جديد .. بن فطيس ...

[سعود الخليل]

ماهوب كفو الوقت حبك يمحيّه=ياللي تخاف صروف الايام تمحاه
ارتاح دام ان المواصل يقويه =انت . انت وانا . انا وقلبي هو إياه
حتى ولو بتغيب ذكراك تكفيه =ياواحدٍ تكفي عن الناس ذكراه
حُبك على رملة خفوقي مواطيه =ورياح عذلي عَنك ماتمسح خطاه
واللي يعذل القلب عن درب غاليه =( يالله عسى اللي يبلا المواليف يبلاه )
اخفيه يابلفيت والحال يبديه =ادناة واحد ينظر الحال يقراه
مخفيه فيه ومعتنيٍ به وحاميه =عن كل عينٍ ودها تنزل حماه
قلبٍ يحبك والهوى الذرب ماليِه =كانك مكذبني بعينك تحلاه
شرط . ان تشوفك فيه منت بحواليه =ويمكن تشوف ديار واماكن رعاه
وتشوف به تمثال والوقت هاريه =وبتشوف زرعٍ ميتٍ واقفٍ ماه
وبتشوف جرحٍ فيه سكين راعيه =راح ونسى السكين والجرح ينخاه
وبتشوف حصنٍ عجّ الاقدار سافيّه =وبتشوف باقي بيت . راعيه خلاه
لاتنزعج . هذا خفوقي وباقيه =ولاتضايق من تصّدع زواياه
قَد زلزله فرقا وهزت عراويه =والله ستر والحظ عانه وعافاه
وكانه صلح لك واعجبك . زيد تبينه =ابنه وجهزّ للمقابيل مبناه
ابغيك بس من المفارق تداريه =وازهل من يداري شعورك ويدراه
وحلل وحرّم فيه . يا أبرك بلاويه =وحله وراع رضاي ورضاك وارضاه
جعلك بعد بعض الوجيه . امحق وجيه =ناسٍ مراتعها الرفيق بتقفاه
انواع . واخطر نوع مانيب ناسيه =نوعٍ على تفريق الاثنين مسعاه
تلقاه دوم . وكل يومٍ تلاقيه =واذا بغيت الصدق ماعاد تلاقه
وإلا انت . ردك كُل مادعيك لبيه =انا اشهدٍ منتوا بفي عيني اشباه
منتب معى العالم . ولا تقولي ليه =انت ادرى مني وفي جوابي وفـحواه
كذيه ومن الله يازين وإليه =واغلى طروش القلب ودواه من داه
الحلم ياتيني بزولك واراعيه =وفي كل حلم اقوم قبل اتحفاه
واعشق سميك في البزارين وادعيه =واقبل خطاه الا اخطى واتلقاه
واسمك يروعني اذا مرّ طاريه =واحب ملقوفٍ يسولف وطراه
وامرّ بيتك من بعيدٍ ولا اجيه =وانا لو انه في يدي ماتعداه
حتى تواير موتري تلتفت فيه =تبغي تلفّ ويستحي العقل والجاه
وصلك يخيط الصدر والبعد يفريه =ويابري حالي كان صديت برياه
ويلي على ادري حبنا ويش تاليه =وويلي على ادري وش ورى الغيب ويلاه
عشان اشوف اذا محبتك ترفيه=والله لاقفي عنك . استغفر الله

وهنا صوتيه

تحميل الملف من هنا

[خفوق إنسانة]

صح لسانه قصيده ذوووق ..
يعطيك العافيه إستاذي تشرفت بتواجدك ..

[سعود الخليل]

المشاركة الأصلية كتبت بواسطة خفوق إنسانة   صح لسانه قصيده ذوووق .. يعطيك العافيه إستاذي تشرفت بتواجدك ..

الله يعافيك ..

وشاكر لك مرورك وتواصلك ..

[نمُوذج]

صح لسانه


شاعر مميز ,

شاكر لك

[عبدالرحمن الفهد]

عسى الردي ياكاسب الطيب يفداك=ماهو كفو يفداك ، يفدى رجولك

انت الذي روس المشاريف مبداك=والاّ الردي مهما تعب ما يطولك

تقصر علومه دون مثلك وشرواك=لاواصلاً عندك ولاهو بحولك

مدت يمينه ماتجي عند يسراك=واغلا ثيابه ما يساوي نعولك

انت الذي في ديرة العز منشاك=جنود الاستعمار ما مهّدو لك

صقر الجزيره في ذُرا العز رباك=تشبه مطاليعه بفعلك وقولك

الطيب من عادتك والصدق مبداك=كم شايباً من طيب ذاتك عنو لك

اللاش تفشل خطّته لوتحدّاك=تعجز حميره عن ملاحق خيولك

[لواء العز]

يمال العافية والله
صح لسان ابن فطيس وحفظ الله ناقلها وعطاه منيته في الدنيا والأخرة .

[أنثى المطر]

ماشاء الله ابن فطيس شاعر مبدع

حتـى ولـو بتغيـب ذكـراك تكفـيـه

ياواحـدٍ تكفـي عـن النـاس ذكــراه

حُبـك علـى رملـة خفوقـي مواطيـه

ورياح عذلـي عَنـك ماتمسـح خطـاه

أبدع أعجبتني البيتين

يعطيك العافيه ماقصرت

لاهنت..

[سعود الخليل]

الله يعطيكم العافيه جميعاً ..

ومشكورين على تواصلكم ومروركم المميز ..

[أبو يزيد]

قصيدة في غاية الروعة والجمال

رسمت مشاعر كثيرة يتكلم عنها الناس

شكرا لك على هذا الانتقاء الرائع

[نهآية حلم]

قصيدة في غاية الروعة والجمال

رسمت مشاعر كثيرة يتكلم عنها الناس

شكرا لك على هذا الانتقاء الرائع

[سعود الخليل]

يعطيكم العافيه على التواصل ..

ولكم الود ،،،

[شـمـ إمرأة ــوخ]

إختياااااااااااااار رائع جدا

شكرا لـــ رقي الذوق


~