حكايتي مع جدتي (مثيرة)

[أبو ريان]

يابعد عمري ... يا بعد قلبي ... يابعد روحي ... يا بعد كلي ....الله يهــــديــــك

دعونا نتأمل المقطع السابق لاحد الاغاني ،،، و نرى الحبيب وهو يخاطب حبيبته بكل معاني الحب و يخاطبها بكل الالقاب القريبه الى نفسها ... وبالاخير يدعو لها بالهدايه ....
في البداية : قال يا بعد عمري ولم ينفع معها هذا الاسلوب لانها ما راح تستفيد من عمره أي شي...
ثم قال يابعد قلبي فهه كنها بدت تلين ... وبعدين قال يا بعد روحي فرجعت الى قسوتها ... وبعد التفكير قال لها يا بعد كلي ..فداخت وراحت في خرايطها ...وبعد هذا عرف انها مصلحجية فدعا لها بالهدايه ... بهذه المناسبة اوجه دعوه للفانين في ان يحذو حذو هذا الفنان في اختيار المعاني و ان يجعلوا للفن هدفا ساميا .....


<<<< يا شينه اذا قام يتفلسف


قبل ابدى موضوعي نوقف دقيقة حدادا على ضحايانا في عيد الضحية المنصرم << اروح منصرم ياعالم .. و خصوصا ضحية جدتي ام ثلاث كلاوي ..


<<< ماقلت صايحو قلت اوقفوا حدادا


خلصت الدقيزة
على طاري ارتفاع اسعار النفط .. في يوم السنين رن الهاتف فرفعت السماعه و اذا بجدتي تحادثني من الطرف الاخر :

جدتي : الو

انا : نعم

جدتي : دجاجه ترفسك
انا : كخخخخخخ الله يرجتس الى المميزة ....

جدتي : اها انثبر بس ، ابيك توديني لام عصمان

انا : اما انتي مدري من وين تعرفين هالاشكال

جدتي : انهج و اخلص علي لا يروح لون الديرم

لا حظوا الحديث السابق لتروا الحنان الذي يقطر من سماعة جدتي في شكل سيل من الالكترونات الموجبة الشحنه تجاه سماعتي .. اااااه يالهذا الحنان المتدفق الذي يغمرني في كل كلمة تخرج من بين شفتي جدتي ...اااااه كم احبك يا جدتي ... اااااااه يا صبايا <<<< وش جابها ذي

وبعد هونيهتن من الزمن و انا عند بيت جدتي ... فتحت الباب ودخلت واذا بملاك في صورة جدتي لابسن مقطعاً برتقالياًو يلوك بين شفتيه قطعة ديرمان مبتله ببعض السعابيل
جدتي : عمى يعمي بليسك وراك تأخرت??!!! ..... انا : ابد زحمة المواصلات تعرفين يعني ....

جدتي : والله مشكلة هالمواصلات يعني الى هالحين تشفطون بياراتكم بوايتات .. انا : الى باتسر ... وطلعنا و فتحت لها الباب وركبت في المرتبة الخلفية مثل كل بنات النعمة ..
واصك الباب ...
جدتي : عمى عمى عمى وراك تصك الباب ..
انا : ليش تبينه مفتوح ؟؟!! ...
جدتي : اصبر خلني اطلع طرف بشتي تحت الباب ..اجر طرف العبايه واصك عليها الباب ..مدري هي موضه ولا انها تشجع الشباب مدري ..

معليش قبل لا اكمل نقف برهه حدادا على ضحايانا العيد اللي قبل المنصرم

<<< هذا الحداد ولا بلاش

خلصت البرهه
اسف على التأخير بس مهوب مني من البرهه الله يهديها __نكمل___ قلت للجدة الحبيبه : الحين وش تبين بام عصمان مدري وش شايفه فيها ... جدتي: ما تدري ؟!! ... انا : لا والله ما ادري ... جدتي :يعني ماتدري؟!! .. انا:
جدتي : ودك تعرف .. انا : لأ<<<< شك في نفسه ... جدتي : بخطب لك بنتهم خديجه ..

كحووووووووووووووووووووووووووء طععععععععععع <<<<< صوت ارتطام بعدما قلطنا في احد البقالات القريبه

سوف نقف في اخر الموضوع حدادا على الضحايا الابرياء الذين كانوا يتسوقون في البقاله المجني عليها

انا : وشوووووو انا اتزوج سودانيه ... جدتي (والعياذ بالله من كلمة انا ) : لا تخلينا يا مادلين اولبرايت<<< مدري وش جابها ذي بعد

ياوليدي خديجه ذي ماخذه ملكة جمال خط الاستواء ..وتسانك ما تبيها انا اخليك تبيها ...
واخذت الجوال و دقت على رقم 0512345678910 وكلمت على براهيم ولد خالي ..
جدتي : الو بريص (دلع ابراهيم ) .. ابراهيم : هااااه وش تبين بعد انتي ... جدتي : وش ابي!! ... ابراهيم : ايه وش تبين .... جدتي : يعني ماتدري وش ابي ؟... ابراهيم : اقول اخلصي تراني ابراهيم منيب يوكون تخفين عليه ... جدتي : ابد جايبة لك خبر سعيد .. بريه : وش ابي بحفايظ الطفل السعيد << تاثير ابو هيثم .. جدتي : بخطب لك خديجه .. بريه : اللللللله خديجه (اقسم برب الكعبه المشرفة انه مايعرفها) يعني تحققت امنيتي .. جدتي : يعني تبيها؟؟ ... ابراهيم (واعوذ بالله من كلمة انا) : ابيها وابي ابوها بعد .. جدتي :احححم عيييب ، وش تبي بابوها شايبن ملحط مغير تبطح وتسدح .. ابراهيم : اجل ابيها بلحالها ... جدتي : يعني نئرا الفتحه .. ابراهيم : وش فتحته بعد انتي الفاااااااتحه << بليس يعرف ربه ... جدتي : خابره وانا امك بس اتدلع ... براهيم: ماعندي دلع بنات .. جدتي : وش تقول دلع بنات ياحبي لك يا برهوم ماحد يفهمني غيرك بس شف كانك بتهون ترا يوكون يبيها .. ابراهيم : قسم بالله بذبحه لو يتزوجها خديجه حبي الاول والاخير... جدتي : اجل خلاص بخطبها لك اليوم وبتتزوجها باتسر ان شاء الله ... براهيم : ذكريني اذا جا يوم العرس ويالله توكلي..

انا : وراتس تقولين له عن خديجه يمكن ابيها انا .. جدتي : اتسذب عليكم اصلا ما فيه شي اسمه خديجه ولا ام عصمان بس ابي اشبها بينكم ... انا : يعني حتى ام عصمان ما فيه .. جدتي : ايه مافيه ... انا(واعوذ بالله من ابليس) : كخخخخخخخخ الله يرجتس رج الى المميزة ... جدتي : تراك غثيت أمنا بهالاقلاع ترا مافيه شي يسوى كله رحبوبي و هل تعلم ومواضيع ماصلة وركبكم يالحريم سود وركبكم يالرجال رصاصيه حتى مسطول و الدباب جاحدينكم ... انا : اسسسسسكتي لا يسمعونس عاد كلش الا الحكومة ..... جدتي : اقول تعال لنا في منتدى العجز المنسمات وتشوف التنسيم صز ..
انا : وشو موقعكم .. جدتي : سجل عندك bmw.3jz.fix... انا : جايك يالمليون جايك .. جدتي: عاد لا تنسانا يالمليونير يالمليونير يالمليونير... انا : راح ادير خشتي عليتس .. جدتي : اها بس لا يكثر <<< مهيب تحطم ابد ..
انا : طيب وين و نروح الحين ( عاش مصرف ) .. جدتي : ودنا لمطعم خلنا نتعشى تراني وانا امك جايعه .. انا: افاا مطعم وانتي تقولين لا تاكلون من اكل السوق كله امراض ... جدتي : عاد وش اسوي جايعه ..انا: طيب وش تبين أي مطعم ..جدتي : ابي كونكاتي .. انا : الله يكرم النعمه مالقيتي الا كنتاكي
...

جدتي : والله ام عصمان تقول انه زين وطبخهم مثل طبخ البيت .. انا : هماتس تقولين مافيه احد اسمه ام عصمان ... جدتي : اقول مشها وانا امك وافهمها ابي هالمطعم وبس ... انا : منتب سهلات يالعجز تعرفون كونكاتي بعد ... جدتي : هو من قالك اني عجوز توني صغيرة ما تميت الاربعين ... انا : عقبال الجامعه .. جدتي : وش جامعته ??... انا : جامعة عين شمس ... جدتي : اها بس بلا مصالة ...

ندخل كونتاكي ... و تجي جدتي بتطلب ويخش في عينها المصري :اهلا وسهلا الئمر تل علينا اليوم عايزة اييه يا بعد توايفي ... جدتي : عمى عمى يعمي قلبك ان شاء الله هووو كبر امك وتحاتسيني كذا .. انا (والعياذ بالله من ابليس):هماتس تقولين توني ما تميت الاربعين .. جدتي: اها بس انثبر لا ازوجك مصريه <<<< بتضيع مستقبلي ..

جدتي : امش وانا امك خلنا نطلع بس من يوم ما شفت هالمصري وانا ما رجيت خير ... انا : قايل لتس كله مطرسه في مطرسه ... جدتي : خلنا نروح للبيت وناكل جريشه (بتشديد الياء المهملة)وقرصان يالله من فضلك .. انا : وهو كذلك ...

والله ونتعشى وننبسط .. وتقولي جدتي افتح السي ام ام خلنا نشوف وش عندهم ذا البرصان ...

وافتح الدش والا ميشيل قزي في وجهي ..جدتي : وجع وخر هالوجه الودر عن وجهي مغير يروع بزراينا الى قال اللككك .. واغير و الا معتز الدمرداش مرتز .. جدتي : وخر هالاملط عن وجهي هو وخدوده جعله في هالوجه اللي ماحلاه ربي تقول ماعندهم غيره ذا الدبي ....
واغير والا فيصل القاسم هو وجبهته اللي تلق تقل مرايه قعدت اناظر خشمي في جبهته وشيكت عليه وغيرت القناة..

واوخره واخيرا القى ماجده الرومي تغني ... و افق معها ومن زود الفق قمت اسعبل وشوي والى الملاس في راسي .. هووو الى هالحين وانت تسمع اغاني يعني منتب عاقل الا الين اعلم امك ؟؟؟ ....انا :


واغيره واحطه على السي ان ان .. والى هالامريكان مخترشين عشان عمارتهم ... تقل مافيه الا هي في الدنيا!! ,,,يعني مافيه عماير الراجحي ولا فيه عماير في الخزان الا عندهم بس...
وشوي يقطعون برامجهم ويقولون خبر عاجل من السعوديه ..

وانا اللي تطقني نفاظة .. ويجيبون مصري مربطينه قدام كونتاكي .. اثره متسمم 20000 نسمه عاد الامريكان ماجابوه عبث الا عشان امريكي متسمم عاد عشان كذا اشتبهوا في هالمصري انه احد ركاب الطيارة المخطوفه ... وبيرسلونه لامريكا يحققون معه <<<<< ماجبت شي من عندي هذي ترجمة جدتي

عاد جدتي تقول شفت وانا امك اذا قلت لك ان المطاعم ما عندهم الا الامراض مالك الا طبخ البيت وانا امك ولو انه ما ينبلع واذا حدك الزمن اقرب بخاري ومعه نص دجاجه وان تسممت اسهال ولا مغص ...اصقعه بسفن اب والا بطنك متعدل ....

هذي نصيحه من جدتي اليكم ارجو ان تجد منكم اذنا مصغيه <<< انثبر بس

قبل الختام نقف هونيهه حدادا على ضحايا كونتاكي و ضحايا البقاله ...


<<< واحد منهم مغصوب على الحداد

خلصت الهونيهه



وداعا يا أحبائي وداعا_______
____________ انا متعبٌٌ والعين تحتاج لغمضي