منتديات سدير

منتديات سدير (http://www.sudeer.com/vb/index.php)
-   ¨° بيت الشوارد °¨ (http://www.sudeer.com/vb/forumdisplay.php?f=109)
-   -   كان الفقر يابنت الاجاويد للرجال عيب. (http://www.sudeer.com/vb/showthread.php?t=163375)

النــاقد 08-12-2016 01:39 PM

كان الفقر يابنت الاجاويد للرجال عيب.
 
كان الفقر يابنت الاجاويد للرجال عيب.
كان الفقر يابنت الأجواد لي عيب = ترى المراجل ياحسينه غناتي

أتعب على كسب المعاريف والطيب = مرخص على شان المراجل حياتي

ولا المعيشه عايش(ن) عيشة الذيب = يومٍ(ن) يجوع ويوم يلقى المباتي

ورزقي على اللي يعلم السر والغيب = واللي كتب بلوح ملزوم ياتي

ماني بوارث مال قارون وشعيب = ولا ملكت النيل و لا الفراتي

مالي رصيد ألا جزال المكاسيب = فريس قوم ولا تحب الشماتي

ولا لي رصيد ألا الوفا والمواجيب = وفروض ديني من صيام وصلاتي

أفرح لامن صارت كفوفي معازيب = كسب الجماله والكرم من صفاتي

أدرى من المنقود وأدرى من العيب = يذهل عدوي في حياته سكاتي

وأعتز في ربعن تحل المصاعيب = أهل الفعول المعجزه المرعباتي

يشهدلها التاريخ وتشهد مكاسيب = دون لها مجد(ن) عريقن ثباتي

ربعي ليا صكت عليه المغاليب = هم مسندي با اللين و بالمعسراتي


يابنت زارك من قصيدي مناديب = أبيات شعري وأحفظيها وصاتي

الفقر ماهو لا فضا البوك والجيب = الفقر فقر المرجله يافتاتي

والطيب يارث من تسد المطاليب = تموت وتبقى علومها الوافياتي

والمرجله مثل الذهب فالمراقيب = واللي عشقها ينطح الموجباتي

ومن لا كسبها شب ما جابها الشيب = والعمر فرصة حي قبل المماتي

أما ذكروني مثل عذب المشاريب = ولا أوقفوا دمع العزى في وفاتي

والادمي لابد مابه عذاريب = ولا ني معدد بالقصيد حسناتي

لكن عطيتك عن حياتي تجاريب = يوم المراجل ساس ربعي وذاتي

وصلاة ربي اعداد خط المكاتيب = على الرسول محمد أطيب زكاتي


الساعة الآن 09:34 PM.

Powered by vBulletin® Copyright ©2000 - 2024, Jelsoft Enterprises Ltd. موقع و منتديات سدير 1432 هـ - 1435 هـ

جميع ما ينشر في المنتدى لا يعبر بالضرورة عن رأي القائمين عليه وإنما يعبر عن وجهة نظر كاتبه