&^ بــــــوح القصــــــيد ^&

[بوح القصيد]

مع شديد الأحترام لكل شخص بهالبلد
للمواطن والمقيم وللصغير وللكبير
اعرف ان الوضع ماهو بهالبساطة ياولد
واعرف ان الأمر هذا يالخوي والله خطير
كل يوم لهالوباء المنتشر يولد ولد
والسبب ناس تجاهل بالغباء كل تحذير
كم عنيد للأوامر طاع نفسه وانجلد
خاطر بنفسه وصابه عقبها سوء المصير
لكن اللي التزم بالأمر للراحة خلد
قدر الموقف بفعله للسبب والله قدير
ندري ان الله خالق والد وما ولد
لكن المولى عطاك العقل حتى تستنير
بوحي

[بوح القصيد]

الكرونا بينت ناس كثيره
يوم داعي الحرب طبله دندنه
يوم كل بالرخا حاله ستيره
تكشف الشدات وشو معدنه
بينت حال الذهب من حال غيره
كل موقف للرجال تبينه
مير يالله تردع الجند المغيره
وان حال المسلمين تزينه
بوحي

[بوح القصيد]

خل المبادئ والحكم خل الأمثال
العاطفة ماتعترف بالعوايد
الحب معروف على مر الاجيال
ماينفع براعيه نصح ونقايد
كم واحد قبل الهوى قال ماقال
وعقب الهوى اصبح طريح الوسايد
يفضح طريح الحب اقوال افعال
تبين به لوكان ماهوب رايد
ان كان حبه صدق فالعشق قتال
ماتحمله اهل العزوم الشدايد
يبقى حنين القلب للخل ميال
لويمنعونه عنه ماهوب فايد
بوحي

[بوح القصيد]

حبيبي يابعد عمري يزين الوقت بوصالك
تعال نعيد حزات الغرام ونقهر الغيبه
على ذاك المكان اللي هدوءالليل يحلالك
انا باقي على حطة غلاك وكل ترتيبه
على عهد الغلا باقي وفي الخفاق منزالك
وطيفك كل ماحن الخفوق اشواقي تجيبه
بوحي

[بوح القصيد]

لاياعساني عند الأجواد وان غبت
ان طروا اسمي صرت مذكور بالخير
والقى حضوري عندهم لاتوجدت
نسايم يرقص على جوها الطير
بوحي

[بوح القصيد]

مشاعرك قلها ولوكنت محجور
لأجل الغلا بين الحبايب طلايب
منتا على كتم الأحاسيس معذور
اطلق عنان خيولها للحبايب
اهل الفضاءوالعلم مامنهم قصور
خلوا بريد الحب فوق السحايب
عبر الفضاء ترسل احاسيس وشعور
كله بضغطة زر والبال طايب
بوحي

[بوح القصيد]

وش لون اغيب واحاجتي لك كبيره
ماتدري انك صرت انفاس روحي
ياورد بستاني وريحة عبيره
ياعطري اللي في ثيابي يفوحي
وش لون اقول لغيرك الحب سيره
وانت الطبيب اللي يداوي جروحي
لا لا يصيبك شك فيني وغيره
مادام شعري في غرامك يبوحي
بوحي

[بوح القصيد]

ادري ان اللي ابي مابه مجال
والمصيبة ماله بقلبي بديل
وادري انه صار في حكم المحال
بس شسوي احب المستحيل
بوحي

[بوح القصيد]

الشهر مبروك يالربع الكرام
يوم حل بدارنا شهر رمضان
ارجي من الله نصومه كل عام
وكل عام ودارنا أمن وأمان
بوحي

[بوح القصيد]

ياربنا ياللي لك الخلق تعبد
ياواحد كل الملا يرتجونه
ياللي لك العباد تركع وتسجد
ماغيرك احد يالولي يعبدونه
تقبل دعاء من قام ليل وتهجد
واسبل من الخشية مدامع عيونه
تكتب له الرحمة ليا صام واجهد
وتغفر ذنوبه وتعفو عن ديونه
ومن الجحيم اللي لهبهاتصاعد
تجير عبدك من عذاب المهونه
وتكتب له الجنه وهي خير مقعد
في مسكن لأهل التقى يسكنونه
وجعله يوافق ليلة القدر وان جد
في ليلة رب البشر يسألونه
يدعي بهامن له مرام ومقصد
والناس فيهاربهم يطلبونه
ومن يطلبك يالواحداللي تفرد
يرجيك يالله لاتخيب ظنونه
ويالله عسى من صام يفرح ويسعد
ويفوز في رضوان خلاق كونه
وختامها واعداد ماحن وارعد
واعداد براق تلاعج مزونه
صلوا على المبعوث للناس احمد
ياللي لمنهاج النبي تتبعونه

بوحي
في 1441/9/5هجري

[بوح القصيد]

انا ياناشدي صحراء وانا من هالحجر والطين
وانا ارض الحماد ومن جبال طويق تكويني
وانا كم مرة فيها مشيت وحافي الرجيلن
تحت شمس سبايبها غدا لوني وتلويني
اخذت من القمر بعده واخذت من النجوم البين
ومن شمس الضحى نورعلى الغربة يوديني
واخذت من الفصول الأربعة شدة قساها سنين
بأرض مابها غير الجفاف وبردها شيني
وانا اللي من طبيعتها قسيت وماعرفت اللين
ومن جو الجفاف اللي بهاصار الجفا فيني
ومن شدة ومن غلظة اهلها خطت لي ثوبين
وبشت من خشونة عيشهاوبره مغطيني
انا من ديرة تبدأ بنون وبعدها حرفين
ومابين الليانه والقسى تلقى عناويني
انا وش لون تبغاني بعد هاللي قريته زين
اجي انعم من خيوط الحرير وملمس الصيني
بوحي

[بوح القصيد]

صباح الرحمة اللي من اله الخلق تغشانا
وغفران من المولى يطهر كل مافينا
ودعوات نرددها اذا مالليل امسانا
عسى ربي يحققها ويعطينا امانينا
بوحي

[بوح القصيد]

تراهاالعالم الغربي فتح للمعرفة بيبان
الين انه وصل للكوكب اللي يلوح براقي
ولا وصل القمر لينه تطور بالفكر انسان
وحنا اللي بنظرتنا نقول ان شعبهم راقي
اجل وينه شديد اعجابنا يامعشر العربان
ورا مانتبع آثار القمر والساق بالساقي
لأنا نحفظ الفكرة وفي تطبيقها نقصان
وخلف اللي بهايوافق هوانا حيل ننساقي
كذا نبقى على قولة ترا كنا زمان وكان
ويبقى حالنا نفسه مدام ان الفكر باقي
بوحي

[بوح القصيد]

عليك من الجفا عدة ملامح والورق شفاف
يبين بلون رسام الوعود ولوحة اعذاره
رسم فيها تماثيل الصدود اللي بها تنشاف
بريشة سولفت عن تركت البرواز لجداره
بوحي

[بوح القصيد]

جعل هذا العيد مبروك وسعيد
وجعلنا نحياه في أمن وسلام

ونفرح بشوف القريب والبعيد
ونحتفل في جيته في كل عام

بوحي