المساعد الشخصي الرقمي

مشاهدة النسخة كاملة : ياناس تسممت إلحقوني؟؟

سمسومه
27-01-2006, 04:51 PM
هلا بالحبايب كلللهم

شلونكم ؟؟ <<< تبيكم تسألونها شلونك؟

المهم أنا مانيب طيبه قولو ليش؟؟

لأني امس تغديت مندي من المكي العصر وغطيته وحطيته بالمطبخ حلو ؟

المهم أنا مواصله يوم جت الساعه 9 ونص الصباح اليوم لقيت نفسي جوعااااااااانه

وتذكرت إني ما أكلت من زمااااااااااان

ورحت فتحت الرز وبديت أتصارع أنا وياه قصدي آكله !

المهم تخيلو إنه باااااااارد من العصر مخليته!!

وأنا إنسانه أقدر السلطه الحمراء الحاره (أم طماط) وكان فيه 2 سلطه وحده كنت ما كلتها قبل ووحده

أكلتها الصبح مع الرز البارد وكأن فيها طعم شي حاااااار بس مو حراره فلفل !!

ومشيت الحال قلت أصولها كذا يابنت!

يوم لبدت بطني ويطري علي أشم السلطه !!

وياليتني ماشميتها وععععععععععععععععععععععععععععععععع

محمضه وخاااااايسه إهي إهيئ إهئ إهئ وقسم أنواع الصياح

وأروح سيده للحمام وأحط اصبعي في حلقي <<< الله يقرفتس !!

والمهم طلع نص الرز <<< عادته خخخخخخ

والباقي عيا يطلع شربت تانكي مويه

وأنا أحس الخوره في حلقي وصحت ودقيت على أمي قلت إن مت ترى ماعندي أحد البيت إذا جاء رجلي من البر
خذو المفاتيح وتلقوني فوق جنب الكمدينه على السرير <<< من زين الوصف خخخخخخ


وتراي محلله كل النااااااس بس انتم حللوني وأصك السماعه وأبتس لأنه يورى لي إن طماطه حمراء منقطه بأخضر كبيييره

ومتجه لمي بتزقط عمري وتموتني

وكل ماحسيت بشي في حلقي زاد الصياح قلت يالله حسن الخاتمه طماطه سبب موتي الله يستربس

وتجيني فكره بنت حمار قلت ورى ما أدق عالدفاع المدني ؟؟

بس ذكرت إنهم مايستقبلون حالات تسمم <<<< جزمت إنها تسممت خخخخخخخخ

المهم وأشرب ببسي لأنه جاني إلهام يقول إن الغازات تقضي على الجراثيم <<< الله يخلف

وأحس كلما قرصت حلقي الغازات إنها تموت جرثومه ومبسوووووطه

ونممتتتتتتتت وأهلي يدقو يدقون والناس ترسل وأنا في سابع نومه وماعندي نيه رد !!

وخافو علي يحسبوني مت صدق ودقو على رجلي وماعنده إرسال بالبر

يوم قمت فجأه على طينون طيونون طييين <<< نوكيا تيرن خخخخخخخ

وإلاها أمي ومن الفرحه إنها لقتني حيه ماتدري وش تقول قالت الله ياخذ عمرتس وراتس ماتردين ارتعنا عليتس!!

قلت تعباااااااانه ومتسممه <<< شخصت حالتي ههههههه

قالت أمي : تعالي بس تغدي عندنا ؟؟

قلت : وش نوع طماطكم ؟ <<< صار عقده خخخخخخخ

المهم تحمدت وتشكرت على نعمة العقل والعافيه وبس



وأنا بأسألكم آلحين وش التسمم؟؟ وتحسون إنه جاني ؟؟

لأني أحس بغثياااااااان وشحطه في حلقي <<< تسمع بالأمراض !!!

تكفون علموني تراي وسوست على نفسي ؟؟

المشكله مابي أروح المستشفى <<< عقدتها خخخخخخخ

تكفون علموني بعد وش اللي يقتل الطماط !!

قصدي الجراثيم اللي في الطماط بسررررررررررررعه

بإنتظاركم
يـــزيـــد
27-01-2006, 05:43 PM
هههههههههههههههههههههههه الله يرجتس ياخبله

انا عرفت الاعراض الي جتس

اعراض الانفلونوا الطيور بدت فيك وتمكنت منتس

يعني روحي لمستشفى الشميسي عندهم غرفة يعزلونتس فيها لما الله يفرجها عليتس

الله يرحمها هع
سمسومه
27-01-2006, 06:08 PM
هلا يزيد

أقول أنت صاحي وإلا مهبول؟

لايصير الطماط طير وأنا مدري؟؟

شكلهم ضمنوه قائمة اللحوميات الطائره!!

تصدق إلا والله أنا وأنا آكل عرطت لي من الدجاجه عرطتين!!

الله يستر بس!!

أمممممممممممممممممممممممم <<< تفكر

إيه أصلا ياكذاب ريحة الطماط اللي خايسه مهوب الدجاج !!

لأن السلطه متبوكه في بلاستيك وبعذرها خاست خخخخخخخخخخخخخخ

صدق من قال إذا جاعت البطون خويت العقول <<<< نصابه توها مألفته!!

لا عاد الصز يقول المثل : عند البطون تذهب العقول

لا والمشكله أذوق طعم حمووضه بس أقول فلفلهم أصلي !! <<< على نياتها خخخخخخخخخ

مشكووووور يزيد عالتفاعل الي من جنب السالفه خخخخخخخخخخ

تحيتي لك .......
أمير سدير
27-01-2006, 06:09 PM
مايعالج هالتسمم الا مستشفى شهار
سمسومه
27-01-2006, 06:14 PM
هلا أمير سدير

شقصدك يعني ؟؟ هاه شقصدك ؟؟ <<< طيب لاتدفين!!

اصبر ؟؟؟

إيييييييه

آسفه فهمتك غلط قصدك نعالج الطماط في مستشفى شهار !! أمممممممم كذا صح والله فكره حلوه مررررره

والله إنك ذكي كيف جت هالفكره على بالك !!

بس والله المشوار بعيد في الطايف شكلي بأرسل لهم بطني في قوطي ويعالجونه على راحتهم!!

أحس هذي أصرف طريقه وإلا ؟؟

عموما شكرا عالرد وماقصرت خخخخخخخخ <<< ودها تضحك خخخخخخخخخخ
القيصـــر
27-01-2006, 07:33 PM
السلام عليكم


هههههههههههههه .... رز والصبح بعد لا وبااارد بعد .... لا وشطة مادري وش تبي يالله نتحمل الرز في العيد الصبح ونجي ناكلة في غير العيد ... الله يهيدك ياسمسووومه

ماتشوووفين شر ياوخيتي ...


وأروح سيده للحمام وأحط اصبعي في حلقي <<< الله يقرفتس !! خخخخخخخخخخخخخخخخ .... ذكرتيني حاجه ... الله يرجك وبس .
سمسومه
27-01-2006, 07:46 PM
هل أخوي القيصر


رز والصبح بعد لا وبااارد بعد

<<<< بلاك والله ماتدري إني أفطر تشكن برقر ومكرونة بشاميل !!!


.... لا وشطة <<< ياخي قصدي شي يسلك للرز


مايجيك شر خخخخخخخخخخ


ومشكوووور عالرد
حمد
28-01-2006, 12:23 AM
ان شاء الله ما فيك إلا العافيه

بالنسبة للتسمم ، نقلت لك بعض المعلومات لعلها تفيدك

:)

أما فيما يختص بالتسمم الغذائي المؤدي إلى النزلات المعوية فبعد تناول الطعام الملوث تستغرق فترة حضانة المرض من 6 ساعات إلى 48 ساعة ، ومن الممكن أن تمتد إلى 12 يوما . ويبدأ المرض عادة بالغثيان والاستفراغ يتبعه آلام البطن والإسهال . وعادة تستمر هذه الأعراض من ثلاثة إلى أربعة أيام ، مصحوبة في بعض الأحيان بارتفاع في درجة الحرارة في 50 % من المرضى ، وعادة ما تكون آلام البطن في المنطقة المحيطة بالسرة ومنها تنتقل إلى المنطقة السفلى اليمينية من البطن . أما الإسهال فيكون من ثلاثة إلى أربعة مرات يوميا إلى إسهال شديد ودموي مصحوبا بمخاط صديدي إلى إسهال شديد شبيه بالكوليرا . كذلك من الممكن أن يحدث التهاب شديد في القولون مما يزيد من فترة المرض إلى عشرة أو خمسة عشر يوما
سمسومه
28-01-2006, 12:34 AM
هلا والله بالصيدلي

هههههههههه والله ضحكت عالمعلومات أما لو ربعها فيني إن تسان فزعت الشرطه والدفاع المدني والإسعاف!!

لا والله ماجاني إلا غثيان وأصلا أنا عندي مرض الشقيقة ويجيب لي غثياااان دايم فعادي ماإستغربت الغثيان!!

بس أحس بشحطة طماط في حلقي <<< الله من زين الوصف!!

أنا موسوسه قاعده أتخيل بطني فيه جراثيم وأشياء وأرتااااع يعني نصفه نفسي بس!!

يوم صحيت من النوم عادي نفسيتي بس إلى الآن ما أكلت شي وأحس بالشحطه !!

تسلم يالصيدلي وماقصرت
مرهف الإحساس
28-01-2006, 09:55 AM
هههههههههههههههههههههههههه
والله العظيم انتي مهستررررررررة

وش ذا الشهوة ... أحد ياكل رز على الصبح ؟؟

لا وبعد بارد ومن امس العصر كمان؟؟ .... ليته على الأقل من الليل كان أخف شوي ..

بس لو انك تعوذتي من بليس ولا دخلتي اصبعك في حلقك كان ما صار اللي صار .. كان خليتي الرز في بطنك الين يطلع

طلعه طبيعية :)

اللي فيك مو تسمم ... وسواس بسبة السلطة اللي شميتيها وقلبت كبدك ..

بس حلو التوصيف ( يلقونك فوق جنب الكمدينه على السرير )cb:


يالله هالمرة عدت على خير ... واياني واياس تاكلين شي بارد ..لا و رز من زين الطبايع على الصبحية jup:


اهم شي عساك فرشتي اسنانكcl: بعد الخور والحموضة هذي كلها :) هههههههههههههههههههههههه

تحياااااااتي لك وقصتك حلوة وممتعة بالحييييييييييل...
فرفوشة
28-01-2006, 12:50 PM
خخخخخخ

ذكرتيني باختي
والله موب من زود اكل
بس حظها أقشر وطاحت لها بطعمية معفنة
مسيكينة أكلت لها وحدة بس

اسمعي روحي بس للمستشفى
أختي راحت وعطوها أشياء زينة أبر ومغذي
ونامت عندهم بس العصر والمغرب
مقناص سدير
28-01-2006, 01:56 PM
لاحول ولاقوة الابالله

اعوذ بالله منك يابليس

لاحول ولاقوة الابالله



شكله جايك جني فيه انفلونزا النعاج

يومنك شربتي الشطه متوزي وسطها عن البرد وانتي قمتي وعلكتيه وقام ولعب فيتس

هذي اعراض انفلونزا النعاج

علاجها ماهو اتي:
عليك انك تطلعين لصمان
وتروحين وتجمعين شوي سمر مع شوي ارطى وشوي اثل ومعها شوي سعف اذا امكن
همن تمرين لتس عماره في جده على كورنيش ابحر وتاخذين منها صيخ همن تروحين وتغطينه في شاطى الجبيل الصناعيه بلاه نضيف همن عاد تروحين لجيزان وتجيبين معس كسرة جيزاني يشب الضوء ويحمي الصيخ همن عاد تروحين لصعيد تجيبين اثنين صعايده عشان يمكونس وهم يسونس وتجيبين واحد من اهل حايل بعد حيي
همن ترجعين لصمان وتحطينه في خلاط كلهم وتشربينهم وبالف صحه وعافيه .



















<<<<<<<<<<<<<شكلهم يبي يودونك شهار انت



يالله تحياتي
كبير التنح والدلوخ
مقناص سدير
المعنّى
28-01-2006, 06:11 PM
سمسوووووووووووومه

مسيكي بالخير بسررررررررررررررررررعة الى اقرب محطة بنزين تبيز قااااز واشربي لك كاس مخلوووط بشوي زيت خروووووع كان فيكي سم بتموتين وكان ما فيكي سم برظوه بتموتين بس الثانيه موتتها اهون شوي



ويالله بدور لك وصفه ثانية
جورية
28-01-2006, 07:32 PM
سماسيمو بسم الله عليتس وعلى قلبتس يا بعد عمري

ليته في بوش وشارون وكيري ولا فيتس يا حبيبتي

والله ضاق صدري عليتس بس تستاهلين ياختي جوعانه كلي خبز وجبن حليب وشابورة مهوب رز <<<<< الله يحوم كبدتس

عموما قدر الله وماشاء فعل لكن خذي درس للمرات الجاية

لا خفتي من شي انه متسمم اشربي حليب لانه يسوي طبقة حماية للمعدة من اي بلى <<<<<< طماط معفن مثلا وعععععع

ما تشوفين شر يا قلبي وطهور ان شاء الله
سمسومه
28-01-2006, 08:05 PM
هلا مرهف المحماس

ياخي لمن يواصل الواحد مايفرق بين الصبح والليل كله واحد ياكل خبزه وجبنه وإلا مفطح!! <<< قاعدة الدبب



(((اللي فيك مو تسمم ... وسواس بسبة السلطة اللي شميتيها وقلبت كبدك ..)))

تهقاه كذا ياأخيي؟؟



(((بس حلو التوصيف ( يلقونك فوق جنب الكمدينه على السرير )))

<<<< مشكلتي متعوده أوصف للناس أمي لو بتوصف لأي ناس لمطعم لحمار لطلبيه تدق علي في بيتي تقول هاتس

الرقم ذا وصفي لهم بيتنا؟؟؟ <<<< دلوله بسم الله علي!


(((اهم شي عساك فرشتي اسنانك بعد الخور والحموضة هذي كلها هههههههههههههههههههههههه))))

الله يرجك وقسم كأنك تشوفني مغير متعنقطه بهالفرشه وطلعت لثتي مقلمه من التفريش وسنوني تمخشت من الحماس!!

والله ولساني تشقق وأنا أفرشه يابعد الدنيا أنا <<< راحمه نفسها!!!

لا واسكت بعد أزيدك من الشعر سطل إني ماعاد أكلت شي إلى اليوم سوت لي ماما غدا وأرسلته لي لأني
بغيت أنقرض من الجوع!!!


تسلم عالرد أخيي وماقصرت
سمسومه
28-01-2006, 08:39 PM
فرفوشه

هلا أم الفشافيش <<< جوعااانه

((( ذكرتيني باختي
والله موب من زود اكل )))
<<< وش قصدتس؟ يعني أنا من زود أكل خخخخخخخ

(((بس حظها أقشر وطاحت لها بطعمية معفنة
مسيكينة أكلت لها وحدة بس))))

<<< اسكتي أنا كنت أكلم وأنا آكل يعني مدري كم أكلت من ملعقه؟؟ بس يمكن إني هديت فيه؟

(((اسمعي روحي بس للمستشفى
أختي راحت وعطوها أشياء زينة أبر ومغذي
ونامت عندهم بس العصر والمغرب))))

<<< والله ما أروح بيقولون فيتس ولاده وإلا كلى وإلا جدري!!!

يا أخيتي أنا كل ما أروح يجيبون لي طاعون مره يقولون تضخم قلب ومره مرض شقيقه ومن هالأمراض!!

بس تدرين أنا مو حاسه بشي غير الغثيان وهو فيني من زماااان بس هو نفسي أكثر من إنه مرضي؟؟

تسلمين عنوني وما قصرتي

تحياااتي لتس
فهد الرشـيد
30-01-2006, 02:09 AM
هلا أختي

عقب هالكلام اللي قريت

عرفت معنى سمسومة يعني


ضد التسمم

بعدين اللي حسيت به هو

تسمم الطماط من بطنك

ما توقع يلقى هالجو الحار ( داخل بطنك ) بعد براد الليل

ومن قريت الصبح وأكلت رز بارد وهالكلام

دريت إن الشهية عندك باب إسعاف ما تسكر

والمذاق عندك فرن مقصدر ما يدري وش يحطون عليه

وبطنك خلاط طاحونه بس هالمرة طاحت فيه حصاه

والحمد الله على سلامتك

وطمنينا على الطماط وش صار عليه

وتقبل حرارة توصيفي

وإن جاس شيء حلليني أول ما ترجفين
المعنّى
30-01-2006, 09:31 AM
سمسومه

صبحكي بالخير بعد كلام الهدوء عز الله انك رحتي فيها وصدقين تراني اعرفه زين عينه احر من الجمر

ويا ويلك ويا سواد ليلك الله يلهم اهلك الصبر والسلوان عقب فرقاك منتي ميته من التسمم بتموتين من رصااااصة الهدوء وتراها ما تخطي كم واحد راح وطي بسبته


الله يستر عليكي يا سمسومه
صقر باهله
30-01-2006, 09:53 AM
يا ساااااااااااااااتر

رز وبارد ومن العصر

ولهالحين عايشه قطوه انت

<< بينظلها

ماشاء الله لا يقعد يجيتس شي همن يبلوشني اهلتس

الحمد لله على السلامه

وعادي تصير اساليني انا خبره في التسممات اللي زي كذا

عزوبي وبعيدن عن اهله ومافيه الا قوة مطاعم

هذي دواها بيره تفاح هولستن ونومي

وما جاتس عندي

<< تراك طولتها وهي قصيره
فرفوشة
30-01-2006, 11:50 AM
((( ذكرتيني باختي
والله موب من زود اكل )))
<<< وش قصدتس؟ يعني أنا من زود أكل خخخخخخخ

والله انتس لبيبة
فهد الرشـيد
30-01-2006, 01:03 PM
سمسومه

صبحكي بالخير بعد كلام الهدوء عز الله انك رحتي فيها وصدقين تراني اعرفه زين عينه احر من الجمر

ويا ويلك ويا سواد ليلك الله يلهم اهلك الصبر والسلوان عقب فرقاك منتي ميته من التسمم بتموتين من رصااااصة الهدوء وتراها ما تخطي كم واحد راح وطي بسبته


الله يستر عليكي يا سمسومه


الله يخليك يا

المعنى

عقبال عندك تولم أنت تلميذي مع بداية السنة الجديدة

وإن شاء الله من ساكتون إلى أر بي جي

تحياتي
لهفة الخاطر
30-01-2006, 04:22 PM
الحمد لله على سلامتك ياسمسومه
والله يبعدي احد يأكل رز بايت بعد إنت الله يهديك
بس عادي متعودتها يمكن >>>بس هالمررررره مافيه فكه
اقول سمسومه وراتس ماشربت لبن يقولون إنه ينفخ البطن وإذا انتفخ بطنك راح ينفجر وتتخلصين بسرعه من الأشياء المستحوذه بداخلك
اهم شئ إنك تتعافين وبسرعه بأي وسيلة كانت
سمسومه
30-01-2006, 09:59 PM
هلا مقناص

وش فيك قمتا تحلوز كنك شايف لك جني!!

وش انفلونزا النعاج؟؟

أخيرها انفلونزا الطماط والدجاج <<< شي فيه أكل بتحفظه خخخخخخ

((((يومنك شربتي الشطه متوزي وسطها عن البرد وانتي قمتي وعلكتيه وقام ولعب فيتس ))))

<<< والله لو بيتي في الجراديه خخخخخخخخ

((((((علاجها ماهو اتي:
عليك انك تطلعين لصمان
وتروحين وتجمعين شوي سمر مع شوي ارطى وشوي اثل ومعها شوي سعف اذا امكن
همن تمرين لتس عماره في جده على كورنيش ابحر وتاخذين منها صيخ همن تروحين وتغطينه في شاطى الجبيل الصناعيه بلاه نضيف همن عاد تروحين لجيزان وتجيبين معس كسرة جيزاني يشب الضوء ويحمي الصيخ همن عاد تروحين لصعيد تجيبين اثنين صعايده عشان يمكونس وهم يسونس وتجيبين واحد من اهل حايل بعد حيي
همن ترجعين لصمان وتحطينه في خلاط كلهم وتشربينهم وبالف صحه وعافيه))))

حشا هذي يبي لها سنتين على هالمشاوير إن شاء الله تجيني انفلونزا البيدجان ولا أطبق خرطك هذا!!

(((<<<<<<<<<<<<<شكلهم يبي يودونك شهار انت))))

<<< تسنك تدري باللي في خاطري خخخخخ

مشكووووووور قليبي .........












المعنى

هلا فيك ........

((((بسررررررررررررررررررعة الى اقرب محطة بنزين تبيز قااااز واشربي لك كاس مخلوووط بشوي زيت خروووووع
كان فيكي سم بتموتين وكان ما فيكي سم برظوه بتموتين بس الثانيه موتتها اهون شوي ))))


وعععععععع شكلك ناويها علي بس والله أتوب ماقد عمري سويت شي <<< ارتاعت

مشكور المعنى











هلا جوريه حبيبتي

شفتي شلون أنا تعبانه إهئ إهئ <<< ماصدقت أحد يعطيها وجه خخخخخ

(((((والله ضاق صدري عليتس بس تستاهلين ياختي جوعانه كلي خبز وجبن حليب وشابورة مهوب رز <<<<< الله يحوم كبدتس ))))))

وعععععععععععع الله يكوم النعمه ما أقدر آكل هالالأشياء <<< اللي يشوفك يقول إنك ماكلتي رز بارد الصبح!!

تسلمين قلبي ماقصرتي عسى الشر يتعداتس يارب










هلا الهدوء

ضد التسمم <<<< بسم الله علي

((((بعدين اللي حسيت به هو

تسمم الطماط من بطنك)))) <<<< يابعد تسبدي يا أنا والله إن الطماط الربحان اللي دخل بطني خخخخخخ

(((ما توقع يلقى هالجو الحار ( داخل بطنك ) بعد براد الليل))))

أكيد كلام سليم %

100 طبقة شحم بتسوي وقايه ولو تحط زيت في بطني وآكل بيض سمعته يقول تشششششششش <<< ينقلي!!

((((دريت إن الشهية عندك باب إسعاف ما تسكر)))))

بسم الله تكفا انضلني نص نضله عشان يخف أكلي بس مو أفقد الشهيه !!!

(((والمذاق عندك فرن مقصدر ما يدري وش يحطون عليه)))))

إخس تعرف حركات العجازين خخخخخخ تصدق على عجزي ماقد سويتها !!!

كل يوم أغسل الفرن يابعد الدنيا <<< قصدتس كل شهر خخخخخ

(((وبطنك خلاط طاحونه بس هالمرة طاحت فيه حصاه))))

والله يا إنك تعرف تتنحت صح خخخخخخخخخ

(((وإن جاس شيء حلليني أول ما ترجفين))))

والله اليوم جبت العيد فيني يالهدوء !!

بطني صااااااايل علي مووووووووووووووووت

بس والله ما أحللك إلين أموت وإذا مت شاور الورثه

مشكوووووور وماقصرت











فاصل إعلاني : المعنى

يمامااااااااااااااااا أجل عينه حاره عز الله راحت كرشتي فيها !!!

تكفون إن مت سلمولي على ربى الجنان ومسز سدير سلام واااااااجد وإن لقيتو جود الحزن إمطخوها لي
ولايمطخها إلا السنبله عني <<<< الله من زين الوصيه !!!!

تسلم يالغالي ....






هلا صقر باهله

<<< نفسي أعرف وش معنى باهله؟؟

رز وبارد ومن العصر

ولهالحين عايشه قطوه انت

<< بينظلها


<<<< والله لو تعيش معي يوم إن تصير مثلي تكل كتكات مع شاهي ومعجنات مع قهوه!!

والله من جد ماعندي أي مانع نستقبل ولا نرد ولي مزاج في الأكل ياااااااه يحبه قلبك!!

ماشاء الله لا يقعد يجيتس شي همن يبلوشني اهلتس

<<<< والله البلشان رجلي هو اللي رايح للبر ومخليني أجوع !!

(((وعادي تصير اساليني انا خبره في التسممات اللي زي كذا

عزوبي وبعيدن عن اهله ومافيه الا قوة مطاعم)))

عادي حتى المتزوجين في حالة الإختبارات والتعب عندهم حالة استنفار هات يامطعم رد يامطعم

في الإختبارات لأني لازم أتغدى في مكان كويس وآكل زين من شان أذاكر زين

وأنا والله من جنبها لامذاكره ولاهم يحزنون!!!

هذي دواها بيره تفاح هولستن ونومي <<<< ما أحبها حدي أنا راوخ تفاح وإلا مشمش ياخي هولستن تسنها خمر !!

<<<< اللي يسمعتس يقول ذايقته خخخخخخخ

إلا والله ذايقه الخمر يومي أسكر إذا ماتدري عن سالفتي رح للفكاهي وشف موضوع لي قديم شوي

<< تراك طولتها وهي قصيره

أبد تمووووووون

مشكور يالغالي وماقصرت

تحياااااااه قوياااااااااااه <<< متأثره بالمجد!








فرفوشه

أنا لبيبه وأنتي ألبب وإن كنتو ريحا فقد لاقيتو إعصار <<< نصوص أولى متوسط خخخخخخخخ

تسلمين





هلا قلبي المتيم

هلا حبيبتي ربي يسلمتس ويخليتس

مشكلتي مواصله وأحسني إذا مانمت يعني مابعد خرب!!! <<<نظرية سمسومه

والله إنتس صادقه مو كل مره تسلم الجره!

اقول سمسومه وراتس ماشربت لبن يقولون إنه ينفخ البطن وإذا انتفخ بطنك راح ينفجر وتتخلصين بسرعه من الأشياء المستحوذه بداخلك

<<<< بعد زود في النعمه لبن خخخخخخخ وقسم إن مايتحدر إلا بعد شهر!!!

اهم شئ إنك تتعافين وبسرعه بأي وسيلة كانت

<<<< أجل ظنتس أسوي اللي قاله المعنى!!

تسلمين قليبي وماقصرتي ......
فهد الرشـيد
31-01-2006, 01:46 AM
الله يطول عمرك


سمسومة

أشكرك على رحابتك

وما تشوفين شر

وتراهم يبالغون فيني

وأنا متأكد إني ما ضرت الا اللي يزعلني

وسمسومة ما تزعل أحد

يعني بريء من تهمت المعنى

والله يخلي لنا بطنك ذا اللي وسع صدورنا وضحكنا

يعني رب ضارة نافعة
سمسومه
31-01-2006, 03:58 PM
igh fhgi],x

<<<< مادريت انه يكتب انقليزي خخخخخخخخ

والرطن اللي فوق يعني هلا بالهدوء

أدري السديراويه يبالغون مووووووت

وسمسومة ما تزعل أحد <<<< الله يسلمك والله إنك صااااااااز بس الناس يزعلوني أنا ما أزعل أحد!!!

والله يخلي لنا بطنك ذا اللي وسع صدورنا وضحكنا

<<< آمين بس أبشرك اليوم وحده ماشافتني من الترم الفايت تقول كرشتك صاغره !!! <<<فرحانه خخخخخخ

مشكور عالرد يالغالي
سديراوية
01-02-2006, 12:32 AM
ياااااااااااربي ربااااااه

رززز على الصبح

حرااام عليتس وبقوة

هههههههههههههههههههههههههههه

تدرين انتس ضحكتيني بسالفتس

بعذر اهلتس لو ارتااعوا عليتس .. ما ينلامون

طيب اسمعي نصيحتي ************************>> وخرووو فيذاااك

اشربي لتس سفن اب مع ليمون

والا اشربي مررة >> شددي على الراااااء

************************ عز الله متي على يدي


اسم الله عليتس


مافيتس الا العاافيه

وهذي بس وسااااويس
سمسومه
02-02-2006, 07:23 PM
هلا سدردر <<< تدلعتس خخخخخ

يا أخيتي قولي الحمدلله تصدقين لو تعزميني عل ىمفطح الصبح ماعييت خخخخخخ

أهم شي أصير مواصله!!!

اشربي لتس سفن اب مع ليمون <<<< وش تحسبيني مقلى وإلا قدر ؟؟؟ حشا صار فيري !!!

أنا سمسومه!!!

والا اشربي مررة >> شددي على الراااااء <<<< هذي مير أهون شوي خخخخخخخ

<<<< كل يوم تخمرها عشان تحارب البكتيريا !!!

تسلمين حبيبتي ماقصرتي وأكيد إني موسوسه مادام هذا زوجي خخخخخخ <<<< بيجلدها !!

تحياتي لتس
المغترب
04-02-2006, 03:07 AM
((وأنا بأسألكم آلحين وش التسمم؟؟ وتحسون إنه جاني ؟؟

لأني أحس بغثياااااااان وشحطه في حلقي )))

سمسمومه الحمد لله على السلامه

أنا شخصت الحاله وأكتشفت المرض



مبروك




مبروك







بـــتـــصـيــريـــن أم وتعقلين شوي




مبروك.....
.

هههههههههههههههههههه



.
أبو إبراهيم
05-02-2006, 10:16 AM
سمسومه

ماتشوفين شر


ودواتس عندي


خذيلت شوي فلاش لاتكثرين

وحطي معه 15 ملم كلوركس

وبيالة ماء وتمضمضي بها

وان شاء الله عقب ذي الوصفه مب شايفينك في المنتدى :)
بسمة سدير
05-02-2006, 04:42 PM
الله يرج بليسك



وأنا جاية طايرة أدور عن علاج للتسمم

الغالية سمسومة متسممة


الله يكفينا الشر


بس الحمد لله

بعد ما قريت الموضوع رحت أدور عن علاج للصرقعة


لكن للأسف طلعوا الناس عاقلين ما يحتاجون علاج

ما دروا إن عندنا مب واحد وإلا اثنين مصرقعين لا...عندنا شلة صرقعة
بسمة فرح
12-02-2006, 10:40 PM
اهلين سمسومه
كيفك واخبارك
والحمد لله على السلامه
حبيت اقولك ان طريقتك في الكتابه بسراحه كوميديه ميه في الميه الله يرجك

بس والله احس اني ابستفرغ يوم قريت سالفتك خصوصا يوم حطيتي اصبعك بحلقك
وععععععععععععععععععععععععععععععع الله يقرفك 000000000000000
سمسومه
13-02-2006, 07:46 AM
المغترب

هلا بك أخيي

تتوقع إني بأصير أم ؟؟؟؟

الله يرجك أنا أم وأم لــ (تميم)

بس يمكن تقصد أم لولد ثاني أو بنوته !!! تصدق يمكن؟؟

بس أول مره أسمع إن الحامل يجيها شحطه في حلقها!!!

((((بـــتـــصـيــريـــن أم وتعقلين شوي)))))

ماعرفنالكم !! قلنا مصاخين قلتو : مناب عاقلين؟؟

فيها شي لو تسممت <<<< ضعيفه فاهمه غلط خخخخخخخ

تسلم أخيي على الرد وماقصرت

تحياااااااااااتي










أبو ابراهيم

هلا أخيي

الله يسلمك

((((خذيلت شوي فلاش لاتكثرين)))) <<<< مادخلته بيتي عشان أدخله بطني خخخخخخخ

<<<<< مسويه كافشتك خخخخخخ

وبيالة ماء وتمضمضي بها <<<< إخس تعرف بعد للغرغره ههههههههههه

((((((وان شاء الله عقب ذي الوصفه مب شايفينك في المنتدى))))))

أفا عليك أبو ابراهيم لهالدرجه ودكم تفتكون مني؟؟

أدري مالين من خشتي بس ماتوقعت تعدموني بهالطريقه؟؟

<<<< ضاق صدرها!!!

<<< وإلا دلخه مفكره تسويها هاااهاهاههاااااااي

تسلم لي أخيي ولاتزعل تراي أمزح معك فحسب <<< أما حسب ذي متعوب عليها!!

تحيااااااااااااتي












هلا بسيمه

<<< بدت تمون!!

شفتي شلون متسممه ومحدن جاب خبري؟؟ <<< نكاره خخخخخخخخ

بعد حتى أنتي ماصدقتي إني مصخنه؟؟

وش فيكم صز كاتبه الموضوع وأنا أتألم وراحمه حالي بقوه مادريت إن السالفه بتطلع فكاهي!!!

والله العظيم إني دخلت وكتبت الموضوع دغري وبدون سابق تفكير بس كنت أبغاكم تطنوني على حالتي!!

لكن الظاهر إني ماش بأعتزل الطب!!!! وألجأ للفكاهي!! <<<< مسويه فاهمه خخخخخخ

((((ما دروا إن عندنا مب واحد وإلا اثنين مصرقعين لا...عندنا شلة صرقعة))))

الله يسلمك <<<< مخفه ههههههههه

تسلمين يالغاليه

تحياااااااتي






هلا بالبنت الدلوعه

أنا طيبه الحمد لله وبدليل إني قوة شهيتي للأكل تضاعفت 620 مره عن أول !!! <<< مصيبه ذا البنت!!

تصدقين لو جعت يمكن آكل أهلي!!

والله يوم رحنا للعوده وصك مخبزهم بدري خيرت أهلي بين إني آكلهم أو يجيبون لي أكل!!!

حبيت اقولك ان طريقتك في الكتابه بسراحه كوميديه ميه في الميه الله يرجك <<<< حرام عليكم كنت أكتب وأنا حزينه!!!

تسلمين على الرد أخيتي