منتديات سدير

منتديات سدير (http://www.sudeer.com/vb/index.php)
-   ¨° الرأي العـام °¨ (http://www.sudeer.com/vb/forumdisplay.php?f=21)
-   -   قصة وقصيدة (http://www.sudeer.com/vb/showthread.php?t=164177)

بنت الاصول 31-07-2017 04:39 PM

قصة وقصيدة
 
السلام عليكم ورحمة الله وبركاته ,,,



قصه وقصيده . . نقلاً عن الراوي / عبدالكريم شليويح الرمضي . . من بلدة المذنب . . من القصيم

وساكتب لكم القصة على حسب ما قراتها وبنفس لغته


هذولا اثنين يتمان من بلدة شقراء . . كبروا . . ووصلا اعمارهم قرابة العشرين سنه . . واحد منهم . . هداه الله . . والتزم . . وربا لحيته . . وصار إمام مسجد . .
والثاني . . بالنقيض تماما . . سكسك اللحيه . . والربابه بيده . . ومن نفود لنفود . . وراعي قصيد ومهيجن . . وكذلك . . مهاوي بنت خاله . . ويحبه . . على نقاء . . وكان دايم يروح لخالته . . يعرض عليه المساعده . . كله عشان يتقرب للبنت ويشوفه . .
المهم . . جاء موسم الحج . . واخونا .. إمام المسجد . . نوى الحج . . وجاء لم اخوه راع الربابه . . وقال . . طلبتك ياخوي . . قال آمر تدلل . . قال انا نويت الحج . . هالسنه . . وابيك تمسك المسجد عن ...!!!!
قال ياخوي . . انا ماني فيد صلاة . . ولا عرف . . انا رجال راعي قصيد . . وربابه . . ومهيجن . .
الوكاد الرجال . . الح عليه . . الح عليه . . ووافق اخونا راع الربابه . .
جت صلاة الفجر . . يوم صلا الامام . . وانتهت الصلاة . . قال للجماعه . . ياجماعة الخير . . انا نويت امشي اليوم مع الحاجه . . وترى اخوي فلان . . ويأشر عليه بآخر الصف . . يبي يمسك الامامه لين ارجع بالسلامه . . قالوا الجماعه الله يستر عليك . . ويطرح بأخوك البركه . . وهم خابرينه راعي قصيد . . ومطنوخ الرجال . . لكن قالوا مابه فايده . .
بدأ الرجال يصلي بالجماعه . . واموره زينه . . بس اللهم . . انه لا جاء يحدث بالجماعه . . بعد صلاة العصر . . يشيل الحديث شيله . . لكن ماشيء . . اموره سالكه الرجال .
بعد ثلاثة أيام . . بنت خالته فقدته . . بدى مايمر عليهم . . على عادته . . وجت حول البيت تنشد عنه . . وقالوا لها الجيران . . ان اخوه راح مع الحاجه . . وهو مسك مكانه في المسجد . . قالت البنت . . مو معقول . . ماني مصدقه . . هذا ماهو راعي صلاة . . قالوا جاك العلم . . قالت انا ماني مصدقه لما اشوف بعيني . . قالوا لها . . لاجت صلاة العصر . . روحي وشوفي . . جت العصر .. وهي لابسه هكالثوب . . وروايح حلوه . .
اذن العصر . . وجو الجماعه على العادة . . وجت البنت ومعه ثلاث اربع حريم . . وصارن على يسار الصفوف . . تقدم رفيقنا راع الربابه . . وقال للمطوع (( اقم )) . . اقام المطوع . . التفت على يمناه الامام . . وقال (( استوو )) . . والتفت على يسراه يبي يقول (( اعتدلوا )) . . يوم التفت ويلاه يراعي بنت خاله وهي تشيل اللثام عن وجه . . وهو يقول :-


//
//

تعدلوا يأهل القلوب المواليف && صفوا ورى القراي خمسة اصفوفي
احلف بربً يعلم السر والغيب && انك مناي ورغبتي و اشتياقي
حياك رب(ن) حيزم الغرس بالليف && مرجع بصر يعقوب عقب الكفوفي
إنك هواي بلابسات المشانيف && والكاذب الله يجهله ما يشوفي

//
//


الله واكبر .........!!!!!!!

وهو يكبر بالجماعه . . ويصلي بهم . . يوم خلص والتفت . . واثره فشل من الجماعه . . قال ولد عمه ملكع ...يازين صلاتك لك ثالث يوم . . إلا هالحديث اللي قلته بين الاقامه . . وتكبيره الاحرام . . وش هو . . !!! قال هذا يافلان . . (( حديث ضعيف جداجداجدا )) . . ومانيب قايله غير ماقلته . .

وسلامتكم ...
(منقول )

فقيدة امها 31-07-2017 05:46 PM

رد: قصة وقصيدة
 
تعدلـوا ياهـل القلـوب المواليـف
صفوا ورى القراي خمسة صفوفي

هههههههه
انا شهد أن قلبه خضر .. لا والحديث اسناده ضعيف

قصه جميله وممتعه
وأبياتها خطيره
شكر لكِ عزيزتي بنت الأصول
بوركت جهودكِ المتواصلة


بنت الاصول 31-07-2017 06:03 PM

رد: قصة وقصيدة
 
اقتباس:

المشاركة الأصلية كتبت بواسطة فقيدة امها (المشاركة 1059012529)
تعدلـوا ياهـل القلـوب المواليـف
صفوا ورى القراي خمسة صفوفي

هههههههه
انا شهد أن قلبه خضر .. لا والحديث اسناده ضعيف

قصه جميله وممتعه
وأبياتها خطيره
شكر لكِ عزيزتي بنت الأصول
بوركت جهودكِ المتواصلة


ههههههههههه فعلا قلبة خضر وعلى نياته
عزيزتي فقيدة مرورك اسعدني
شكرا لك ياغاليه وبارك الله فيك

كوني بخير


الساعة الآن 01:39 AM.

Powered by vBulletin® Copyright ©2000 - 2024, Jelsoft Enterprises Ltd. موقع و منتديات سدير 1432 هـ - 1435 هـ

جميع ما ينشر في المنتدى لا يعبر بالضرورة عن رأي القائمين عليه وإنما يعبر عن وجهة نظر كاتبه