيلوا ...

[الأم الحنون]

الأخت الفاضله جمانه رائعه

بارك الله فيك..رائعه ياجمانه ..دائما الأمثله الواقعيه والحيه

لها تأثير قوي ..واكيد اسلوب في طرح المفهوم

واهدافك كانت واضحه ومحدده ..

كل الشكر على هالتجارب


وفك الله

[جمانه رائعه]

مشكورة الام الحنون على المرور وجزاك الله خير

[جمانه رائعه]

تحياتي للجميع
بتكلم اليوم عن اكتشاف المواهب

التجربة الثالثة :
في يوم جت معلمة الفنية من الصف السادس زعلانه والشرر يطلع من عيونها وتسب في البنات وقلة ادبهم وحركاتهم الي مالها داعي وعلى هالمنوال
المهم سألتها ايش فيه ؟؟
قالت :فيه بنت جالسة في الحصة تتلهى في ورقه معها لا وزيادة كاتبه فيها كلام كله قلة ادب شوق وحب وغرام وخرابيط
قلت :عطيني الورقة وشفتها لاحظت ان الكلام المكتوب كانه شعر لكن مو متناسق ناديت البنت وسألتها :مين الي كاتب هالكلام ؟؟
قالت :مدري
قلت انا الكلام المكتوب عاجبني وابي اعرف من وين جابيبته ؟؟
قالت :انا كتبته
قلت :من وين اخذتيه
قالت :من عقلي ألفته
قلت :انتي موهوبه وروعه كتبتي شي غيره
قالت :ايه بس ماحد يدري عنها علشان اخاف امي تعرف وتزعل مني
وسكتنا على اني شجعتها وطلبت منها انها تألف شعر بس تبتعد عن الكلام الي ماله داعي يعني تكتب عن امها ولا معلمتها او اي شي
بعد فتره اكتشفت ان المسأله وصلت للمديرة من خلال المعلمة الله يهديها والمديرة بلغت الأم وكبرت المسأله
سألت البنت بعد فتره عن الأشعار الي كتبتها قالت:ماكتبت شي ولاعاد اعرف اكتب اخاف امي واخواتي يزعلون علي علشان كذا تركتها بصراحه انا انصدمت واسودت الدنيا في وجهي يعني حرام الموهبه تنقتل وتندفن علشان فيه ناس يفهمون غلط او يفسرون الأمور على مزاجهم يعني انا دايما اقول انا ماامنع المواهب لكن اوجهها للطريق الصح وفكرت في فكره
جبت دفتر شكله حلو فيه حوالي 200 ورقه
وديته الخطاط <<<علشان خطي يجنن واخاف احد ينظلني <<ايه هين
وطلبت منه يكتب عليه العباره التاليه :
تلميذتي الغاليه .......
اهديك هذا الدفتر لتخطي فيه أولى محاولاتك الشعريه الرائعه
والى المزيد من الإبداع في عالم الشعر
تمنياتي لك بالتوفيق في حياتك القادمه
معلمتك .......
وغلفته واهديتها اياه
بعد فتره جابت لي الدفتر ومكتوب فيه بعض الاشعار والخواطر
وقالت :ان امي لما شافته سمحت لي اكتب الشعر فيه وهذا اخر ماكتبته
طبعا ماتتخيلون فرحتي بها الي صار ما اقدر اوصفها ابد
وبعد كذا صرت احاول اكتشف المواهب في الشعر خاصة عندنا في المدرسة واشجعهم انهم يكتبون لنا في المناسبات المختلفه والله يعين ان شاء الله
وسلامتكم

[جمانه رائعه]

ليه يا اعضاء المنتدى موضوعي ماعجبكم ؟؟!!

بصراحه حطمتوني كل يوم اجي ركضه للنت علشان اشوف ردودكم وفي النهايه كذا ؟؟!!

ولاتقولون شغل اعتقد ماحد مشغول قدي انا معلمة وأم وعيالي يدرسون وما عندي احد يساعدني لاشغاله ولا غيره يعني بالعربي مالكم عذر !!؟؟

[الأم الحنون]

الأخت الفاضله جمانه رائعه

بارك الله فيك ...معليش لاتنزعجين ترى الكثير من المواضيع مايرد عليها

عادي يعني ..بس بصراحه عاجبني الموضوع وفيه الكثير من التجارب الواقعيه والمواقف

المفيده ..تصرفك مع هالطالبه رائع وياليت تتواصلين مع الأم بهذا الخصوص وتصير معك في


الصوره اخاف تنفهم المسأله غلط وفيه الكثير من اصحاب العقول للاسف تضعف

المواهب ..


بارك الله في جهودك واتحفينا بالمزيد وانا وياك نتحاور ..



وفقك الله

[جمانه رائعه]

والله لي الشرف اختي الأم الحنون انك تحاوريني
بس الي يقهرني ان الأعضاء يتفاعلون مع مواضيع بايخه وسخيفه مع العذر للكل بس ترى هذي الحقيقه مو علشانهم ماقد تفاعلوا مع اي موضوع اطرحه لكن اشوف مواضيع كثيره قيمه ولها فوايد كثيره بس محد يعبرها
والمشكلة ان المواضيع الي يتفاعلون معها ماتعود بأي فايده لا للاعضاء ولا المنتدى و يتفاعلون معها مجامله وبس
انا اسفه لحد يزعل بس مع الاسف هذي الحقيقه

[الأم الحنون]

جزاك الله كل خير ياجمانه يارائعه

[أمي الحصي]

غاليتي جمانه رائعه

بالعكس موضوعك رائعه

و اول ماادخل المنتديات اشوف وش جديدك

مواضيعك هادفه وراائعه

دمت مبدعه لنا

[فهد الرشـيد]

جمانه رائعة

بالفعل أنك رائعة في الأساليب التربوية المكتسبة من الخبرة والتعامل مع الطالبات وأنا أقدر فيك احترام الطالبات والنظرة إلى الجانب الإيجابي في تصرفات الطالبات فكتب التربية والتعليم ليست كفعل الواقع

وبالنسبة للردود وسعي صدرك علينا ترى الجد ربعه شويين ولا يهنون أحبابنا المتفاعلين مع المواضيع الهادفه


والغير مفيد ربعه واجد على قفا من يشيل

وفي النهاية أقول

أن الكلمة مثل البذرة

إن كانت طيبة يمالك من الثمار اليانعة

وإن كانت خايبة الله يعيينك على الشوك


مع حبي وتقديري للجميع

[جمانه رائعه]

الله يخليك لي يالأم الحنون لولا الله ثم انتي مدري وش كان بيصير فيني من القهر
مشكورين الأميره الصغيره والهدوء والله يخليكم ولا يحرمنا منكم عزالله انكم عطيتوني دفعه علشان اكمل الموضوع

التجربة الرابعه:
عندنا في المدرسه مجموعة من الطالبات الاجنبيات يعني من مختلف الدول العربية السودان ومصر والشامو لاحظت على صف من الصفوف وهو الصف الرابع انه في حزازيات بين السعوديات والاجنبيات يعني بالعربي السعوديه ماتبي الاجنبيه تجلس جنبها ولا تكلمها ولاتلعب معها وعلى هالحال لدرجة انهم صاروا يعايرونهم باشكالهم
المهم انا كنت متظايقه من هالموضوع بس ماقدر اتكلم علشان مااجرح مشاعر البنات المرفوظات وكمان مااقدر احددمن البنات الي يرفضونهم
لحد ماجا يوم كنت اقرا في كتاب عن قصص الأنبياء ولقيت هالمعلومه ان الناس كلهم تناسلوا من ابناء النبي نوح عليه السلام ( بعد الطوفان وغرق الكفار اراد الله ان جميع الرجال يصابون بالعقم ماعدا نوح عليه السلام ورزقه الله بثلاثة أولاد نسيت اسماءهم ومن هالاولاد تناسل الناس لذا يسمى نوح ابو البشر الثاني والله اعلم )تبي تقولون وش علاقة الموضوع بالبنات انا اقول لكم
ابناء نوح عليه السلام واحد منهم حنطي وشعره اسود وناعم وهو الي تناسلوا منه اهل جزيرة العرب ومن يشابههم والثاني كان اسود وشعره اسود وخشن وهو الي تناسلوا منه اهل افريقيا والثالث ابيض وشعره وعيونه ملونه وهو الي تناسلوا منه اهل اوروبا مدري اذا احد سمع هالمعلومة ولا لا
عموما انا فرحت فيها واخذتها وشرحتها للبنات ببساطه على قد مستوى فهمهم وفي النهايه وصلت معهم ان الناس كلهم اصلهم واحد ومايضر الانسان اختلاف شكله عن الباقين
حسيت انهم تأثروا وعرفوا اني اقصدهم وبعد فتره لاحظت التغير واضح عليهم لدرجه كبيره والحمد لله
وسلامتكم

[جمانه رائعه]

مع الأسف يااعضاء منتديات سدير الأعزاء لحد الآن مالقيت منكم التفاعل الي كنت اتمناه لكن لقيته في مكان ثاني ماتوقعت ابد انهم بيتفاعلون كذا ولاتزعلون مني بس انتم الي حديتوني
واتمنى من الأم الحنون انها تحذف الموضوع اذا ماعليها كلافه ولها الشكر الجزيل

[الأم الحنون]

الأخت الفاضله جمانه رائعه

اسعدك الله بكل خير ...

تجاربك تثرينا ..واسلوبك الواقعي والحيوي ينيرنا

فلماذا احذف الموضوع ؟؟رائع ..

اما الردود تلحقيم خير ان شاء الله يالغاليه

وعلى قولتهم لاتنزعجين ...

اكملي تجاربك والله المستعان


كل الشكر

[بسمة فرح]

رووووووووووووووووووووووووووووووووعه


تسلمين ياحلى مربيه

[بسمة فرح]

ليه وشدعوى تحذفينه والله اني متفاعله مع الموضوع بشكل خيااااااااااااااااااااااااااالي

[ورود]

كل عام و الجميع بخير

و عذرا على عدم ردي لشبه انقطاعي عن النت فترة رمضان

****

ما شاء الله تبارك عليك أفكار رائعة من معلمة رائعة ذات ضمير حي تجاه طالباتها

و تجاه دورها كمعلمة و مربية

سبحان الله الأطفال كالنبتة الطرية إن أصلحت تربتها و اعتنيت بها صلحت و نمت كما تريد

و إن تركتها و أهملتها نمت تعبة أو ربما لا تنمو
***
لي عودة أخرى إن شاء الله

[بنت الوادي]

الله يجزاك خير قولي آآمين ياجمانه يا غالية

[سعد القاسم]

جمااانه حقا راااائعه انتي يعطيك الف عاافيه على هذه التجاارب الطيبه والله نستفيد منها ولتس جزيل الشكر ...
...وجزاتس الله خير اختي .. مووضع رااائع فعلا

[حمد]

تمثيل رائع

واسأل المولى عز وجل ان يثيبك على ما فعلت ويكتب لك الأجر

فالمعلم والمعلمه يحمل كل منهما رساله إلى هذا الجيل ، فهم الموجهون والقدوه الحسنه


بارك الله في جهودكم

[أمير سدير]

جميل جدا



والله انك مربية اجيال صالحه



تستحقين ان تكوني موجهه



ويالله كملي التجارب


وبلا تغلي عاد



بانتظار الردود


اخوك امير سدير

[فهد الرشـيد]

جمانه رائعه


أعجبني إستغلالك للقصة في صالح حل النزاع بين الطالبات


الله لا يحرمك الأجر


واللي يدور الحل لازم يلقاه

بس المشكلة في اللي يقول وش علي منهم يتهاوشون ولا يتصالحون بكيفهم


أشكر لك جهدك وننتظر منك المزيد


تحياتي

[جمانه رائعه]

كيفكم

اليوم انا جايه اطلب منكم خدمه

عندي فكره حابه انفذها الاسبوع الجاي او الي بعده وابي اقتراحاتكم

الفكره عباره عن اسبوع نتكلم فيه عن اهمية الصلاة والحث عليها

يله وروني الافكار والابداع

ولكم جزيل الشكر

[سديراوية]

رووووووووووووعة منك يا جـــمــانة ..

والله عليك افكاار تربوية ممتازة ..

الله يعطيك العافية