موقف عجيب حصل أمامي

[قلم صريح]

جتني هالسالفة من أخوي حمد ولد أبوحمد

****

هذا طال عمرك .. كنت بالحرم فجر الجمعه الماضيه ،، وبعد شروق الشمس ،، طلعت افطر واريح شوي بالسكن باخر شارع الهجره ،،
شارع الهجره .. هو اللي وانت طالع من باب الملك عبدالعزيز يصير قدامك .. بين وقف الملك عبدالعزيز وشركة مكه ،، وهو مخصص للمشاة والناس فيه واجد وونيس .. وعليه محلات وما تشعر بالملل ،، وكان السكن بعيد شوي يجي 500 متر ،،
هناك كان فيه طيور حمام كثيره ،، يعطونها الناس أكل وفتات خبز ،، والقطاوة بهالشارع كثيره ،، عاد قطاوة مكه عصاقيل مافيها شعر .. مغير جلد وعظم ،،
فـ وأنا أمشي .. لفت انتباهي قطو واقف على الرصيف ،، متوثب يبي يقفز واعصابه مشدوده ،، وكان قدامه مجموعة حمام يلقطون حب ،، وحمامه منهم كانت واقفه قريبه من الرصيف والقطو ،،
القطو كان واضح أنه منشن عليها ،، والحمامه ما انتبهت له ،، واللي ساعده .. كان فيه لي مويه ازرق مرمي على الرصيف ،، من اللي يعبون فيه الوايتات الخزانات ،، فحجب القطو عنها وما انتبهت له ،،
انا شايف المنظر قدامي .. وتوقعت انه يصيدها ،، باين انها ما شافته ،، وقربت من الرصيف كثير ..
جا في بالي ارفع صوتي اهش عليه عشان ينحاش أو تهرب الحمامه .. بعدين قلت في نفسي .. هذا حرم وهالقطاوه الظاهر عايشه على الحمام .. وقلت خله كان صادها هذا رزقه ،،
شوي ويقفز القطو على الحمامه .. تفاجاءت الحمامه وجت تطير .. وما امداها .. الا والقطو مسكها ..
عضها مع جناحها ومسكها بمخالبه ،، وهي تحته تفرفش تحاول تتفلت منه ،، ومع حركة الحمامه تتملص ،، القطو امتلا فمه ريش ،، ومعد عرف كيف يمسكها .. كلها ريش ،،
لحظتها مريت قربهم ،، قلت خلاص اكيد بياكلها .. وتعديتهم ،، الا اسمع وراي ضجة الناس وضحك ..
قلت بنفسي تراها فلتت منه ،، وشوي وتمر الحمامه قربي طايره ،،
عرفت انها هي ،، لأنه تطير على ارتفاع بسيط وما قدرت ترتفع ،، وريشها كان مبعثر بعد اللي صار لها مع القطوه ،، وواضح كانت مرعوبه وخايفه مره ،،
جا بنفسي انه بيصيدها قطو ثاني .. لأنه من الرعب اللي فيها ،، تعرف الواحد من الخوف معد يشوف ،، فما بالك حمامه ،،
تابعت الحمامه وهي متجهه يم سكه ضيقه قدام شوي .. ونزلت باول السكه ،،
مر قربي اثنين وهم يضحكون ويحكون عن الحمامه والقطوه .. قلت لهم صبر شوي لين نوصل السكه ..
وصلنا السكه .. الا وفيه قطو يطارد الحمامه يحاول يمسكها ،، يا سبحان الله مثل ما توقعت ..
حاولت الحمامه تطير .. بس وين .. السكه على اليمين واليسار عماير عاليه يجي لها عشر أدوار أو أكثر ،، وصعب ترتفع فوق وهي بها الحاله ،، فمالها الا ترجع مع الطريق اللي جت معه ،، والقطو يطاردها ..
جلست الحمامه تكفخ بالجدران .. ثم طاحت بين مواسير كانت موضوعه قرب الجدار .. فمعد بقي الا راسها طالع فوق ونشبت جنحانها ..
جاك القطو يمشي بهدوء ووقف يطالعها .. ثم لقطها مع رقبتها ومشى يدودلها بفمه ..
قلت بنفسي سبحان الله ... مقدر للحمامه تموت .. انحاشت من الموت هناك .. وجت لقته ينتظرها هنا ..
يعني حتى لو هشيت القط الأول وطارت الحمامه .. برضه مكتوب أنها تموت .. وجا أجلها ..
شوف كيف قدرت تتلفت منه وهربت .. وبعدها بثواني .. كان الموت ينتظرها بالسكه ..
والأهم من كذا .. الرزق .. سبحان الله شف كيف الأرزاق مقسمه .. واللي مهو مكتوب للواحد ما يقدر يحصله مهما اجتهد ..
شوف كيف .. ما كان مكتوب أن القطو الاول ياكل الحمامه .. رغم الجهد اللي بذله والتعب في صيدها ،،
والقط الثاني .. جته الحمامه غنيمه بارده مبرده ..

[نــــــورهـ]

رائعـــــه الحادثه ,,, وياكثر ماشفت عندنا بمكه
الحمام رمز جميل ,,,
والقطــــو فيه صفه لو لزق فيك مافكك
شكريااات اخ حمد واخ قلــــم ,,,, احترامي

[طُـهـر]

ماشاء الله عشت الموقف

بس ياقوي قلبه ليش ماساعدها

[قلم صريح]

يقول في معرض سرده اختنا , طُهر , ( جا في بالي ارفع صوتي اهش عليه عشان ينحاش أو تهرب الحمامه .. بعدين قلت في نفسي .. هذا حرم وهالقطاوه الظاهر عايشه على الحمام .. وقلت خله كان صادها هذا رزقه ،،)
و أنا توقعت تجي القلوب الخفيفة و الحساسة و تقرا و تتضايق إن ماحد ساعد هالحمامة
و لا خاب توقعي ,
إحترامي

[طُـهـر]

أيوه فاهمة

أول شيء يوم قال هالحكي على بالي لأنها حمامة حرم تبي تجيها كرامة وتطير ~>موب الكرامة اللي عكس الذل
لاكرامة الأولياء والصالحين ~>حسيتني شيعية : )

بس ضاق صدري عليها في النهاية

المشاركة الأصلية كتبت بواسطة   تجي القلوب الخفيفة و الحساسة

حسيتها دقة ولا : )

[شبل الأسد]

سبحان الله موزع الأرزاق
ومع ذلك كسرت خاطري
هذه"الحمامة"
وهي تفر من الموت وكيف! كانت مذعوره..!

شكرًا لك أخي الغالي على هذه القصه..،

[رحيق الياسمين]

موقف صعب عاد حمام الحرمين غير شكلهم والتامل فيهم شئ رائع

شكرلك استاذنا قلمــ على نقل قصه مشرفنا حمد

[اشواق]

يا ليتني حمامة و ياكلني القط بس لأزور الحرم.
يا الله قصة فيها من المتعة الشيء الكثير.
أردت فقط المشاركة بشيء مختلف فلا تستاؤا من ردي.
شكرًا للأستاذ حمد و الأستاذ فيصل على القصة.
حفظكم الله و أدام عطاءكم.

[بنت الاصول]

ياقوي قلبك مشاء الله عليك
باين عليك عسكري
لواني مكانك كان ماا خليه يقترب منها المسيكينه

كسرت خاطري الضعيفه
سبحان ىالله الي مهوب مقسوم لك مقسوم لغيره

سبحانه موزع الارزاق

[وَدْقْ ,]

قلوب رقيقة يعني تعترف انك قآسي !
صحيح ان هذا يومها بس اقلها عملت بالاسباب انقذت روح
ولاتحتقرن من المعروف شيئا .
: )

[قلم صريح]

المشاركة الأصلية كتبت بواسطة ||زخـآت المـطـر ||   قلوب رقيقة يعني تعترف انك قآسي ! صحيح ان هذا يومها بس اقلها عملت بالاسباب انقذت روح ولاتحتقرن من المعروف شيئا . : )

لوني قاسي ماحسيت أن فيه قلوب رقيقة
لكن أنا واقعي و الله سبحانه يسخر خلق لخلقه فكيف بحيوان لحيوان

ثمن لو انه طيرها كان ماجاب هالسالفه و لو جابهاو مسوي نفسه المُنقذ , قلنا
يا حمد ولد أبو حمد وش المناسبة تورينا أنك يعني أني ؟
على العموم أخونا حمد عليه طريقة سرد لو يستغلها و يتحفنا بها كان تمتعنا بسواليفه ,
كان يجي لي في الخاص ثمن يقول سالفه ودي انها ماتخلص وهي واقعه له في نفس اليوم أو قبلها بشوي , هذي دعوه له أنه يتحفنا هنا ,

[وَدْقْ ,]

ماودي اخرج عن ايطار القصة .

لكن حبيتا عقب على لو جابهاو مسوي نفسه المُنقذ , قلنا
يا حمد ولد أبو حمد وش المناسبة تورينا أنك يعني أني ؟

الـكل وتفــكيره ,
.
شكراً على النـقل ,

[بنت العناقر]

ماشاء الله قصه رائعه .. وسرد قصصي مميز
اهنئك ع براعه التصوير , وهذا النقل الذهني اللذي استطعت به جذب خيالنا .
فحلقنا بفكرنا لنجاري سماء سردك .. حتى وصلنا معك إلى ساحة الوصول
حينما رسمت لنا جمال العبرة اللتي ختمت بها الاحداث ..

[قلم صريح]

قال لي أخوي ولد أبوحمد سالفة حصلت الأسبوع الفائت و طلبت منه أنه ينشرها هنا للفايده و أنتظر معكم , لكن أذا ماكتبها بنفسه سوف أنشرها هنا كما كتبها لي .
و سلامتكم

[قلم صريح]

وصلتني هذه الرسالة قبل شوي من أخينا شيخ الشباب / حمد أبوحمد :

قبل شوي اتسمع للراديو فالمذيع قرا خبر عن كبار السن في الصين وأنهم يستحمون في بحيرات بارده وبعضها تصل الى درجة التجمد .. وهذا يزيد مناعة اجسادهم ويحسنون اداء اعضاء الجسم الداخليه ..

ثم قراء المذيع الأية الكريمة (وَاذْكُرْ عَبْدَنَا أَيُّوبَ إِذْ نَادَى رَبَّهُ أَنِّي مَسَّنِيَ الشَّيْطَانُ بِنُصْبٍ وَعَذَابٍ * ارْكُضْ بِرِجْلِكَ هَذَا مُغْتَسَلٌ بَارِدٌ
وَشَرَابٌ * وَوَهَبْنَا لَهُ أَهْلَهُ وَمِثْلَهُم مَّعَهُمْ رَحْمَةً مِّنَّا وَذِكْرَى لِأُوْلِي الْأَلْبَابِ * وَخُذْ بِيَدِكَ ضِغْثًا فَاضْرِب
بِّهِ وَلَا تَحْنَثْ إِنَّا وَجَدْنَاهُ صَابِرًا نِعْمَ الْعَبْدُ إِنَّهُ أَوَّابٌ )

عاد البارحه وأنا جاي للرياض ،، توضيت لصلاة العشا ،، فالموية باردة والهوا ثلج ،، وقامت سنوني تطقطق ،، قلت ليتني تيممت ،، بهالبراد حلال التيمم ،، الله يستر لا أنزكم ،، وقمت اعاطس وحلقي احس فيه نغزة ،،

بس سبحان الله بعد الصلاة راح الوجع ،، وهذاني طيب ولافيني الا العافية الحمدلله ،،