المساعد الشخصي الرقمي

مشاهدة النسخة كاملة : يابنت شوفك عند مغليك جنه،،

عبدالله الصالح
15-01-2002, 03:43 AM
السلام عليكم جميعا ،،،

للقلب من زود المشاريه ونه .......دمع الغلا بالعين فاظت بحوره

يامن يجيب العلم بالخير عنه....... ترتاح نفس بالغياب مخطوره

قلبي على فرقاه ياناس كنه ....... من صاح ظرسه وانتفخ من جذوره

مانام والعينين ما غمضنه .......يفز من زود الوجع والحروره

يابنت شوفك عند مغليك جنه ..... لاتلعبين بقلب مغليك كوره

مر تبين الوصل مع زود حنه ..... ومر تقولين الوصال محظوره

جرحي على فرقاك بالجوف اكنه..... والنفس مع زود التغلي صبوره

شكيت( يابن كليب) خلي وفنه...... عليك وابي الحل من زود جوره

اما يجي والحب مافيه منه ....... والا يصوم القلب واربط سيوره


وسلامتكم جميعا ,,

دفين الجرح ( عودة سدير )
عبدالله الصالح
17-01-2002, 02:20 AM
.
الجريوي
17-01-2002, 09:54 AM
قصيدة أكثر من رائعة

الله يعطيك العافية يا دفين الجرح يا شاعر شعراء منتدى سدير

لكن عندي استفسار ؟

من هو ( ابن كليب ) المذكور في القصيدة ؟

هجرس !! !
عبدالله الصالح
17-01-2002, 03:00 PM
هلا اخوي الجريوي
ومشكور على كلامك الحلو

والمقصود في القصيده هو هجرس ابن كليب بس اتوقع انه ما فتح الموضوع

تحياتي لك
عبدالله المهيدب
17-01-2002, 07:21 PM
تسلم يديك اللي بدن وكتبنه
**** عمدان بيتك بالعطايا معموره
انا اشهد انك شاعر حاز فنه
**** ابدعت في قول الشعر في بحوره

ابوعبدالمحسن
أبو ريان
20-01-2002, 06:08 PM
فعلا اخوي دفين الجرح قصيدة جيدة وفي غايه الروعه وانا لم اشهدها الا اليوم الاحد الموافق 6/11/1422
وشاكر لك على ذكري بالقصيدة وانشاء الله تجد ما يسرك 000

حي الجواب اللـي وصـل مــن دون مـنـه === واليوم من شفناه وضحـت الصـــوره
جواب من نغليه ومن شعـرة ومـن فــنـه === دفيــن جـرح وهــو للعشــق سيــــوره
ومن فقد خلك في شهور القيـض والكـنـه === عسى يجـيك العلـم وتـسـر بحـظــوره
مـن هـجـرس ابن كـلـيـب سـلام يـزفــنـه === طيور مغردة تغريد فالجـو وبحــوره
وياليت منهو خليله على الـشرع والـسنـه === يـهـنـى بـدنـياة ولــو بـحـلام مــنثـوره
ويا دفين الجرح خلك رحل واياك والونه === خلك قوي العزم شديد تمحي الصوره

ارجو ان تحوز على رضاك ورضاء الاعضاء ولا يصير خاطرك الا طيب يالغالي
ومعليش تمت كتابه القصيدة في ضرف نصف ساعه يعني لك عليها شوي 000
منيف المنيف
21-01-2002, 01:25 AM
اخوي...هجرس لا تزعل دفين الجرح.....وخلوكم حبايب.....بس ماشفنالكم قصيد في مسافر.لو اني شاعر كان ما خليتكم .لكتب في كل واحد قصيده ......اكيد قصيدة مدح ولا هان الجماعه.....:)
أبو ريان
21-01-2002, 08:54 AM
تسلم يا مسافر على ردك واهتمامك باعضاء المنتدى والعكس انا والله ما زعلت على دفين الجرح وبينت في الرد
معزته وغلاة وانا يوم اقول فقدنا ملامحك تراها مهيب مسبه هذي من زود الاهتمام وقد قلتها قبل كذا الغالي علينا
مانبغى نفقدة نبيه مستمر معنا في المنتدى وبالنسبه لقصيدته الرائعه اللي موجهها لي شخصيا انا لم اطلع عليها الا
امس وعلى طول رديت عليها وبينت له شخصيا اهتمامي به كشاعر له وزنه في المنتدى 00000
صورة لمسافر
صورة لدفين الجرح للاطلاع والافادة 0
صورة للمشرف0