لبو صالح بقلبي محلا >>>

[الجريوي]

هذه واحدة من قصائد الرثاء التي جادت قرائح شعراء سدير لفقدهم الشيخ إبراهيم بن حمد المعجل الذي لمع نجمه وأحبه الناس وعند وفاته سارت في جنازته سدير عن بكرة أبيها ، للفقيد الرحمة والمغفرة ولأهله الصبر والسلوان .

قال الذي دمعه على الخد هلا
دمعه على الخدين يذرف ذروفه

وين انت يا للي كل ما اقبلت هلا
يفرح بشوفي مثل ما افرح بشوفه

والفت عمي وغيره الولف كلا
نبي ندور لين نبري الحسوفه

تراي أنا التلميذ والعم مُلا
آخذ دروسه واعترف بمعروفه

يا الله يا للي فوق خلقه تعلا
انك تجير العم مما يخوفه

الموت حق والمنايا سجلا
واللي مشى لابد له من نكوفه

ما اوحيت من قالوا له الموت خلا
الكل منا واردات اكفوفه

بس ان لبو صالح بقلبي محلاً
لعلنا عقبه نشوف المروفه

ما خاب ظني في عياله وزلا
مني وانا منهم على كل شوفه

لو يذكر اني رايح للمكلا
لابد ما اسمع من طرفهم هتوفه

وعيالهم عن لاهب الشمس ظلا
من شافني منهم تلاحق اطروفه

أحبهم حب لقلبي تبلا
حسبة عيال اللي هوى في اجروفه

ما له عضيد غير منهو تحلا
بالعرف والمعروف تلمع سيوفه

وصلوا على اللي مرسل بالأدلا
اعداد من لبى وبيته يطوفه

عبدالرحمن السلطان المعجل

[أبو ريان]

رحم الله الشيخ ابراهيم ابن حمد المعجل رحمه واسعه واسكنه فسيح جناته وجزاك الله خير يالجريوي على نقل المرثيه في الشيخ ابراهيم وصح لسان الشاعر عبدالرحمن السلطان المعجل على روعه الكلمات

[عبدالعزيز المعجل]

الشكر وجزيل الشكر للأخ الجريوي على ادراجه احدى قصائد الرثاء التي شاركنا بها اخواننا واعمامنا الشعراء

والشكر موصول لاخوي ابو ريان على تثبيته للقصيده


وانشاء الله بأقرب وقت سوف اضع موضوع فيه ما استطيع نشره من قصائد الرثاء في جدي ابراهيم رحمه الله تعالى




اخوكم
عبدالعزيز بن حمد البراهيم المعجل

[السلمان]

رحم الله الشيخ ابراهيم بن حمد المعجل واسكنه فسيح جناته ونعزي انفسنا بوفاته قبل اهله

ولك كل الشكر اخوي الجريوي على المرثية وصح لسان الشاعر عبدالرحمن المعجل

ونحن بانتظار ما وعدتنا به اخوي شاعر سديــر من قصيد في الشيخ رحمه الله تعالى واسكنه فسيح جناته

وتقبلوا تحياتي

[عبدالعزيز المعجل]

اسمح لي اخوي الجريوي ادمج موضوعيك بخصوص المراثي بموضوع واحد وهو المثبت الان

وهذه القصيدتين التي كتبتها بالموضوع ذو العنوان

مجموعة مراثي الشيخ ابراهيم المعجل


شاعر سدير

[عبدالعزيز المعجل]

بقلوب مؤمنة بقضاء الله وقدره استقبلنا نبأ وفاة فقيد حوطة سدير الشيخ إبراهيم بن حمد المعجل رحمه الله رحمة واسعة في يوم الخميس الموافق 2/4/14232هـ بمشاركة أهل الفقيد أحزانهم شاركنا بهذه القصيدة المتواضعة :

يا الله يا المعبود يا وال الأقدار
جليل شانك والملا لك يطيعون

نطلبك يا الرزاق في سر واجهار
تغفر لمنهو داخل القبر مدفون

يا عونة الله ما عن الموت مفرار
ياتيك لوك في مغارات وحصون

قدامه القوات تخضع وتنهار
بأمر الولي يأتيك بالكاف والنون

يا الله يا اللي ترسل الغيث مدرار
يا عالم ما كان بين ومكنون

بحسناك تجعل منزله بين الأخيار
يا محصي الذرات يا عامر الكون

يا مظهر ذا النون من غب الأبحار
بأمرك رماه الحوت والرزق مضمون

يا ثالث الاثنين في داخل الغار
يا وامرٍ خلقه لبيته يحجون

أن ترحم اللي شد من دار لدار
تقبل دعا اللي لابن معجل يعزون

ابن حمد ريفٍ على الضيف والجار
قولة هلا يا مرحبا حين يلفون

يفرح إلى سمع الصوت بالأسحار
غاصبهم المسرى وللخير يرجون

ما هو من اللي مهنته حلف وأعذار
لبابهم دون المسيّر يصكون

ساس الكرم والطيب من نسل الأخيار
معاجلة للطيب والخير يسعون

حر رحل وارث لنا عقبه أحرار
مع درب والدهم على العز يمشون

وصلاة ربي عد همال الأمطار
على النبي الهاشمي خير مامون

عمر حمد سعود الناجم

[عبدالعزيز المعجل]

شكر متواضع للأخ عمر بن حمد الناجم علىما عبر به نحو العم إبراهيم ((رحمه الله رحمة واسعه))

مشكو يالي فالعزى ينظم اشعار *** الاوله بالرا والاخرى على النون
الشاعر الي ماعلى طيبه غبار *** ولد الذي للعم صاحب ومضنون
راعي سواليف حسينات وقصار *** يلفي على عمي بعد ما يصلون
ان جا العصر في البيت كنه على نار *** وده يشوف الي لشوفه يهلون
وإذا لفا يفرح به كبار وصغار *** يبون قول الي منول يقولون
بختصرها والشعر دونه جدار *** يحماه عن خطوات ناس يهذرون
شكراً لابن ناجم على كل ما صار *** والمعذره لعيال عم يعذرون
صلاة ربي عدد من راح زوار *** على النبي الي عن الشين مصيون

عبد الرحمن بن سلطان المعجل

[عبدالعزيز المعجل]

هذي قصيده لشاعر اكن له الكثير من الاحترام والتقدير لأنه اقل شيء استطيع انه اعطيه اياه

هو استاذي الفاضل / ناصر بن عبدالله النصر الله


في ذمة الله راح سمح السجايا **** حرٍ حدر من ماكر العز والطيب
شيخٍ حباه الله حلمٍ ورايا **** ومن السماحة والحجا والتجاريب
ابو حمد راع الوفا والحمايا **** إبراهيم بن معجل زبون المطاليب
لو خيرتْ ياسعود فيه المنايا **** أرخت له حبال البقا عاش ماصيب
شيخٍ ضريحه في قلوب وحنايا **** وإن غاب في فج الطعوس الاهاضيب
ياخالتي تدرين هذي عرايا **** والعبد ماله عن قضا الرب تجنيب
ومادام للساس المعزْى حمايا **** تلقى به ظلال للندى والمواجيب
يالله يالمعبود جزل العطايا **** تسقي جدث صبح المحيا شآبيب
وامح الذنوب وخل عنه الخطايا **** واجعل مقره بين بيض الرعابيب
في صحبة المختار خير البرايا **** ولآل والصحب الكرام الأطاييب