ديـوان الشاعر ابن عــمــــــــار ..

[( عابرة سبيل )]

بسم الله الرحمن الرحيم

السلام عليكم ورحمة الله وبركاته


حرف .. غني بـ روعه .. اطربنا

وامتعنا كثيراً ..

هنا ديوان يضم جميع ماباح به قلمه .. شاعرنا ابن عمــــار



قصيدة أهديها لأهل ســدير وأرجوا ترتقي لأذواقكم...


قصيدة .. يا ســــديـر سـبب لي وداعــك مـصـيـبات...................................,,,,


البارحه هلّت من العـين .. دمعات=سبـّة فـراق اللّي على النـفـس مشـقـين
سـهـرت لـيـل ٍ بالـشقا.. والمعانـات=من لوعتن..وسـط الحشا..يا محبـين
على الذي عليـهم القلب ما بات=ويونّ ونّات ٍ على الـشـوق ..سَهرين
شوقي على ذيك الليالي ..المريفات=يارب تـجمـعـنا..على الود عجلـين
وقت ٍ مضى فيه الـسـعادة مـسـرّات=مع ربـعـي اللي للـشدايد شديـدين
في ديرة ٍ يِكـتب .. لاهلـهـا سجلاّت=أهل الكرم والجود واهل .. الميادين
واهل الـنـقا واهل العلوم .. المجيدات=تـشهد لهم في نجد روس..المعادين
واهل السخا والطيب واهل العطيّات=واهـل الـدلال اللي على الـنار مـركـين
ياسـدير سـبب لي وداعـك مـصيـبات=يـوم الـوداع اللي .. يصيب الـمحـبـين
لاشك ابصبر من شـقا الروح والـذات=والصـبر مـفـتـاح الـفـرج لـو بعـد حـين
يـالله يا للي مـن عـطـايـاك جـــزلات=مـا غــيرك اللي مـن عــطـايـاه جـزلـين
يا فارج الضيـقات وقت المصـيبات=يـا عــالــم ٍٍ مـا بـالــسريرات .. مخــفـين
أدعـي عـظـيم ٍ واتحرّى الإجـابـات=وارجي كـريم ٍ..كـلــنا فــيه راجــين
يجمع بنـا مع رفـقة العـمر جمـعـات=والوصل يبقـى .. بينـنا..دوم ٍ متـين
واختم جواب القلب من جزل الأبيات=على .. نـبـي ٍ.. وضـّح الدرب للـعين
الـهادي .. اللي قـادنا ... للـهـدايـات=صـلات ربي .. عِـــدة أيــام وســنـين
واعــداد هــمّال الـمـزون..الــمـهــلاّت=على نبـي ٍ ثـبـت الله ... به الـدين

أخوكم عبدالعزيز بن سعد ابن عمار


الثلاثاء 25 المحرم 1428هـ


(( أضغط هنا للإطلاع على القصيدة في بوح القوافي )) (http://www.sudeer.com/vb/showthread.php?t=40973)


وللإستماع للقصيدة أضغط هنا

http://up.ftahilah.com/up//uploads/557f342a56.mp3

[( عابرة سبيل )]

السلام عليكم ورحمة الله وبركاته ،،


هذه القصيده .. الرائعه .. ذهبت لـ قسم التميز لـ فوزها بـالمركز الثاني في شهر ربيع الاول


قصيدة .. ذكرتني وقت ٍ لها الـروح تشتـاق ........................,,, ‏



سر ياقلم واكتب تعابيـر مشتـاق=واكتب قوافي من ضميـري كتابـه
واكتب لنا عذب القصايد والاشواق=وارسل مع الريح الهبوب وسحابـه
لعيون ترفٍ لاجله الـروح تنسـاق=الغالي المجمـول ألـفٍ هـلا بـه
قلّه سلامك داخل القلـب خفـاق=يوم أرسله مع شوقه اللي مضى بـه
أقبل رسوله يحمل الشـوق بارفـاق=والقلب مني بالخفـوق ألتـوى بـه
ياصاحبي بالحيـل بالحيـل شفّـاق=أشفق على حب ٍ تجدد .. صوابـه
طلّت جبينك كنها شمس الاشـراق=والاّ كما ضي القمر .. في نصابـه
وللعين سِحر ٍ أنتشى وسط الأعماق=وابحرت مع طيف ٍ خذانـي سرابـه
والخد نور ٍ في دجى الليـل بـرّاق=يكشف سنا خديه نور ٍ .. ضوى به
ذكرتني وقت ٍ لها الـروح تشتـاق=وقت ٍ على عهد الصبا .. واسفى به
وقت ٍ طوى صفحات الأيام بوراق=يوم الهوى ..عندي وعندك زهابـه
واللي مضى من فايت العمر بفـراق=يعطيك من باقي .. حياتـه شبابـه
يا طير ياللي عانق الريـح بسبـاق=لا هنت يا طير ٍ .. طلبتـه اطلابـه
أرسل جواب القلب صوبه ولو ضاق=وانثر سلامي لـه وشوقـي ومابـه


أخوكم عبدالعزيز بن سعد ابن عمار

الثلاثاء 18 المحرم 1428هـ

(( هنا تجدونهـــــــــــا في قسم التميز )) (http://www.sudeer.com/vb/showthread.php?t=40703)

[( عابرة سبيل )]

السلام عليكم ورحمة الله وبركاته

نص أرجو أن يرتقي لذوقكم الرفيع..تحياتي للجميع


قصيدة .. أعد واحسب الليالي والايام......................... ‏


أعـد..واحـســب ..الـلـيـالــي والايـــــام=واصبر على وقتٍ من العمر .. محسوب
وادعـي عظيـم الشـان مـن كــل مـاهـام=وجهي علـى ميـلات الايـام .. مكلـوب
يقـضـي عـلـيّ الـهـم .. وصـيـر مـقـدام=للخير..وفعل الخير ..مـن غيـر مطلـوب
يـا وجـدي من..هـمّ ٍ علـى البـال عــوّام=همّ ٍ على صـدري كمـا الحـرف مكتـوب
أضحك وانا فـي خاطـري حـزن وحطـام=وامشي طريق ٍ فيـه مـن قلبي دروب
درب ٍ خـذانـي فــي مـتـاهـات الأحـــلام=ودرب ٍ غدابي فـي دجـى الليـل منكـوب
ودرب ٍ مضـى بالعمـر عـام ٍ بـعـد عــام=واصبحت أنـا ويّـاه صاحـب ومصحـوب
عــزي لقـلـب ٍ يقـضـي اللـيـل مــا نــام=كنـه سجيـن ٍ بيـن الاضــلاع مـرعـوب
مــا همـنـي لا ضـاقــت الـحــال مـــادام=ربـي كفـيـل الـحـال مــن كــل مـكـروب
يـا طـيـر يالـلـي فــوق الاريــاح حــوّام=يـا فـرح عيـنـي شوفـهـا كــل ماتـنـوب
أوصــيــك دار ٍ لـلـقـرايـب والاعــمــام=تنثـر سلامـي فــي سـمـا كــل محـبـوب
واحفـظ وصـاتـي مــن حـسـود ٍ ونـمـام=يفـرح إذا صـار الـردى فيـك منـصـوب
وصـــلات ربـــي عـــد طـيّــات الأيـــام=علـى النبـي اللّـي عـلـى نــوره نـجـوب


أخوكم عبدالعزيز بن سعد ابن عمار

الأحد 15 رجب 1428هـ



(( أضغط هنا للإطلاع على القصيدة في بوح القوافي (http://www.sudeer.com/vb/showthread.php?t=47703) ))

[( عابرة سبيل )]

السلام عليكم ورحمة الله وبركاته


اخواني وأخواتي أضع بين أياديكم هذه المتواضعة راجياً أن تنال بعضاً من استحسانكم

وتقبلو أعذب التحايا والتقدير


قصيدة ... الشمس غابت وأقبل الليل بسكون ....



الشمس غابت واقبل الليل بسكـون=والنفـس ضاقت من لـهايب شقاها
زادت غرابيل الزمن..يالله العون=وضاق الحشا من جورها في مداها
في داخله حزن ٍ.. ثـقـيل ٍ ومكنون=وفي داخله.. لوعات هم ٍ..لواها
كـنّه غريق ٍ في بحـور ٍ..بلا عـون=وش حيلة الغرقان من كـثر..ماها
يضحك وقلبه بين الاضلاع مطعون=ويخـفي طـعـونه عن عيون ٍ لفاها
يضحك وهو من جور الايام مغبون=ويكـتم عن الأحباب نارن لضاها
يمشي على كف القدر وين مايكون=ويصبر على المكـتوب لامن عناها
ويصبر على ضيمات الايام بالهون=وعزي لحاله من همـوم ٍلقـاهـا
إليـا ضـواه الليل دمعه يـهلّون=من حرّة الـعبرات جاوب.. نداهـا
يون ونــّة اللي بالحبس مسجون=ويطلق عناهـا من محاجر حشاهـا
يشكي زمانه من مشقّات وديـون=أو من حياتـه.. بالمشاكل حواهـا
ويشكي سنين العمر لـلّي يعدون=أو من منات الروح تاهت خطاها
وين السعادة اللي هامت بها عيون=وين الفرح اللـي تـغنّى وراهـا
يالله ياللي كل من جاك محزون=ياواحد ٍ كل الخـلايـق كـساهــا
أسألك يا إلـهي الصبر والعـون=وافرج همـوم عبدك اللي شكاهــا
واختمها بالصلاة من خالق الكـون=على نـبيّه..عــد غـيم ٍ ملاهــا


أخوكم عبدالعزيز بن سعد ابن عمار


الثلاثاء 21 ربيع الآخر 1428هـ



(( أضغط هنا للإطلاع على القصيدة في بوح القوافي (http://www.sudeer.com/vb/showthread.php?t=44192)))

[حمد ولد أبو حمد]

السلام عليكم ورحمة الله وبركاته

مبارك عليكم الشهر وكل عام وانتم بخير...

أضع بين أيديكم هذه المتواضعة وأرجو أن تنال استحسانكم..

مودتي للجميع...


قصيدة .. نجلاااا العيون ........................,,,




الصبر طال وضاق بالصدر الأنفاس=والعين هلّت ما بقى من حزنها
والقلب من ردى حظوظه والاتعاس=يبكي دموع دمّه اللّي سجنها
يا ليل قلي عن خطيّات الافلاس=وخبرني عن ذيك الضماير وعنها
ماكنت اظن ان المحبة لها قياس=ولا هقيت اني أبدفع ثمنها
و ماكنت اظن بعض البشر مابها احساس=ولا حسبت احساب ماضي زمنها
حطّيتهم بالعين وفي عالي الراس=واغليت ناس ٍ عقْب ماصرت منها
وعزّيتهم في كل الاحوال باحساس=صادق ومن طيبة تناثر علنها
إليا غشاهم من مشينات الادناس=وضاق الحشا بصدورهم من مشنها
أوجست فيهم علّتن مرّها حاس=خافي هموم ٍ بالضماير وطنها
واضيق إلى شفت الحزن فيهم الباس=وتصيب نفسي شقوتن مع محنها
واشدها واقول يانفس لا باس=قوّي عزوم القلب وهلّي مزنها
هلّي وفكّي ضيقهم واطردي الياس=وداوي جروح قلوبهم من وهنها
وفلّي نبات الطيب من نسل الألماس=نسل ٍ تغنّى بالمكارم لحنها
( إيه) والله اني ضايق الصدر محتاس=من لاهب ٍ يحرق خفوقي لسنها
كني كما نارن لهايبها بحباس=من كل صوب ٍ مالها..فرّ..عنها
والاّ كما طير ٍ على ريح نسناس=العين دونه كم صويب ٍ وزنها
ما يدري عن هاك المقانيص والناس=يوم انهم برماحهم صوّبنها
يونّ جرحه غبنتن بين الأنفاس=ونارن لضاها لجّت الروح منها
ويا طيّ قلبي طيّت الحر قرناس=حال الذّي عن غايته وابعدنها
حوّام مع صلفات الأرياح عسّاس=يبغى المرام اللي لعينه ضمنها
ويا جرّ قلبي جرّ سيلن للإغراس=يجرها بعروقها مع غصنها
على هنوف ٍ ناعس الطرف ميّاس=الفاتن اللي نور عيني فتنها
نجلا العيون اللي لها الرمش حرّاس=ورموش عين ٍ كحلها جملّنها
والوجنتين اللي كما الورد غرّاس=إليا استحت زاد الخجل في حسنها
يا فرحة ٍ صارت بالاقدام تنداس=والضيم مع..مرّ..الليالي سقنها
حاطوا عليه وغيّبوا نور الاشماس=حسبي على جرح ٍ يسبب حزنها
وحسبي على الذّي تسبب بالاتعاس=عذّالها اللي من حياتي خذنها
لا واعذاب القلب من أقرب الناس=حسبي عليهم يومهم يجرحنها
القلب ينزف والمعاليق يبّاس=والدمع فوق أوجانها سال منها
اللّي طوى خلّي طواني بمقياس=واللي سقاه ..المر.. روحي غبنها
خاب الرجا واصبحت في ليل الادماس=أسري مع الهوجاس واذكر زمنها
نور الليالي والهوى كان نبراس=واليوم غابت واختفى النور عنها
ويوم الغضي يرسل لنا الشوق باحساس=صدق المشاعر والغلا ورّدنها
واليوم كلّن مع خليله طوى الياس=طيّت سنين العمر لامن طونها
وصلات ربي كل ماهب نسناس=على النبي وعدّ غيم ومزنها






أخوكم عبدالعزيز بن سعد ابن عـمـار


الاربعاء 7 رمضان 1428هـ


(( أضغط هنا للإطلاع على القصيدة في بوح القوافي )) (http://www.sudeer.com/vb/showthread.php?t=50451)

[حمد ولد أبو حمد]

السلام عليكم ورحمة الله وبركاته

أخواني وأخواتي اسمحو لي أن أقدم لكم هذه المتواضعة التي نظمتها في أحد أعمامي
الشيخ الشاعر عبدالله بن سعد بن عمار وقد تجاوز من العمر المئة أو أكثر وهو ممن عاصر زمن الشاعر ابراهيم المزيد رحمه الله,,,, ويعتبر ركيزة الأسرة ومرجعها متعه الله بالصحة والعافية.....


قصيدة .. قم ياقصيدي وانظم القاف لاهنت.............................,,




قم ياقصيدي وانظم القاف لاهنـت=وياهاجسي قدم من الجزل مـالاق
مالاق من جزل المثايل إلى كنـت=مع سجّت الأفكار تبحر بالاعمـاق
واسمى المشاعر هاتها لى تمكنـت=وابلغ تمام القول بالصدق ينسـاق
في حق شيخ ٍ بالوصل فيه ثمنـت=الواجب المفروض لو هو بالآفـاق
شيخ ٍ قي قلبي له من القدر كونت=صدق المشاعر والمحبه والاشواق
وانا الذي من واهج الشوق أيقنـت=اني على .. شوقة محياك ..مشتاق
ومالي جدا من مانع ٍ مـا تمكنـت=أرد أمر ٍ يرغـم النفـس تنسـاق
أسوقها على عهود ٍ لهـا صنـت=يمين ربـي ثابـت ٍ فيـه ميثـاق
يابو سعد ياذخرنا والفخـر أنـت=عبدالله العمار ياشمـس الاشـراق
سقت القوافي من ضميري ودونت=دونتها من صافي القـول بصـداق
أبغى السموحة والعذر منك لاهنـت=ولا هان راس ٍ في سما المجد براق
واختامها دوم ٍ على القول زينـت=صلوا على النبي باعـداد الاوراق


أخوكم عبدالعزيز بن سعد بن عمار


الثلاثاء 18 شوال 1428هـ


(( أضغط هنا للإطلاع على القصيدة في بوح القوافي )) (http://www.sudeer.com/vb/showthread.php?t=52193)

[حمد ولد أبو حمد]

السلام عليكم ورحمة الله وبركاته..

صبحكم / مساكم الله بالخير ... بدون مقدمات ,, أقدم لقلوبكم الطاهره هذه المتواضة ,, أتمنى أن تشفع لي ولغيابي , وسوف تحدثكم عن نفسها !!!

تفضلوا ....


قصيدة .. شبكني ابشباك الهوى يوم حيّاني..............!!



لواني خفوق القلب من نظـرة عيونـه=عيون الحبيب اللي تعنّى علـى شانـي
هلا يالعشير اللي لفانـي علـى هونـه=هلا ياقمر خمسة عشر يـوم وافانـي
هلا يا ربيع القلب و يا مجلي حزونـه=هلا يا بعد كل الغلا واغلـى الاثمانـي
سلامي على عهد ٍ سقى وارق غصونه=سقا الله عهود الحب يوم الغضي جاني
صروح المودة والغـلا بانـي ركونـه=وشيّد مباني الحب من ساس الاركانـي
سناها شعاع البـرق لا هلّـت مزونـه=يشعشع سنا نوره على القاصي الدانـي
غرامه تمكن بي وانا صرت مضمونـه=وشبكني ابشباك الهوى يـوم حيّانـي
وسحرني حسين الدلّ واصبحت مرهونه=وتولّعت به والشوق نـاره تـولا ّنـي
ألا واعذابي ساعـة امـوادع عيونـه=تعابير قلبي .. تفضح الشـوق بلسانـي
وانا من صواب الحب ياللي تعرفونـه=عليل الفؤاد ولاهب الشـوق أشقانـي
طريح الهوى ياهل الهوى لا تلومونـه=إلى صار فكره مع هوى البال سهراني



أخوكم عبدالعزيز بن سعد ابن عمار

الخميس 25 ربيع الآخر 1429هـ


(( أضغط هنا للإطلاع على القصيدة في بوح القوافي )) (http://www.sudeer.com/vb/showthread.php?t=59395)

[حمد ولد أبو حمد]

السلام عليكم ورحمة الله وبركاته ،،


هذه قصيدة الشاعر عبدالعزيز ابن عمار ،، في منتدى الترحيب والضيافة ،،


أرجو ان تنال استحسانكم ،، ومودتي للجميع ...


قصيدة .. جيتكم ضيف زاير *** راجي ٍ ومتمني ...........................,,



الهوى والمشاعر=تروي الشوق عني
جابني الود طاير=في رباكم أغني
بالغلا جيت عابر=في هوى نجد كني
ريح نسناس داير=بالهبايب تثني
جيتكم والمخابر=كل حب ٍ تكني
صادق الود ظاهر=في ربى سدير مني
جيت والفكر ذاكر=ذكريات ٍ مضني
دار قوم ٍ حراير =بالمكارم تغني
جودهم دوم صاير=شامخاً مايثني
جيتكم ضيف زاير=راجي ٍ ومتمني
تقبلوني أساير=ركبكم ..يقبلني



أخوكم عبدالعزيز بن سعد ابن عمار


الأحد 9 المحرم 1428هــ



(( أضغط هنا للإطلاع على القصيدة في منتدى الترحيب والضيافة )) (http://www.sudeer.com/vb/showthread.php?t=40418)