[بوتركي]

السلام عليكم
والله فرصة طيبة اني اشارك في منتديات سدير
(مع اني من اهل شقرا)


الوكاد


انا اقترح ان الموضوع يغلق


لأني الاحظ ان مضمون الموضوع "مريب" ومشكوك فيه .
معليش وش دخل القهوة بالتخسيس ؟
والرده حسب معلوماتي انها للعجايز وللي عندهم امراض خطيره بالجلد ومايتشافون منها الا بعد سنين !!
انا مو قصدي اقطع رزق احد
بس يالربع ماتحسون ان الموضوع هذا مريب بالحيل؟
ومساكين هالبنيات ماصدقن خبر .. على طوووووول ردو
تقول جا لها خبر يفرحّها
حتى الشباب يا ملا العافية على طول دخلوا بالموضوع ويبون تخسيس

شوفوا ياللي تبون تخسيس
اذا ودكم بتخسيس ناجح وبدون اي تعب
امر بسيط جدا ً ، بس خل عندك عزم وشديد بقرارك .. وكلها شهر او شهرين وتخس ، وتصير وش ملحك .

1- امش رياضة باستمرار .
(شف لك شارع طويل او مخططات فاضية مافيها عوايل وامش فيها ساعتين)
عشان ماتحس بتعب؟ اشبك السماعات على اذنك وشغل جوالك عالرادو.
حط اشياء تحسسك انك تمشي
لأنها "نفسياً" يشغلك الرادو عن التعب وانت ماشي .
يعني كأنك بالضبط تسولف مع خويك بكل حماس بسواليفكم وانتم ماشيين وناسيين امر التعب .
بس هاه !
مو تحط اغاني غربية كنك بسم الله رونالدو او مايكل جكسون وهو يتريقص
لا وانتبه لا شغلت لك شي يحمسك يجبرك ان تطمر وتفرح ومسوي نفسك بطل مشهور .. انتبه ترى يضحكون << قد سواها ولقط وجهه هههههه .






2- قلل الاكل .
يعني كل 10 ملاعق من رز .
و 8 قطع بحجم (نصف طول اصبع الخنصر)
وقطعتين خيار
حاول قد ماتقدر ان تشرب 4 اكواب موية ( قبل الأكل ) .
بعد الأكل اشرب (سفن دايت) .
وابعد عن اي مشروب غازي به سعرات حرارية كثيرة وفيها سكر ..ابعد عنها نهائي .
والا ترى بتهدم ريجيمك .




3- طبعا شي اكيد ان الغالب من الشباب والبنات يقللون من الصلوات .
ياخي صل لو في البيت عادي
تدري ان فرضك للصلاة تساعدك على التخسيس ...؟
خصوصا ً إذا طولت بالصلاة لمدة 20 دقيقة من قرائتك للقران في الركعة الاولى والثانية .
لأن تأدية الصلاة لها صلة بالرياضة .



4- امزح مع اي واحد تعرفه
اسطره كف وخله يلحقك ..
حاول ان تبعد ولو على الأقل اثنين كيلومتر وهو يلحقك .
واذا بالبيت؟ اجهد نفسك بالركض .
امزح مع اخوك الكبير مزح ثقيل
خله يلاحقك بعصا
شرط انك تخاف وتنحاش من مكان لمكان .




5- ابعد عن اي شي فيه سكر ودهون كثير .
اشتر من هرفي او اي محل وجبات سريعة نظيفة عندهم سلطة مشكلة .
كل منها صحنين (يومياً) وخلها وجبة عشا !





6- سواءا كنت موظف او عاطل او طالب
اي شخص يطلب من شخص ثاني يروح لمكان بعيد او قريب .
خذ انت مكانه وقل انا بروح .
يكون احسن لو بالشمس .
حاول تفتح ازراير ثوبك اللي حول فوق صدرك .
خل الحر يكثف على صدرك اكثر .






7- ( عاد هالبند السابع فسيولوجي ) وصدقني بتنجح
ناظر نفسك بالمراية .
وكلم نفسك وقل : "انا جاد اني راح انحف .. وبنحف"
فكر وانت تقول هالكلام بأخوياك ونظرة الناس عليك كونك دب وعليك كرشه
فكر بالاطفال اللي يقولون "دبا كريشه بريالين" وخصوصا ً قدام اللي يعزونك من خوياك !! .
فكر وهم اخوياك يضحكون عليك من كلام البزران .




7 خطوات ان نفذتها
بتتفل على ابليس

وتقول اعوذ بالله من هالموضوع بغى يعدمني ..








اقترح ان يغلق الموضوع بسرعة

(ترى هالموضوع بذمتكم يالادارة) من حيث دعاوي اللي ماربحو شي من هالموضوع الا الخسارة