خذوا هالسالفه من سوالف الاولين فيه وحدة قديما ولدت وراحت لاهلها وهي بالنفاس قامت امها تحوف لها الاكل( تحوف يعني تجتهد في صنعه ) وتخصها بسمينة راهية واللحيمة توزيها لها النفسا خابرين قلة الحال هذيك الايام الله يديم علينا النعمة عاد ذا الخبلة كانت توزي اكلها واذا جا رجلها يمها عطته الاكل وقعد ياكل وهي تناظره مرت الايام وطلعت من النفاس وجا الرجل ياخذها لبيتهويوم جا يبيها ولا المرة هزيله وهو ما شاء الله تقل فحل من قوته لطشها بالكلام وخذها ورماها عند اهلها وقال لامها بنتك ميب مرة اذا ما صلحت بدالها غيرها الاميمة ضاق صدرها ورجاجيل اول تعني لهم ذا الاشياء خبركم لا تلفزيونات ولا استراحات وجمعة شباب يعني هي تسليتهم كل ليلة المهم تمسك الام بنتها وتنشدها وراك وليش وش فيك ؟ ومن الكلام عرفت ان البنت كانت توزي اكلها وتعطيه الرجل ايه.... سكتت الام وقالت لرجل بنتها خلاص خلها عندي كم يوم وما يكون الا الخير وقامت بها مثل النفاس واشد وهاوشتها على سالفة الاكل وصار الرجل كل ظهرية وكل بين عشاوين يجي يم حرمته ويتلمس كان اهنا غدا ولا عشا والمرة تقول امي ما طبخت اليوم ما عندها شئ يسوى المهم بعد اربعين يوم جا ياخذ حرمته وراح بيتهم واصبحوا ولا الرجال مبسووووط ومد لها ذيك الطلاعة السنعة ( الطلاعة للي ما يعرفها هي هدية من الزوج لزوجتك بعد الولادة) راحت لامها تبشرها ان ابو فلان مبسوط منها فرحت الام و قالت لبنتها : شوفي يابنيتي ( غذا نفسك لرجلك وغذا رجلك للناس ) ومعنى المثل لاتهتمين برجلك على حساب نفسك ترى بيدور على غيرك عكس لو اهتميتي بنفسك بتزينين في عينه حبيت اشارككم بها تراها واقعيه