فرق اعراس اول عن اعراس هالوقت

[أبو ريان]

كل عام وانتوا بخير..
شفت مواضيع في الاقلاع عن الاعراس .
. قلت خليني اكتب موضوع عن عرس اول كيف يكون.

مثل ما نعرف ان العرس اليوم يختلف عن عرس قبل.. الحين العرس في الفنادق وقاعات الاعراس
اعراس اول بسيطة ولكن الكل يشارك فيها الكل يكون مستأنس ، والكبير والصغير يشارك..


حصلت عن معلومات عن أعراس أول ومثل ما تعرفون طريقة الاحتفال بالاعراس يختلف من قبيلة الي أخرى، ومن منطقة الي أخرى…

( الخطبة)

في البداية رحلة الزواج تبدأ بالخطبة، وفي الغالب العروس اتكون من الأهل، وبعد الخطبة اهل العروس يطلبون مهلة تقريباً شهرين عشان العروس تستعد للعرس، وخلال هذا الفترة العروس تخبأ لمدة أربعين يوم..



( استعداد العروس)

خلال هذي الفترة العروس تلبس ثياب مصبوغة بخلطة مكونة من الورس والياسمين والهيل ويدهن جسمها بالنيل، وتتحنى كل أسبوع ، ويدهن شعرها بالعنبر والياسمين ويجدل بالورد والياس والمحلب، تأكل أحسن المأكولات ( مب مثل بنات الحين يأكلون وجبات سريعة، ويتعدلون بالمكياج كلها كيماويات) ، وتغسل شعرها بالسدر المطحون


الذهبية ( أدوات العروس) وكذلك تسمى الزهبة..
في هذي الفترة العروس تتجهز وتشتري ما يلزمها من ملابس ، وذهب وعطور،

( الثياب) ثيابها يكون المخاوير ( التطريز) ، الحرير الصيني، بستان الياهلي، ابو طيره، أبو قلم، الصاية، السلطاني، أبو بادلة والمخور


(الشيل) منها النيل الهندية والسود أبو قفص.

( العباءة) سويعين، ام الخدود، أم التلايج الخفيفة والسميكة.


(العطورات) دهن العود، دهن العنبر والصندل، دهن الزعفران والورد والنرجس، المخمرية والدخون والعود.



في ليلة الزفاف تلبس العروس أخضر لانهم يتفألون بألاخضر

(ليلة الحنه)


تعتبر ليلة الحنه من أحلى ليالي العمر في حياة العروس، حيث تتم تحنية ( يعني وضع الحنه) راحة يدى العروس، وأطراف أصابعها في حفل تشهده قريبات العروس،
يكون ليلة خاصة بالحنة ، تتحنى فيها العروس، ويوضع على اناء الحناء الشمع الحلويات، ومن أغاني الحناء،

** حناك عجين يا بنية ، حناك عجين**
**لين جابوا المعرس مالك**

وتردد البنات الي ما اتزوجوا: ** حنونا من حناكم..
**ترى نحن نمشي وراكم



أيام العرس..
حفلة العرس اتكون لمدة أسبوع، وفي فرق شعبية يسون رقصات معينة .مثل فرق الليوا والعيالة، والاهل يسون المالد والرزيف ويشارك في الرزيف كل أفراد القبيلة، ويقومون بالغناء والرقص واطلاق الاعيرة النارية.. . ومن أغاني الأعراس:



معرسكم يبغى رماسى*** عصرية والليل ماســـــــي
ذكروني كاني ناســي *** بالهوى واشطحيتــــــــــــه

( شرح للاغنية ) ( الشعر يدعو الناس انهم يفرحون ويغنون ويرقصون لان هذي هي رغبة المعرس عشان يفرح عروسته، والمعرس يخشى ان تشغله الافراح والاحتفالات من التفكير في عروسه الي تجلس في غرفة الزفاف، فيقول حق ربعه " ذكروني كأني ناسي الهوي واشطحيته")

وهذي مقطع من أغاني البدو في العرس :
شلنى شلات يالغالي بشلك*** فوق حضن الهين حطني بنام
يوم أنا ولهان ومضيع ما دله*** غيثيى بالنوم يا طوير الحمام

( هي من أكثر الاغاني الي يغنونها في عرس البدو، في هذي الأغنية يطلب المعرس من صديقه المقرب ان يصحبه وهو ساير بيت أهل العروس ، وعشان هو يشعر بالقلق يطلب من صديقه التشجيع، وما ان يركب ناقته يطلق العنان لقلبه كي يعبر عن جبه وشجنه فهو لا يفكر الا في عروسه، وعندما يلمح حمامه طليقة في الجو يروى لها مشهد رؤيته لحبيبته في الحلم، وهو سعيد بذلك.. )




مكسار الحريم: والمكسار خيمة كبيرة تجتمع فيها نساء العائلة، وصديقات العروس، والجارات، ويغنون أغاني مختلفة من هذي الأغاني الي يصفون فيها العروس:


جاكتن تذكر الأوطان*** وعندكم شاعت طواربها
غيظتن والعود روياني*** والشباب اللى يزاغيها
ماتحق يصور نسياني*** جانه بمال نشريها

وفي نفس الوقت يوزعون الهدايا الي احضرها المعرس لأهل العروس وصديقاتها.

[عبدالله المهيدب]

ياليت نحاول نكتب الفروق الللي نعرفها حتى نحصل على اكبر كم من الفروق وبعدها احولها لارجوزة يشارك فيها الجميع زشكرا لهجرسنا

ابوعبدالمحسن