العودة   منتديات سدير > ¨° المنتدى الترفيهي °¨ > ¨° التراث والسياحة °¨

¨° التراث والسياحة °¨ نوادر- أدوات قديمة - قصص وقصائد من التراث - تبادل الخبرات و التجارب في مواقع وأزمنه و وسائل و طرق الرحلات البرية و الصيد ، والسفر والسياحة .

الإهداءات

إضافة رد
 
أدوات الموضوع انواع عرض الموضوع
قديم 01-02-2002, 06:39 PM   #1
عضو مشارك
قصة السديراوي والأميروالاخوياوالقنص

( منقولة ) :

هذه يا أخوان قصة واقعية حدثت مع أحد الأصدقاء و الذي عرف بصراحته المتناهية مع الجميع ... أما سبب أعتقادي الجازم بصحتها فهي لأني أعرف هذا الشخص معرفة عميقة و أعرف مدى صراحته و كذلك بسبب أن هذه القصة غير مستغربة ومن الطبيعي أن تحدث ..

بطل قصتنا من ( حوطة سدير ) و هو يسكن بحي ال .. بجوار أحد الأمراء و هذا ( السديراوي ) يعتبر مرجع في القنص ( الصيد ) يعرف خوابي و ظواهر الحياة الحيوانية .. أماكن تواجدها , و قت ظهورها و كيفية صيدها .. الخ . و أسمحولي يا أخوان أن أروي القصة بالهجة العامية و على لسانه علما أني لن أرويها نصا كما سمعتها من صديقي و لكني سأرويها على حسب فهمي لمقصد الراوي مع بعض الزيادات الدرامية و التي لا تؤثر على مضمون القصة ..

طلعت من المسجد عقب صلاة المغرب و الى هذا الأمير واقف كنه يحتري أحد .. المهم على العادة اذا مريت عليه أسلم من بعيد و أتوكل على الله الا ذا المرة يوم سلمت عليه و جيت أمشي و الى واحد من عبيده وراي و يناديني قلت في نفسي ( وجع أثره كل هل المدة يحتريني .. وش يبي عسى ما سوالهم أخوي ناصر شي وجا يحط حرته فيني الله يستر ) المهم قالي مرسوله ( الله لا يهينك الأمير يبيك ) قلت زين جاي ( الحمد لله قالي الله لا يهينك يعني ما فيه مشاكل ) .. المهم يوم جيته و سلمت عليه وقعدنا نسولف شوي .. سالفة ورا سالفة و دخلني على علوم البر و الطلعات .. ( أيه ألحين عرفت ليش مناديني ) المهم قالي ( ودي أطلع للبر أقنص ذا الأيام و لا أعرف الأماكن الزينة وش رايك أنت يقولون أنك بخص بعلوم البر ) .. هنا جتني الضحكة لأن وجهه مهوب وجه بران و صيد .. بغيت أقوله يمدحون حديقة الغرفة التجارية خلهم يطلقون لك دجاجتين و أقعد لاحقهن الين ما تصيدهن لكني خفت منه أو بالأصح من اللي معه .. المهم قلت له ( وش ودك تقنص ) قالي ( أرانب ) .. هو قال أرانب من هنا و أنا أنصدمت من الجهة الثانية .. أرااااانب مرة وحدة .. طيب على الأقل قل ودي أصيد عصفورة حلوة مهوب أرااانب .. قلت له ( بس ترا صيد الأرانب كايد و يبيله جلد ) قالي ( هذا اللي أنا أدوره ) .. المهم قعدت أوصفله بعض الأماكن الزينة اللي تنفع للقنص .. ويوم كثرت عليه الكلام قالي ( تدري بس وش رايك تخاوينا ) .. قلت ( والله مدري خلني أشوف الأهل و أرد عليك عقب صلاة العشى هذي الطلعات بالأيام و لا أدري يمكن أهلي يبون شيء ) .. قالي بنبرة فيها شماتة و رحمة ( على راحتك ) .. المهم رحت للبيت وقلت للوالدة ( تراني أبطلع للقنص عقب كم يوم وش رايس ( ماهو رأيك ) ) قالت لي ( كم تبي تقعدون ) قلت ( و الله ما أدري على هوا الأنفس ) وفي الحقيقة على هوا الأمير .. قالت ( الله يحفظكم بس لا تطولون ) قلت ( أبشري ) المهم عقب ما صلينا العشى و تقابلنا أنا و الأمير و رحنا لقصره ( قصر أبوه الشايب ) ودخلني ذاك الملحق اللي أكبر من بيتنا و قعدنا نسولف شوي .. قالي ( هاه عسى الأهل عطوك الباس وورد ) و عقبها قعد يضحك .. أنا ضاق صدري و بغيت أتهاوش معه أحسبه يسب أهلي و الا يسبني لأني مدري وشو الباس وورد .. المهم يوم شافني ماضحكت حس أني أحسبه يسبني فتدارك الموضوع و قالي ( هاه بشر سألت الأهل ) .. قلت ( أيه و أبشرك الشاص حق أخوي أقدر أخذه ) شاص أخوي موديله 94 .. قالي ( لا خلاص مافيه داعي تكلف حالك أنا أبتكفل بكل شيء من الى ) قلت له ( على راحتك و الله يعطيك العافية بس لا تنسون تجيبون معكم براميل و موية و سكاكين و عزب ووو ) قالي ( لا تخاف محنب ناسين شي .. واحد من الشباب عنده كل العدة و يبي يجيبها معه بس قلي متى ودك نطلع ) .. قلت ( خلاص الوعد بكرا العصر ) قالي ( لا ما يمدي نجمع أشغالنا خلها عقب بكرا الفجر ) .. قلت خلاص .. المهم مرت الساعات و الدقايق .. وقبل الرحلة بليلة رنيت عليه في البيت قصدي القصر و قعدت ساعة الين ماطلع يوم طلع قلت له ( هاه كلش جاهز .. على وعدنا ) قالي ( خلاص حط رجولك و يدينك و دمجك في موية باردة ) .. المهم من بكرا صلينا الفجر و لقيت أخوياه اللي كانو معه قبل يومين واقفين عند باب القصر ومحملين معهم العدة في جيب لاند كروزر و شاص وش زينه مهوب زي حق أخوي اللي مان فيه .. المهم قعدنا نسولف مع بعض الين يطلع صاحب السمو وكل واحد فينا فمه أخيس من الثاني .. بعد حوالي ساعة من الصلاة طلع علينا و هو لابس جنز و ماسك في يد شنطة صغيرة و في اليد الثانية كاس عصير برتقال .. قلت له ( عسى ماشر وراك لاطعنا ) ما كملت الجملة الا و أخوياه بدو يناظروني و يخزوني بنظرات أستهجان .. جيت أبكحل الموقف عميته يوم قلت له ( تراك طالع للصيد منتب طالع لفلوريدا وش ذا اللبس و وش ذا الشنطة ) في هذي اللحضة بديت أحس بالشرار يتطاير من عيون أخوياه .. بس رد الامير طمني شوي ( لا بس أنا أرتاح في هذا اللبس ) المهم ركبنا السيارات .. أنا و الأمير و أثنين من أخوياه في الجيب .. و الثنين الباقين في الشاص .. مسكنا الدرب و كنا نبي نروح للرملة ( الربع الخالي ) .. بعد ما عدينا ربع الطريق تقريبا بدا يتذمر الامير .. متى ناصل .. كم بقي .. لياك مضيع ( عسى ما ضيعت ) ... وهو يترنم علينا أرتفع ضغطي منه ومع ذلك قلت له بلين ( يا أخوي تراك طالع لبر و البر يبيله جلد و لعلمك الدرب بقي عليه واجد .. أنكانك تحب نرجع رجعنا ) .. بعد ما قلتله هذي الكلمة حس بغلطه و هجد و لا عاد صار يغثنا .. و قعد كل دقيقة مطلع سجارة من الشنطة اللي معه و يقرا ذا المجلات اللي هو جايبها .. على هذي الحالة ألين وصلنا لأخر محطة قبل البر .. وقفنا نصلي و نعبي بنزين وموية و .. الخ و كانت الساعة حوالي ثلاث و نص العصر .. المهم عقب الوقفة مشينا حوالي 40 كيلو و دخلنا البر .. ما أمدنا ندخل البر الا و الأمير غاثنا ( هذا المكان زين خلونا نقعد هنا يكفي ياجماعة تعبنا ) .. ما أمداني أقول لا ما ينفع ذا المكان مهوب زين قدام أحسن الا و اللي يسوق يسأل الامير كنه يعاندني ( هذا المكان زين طال عمرك ) قال الامير ( أيه و قفونا في أي مكان لو فوق أثلة ) نزلنا و طقينا خيمتنا و صرنا نشتغل الا الأمير يتمقل فينا .. يوم شفت المسألة مهيب فري ( FREE ) و الموضوع فيه طبقة ارستقراطية و طبقة كادحة .. تركت الشغل و الله منيب عبد عنده .. وقعدت أشوف ذا الأسلحة اللي هم جايبينها .. فرد .. رشاش .. شوازن و خرازات و بنادق .. الخ قلت للأمير ( ما شاء الله ياأبو فلان وش ذا الأسلحة ما بقي الا تجيبون قاذفة قنابل ) .. قعد يضحك الامير وفي عيونه نظرة الأنتصار و الظفر .. المهم طبخنا عشانا و تعشينا و عقبها قابلنا الضو نسولف .. و هنا كانت الصدمة بالنسبة لي يوم شفتهم يتغصبون الضحك اذا نكت الأمير مع العلم أنه في قمة السخافة هذا فوق أن أشكالهم كانت في قمة المصالة وهم يتغصبون الضحك .. قعدنا معظم ذيك الليلة زهقانين الا الأمير .. حتى الامير زهق شوي عقب ما شافني ما أضحك .. المهم ما زانت السوالف شوي الا يوم مل هذا الامير من التنكيت وعطانا الأذن بالسوالف .. عرفت أنه عطانا الأذن بالكلام يوم سمعت حس ( منوخر ) لأول مرة بدا يسولف .. هذا منوخر محترف نفاق و تطبيل و تغصب ضحك .. المهم أني نمت هذي اليلة مفجوع و ضايق صدري .. وش ذا الورطة وش اللي بيصبرني الين ما أرجع للديرة وش اللي بلاني مع ذولا .. المهم .. يوم جاء الصبح و طلعنا نقنص و كلن معه خرازة ( شيء كنه ساكتون بس أقوى ) يدور ذا الأرانب .. طلعت أنا و الأمير و أثنين .. نصيد .. في البداية كان الجميع يصيد حتى اللي يسوق و كلنا صدنا الا الأمير !!! و بصراحة كان الامير أحول الأرنب يمين و هو يرمي يسار .. في هذي اللحضة بدا الأخويا تشغيل مكينة النفاق وخذو مني الخراز و وقفو هم عن الصيد و خلو الأمير لحاله يصيد .. كل ما رمى الأمير ولا جاب الأرنب قالو ..لوها يسار شوي كان الفشقة ( الرصاصة ) في راسها .. هاه لوها يمين .. لوها يسار .. على ها الحالة اٍلين وصلت معي وقلت له ( يا أخوي و الله أنك منتب حولها نبي نقعد النهار كله و أنت ما صدت شيء ) ..رد علي الأمير بقمة العصبية ( ورا ما تنطم ) قالها ثم قال للسواق أرجع للخيمة و اللي قاعد جنبي في السيارة يخزني بنظرات تهديد .. المهم يوم وصلنا للخيمة قال ( يالله ضفو الأشغال نبي نرجع للديرة .. وراي شغل هناك ) وبدون أي أعتراض أو نقاش ضف الأخويا العفش و حملوها في السيارات .. وركبوني هذي المرة في الشاص .. بعيد عن الأمير .. و رجعنا للديرة و أنا في قمة الدهشة من أستعباد أخوياه اللي معه و مندهش بعد من النفاق الصارخ من أخوياه مع أني متاكد أن الأمير يعرف قدره وحده و يعرف بعد أن الكلام اللي قالوه فيه كبير مرة عليه .

التوقيع
انا فضيحة ... طل اكتم السر ... ويسموني الناس ( خرخيرة ) ! !





خرخيرة غير متصل   رد مع اقتباس
من قدموا شكرهم لـ خرخيرة :
قديم 04-02-2002, 11:39 PM   #2
عضو مشارك

وينكم محد عطاني وجه ! ! ! ! !

التوقيع
انا فضيحة ... طل اكتم السر ... ويسموني الناس ( خرخيرة ) ! !





خرخيرة غير متصل   رد مع اقتباس
من قدموا شكرهم لـ خرخيرة :
قديم 05-02-2002, 09:00 AM   #3
عضو جديد
 
شكر 1 فى 1 موضوع
فتاة سدير is an unknown quantity at this point

 

وين تبغنا نقرا كل هذا ...!!!


تبغين الصدق ما قدرت الا اول سطرين من موضوعك واخر سطرين...!!!




وبعدين ابحاول اقرا الموضوع ;)

;)


تحياتي,,,,

فـــــتــــــــــاة ســـــــــديــــــــــــــر,,,,,,,
وشكرا,,

التوقيع
اتمنى لكم التوفيق

يخاطبني السفية بكل قبح **** واكرة ان اكون له مجبا

يزيد سفاهتا وازيد حلما **** كعود زادة الاحراق طيبا
فتاة سدير غير متصل   رد مع اقتباس
من قدموا شكرهم لـ فتاة سدير :
قديم 17-02-2002, 05:11 PM   #4
عضو سوبر
 
تم شكره :  شكر 12 فى 11 موضوع
أبو ماهر is an unknown quantity at this point

 

.

وبعدين وش صار 0 0 0 0 0

سراحة نهايه بايخة طيب عطو خويك شيئ من الدراهم كافأه ؟

أقول من هو الي طلع للقنص مع الأمير وش أسمه من القصة في بالي واحد منهو؟



محب لكم الخير


أخوكم:-

التوقيع
amer_114@hotmail.com
أبو ماهر غير متصل   رد مع اقتباس
من قدموا شكرهم لـ أبو ماهر :
قديم 28-02-2002, 06:08 AM   #5
عضو نشيط
 
تم شكره :  شكر 2 فى 2 موضوع
المنيف is an unknown quantity at this point

 

معليش


ما فيه شيء جديد

التوقيع
[FL=http://yassser.jeeran.com/abdallh.swf] width = 476 height = 101 [/FL]
المنيف غير متصل   رد مع اقتباس
من قدموا شكرهم لـ المنيف :
قديم 01-03-2002, 05:55 AM   #6
عضو نشيط
 
شكر 1 فى 1 موضوع
ابوكريم is an unknown quantity at this point

 

معليش القصة فيها شوية نصيبات مهوب نصب استغفر الله اجل وين الشوازن اللي تقول عنها والله لو انه اعمى ما يفرغ الخمس طلقات في وجهة الارنب ان يجيبها واذا اخطى الاوله مهوب مخطي الثانية ولا لا تدقق يالقارئ.

التوقيع
من لم يمت بالسيف مات بغيره
تعددت الاسباب والموت واحد
ابوكريم غير متصل   رد مع اقتباس
من قدموا شكرهم لـ ابوكريم :
قديم 10-10-2013, 09:33 PM   #7
عضو سوبر
 
تم شكره :  شكر 191 فى 152 موضوع
ابن الاجواد is a splendid one to beholdابن الاجواد is a splendid one to beholdابن الاجواد is a splendid one to beholdابن الاجواد is a splendid one to beholdابن الاجواد is a splendid one to beholdابن الاجواد is a splendid one to beholdابن الاجواد is a splendid one to behold

 

رد: قصة السديراوي والأميروالاخوياوالقنص

خخخخخخخخ

ابن الاجواد غير متصل   رد مع اقتباس
من قدموا شكرهم لـ ابن الاجواد :
قديم 11-10-2013, 03:44 AM   #8
كاتب مميز
 
الصورة الرمزية حتما ً سأكون
 
تم شكره :  شكر 2,524 فى 949 موضوع
حتما ً سأكون is a splendid one to beholdحتما ً سأكون is a splendid one to beholdحتما ً سأكون is a splendid one to beholdحتما ً سأكون is a splendid one to beholdحتما ً سأكون is a splendid one to beholdحتما ً سأكون is a splendid one to beholdحتما ً سأكون is a splendid one to beholdحتما ً سأكون is a splendid one to beholdحتما ً سأكون is a splendid one to beholdحتما ً سأكون is a splendid one to beholdحتما ً سأكون is a splendid one to behold

 

رد: قصة السديراوي والأميروالاخوياوالقنص




هههههههههههههههههههههههه
ههههههههههههههههه
هههههههههه
هههه

وماجابوا معهم السلق لق

اجل الدعوى شررهم ياجوهر << يقراها ويضخم الصوت


عجبتني القصه .. تسلم الايادي

حتما ً سأكون غير متصل   رد مع اقتباس
من قدموا شكرهم لـ حتما ً سأكون :
قديم 12-10-2013, 12:39 PM   #9
عضو جديد
 
الصورة الرمزية هيفا للاعلان
 
تم شكره :  شكر 12 فى 9 موضوع
هيفا للاعلان is an unknown quantity at this point

 

رد: قصة السديراوي والأميروالاخوياوالقنص

نايسس ي بعدي ..
تحيه

التوقيع
اتشرف بمتابعةة الجميع

تويتر * انستقرام

ms_m2009
هيفا للاعلان غير متصل   رد مع اقتباس
من قدموا شكرهم لـ هيفا للاعلان :
قديم 23-01-2016, 03:20 PM   #10
عضو مشارك
 
الصورة الرمزية أبو رشا
 
تم شكره :  شكر 7 فى 7 موضوع
أبو رشا is an unknown quantity at this point

 

رد: قصة السديراوي والأميروالاخوياوالقنص

الله يعطيك العافية
التوقيع
وقفات مع مغسلة الاموات

http://www.sudeer.com/vb/showthread....post1059004015

لا اله الا الله
لا حول ولا قوة الا بالله
سبحان الله وبحمده سبحان الله العظيم
سبحان الله والحمد لله ولا اله الا الله والله أكبر
أشهد أن لا اله الا الله وأشهد أن محمد رسول الله
أستغفر الله الذي لا اله الا هو الحي القيوم وأتوب اليه
اللهم صل على محمد وعلى آل محمد كما صليت على ابراهيم وعلى آل ابراهيم أنك حميد مجيد
وبارك على محمد وعلى آل محمد كما باركت على ابراهيم وعلى آل ابراهيم في العالمين أنك حميد مجيد
أبو رشا غير متصل   رد مع اقتباس
إضافة رد

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 10:26 PM.


Powered by vBulletin® Copyright ©2000 - 2024, Jelsoft Enterprises Ltd. موقع و منتديات سدير 1432 هـ - 1435 هـ

جميع ما ينشر في المنتدى لا يعبر بالضرورة عن رأي القائمين عليه وإنما يعبر عن وجهة نظر كاتبه