شعراء منطقة سدير [الأرشيف]

خــــفــــوق ®

01-06-2002, 10:46 AM

بسم الله الرحمن الرحيم

مرحبا بكم في هذا الموضوع الذي ارجوا من الله العلي القدير ان ينفعنا به في مجال الأدب والشعر

لا أطيل عليكم

فكرة الموضوع هي محاول حصر أعلام الشعر الشعبي من منطقة سدير

وكل عضو يختار لنا شاعر متميز ويكتب نبذة عنه وابرز قصائده

وبهذه المحاولة الجادة في تحقيق هدف المنتدى الا وهي الإفادة والإستفادة

ابدأ بنفسي في تقديم الشاعر المرحوم / حمد بن عبدالله بن عبدالعزيز المعجل رحمه الله

ولد في الحصون سنة 1325هـ , وتوفي رحمة الله عليه في الرياض سنة 1418هـ .
وهو شاعر متمكن وواضح المعنى , وقصائده تحمل طابع الأصالة, وله قصائد في جميع مجالات الشعر , ولكن للنصيحة والموعظة نصيب كبير من قصائده, وكثيراً ماتتضمن قصائده الحث على التمسك بالدين والإستقامة , والحث على الخصال الطيبه والحميدة وذم الخصال السيئة , ويهوى مساجلة اصدقائة , وتبادل القصائد معهم
ونستعرض فيما يلي قصيدة من قصائده

وقت مضى كنه على خاطري حلم=في نعمة الاسلام مر بسهولة
يقول الأول كل مازم يهضم=الكل يرجع في مواقع نزوله
في دبرة اللي بالمخاليق يعلم=ماداج في وضح النهار وليوله
رب على من تاب يغفر ويرحم=سبحان مفني دولة عقب دولة
لاشفت آثار جدودنا صابني هم=ماودي اشوفه ولا ادوج حوله
أهل الوفا والطيب والدين وشيم=راحوا خلوا حقهم للي هوله
لا جاهم الضيف يحشم ويكرم=يروح مسرور النبا مع ذلوله
هذي سلوم اجدودنا الضيف يحشم=خص الضعيف اللي ذلوله نعوله
وحنا بساقتهم عسى الله يرحم=الموت حق وكل نفس تنوله
فيما مضى ياطول ماقلت ياعم=واليوم انا اللي صرت عم الحموله
بوصيك ياللي بالملازيم تهتم=عليك بالعليا طريق الرجولة
وقت علينا زود الهم بالهم=في هالزمان اللي كثير ميوله
من طاوع المعبود يسعد ويسلم=يتبع طريق الرب ويتبع رسوله
خمس الفرايض لازمه والشهر صم=من طاعة الله كل خير تنوله
بوصي عيالي كلهم لايم لم=الله يقديهم على اللي نقوله
من رافق أهل الطيب مايلحقه ذم=ملزوم تاخذ من سجايا فعوله
ومن رافق اللي دون يخسر ويندم=لابد مايبلاك شر تنوله
ولايغرك سنحة الزول والجرم=ماهيب في جرمه ولا كبر زوله
مثل السراب اللي يغرك الى زم=يزم لك وهو سريع جفوله
ولايغرك من بوجهك تبسم=حتى تميز غايته ومحصوله
لوشفت وجهه زين بالداخلي سم=له حقة للغافلين محبولة
واوصيك ابن عمك الى جار فاحلم=ادمح له الزله وكرّم نزوله
واوصيك في جارك ترى الجار يكرم=قبل حديكم ترحل به زموله
والوقت لويسقيك من صافي الجم=لابد ماتشرب بواقي حثوله
وصلاة ربي عد من حج واحرم=على النبي اللي كريمة فعوله

اتمنى ان تحوز الفكرة على اعجابكم
اخوكم / خفوق

السلمان

02-06-2002, 09:06 PM

اولا احيــك اخوي خـــفوق على هالفكـــرة المتميزة فعلا فكرة رائعة
واتمنى انها تجد التفاعل وتسلم لنا يامبدع

وزي ماقال اخوي هجرس الشعراء كثار جدا وقصايدهم قد ما تكون مطبوعة لكن مثل هالفكرة المتميزه قد تساعد في نشر شعرهم
احب ابدأ انا بالاقربين وبابدأ باحد اجدادي
جدي سليمان بن محمد الجردان ولد في عام 1310هـ في جلاجل ، تعلم الكتابة وحفظ القرآن الكريم. شارك الملك عبدالعزيز في عدد من غزواته وحروبه منها حروب فتح الحجاز وحصار جدة الذي انتهي بموقعة الرغامة والاستيلاء على منطقة الحجاز واشترك رحمه الله في موقعة جراب والسبلة وغيرها ونظم قصايد في هالموضوع
وقد اشتغل بالفلاحه التي تعتبر مصدراً للزرق يومذاك لا سيما إذا توافرات المياه بالمنطقة ، وحينما تقل الأمطار واتغور الآبار يذهب إلى العراق بحثاً عن عمل.
وله قصائد قالها بمناسبة شح الأمطار وجفاف الآبار ، يصف فيها الحالة التى تصل إليها المزارع في جلاجل وذلك بين جلاجل والكويت وموانيء المملكة الشرقية مثل ( عينين ) الجبيل حالياً و الاحساء لجلب التمور منها حين تصاب نجد بالجفاف والقحط . وبعد أن استقر في جلاجل عمل مؤذناً بالمسجد الجامع مدة تقارب عشرين عاما .توفي رحمه الله في جلاجل يوم الأحد 25 ربيع الأول لعام 1397هـ عن عمر بلغ 87 سنة تغمده الله بواسع رحمته وغفرانه. وليس له الا بنتان وكلتاهما شاعرتان احدهما جدتي رحمة الله عليها واختها امد الله في عمرها في الخير واحسن اليها
الشاعر رحمه الله له مجموعة من القصائد الشعرية قالها في مناسبات مختلفة .لكن لا يوجد له شعر مطبوع وانما حفظه الناس وتداولوه بينهم
وبمناسبة حصار جدة الذي انتهي بموقعة الرغامة وفتح مدينة جدة عام 1344هـ قال الشاعر القصيدة التالية :

قــم يـــا نـديبـــي دن جـــرو دواتـــي = دن القـلم يــــــا مسندي والسجـلات
نكـــــتب حــروف والضــح بـيـنـــاتـــي = خــفض ورفــع بيــن نصب وجــزمـــات
افـتـك صندوق الحـشي يا شـفاتـــي = وافــتر دالويـــة وبــاح الخفيــــــــــــات
يا عين هلــي بازراق الدمــع هـاتـــي = هلـــي غزير الدمـــع هـليـــه ذرفـــات
عـــزاه مـــن حـــارب لذيــذ المباتـــي = وتـدي نشـور الصبح والجــفـن مـابـات
ذالـــي ليــــال وأشــهـر مدلجــاتـــي = مـــــاذقت أنـــا للنـــوم راحــــة ولذات
والزاد حـاربـتـــــه ولا لــه شــفـاتـــي = لو هــو خـــاصر ضـان حــيل سـمينات
والما القراح اللـــي عـــــذب فـراتـــي = مر على كـبدي ولا هــوب مشــهــات
الى عاد هذي سيرتي فـي حياتـــي = عسـى عــواقـبـهـا حـميدة وخـــيرات
ويـا راكــــب هجــــن تبــوج الفلاتـــي = فج الزغـون وهـضـــع الأرقــاب دربــات
دربات وان جــن بالغــداري سـراتـــي = الـــــى زال زول مــــا لا يذيرن أمنيات
كـــــبار المخــاصـر ضمر مـوجــفاتـــي = تقطع بعــــيد الدو سجـــة وهــجـــات
حــيل رعـــــت باقــفار زمـل مـراتـــي = مـــاشـمــهــن افـحــول زمل مهيجات
مـربـاعـهـن بيـــن البــزم واحــرباتـــي = ومقياضهن مـن يـم دخـنــــة مقيضات
مـا بركن للشد مـنـتـويـن ســعـاتـــي = داروا عـلـيـهـا الكـــــور والخــرج والات
واخرجوهن قمش الحسا مشكلاتــي = ومياركن فوق المناكــــــــــب مسوات
شالوا عليهن قــــبل وقـت الصلاتـــي = شالوا عليهن جهمـة عـقـب مـبـيــات
سارن مع الأبطع عجــال الخــطاتـــي = ومــــــوادعــيـن بيـــــــــت رب البريات
أقــفـن تـناحــن وجــهــن حــادراتـــي = اقــفـن تــــناحــن مــــثل ريم مذيرات
ياهـل النضى مــا تفهمون الوصاتـــي = وصات كما اللي موصي لـــــه بعيلات
ريضوا كفيتوا شفر فجـوى الفجلاتـــي = عوجوا ارقاب ركـــــابكــم بشكـــيمات
واصغوا لــي القلب لفهيم الثـبــاتـــي = حــــافظ مــــا يبدي وياتــــي وما فات
الـــى لـفـيـتـوا والـذي والحــمــاتـــي = بلـــغ سلامــــي عـنـدهـــم بالتحيات
اخـــبـر وخــبـرهــم بسيرة سـواتـــي = ومن طول سقمي بان فيــــه علامات
الشــــيــب لاح واضــحـــة بـيـنـاتـــي = والشيب لـــه حــق ووقــار وهــيـبـات
لولا العــــذارى تكـــــرهة يـوم يأتـــي = وان عــــــــارضنـــه طــريــق مــصدات
شيت مـــــن يـوم بــــه الهـايــلاتـــي = يوم تصبحـــنا الطـــيـايير ســــــــيرات
ويــضيق بالقلب الخـــيوف الفـلاتــــي = كل سعى له في جـحــوره وغــــايات
جانا الفشق حــمـلات و مـقـطباتـــي = تســـعين مــلموض بشــدة مــقــوات
وســـــاق الامام جـــموع الراهباتـــي = نصره هـــل التوحــيـد والديــن والذات
وهموا هل التوحي هجـد العـصاتـــي = بوعد وعهد لا مضى سبـع ســاعــات
واشتب نـــار حـروبــهـا المـوقـداتـــي = وقودهــــن رجـــال وأيتـــــام عــيـلات
الى ولعت بـاطـواب والمـرهـــفـاتـــي = ومكــــاين وان اشـحــنــوهــن مريبات
تشبة رعـــود صيوفــها القــاصفاتـــي = الي صبصبت ثم انصبت مســـــتهلات
سقـوا يسقـي القـاع و المــرملاتـــي = يسقى عـثاعثـها وعـــال الرفـيـعـــات
يـضـيـق مــجـــاريـهــا بثــج الدبـاتـــي = وجـــــنايـز هــــذاك حــــي وذا مـــات
كـفيا كــفيا الشـر فـــي الموجباتـــي = كــــفيا الحــوادث والبـلاوي والآفــــات
دار الفـلك ربـــي لنــا بـلحــظـاتــــــي = عجل الفرج فـي كــــل وقت وحـــزات
الــى حـل عسر فالفـرج منــه ياتـــي = ما ننتظر غــيره لكـــــشف الضــرورات
دارت علـــى الأشــراف بـالدايـراتـــي = دارت عــليــــــــهـا دايـــر الــدور أذلات
وصـلات ربــي عــد فــرض الصلاتـــي = وأعداد ما يــــقرأ المصلـــــي تحـــيات
على النبــي ما أخضر كـــل النباتـــي = واعداد مــــا هـلت حـقـوق المخـيلات

وعندما جف الماء من آبار جلاجل في إحدى السنين وحيين دخل الشاعر مزرعته البطيحاء وشافاها شهبة وهشيم تذروه الرياح حز في نقسه هذا المنظر وقال:

شفت البطيحاء شوفـــة تدهش البال = شوف الغرايس منـــه واسقم حالــي
الأرض بـيـضـا وفـيـهـا مــا بــــه ظـلال = لو جيت في في كـــلتك الصوالــــــى
مـــن عـقـب مــا بالقت غــايف وميال = يذكره مــن خــبره لحـــق بالتوالـــــي
غــاد هـشتيم فيــــه عجــات ونجــال = مثل الرمام اللي ببعض المغــالــــــي
ومـــن عـقـب مـــا هــو طرشها يعول = عوال تسر عينك بالطرب والعدالـــــي
يسنى بها عوص من الهـجـن وحــيال = سواقهن في سوقهن ما يبالــــــــــي
اليوم جــــــمت بيـــرهــا خــمرة دلال = تصري إلى ما فوحـت بالعجـالــــــــي
وعزاه حمل الغرس كـــــــله بالاجمال = كله هضاب ما بقـــي بـــه توالـــــــي
لا مــو فـــي ديــن ولا كـــــنز لعـــيال = ولا من الحرة عنا لــــه جـــمالـــــــي
أســـباب هذا ذنوب ما فيهن أشكــال = ما يظلم المخلوق مولى الموالـــــــي
أرجي من الله لا بعجـلــه ولا إمـهـــال = منه العفو نرجيــه عـــز الجــلالـــــــي
يغفر ذنـوب مـــثل بعــضـات الأجـــبال = يغفر ذنـــــتوب معـظمات ثــــقالــــــي
يالله طلبتك بـــــأول الوســم هــــمال = نوه حقوق مــــن صدوق الخـيالـــــي
مبكـــــــر مــرواح والفـــي مــــــا زال = لين الظهر باكــــــر بوقت الزوالـــــــي
حـــنه رعــــودة فــــــيه رنـــــة وزلزال = للبرق في مقدم طهاة اشتعالـــــــي
نو تتابـع كن ســيلـــه الـــــى ســـال = ريل تحــدر لا نـتــحـالـــه بجـالـــــــى
مــن درب أبـا الخران واقبل به اشمال =الي خشم مقعي حدوده شمالـــــي
يخـص فــيـحـان عسى عقب الامحال = ويعم نجد كــــــلها بالكـــــــــمالـــــي
يسقـــي غروس مــــا يملن الاكــــال = الا جنبي خــشر بها والأهالـــــــــــي
وقت الجذاذ وكنها وقف واســـــــــبال = مــــــــا غـلقت بيبانها بالعــمالـــــــي
وصلاة ربي عــــد مــــا هـــل هـــمال = على النبي مازال فـــي ومــا لــــــي

وقال قصيدة ثانية يوصف الجفاف الذي أصاب جلاجل ، والذي بسببه صار جدي رحمة الله عليه يسقي النخل بواسطة قدر يحمله قوق راسه :

يـا للـه يـاللـي كـــل خـلقـه بـرجــواه = يــا واحــد كــــــــل الخــلايق عـبـيـده
يـا عــــــالم الخــلوق ســـره ونجــواه = وهــو الـذي يقدر علــى شـــن يريده
يـا مجـري سفن البحـر فـــوق الأمواه = فــي وســـط هيران وقــوعـــه يـعيدة
يـا مـــــــبري أيـوب مــن شـــد بلـواه = بأســــباب صبره نــال حـــالا حــيمدة
ويـا مخــرج ذنــون والمـوج غـــــــــباه = ايضا وبطن الحـــوت بــأعظم مكـــيدة
بوسط الظلام وسمعـه أجــاب دعــوه = ثــلاث ظلمات فــطنــــــه ســــديــدة
ويـا حــامل نوح علــى الفلك وأجــراه = فــــي غــرقــــة أمــواجـها بـالمـزيـدة
وابنــه غـريق مـــا ارعوى يـوم نـــاداه = ما ينفعـه مــن دون ربـــــــه محـــيده
يـاللــه أنــا طــالبـــك يـا للــه يـا للــه = مـــــا لـــــــه شريك ولا لـــــــه نديده
ان ترحم اللي يالو لــي عمست أرياه = عند العرب مــــا عــد يسوى جــديدة
الي قل مــا عنده تســـاعوا لفـرقــاه = فـي مجلســــه يجـلس وحـيد فـريده
مـــا تقبل أعذاره ولا يسمــــع حكــاه = ولا لـــــــه صديق لــــــــه مــود يعيده
بــاخـــرزمان والـنـمـيـمـــــــة حــلاواه = ومن سمع هرج مــن لسانـــــه يزيده
والا فـــراع المــــال كــــــــل تـلـقـــاه = يرفــون زلاتــــــــه ويكــــــــثر شهيدة
كل على شـوفـــه حـريــص وجـمعـاه = والـــى هــرج هــرج تمـنـوا يـعـــيــده
عـــزاه مـــن مثلـــي وعـــزاه عــــزاه = غاد نـشـيـش الحــال كــــــنه حديده
بيدي بشغل والشـــغــل ذلك يجــزاه = يحاكــــي هموم فــــي فــواده بعيدة
أيضا وغرس لـــــــــــــه مصافير يغذاه = بوسط الحفاير كـــود ينمـــي جــريدة
يحط كـــــوارة مـــع القدر يملاه يغذاه = مثــــــل اللــي اللــي يغــــذي وليده
هني مــــن شافــــه كـــــــبار ويرقاه = يعدل عـــذوق فــــــي حجوره عديده
أيضا وجــمـــه واتي مــــــا نزح مــــاه = يــــا جـــود حـــظـه يوم تسهر معيدة
هــذا وعـفــو اللــــه بيــــــوم الملاقاة = وعالـي المنازل فـــي جـــنان خــليدة
وصلاة ربــــي عــد رملــــه وحـــصباة = علــــى النبــي اعـداد حـب الحصيدة

هذا بعض من شعره رحمه الله تعالى واسكنه فسيح جناته وجميع موتى المسلمين وان انشاء الله انه يحوز على رضاكم وتقبلوا تحياتي