[فقيدة امها]

عموما هذي سالفه قاصتها علينا وحده من العجز اللي عندنا
الله يطول بعمرها

هنا هاك الواحد والواحد الله في سماه العالي

والى هنا هاكـ الرجال اللي يقال له علي ,,

علي معرس وقاعدن في بيته ولا يشتغل .. وإن طلع راح للحيطان يتمشى ويناظر النخل

المهم حرمته (( حصه )) تروح تشتغل عند الناس علشان تكد على عيالها .

في يوم من الايام جا ولد عم علي لهم في البيت , طبعا علي ماكان موجود ...

حصه رحبت فيه ولزمت عليه بالغدا ,,
وهو عياا يقول انه مستعجل وانه قايلن لولد عمه " علي " انه يبي المسحاة . ..

المهم ان حصه عطته المسحاة وراح ولد العم ومعه المسحاة
<< مدري ليه احس ان المسحاة هي محور القصه

طبعا علي رجع للبيت واول مادخل البيت سأل عن المسحاة
(( مدري وش جابها على باله ))

قالت له حصه ان ولد عمه جا وقال تراني قايل لعلي اني ابي المسحاة

علي ... عصّب وقام يهوش ويدّهر
وقال لحصه ان مارحتي وجبتي المسحاة قبل المغرب فانتي طالق

قالت له حصه وين اجيبها منه هو بقلعة وادرين
وان رحت ما وصلت ولا باتسر

المهم الرجال طلّق بسبة هالمسحاة ....

رجعت حصه لبيت ابوها ومعها عيالها ...
طبعا هي مافرقت معها لانه ما يناظرهم في شي وهي اللي تكد وتتعب ..

حاول علي انه يرجعها وعيّت واصرت على رايها ..

طبعا علي تحسّف وقام يشكي الحال على خويه (( ابن دمعان ))
ويقصد ويقول ..

ياونتن ونيتها يابن دمعان .......... على عشيرن طاوي الياس دونه

على بزور خليو تقل يتمان .......... ومن البتسى ضاقت محاجر عيونه