|
من سواليف الأولين>> لاتفوتكم ,,,
http://up.graaam.com/uploads/imag-4/...013ca4fcf2.jpg هذا ياطويلين العمر واحدن قال لاهله اخطبولي ودي أتزوج المهم ان اهله خطبو له وحدتن ماشاء الله تقول للزين وخر واجلس متسانك وتزوجوا وحطوا ذاك العرس الحنان الرنان وماشاء الله دخل على حرمته هو شافها والا ماشافها انقلب وجهه ما يدري وش جاه المهم من شافها قال .. الله واكبر تسنه الموت جاني ** يرجس بحجوله مدخلينه عليّا ومعطرينه بالزباد العماني ** تسنه جيفة في ( جيوبي ) منيب متأكد من اخر كلمه .. بس يعني من شافها وهو كن فيه الموت ماحبها ابدن ابد.. وانها مشخصه له وحاطه من هالعطر الزين اللي يقاله زباد عماني وهو كنه شامن ريحه شينه يعني من شده كرهه لها .. عاد هي يوم قال هالحتسوه ردت عليه وقالت الستر يا ابن حمود واعطيك مالي واربع ليالي لا تظهر عليه يعني استر علي جعلك للجنه يا ابن حمود واعطيك كل مالي واللي تبي .. وش بيقولون الناس طلقها في ليلتها لو اربع ليالي عاد بعض الاولين الله يصلحه مافيه رحمتن ابد قال .. والله لو تعطيني مال فردوس مع أباعر ما استر عليتس يعني منيب مقعدتس لو ليله عندي روحي الله يستر عليتس الاباعر .. هي البعارين .. ,,,,,,, هذي بعد وحدتن وش حليلها غنيه وعندها حلال ومال ومعرسه ورجلها يعزها ويحبها وهي تموت فيه دخل عليها يوم وهي تقرص على المقرصه بتزين له غداه .. قال يا ام فلان طالبتس وماترديني .. قال انت ماتطلب تام امر قال ابي بعض صوغتس واللي عندتس ودي اروح اترزق الله قال سم وابشر وهذا صوغي كله وتعطيه اياه ... ويروح الرجل بقوله يترزق الله هالحريمه وهي جالسه في يوم من الايام وتجيها حرمه قالت تدرين رجلتس وين هو؟؟ قالت ايه رايحن يترزق الله.. قالت الله يرحم حالتس رجلتس اعرس وانتي تقولين رايحن يترزق الله .. بعض الحريم الله يصلحهن ياحبهن للشر طيب دريتي عضي على شحمه وسكتي .. ماعلينا هالحريمه من ضيقتن جتها ياربي وش تسوي والقطي عبيتها وروحي في البر عند شجره وتقعد تبتسي وتبتسي وقالت .. صوغي غدا وابو عيالي تنكر ومافيكم يالنشاما من يجيبه طلع عليها واحدن من اهل الارض بسم الله العظيم الاعظم >> يعني جني وقالها .. روحي عليتس الله وامان الله ان ينكس صوغتس ورجلس راحت لبيتها وهي متروعه .. ويروح هالجني بسم الله ويلاطف الرجل وحرمته الحريمه غدت مهبوله وعجز هالرجل يقرا عليها ويعالجها بس ما من فود .. راح الرجل لحرمته قال سويتيها يابنت اللذينا قالت .. ما سويت شي هذا ربي راحم ضعفي ... هنا نشوف وشلون الحريمه ربي رزقها على حسن نيتها جعلها للجنه البارده .. وأموات المسلمين ... ,,,,, كانت حرمته طيبتن بالحيل وماجاه منها الا بنيه وحده ... المهم جاها مرض ومرضت ياعمري وتوفت .. وخلت بنيتن وحده هالرجل قال ورا ما اعرس غدي ربي يرزقني حريمه سنعه تداري بنيتي وتعاملها مثل بنتها المهم المره تعامل البنيه في حظرته معاملتن الله انها ولا راح الله يهديها بس.. دخل مره ولا شوشه بنيته طايره ويوم شافها ضاق صدره وقال .. يالجوهره راستس مشوش ومحتاس راح العميل اللي يعمله ويسويه والله لولا الحيا والخوف واداري الناس لاقعد على حيلي واعمله واسويه هذه قصص من بعض سواليف لأولين الله يرحمهم ويسكنهم الجنه .. |
رد: من سواليف الأولين>> لاتفوتكم ,,,
ياحياة الشقى هالحريم مسكينات من يخلقهن ربي إلين يموتن بس الي سالفتها طلع لها جني معليش اساطير وين عايشين فيه إحنا ..! وآخر سالفة ودي أدري وش صار على الحرمة طلقها أ ولا ..؟ فقيدت : مميزَه ماشَاء الله دمتِ طَاهِرة , |
رد: من سواليف الأولين>> لاتفوتكم ,,,
من جد عشت جو مع القصص
من زمان واحنا بس نتابع هالنت وخلينا سوالف الاولين مع انها موثقه يا زينهم وسوالفهم ولو ان بعضها خيال وياليت الموضوع ما يوقف كل من يدخل يجيب سالفه ويثبت الموضوع من بعد اذنكم لان هالسوالف من جد لها عبق وعطر لا يشابهه شيء فقيده لا حرمني من اجمل وارق فقوده |
رد: من سواليف الأولين>> لاتفوتكم ,,,
قصص رائعة فقيدة شكرا لك على اختيارها وجزاك الله كل خير |
رد: من سواليف الأولين>> لاتفوتكم ,,,
صيد لذيذ ممتع يا مبدعتنا .. : وزاد من جمال تلك القصص أنها من البيئة القريبة .. كما وإن أسلوب كتابتها قريب من النفس .. وبالتالي فإنها تسكن العمق .. وتترك أثراً في منتهى العذوبة الجمال في نفس المتلقي .. تحياتي لك مشرفتنا المتميزة فقيدة أمها .. ولكل الأهل في المنتدى .. - |
رد: من سواليف الأولين>> لاتفوتكم ,,,
اقتباس:
كل الشكر لك ..للأسف ايقونة الشكر مزاعلتني :aggressive: * والله يعطيك العافيه ..وفي القصه الاخيره مع الرجل وبنته .. تلاحظين الجلافه في التعامل واخفاء المشاعر يعني حامل هم كلام الناس عنه ولا حمل هم شوشو بنته وضيقة صدرها !!! ولو تلاحظين يمكن عاداتهم اول ان الواحد مايكون حنون مع اولاده عكس الان اللي الاب شوي ويدخل مع اولاده الحمام ( اكرمكم الله ) مع ان الكثيرين يسوونها ولا حرج * الف شكر وكل عام وانت ِ بخير |
رد: من سواليف الأولين>> لاتفوتكم ,,,
اقتباس:
شرفتني اطلالتك العطره غاليتي ودق والتميزاكتمل بمرورك العطر وتعليقك الجميل خمائل من الياسمين تعطر قلبكِ الطيب |
رد: من سواليف الأولين>> لاتفوتكم ,,,
اقتباس:
ولا حرمني منك ياغاليه ولا من قلبك الطيب سعدت بحضورك وتعليقك الجميل وقلمك الأجمل شكراً لك بحجم السماء وأكثر حبيبتي |
رد: من سواليف الأولين>> لاتفوتكم ,,,
اقتباس:
اشكرك على مرورك أختي بنت الاصول بارك الله فيك ودمتي بخير |
رد: من سواليف الأولين>> لاتفوتكم ,,,
اقتباس:
حياك ربي أستاذ عبد العزيز العمران حضورك انار السطور وتواجدك وتعقيبك الجميل ارتقى متصفحي للأجمل تقبل مني جل التقدير وعظيم امتناني على تشريفك الكريم |
رد: من سواليف الأولين>> لاتفوتكم ,,,
خَنقوْلكٌم سَالفَه مِن سيوالِف جَدتِي عَن الصَبر ومَن هَالكَلام يَاجاره أَعي وإِسمعِي cb: تسمُعون أَنتم بَعد صح cb: تقُول فِي واحد أَرمَل يَبِي يتزَوج وقَال لأمه أَبي أَتزوج مِن بنَات عمِي مو عَم لَزم لا .. يقُول يمَه هِن زينَات وودِي وحدَه مِنهُم فرفضَـت أُمه وقَالت لا مَاتخِذ إلا بَنات وحدَه مِن جيرَانهُم أمهُم مَاشَاء الله عَليها تَربِية وأَبوهُم له صِيته وتجَارته مَاشَاء الله وبنَات عمِك مايعجبُوني هَذولِيك يعنِي أَحسن ذُوق .. رِده هَاته ملزَمه ماياخِذ منهُم ؛ وخَذ الي قَالت أُمه ولاحبَها أَبد تقُول جَدتِي بس الحُرمه سَنعه حببت نفسَها فِيه طَبايعهَا زِينه مَعه وهِي حابتَه ثمِين حبَها ...! وتقُولي سُوالِف مِثل كِذا وتقُول الرجَال منُول صَلفين يعنِي دَفشِين مو مثل الآن يرحمُون وحُرمته تحكمَه عَاد تعلِيقِي عَليها : cb: هِي مَاصبَرت إلا أَنها حابتَه مو شطَارة فِيها لو إِنها ماحبَته طلعَت مِن بِيتها ولارجَعت ؛ وثمِين هِي مجبُوره تَصبر عَليه منول فقر مُو مثل الآن عِز ومعزَه , والشُور عِند البنت تضحك تقُول ولَو حَريم أول مُو مثل اللحِين قِلت بس لاتقنَعيني صَابره مِن رضَاء لا مردّها له وين ترُوح له ..! مايعجَبها كَلامي طبعاً , spo: هُو مَافي سَالفه بِعينِها لكِن مَاقصَدت طَبع الأَولِين غِير يعنِي جَدتي تقُولنا أُحمدوا ربكُم ؛ وَلازم هِنا مسَاحة لجَدتي tvm: , |
رد: من سواليف الأولين>> لاتفوتكم ,,,
سالفه جميله مثلك ودق ويخلي لك ربي جدتك ويطول بعمرها والله الكبير بركه في البيت
لك اعطر تحيه < حست راعيه الموضوع |
رد: من سواليف الأولين>> لاتفوتكم ,,,
الله المستعان ........!
زمان اول تحول عفاك الله يالغلا |
رد: من سواليف الأولين>> لاتفوتكم ,,,
اقتباس:
وانتي بصحة وسلامه ياغاليه يمكن بعضهم يرجع ذالك الي نقص خبرتهم في مجال التربيه او مو متعودين على انو تكون فيه علاقه حب بين الأبناء والأباء بس مو كلهم فيهم جلافه بعضهم في من الحنيه مايكفي بلد وهذه لمسته في ابوي كان حنون علينا الله يرحمه ويسكنه الجنه اشكرك على تشريفك العطر نورتي متصفحي بمرورك الجميل دمتي بكل الحب |
رد: من سواليف الأولين>> لاتفوتكم ,,,
اقتباس:
هلا حبيبتي ودق يتشرف متصفحي بوجودك وبوجوك سواليف جدتك وربي رووعه سواليفها الله يحفظها ويطول في عمرها ويخليها لكم يااارب ننتظر سواليف جدتكِ ؟؟ :yes: |
رد: من سواليف الأولين>> لاتفوتكم ,,,
اقتباس:
حياك ربي أخي الكريم مشتاق شرفت متصفحي بحضورك الجميل لك مني كل الشكر والتقدير |
رد: من سواليف الأولين>> لاتفوتكم ,,,
اليوم عندي لكم سالفة جدتي ام حمد أم جدة جدي من امي الله يغفر لهم جميع السالفه لها حول 90 سنه والله اعلم ان كانت مهيب اكثر .. السافه ترويها لي جدتي أم الوالده الله يطول في عمرها ويخليها لنا .. تقول : كانت أم حمد ساكنه في قصر على جال قليب أم فرغين في منطقه تسمى الفشخاء في الديره وكان البيت معروف انه مسكون لكن الاولين مايخالفون أبد وكانت تشك في البدايه ان المقرصه تستعمل في الليل لانها تلقاها متغير مكانها .. وفي يوم من الايام كان عندها غرفه داخليه كبيره (( الصفه )) وكانت في البيت بلحالها ورجلها في المزرعه الا وهي اللي تسمع اللي يصفق لها من داخل الصفه وتقول : يا ام حمد لاتخافين بسم الله عليتس والف اسم يحوط عليتس انا قصيرتك وجايه حانتن عليتس وابا اساعدتس على غثا ها الدنيا وكانت ام حمد عندها الشواغيل اللي في المزرعه واذا جاء الفجر تسوي لهم العصيد وتخض اللبن وتحلب الغنم وتخبز على ها المقرصه يعني تشتغل وتتعب . قامت ها الجنيه تشتغل معها وتساعدها والى جاء في الليل قالت لها : يا ام حمد طرفي لي الحجري - قدر كبير للذبايح - والمقرصه ابيها الليله . والى اصبحت لقت خويتها مرجعه الاغراض ومحطوط فيها قرصان كبار واصفر من الزعفران ومصفط ارباع وفي وسطه قطعة لحم كبيره وتقول ام حمد شغلهم يهبل بس مافيه ملح ابد ... وتقوم ام حمد تقطعه مع اللحم وتطبخ له مرق وتملحه وتسويه تشريب وعلى ها الحال سنين والمره تساعدها بس تغطي وجهها بكمومها وكانت مثل على مايقولون شلحان .. وحبيبه معها ويوم جاء سنه من السنين قالت الجنيه لام حمد : انا اليوم حجاجه انا ووليدي لكن ابوصي لك بنت عمي في غيبتي تفزع لك .. وان حصل منها اي شي خسخسي لها وتعوذي منها واطرديها على طول .. وراحت خويتها الحجاجه ومن بكره جتها بنت العم واول يوم مابدر منها شي وثاني يوم وهم متقابلين على خض اللبن فتشت وجهها على ام حمد وسعلوت عليها _ يعني قالت بااااااا - تقول ام حمد وانا اللي اذكر كلام خويتي وقالت لها : بالعويذ الله منتس سبعه تعاويذ .. لاعاد اشوفتس ولا تقبلين علي خس يخستس .. تقول ام حمد : من روعتي ما اذكر من شكلها الا فتحة عيونها كانت بالطول . وفعلا ماعاد جتها .. ويوم رجعت خويتها من الحج الا وهي تصفق لها في الصفه وجايبتلها صوغه من الحج ثلاث كساوي خضر وقالت لها هاها خانت ميزيتك حالها هاوشتها مهيب زاتسيه واخوالها الرياحين جاني علمها وانا في مكه لكن جاها ما كفاها وردت علومهم مثل ماكانت .. اعجبتني هذه السالفه واتمنى تعجبكم منقول لأمانه |
رد: من سواليف الأولين>> لاتفوتكم ,,,
اقتباس:
بسمَ الله الرَحمن الرَحيم سكنهُم مسَاكِنهُم يَارب , وِش هَذا مَابِيها الصِدق ؛ تَذكَرت فِي نَاس يصَحُونهم لصَلاة الفَجْر , حَتى لو منقول عَادي أَهم شَيء نقرَأ قصَصهُم ونستَفيد < شرايَك تَثبتِين المَوضُوع بَعد :ض: , |
رد: من سواليف الأولين>> لاتفوتكم ,,,
اقتباس:
آمِين آمِين يَارب العَالمِين ويخَلي لِك والدِيك وكَل أَحبابك يَارب يَاكرِيم , بَركَه وبَس أَول يُوم رمَضَان زرنَاها حَسِيت بِ طعم رمَضان صِدق الله يخليهَا لنا ويخَلينا لهَا يارب , الله مِير يسَلمك كلنَا رَاعينَه مَاعلِيك , أَنرتِ يَالطِيفَة , اقتباس:
إِي سُوالفهَا يُوم تهَاوشنِي عَلى شكل نَصِيحة ويُوم تَعطِيني جَوي تمتَلك مَهَارة فِي التَسلِيك , ويخَليك لأَحبَابِك يَارب , أَبشرِي مَاطلبتِ شَيءْ بَسير عَليها إِن شاء الله نُوبة ثَأنية وبكتَب قصصهَا إِن شَاء الله , الله يسعدِك فَ الدَارين يَارب , , |
رد: من سواليف الأولين>> لاتفوتكم ,,,
هلا غلاتي ودق ثبتكِ ربي على طاعته وحفظك .. انا ما اقدر اثبته ياقلبي لان مو في قسمي امي تقوله الله يرحمها ويسكنها الجنه تقول كنا نسمع اصوات ونشوفهم زي الخيال عندنا بس ما كانو يذونا ابد في شيء |
رد: من سواليف الأولين>> لاتفوتكم ,,,
منقوله من روايات الراوي :- محمد الشرهان جرت هذي القصة على الشاعر/ حاضر بن حضير العازمي هذا الشاعر كان في آخر حياتة كفيف البصر هذا اللي أنا سمعت عنه, وكانوا أهلة رحل يشدون وينزلون وسكنوا في حوطة سدير وقبل لاتجي السيارات كانوا يجون للمدن الكبيرة على رجليهم وقليل اللي يجي على دابة, وهالشاعر كان رجال فقير وضعيف الحال وعادة الناس اللي يجون إلى المدن الكبيرة يروحون ويسلمون على الشيوخ ويقصدونهم وخاصة الشعراء يجون للأمراء ويسلمون عليهم ويكرمونهم ويشرهونهم ويعطونهم فهو يوم جا ودخل القصر كان وقتها الملك سعود ولي العهد وحاول أنه يدخل مع اللي يجون يسلمون على الملك سعود وما حصل له وقعد عند الباب وهو رثّ الهيئة ومسكين وضعيف وقليل شوف والأجنبي دائما مكسور الجناح مهوب كل يتلقاه خاصة إن كان رث الهيئة ومهوب معروف وجا هو مع الناس اللي يسلمون ولا حصل له أول يوم ولا ثاني يوم ولا الثالث وعجز ويالله عقب عشرة أيام حصل له يدخل ويوم دخل كان هو جايب قصيدة بيلقيها على الشيوخ فلكن قال قصيدة عند الباب ويوم مثل قدام الملك وسلم قال وش عندك قال عندي أبيات قايلها وقال: عنـيـت لك من باطـن سدير ياسعـود ودي بـقــربك ياربــيـع الـضــعــافـي يالليـث يا الضرغـام يا منـقع الجـود يامهـدي اصعـاب العرب بالسـعـافي لا جـيـت يمـنـعني عن الباب راصود والصـدر ضـاق ولا على الله خـافـي لعـل حـظي فـيـك ماهــوب مـقـرود واللي عطـاك من الوهايـب جـزافي تعـطي جـواد الخـيـل بارسـانها قود زود على العـيـرات حـم الشـعـافي يا ابو فهد مالي بغير أنت مقـصود يـوم انـهـن عـضـن في الضـلافـي ارخص لي اواجه من القل مضهود رجـلي ما يضـفـي عـليهـن لحـافي واكرموه من ضمن اللي هم يشرهونهم وعطوه حقه اللي الله كتب له وقعد في الرياض فترة يروح هنا وهناك ويسير على فلان ويتقهوى عند الاسر والحمايل يوم انه مضى علية فترة وهو قاعد يمكن حول الشهرين والقريشات معه رابطها وحاطها في مخباته وماينام إلا وهو متوسدها ويتلمسها من يحصل أول الخرجية ووده يرسل من هالخرجية صوغة لأهله وماكان فيه سيارات يالله عقب 15 يوم أو 20 يوم تروح سيارة جهة المجمعة الحاصل وهو في السوق والا فيه واحد من خيرة الرجال وطيب وكريم أسمه محمد بن صالح من الاسر المعروفة في مدينة عشيرة في سدير كان بن صالح مستأجر لوري ويشيل ركاب يترزق الله فيها والسيارة هذي بتمشي بكرا او بعده لوري أحمر والناس يجمعون عفشهم اللي معه شنطة واللي معه شنطة وفراش واللي معه برميل فية قاز والثاني معه باب خشب واللي معه شبك ومكينة خياطة مشكلين الناس أما حاضر دخل السوق بوسط الديرة يسمونة سوق الحساوية أسفلة ناس يخيطون ثياب وجنوبية يبيعون قهوة وهيل واغراض ويجي هو يتلمس ويتحسس ويقعد عند راعي دكان ويشتري منه واول مافية كيس تحط فية الاغراض بس الحريم يجمعون الثياب المستعملة ويقصصونها ويصلحونها كيس ويبيعونها على اللي يبيع القهوة والهيل والدارسين فجا حاضر عند راعي الدكان وقال ابي قياسة سكر يجي لها 10 كيلو ابي نص وزنة هيل مابعد جت الكيلوات قال ابي لومي ويحطها له في كيسة من هالخرق وياخذ شوي دارسين وزنجبيل وفناجيل من ذيك الملونة وبيالات المهم تقضى وأخذ له اغراض واجد وشافها والى والله واجد ولقى واحد يبيع كنادر رامي صندوق خشب مايبة واخذ اغراضة وحطها في هالصندوق واخذ حصاة وسمر عليها وقال خلها عندك الى بغى بن صالح يمشي ابروحه معه قال زين وفعلا" يوم جا بيمشي بن صالح قال له الله لا يهينك ابيك تجدعه لأهلي إلى وصلت .. أهله يدري عنهم ساكنين حولهم ويوم انه حط الصندوق في اسفل السيارة وركبوا الركاب وتجمعوا اللي على السلة واللي في الصندوق متلطم واللي يحكي مع خوية ودايم الغمارة يحجزونها للمعاريس أو اللي يبي والدته يحجز الغمارة اللي قدام المهم أخذو صندوقه ومشو يوم وصلو الديرة بعد يومين او ثلاث ايام لأنهم يواجهم تغريز وحفر ودفن وأحيانا ينزلون العفش علشان يدفون السيارة يغتثون مرة هالكلام قبل لا تتزفلت الخطوط فيوم وصلوا للديرة وبغوا ينزلون الصندوق مالقوه تخالفت فيه يدين وضاع .. ضاع صندوق حاضر ولا يدري وين راح ويوم جا عقب شهر ورجع حاضر لأهله وسلم عليهم على باله أنهم مسفهلين ومستانسين واصلتهم المقاضي والأغراض ويسألهم عن أخبارهم وأحوالهم ويقولون الحمد لله بخير وبس ماروحت لنا شئ في روحتك, قال وشو ..! استغرب حاضر قال روحت لكم صندوق فية أغراض فية هيل وقهوة وزنجبيل ودارسين وكسوة لكم وين راحت قالوا ابد ماوصلنا شئ قال ارسلتها مع بن صالح قالوا ابد ماجانا منه شئ وراح حاضر لبن صالح في مزرعته ويسلم عليه ويسأله قال ياأبو محمد الصندوق اللي روحته معك ماوصل لأهلي قال دور تأكد يمكن واحد من الركاب نزلة ولا يدري من هو له فدور الصندوق ومالقاه ورجع لبن صالح ويقول الأبيات هذي: يا خوي أنا اخترتك على كل مخلوق وارسلت معك من المقاضي علاقة بلاك خير واجودي وماثوق وشرواك مع حمله يشيل الوساقة ياابو محمد ياهوى لابس الطوق ماهوب حق اشناك عقب الصداقة عندك غدالي يابن الاجواد صندوق وانا حشا ماالحقك تهمة سراقة لكن تلبس واظهر الطاق مطبوق وان اعتقل ماالحقت راعية ساقة والا اغرمه لي ياابن صالح من السوق موجب من العازة ولا ش أنفهاقة الى قلطت بحق مانيب مفهوق حقي هو القادم وادور لحاقة على المناصي لي معاليم وحقوق وجيش ومخاريج وكساوي رقاقة وارد على الأخيار مع كل طاروق واقلط بدم الوجه قبل اندفاقة الكذب نقع صباخ همج ومطروق والصدق قرهود قراح مذاقة والقى هالقصيدة على بن صالح وقال ياحاضر والله ياابن الحلال ماأدري وين صندوقك وحنا لو محناب محل ثقة ماروحت معنا صندوقك من الاساس قال حاضر أي بالله محل ثقة للحين تخبر أنا رجال ضعيف وهذا محصولي وأبيه لأهلي قال والله مالقيناه بس ياحاضر صندوقك كم تقدر قيمة اللي فية قال مهوب غالي من الميتين وفيها وإلى ذاك الوقت يوم يجيهم وقت صرام التمر وكان عند بن صالح نخل يسمى المظل وكان في النخل اخو بن صالح ويقوم ويكتب لأخوه ناصر انه ياصلكم حاضر تعطونه ثلاثمية وزنة تمر بدل صندوقة ياكل منها ويبيع اللي يبي وعطاه الورقة تشكر منه حاضر والحقيقة هذي العادات الطيبة وهذا هو الشاعر ثبت كرم أسرة بن صالح بالقصيدة هذي |
رد: من سواليف الأولين>> لاتفوتكم ,,,
متصفح رائع وسرد أروع نتمنى أن تتواصل السواليف في هذا المتصفح فقصص الأولين لاتنتهي وحكيّاتهم ليس لها حدود ففيها العبر والمواقف الطريفة والمحزنة شكرا لك مشرفتنا فقيدة أمها على هذا النشاط والبحث ونحن متابعين جزاك الله كل خير |
رد: من سواليف الأولين>> لاتفوتكم ,,,
يعطيك العافية موضوع رائع
|
رد: من سواليف الأولين>> لاتفوتكم ,,,
اقتباس:
الروعة اجدها هنا بتشريفك لمتصفحي مراقبنا نور الأصايل وتواجدك الجميل أشكرك كل الشكر بارك الله فيك |
رد: من سواليف الأولين>> لاتفوتكم ,,,
اقتباس:
الله يعافيك شرفت متصفحي أخي الكريم فهد لك كل الشكر والتقدير بارك الله فيك |
رد: من سواليف الأولين>> لاتفوتكم ,,,
جيتكم بسالفه من زمان اول ان شاء الله تعجبكم كان فيه ولد صغير كلما قابل رجل من حارتهم قال : للولد سلملي ع امك الولد اذا وصل عند امه اخبرها المهم المره الاولي والثانيه والثالثه اخبرت زوجها بسالفه ذاك الرجل وطلبت من زوجها يترك لها حريه التصرف معه قال: تصرفي المهم قالت لولدها اذا قابلت الرجل وقال لك سلملي ع امك قول له امي تسلم عليك وتقولك تجي بعد صلاة المغرب قابل الولد الرجل وقال له : امي تسلم عليك وتقول تجي بعد المغرب اخبرت زوجها وقالت راقب البيت واذا دخل تجي الهم الرجال كان ينتظر الموعد احر من الجمر ويوم جاء بعد المغرب وهو يطق الباب قالت : ي الله وش هالورطه هذا زوجي والله انه يذبحني انا وياك تعال تعال ابسرعة المهم: اهي كانت مجهزه له عباة حرمه وزوجها جايب لها حب قمح وكانت بالشانه في طحنه تعرفون اول يطحنون ع الرحى الله يعين حريم اول تلف في الرحى بيدا حتى تكاد تنشل يدها من الطحن كانت مجهزه الرحى في الحوش والحب عندة المهم قالت البس العباة وتعال اجلس اطحن بالرحى وانا ابي اقول زوجي هذي حرمه مستاجرتها وكان ظهره جهة الباب المهم فتحت الباب لزوجها ناظر للي عند الرحى ورفع زوجها صوته وقال وش هالحرمه الي عندكي قالت : هذه حرمة مستأجرتها تطحن لنا كيس القمح اللي كنت بلشانه فيه قال الزوج شيء طيب اهم شي ماتروح إلين تطحن الكيس كله قالت : الزوجه اكيد انا شارطه عليها كذا المهم جلس الزوج وزوجته في الحوش يناظرون في هالمسكين اللي ورط حاله في هالموقف الزوج كل شوي يقول هاه خليكي سريعه ترا مانقوم من الحوش حتى طحنين الكيس كله المهم سرى ليل هالمسكين اللي ماعمره طحن لامه الطحين يوم قضى من طحن الحب اذا هو في حال يرثا لها و لكنه يبي السلامه خايف ينكشف امره للزوج قالت له : الزوجه : ماقصرتي الله يعافيكي هيا قومي وروحي لأهلكي المهم قام ويادوب عضامه شايلته ويدينه ماعاد يقدر يحركها غادر من عندهم وبعد كم يوم قالت المراه لولدها اذا قابلته سلملي عليه قابله الولد وقال : امي تسلم علييك قال : ليه هو طحينكم اللي طحنته خلص يعني تبيني ارجع اطحن لها مره ثانيه والله مااعودها كم انتي عظيمه ي بنت حواء |
رد: من سواليف الأولين>> لاتفوتكم ,,,
أَنا جيتكُم بِسَالفة مِن سُوالف جَدتي , تقُول فِي واحِد تَاجر وأَهله كلهُم تجّار خطَب بنت أهَلها حَالتهُم فَقيرَة نوعًا مَا وهِي صَغيرة مَره شَرط أَبوها عَلى الخَاطِب أنها ماتشتَغل إِلين تكبَر شوِي عَلى الأَقل قَال الخَاطب مَيخَالف وخَذها وهُم دِيارهُم بَعيدَه والأَولين لاتَزوجَت تَطول فِي بيت زُوجها مَاتطلَع مو اللحِين فِي بيت أَهلها أَكثر مِن بيت زُوجها ؛ مَرت أَعتقد سَنة كَامله قَال أَبو البنت بَروح أَزور بنتِي أَشوف وَش صَارعَليها وهُو يقبَل عَلى مكَان الي سَاكنِين فِيه ولا بنتَه تشتَغل ومرهقَه مِن التَعب قَالهَا ليه تَشتغلِين ..؟ أَنا شَارط عَليه إلين تكبَرين قَالت لَو تَبي لِي الخِير بِ المعنَى ماحَطِيتني عِند حَمُوله وش تَبيهُم يقُولون عنِي رفلَا ..؟ يعَايرُوني ..؟ أُمي تقُول منَول يكرفُون كَرف لو المُوية تجَيبها الحُرمة وتدَق الرَحى وتطحَنه وكَل شَيء تَسويه , الله يجعَله تَكفير وتَمحيص لذنُوبهم يَارب , |
رد: من سواليف الأولين>> لاتفوتكم ,,,
السلام عليكم ورحمة الله وبركاته من سواليف الأولين هنا هاك الواحد والواحد الله في سماه العالي >> (بدينا بحجايا العجز ) سوف ابدا حديثي عن زواجات الاولين ببداية الخطوبه والتي في الغالب ذلك الوقت تكون عن طريق الرجال أي ان الحريم مالهن سنع في الخطبة ولا يتم رؤية العروس من قبل أي فرد من افراد عائلة العريس وانما تؤخذ البنت بالذكر وبالسؤال عن امها وابوها وركزوا على امها لان المثل الشعبي يقول ( انشد عن امها قبل لا تضمها ) ويتم السؤال عن شكل البنت من قبل ام العريس عن طريق جاراتهم او احد قرايبهم قد شافها قبل لا تتخفر أي تتغطى( عساها بييضا وعسى عليها لحم – أي سمينه ) لانها علامة على الصحة والمقدرة على القيام باعمال البيت وانجاب الابناء حتى انهم يطلقون على السمين مسمى (مستصح ) وبعد ان يتفق اهل العريس على البنت المختاره يتوجه الأب وولده الى منزل او دكان ابو العروس اذا كانت هناك معرفة شخصية مسبقة , واذا لم تكن هناك معرفة مسبقة يرسل وسيط (الخطًيب ) او بارسال رسالة لابو العروس حتى ولو كان في الشارع اللي وراهم 0 ويتم الرد من ابو العروس بالموافقة مثل ( والله لوهي ذبيحة ما عشتكم ) او بالرفض:s ( ترا ما عليها دلو ) كناية عن قطع الامل في الزواج منها, واذا رفض ابو العروس يدخلون على اقرب بيت ليخطبون للولد علشانهم واعدينه ما يرجعون لبيتهم الا وهو خاطب ;) 0 وعادة يتم الزواج خلال شهر او شهرين على اكثر تقدير لان العروس تدخل امها للسوق مهيب هي وتشق لها يجي عشر قطع من ها الاقمشة المنتنترة (اللي فيها ترتر) والمفصصة ( اللي فيها فصوص كرستال ) المنزكه ( المطرزة بخيوط حريرية ) وتدخلها على الخياط بموديل واحد برنسيس بزعمهم ان الموديل في القماش , وتشتري لها كم كندرة كعب ماخذة معها نمونة من نعالها علشان المقاس اما العطور فهي من عجائب الدنيا السبع فمن العيب ان تذهب العروس وما معها اقل من عشرة طقوم ( الطقم مكون من اربع زجاجات مقاسات متدرجة من نفس النوع = 150مل ,100مل ,50مل ,30مل ) واحد معبى عود والثاني معمول (البخور مهوب البسكوت) وتلاقي بناتها يعرسون وهي ما بعد خلص طيب عرسها من كثره 0 اما غرفة النوم فالزوج يشتريها ويحطها في غرفته في بيت اهله والعروس ما تشوفها ولا لها راي فيها , ولان ما فيه عيال يسكنون لحالهم الا اليتيم فما فيه امل انها تطلع من بيت اهله الا ان شرا له بيت ملك والا مات ابوه وباعوا البيت0 ونرجع لموضوع العروس فا الـحق المهر كان يتراوح ما بين (20 : 30 الف ريـال ) وما فيه شبكه الا عند الناس المتمدنين ( الكلاس بلغة العصر ) , والصباحة يلبسها الزوج للعروس يوم العرس وهي عادة تكون على شكل رشرش وكف ذهب ( مهوب صفعه ) ودرزن غوايش ( شفتوا الثروة اللي تحصلها العروسوفي وقت لا حق بدلوا الرشرش الخفيف بجنيهات معراة ( أي عليها برواز ذهب ) وهذا يصل وزنه الى كيلو ونصف احيانا بحيث تضع المراة خلف رقبتها مناديل من ثقله واذكر ان هناك مصرية الله يذكرها بالخير شافت قريبه لنا لابسه جنيهات وقالت ( الكردان اللي لابساه عمتك يقطع كام كيلو) <- ناويه تسرقه الدافوره نعود الى محور حديثنا اللى هو حفل العرس والذي هو من مسئولية اهل العروس فا العائلات اللي بيوتهم كبيره وقدام بيتهم براحة واسعة وعندهم سطح كبير يسوون العرس في بيتهم اما اللي بيوتهم صغار يستأجرون قصور افراح والتي كان من اشهرها في ذلك الوقت طبعا الترتيب حسب الفخامة 1- صالة العروسة 2– قصر البستان 3 – قصر ابن عويس وهي صالات او حوشه تخلوا من أي اثاث ما عدا الزوالي الحمراء وبعد استجار القصر ينب ( يدعوا ) اهل العروس الناس للزواج شفهياً او وصاة ( يقولكم ابو فلان لا تخلونا يوم الخميس على عرس بنتنا – بدون ذكر اسمها – على ولد ال فلان الله يحيي الكل والجميع ) والمقصود بالكل والجميع - جميع من في البيت رجال ونساء واطفال وعجز وشياب- والناس ما كذبت خبر يحبون العروس حباً جما تقوم البنيات باخراج هدوم العيد اللي ما تطلع الا في ها المناسبات السعيدة وتسفع شعرها ( تلفه حول راسها على شكل طاقية ) علشان ينعم وتقدر تلفح به وهي ترقص , وفي اليوم الموعود من بعد صلاة العصر تبدأ الام بتلبيس ها المبزرة علشان يروحون للعرس وعددهم حوال 8 اكبرهم ام 12 سنه واصغرهم ابو 6 اشهر والبطن مليان الله يعظم اجرها لا يعرفون حبوب منع حمل ولا شئ واللي تاكلها يقولون لها تراها حرام , المهم انها الى اذن العشاء صلت فرضها والين العيال جاهزين مسكت بيدها اللي توه ماشي وشالت الصغير على كتفها وراحوا للعرس وقبل لا يدخلون مع الباب الا وذولاك الدلالات يجن اربع باسطات عند باب القصر بالببسي والحب والحلاو والفش فا ش حتى الكور تبيعها وينشبون ذا البزران يبون حلاو تقوم الام وتعطي الصغير اخته علشات تقدر تطلع البوك من صدرها وتوزع على عيالها على كل واحد ريـال يشرون اللي هم يبون , وتقوم هي بدورها بشراء الحب وما ادراك ما الحب ( هو عبارة عن نوع من المكسرات او البذور المحمصة وهناك نوع اخر مالح ورطب يرد من بلدة القصب ) وتشتري لها يجي نصف صاع _ يالله ييزيها هي وحريمها _ ثم تدخل بحمد الله الى صالة العرس ويكون قد سبقتها الى هناك الطقاقات وتجلس الطقاقات في وسط الصالة على شكل حلقة وفي وسطهم منقد الفحم اللي يحمون عليه الطيران وهن عادة يكونوا متغطيات ولا بسات من ها الغوايش اللي يستعملونها في نفس الوقت مع طق الطيران كأداة موسيقية وكل وحدة في حضنها طفل رضيع نائم اغلب الوقت – هذا اللي محيرني الى هذا اليوم هل هو اصم ام ماذا ؟:rolleyes: وتتحلق النساء حول حلقة الطقاقات بدون كراسي او مساند وما ان تصبح الساعة 30ر8 حتى يكتمل العرس ويغص بالحاضرات مع اطفالهن وتأتي البنت ام 12 سنة وتقول لامها شوفي هدى بنت خالي متبودره ( حاطه روج ) ابي مثلها وتقول الام وهي تضع اصبعها السبابه تحت عينها وتسحبها الى الاسفل : يا خزياه تبين تقلدين ذا البازع اكيد انها تبي رجل ( وكان هذا هو اسلوب تهديد الامهات لبناتهن الى قالت ابي اغيب قالت اكيد انك تبين رجل , الى قالت ابي اقص غره قالت تبين رجل, حتى كرهوا البنات في الرجل والعرس كله:mad: وبعد ذلك تبدأ الام في توزيع الحب على النساء اللي حواليها وما تشوفين الا قشام الحب يتطاير اثناء الحديث وخصوصاً انهن يرفعن اصواتهن بسبب ازعاج الطق , وبمناسبة الطق فلا يبدأ الا عندما يدخل العريس على العروس فهذا مؤشر ان المعرس جاء , وتتهافت البنات المتغترات طبعاً ليقفن امام باب الغرفة علشان يشوفون المعرس فاذا كان المعرس قليل الحظ في الجمال ما تسمع الاوععععععععععععععع باعلى صوت كان ازواجهم المستقبليين بيصيرون ازين الا اشين واشين , وابو العروس يدخل المعرس على بنته واذا كانت يتيمه يدخله اخوها والا عم لها ويدخل معه شاب جذع (جذع اي ولد بين ال12 وال15سنة) من محارمها علشان يقهوي المعرس والى انتهي من صب القهوة عطاه المعرس قاسمة الله (مبلغ محترم) . والطقاقة تأخذ اجرها من الحاضرات وليس من اهل العرس لأن كل وحدة تنطل عليها فلوس وتقول لها ( طقي في محمد وعبدالله وبراهيم ) والبنات لا وتقوم بترديد اغنياتها كالروبوت ( ومحمد لا تخلونه وعبدالله فارس الفرسان وبراهيم بربربربرب) لو تخربط عليهم ما دروا وش هي تقول من الازعاج وفي النهاية تطق شوط اهل المعرس ( كل ال فلان خياله عليهم رزة الراية وهم للروس رماية ) وتنطل عليها ام المعرس اغلى نئطه في العرس وبهذا الشوط ينتهي العرس ويقولون تفظلوا على العشاء حياكم الله وتكون الساعة 10 ويكونون الاطفال صافين عند رجول امهم نايمين كانهم سردين في علبة وتروح الام تتعشى وتخلي عيالها في السطح>>اللي كان مقام فيه العرس الين تخلص والعشاء طبعا يكون على هذا الشكل تباسي عليها رز ولحم اما السلطة فليست موجودة في معجم الاعراس واحياناً يضعون برتقال تضطر تعصره على الرز اذا كان يابس>ياحياة الشقى وترا موهب من قل سنع ولا فقر بس هذ سلوم العرب>>امحق سلوم , وبعد الانتهاء من العشاء تذهب الام لحمل اولادها النائمين ووضعهم في السيارة واحد تلوى الاخر وقد تنسى احد منهم من كثرة الصعود والنزول >>ضعيفة الله راقية نازله, حتى ان احدى قريباتي قالت انها نسيت احدى بناتها في العرس نائمة وانها عندما وصلت الى البيت واخذت تنزل الاطفال وتضعهم في مراقدهم قالت وهي تصفق كفاً بكف : شيهات (سبه مؤدبة يختص بها اهل الرياض يمكن كان يقصد بها shit )نسينا ندو- تصغير ناديه – ورجعوا الى بيت قرايبهم لاخذ البنت المنسية اما العروس فتذهب مع عريسها الى منزلهم ولكن ليست لوحدها وانما معها ( الربعية) وهي سيدة متقدمة في السن تروح مع البنت للحموله علشان تجسرها – هي مستحية منك اصلا – وفي اغلب الحالات يعطيها المعرس قاسمة الله ليلة العرس ويوصلها بيتها0 والعروس ما تروح لاهلها الا في الزوارة بعد اسبوع تروح هي والزوج علشان يسلم على امها وجدتها ويعطيهم الفتاشة وهي مهمة عند اهل الرياض خاصة (الفتاشة:مبلغ محترم من المال يعطى لام العروس وجدتها لانها نزعت غطاء وجهها له "فتشت له") 0 وفي النهاية هذا مما ورد علي وبعضه مما حكي لي وحملت وكملت وفي الاصيبع الصغير دملت>> منقول للامانة |
رد: من سواليف الأولين>> لاتفوتكم ,,,
بسم الله الرحمن الرحيم
ابارك لك الترقية لمشرفة الله يوفقك ثانيا سواليف الاولين اغلبها عبر وفوائد وتعلمنا كيف كانوا نمتكاتفين عكس عيال هالوقت عيال النيدو والنت والا من رحم ربي اسمحي لي ابدي اعجابي بقلمك وتميزك واسلوبك الراقي وتالقك |
رد: من سواليف الأولين>> لاتفوتكم ,,,
اقتباس:
الله يبارك فيك ويسلمك أخي ابو الوردتين فعلا ما احلا بساطة الاولين وسواليفهم وطهر قلبوهم أسعدني حضورك وأشكر لك ثنائك الجميل لك تحياتي |
رد: من سواليف الأولين>> لاتفوتكم ,,,
سالفة حصلت قديما كان فيه شاب من اهل عنيزه وكان هالشاب ساكن هو وامه فقط في بيت واحد لأن ابوه كان متوفي وكانو مبسوطيين وعايشين بكل سعاده وخير مع شح وفقرذاك الزمان المهم امه العجوز شبت عليه وقالتله ياوليدي ورى ماتعرس وودي تزووج علشان اشوف عيالك قبل مااموت وهو يقول بسم الله عليك عقب عمرن طوييل يوووه المهم الححت عليه وهو وافق وخطبتله امه هاك البنيه ( اللي كللها ملح ) الولد عقب العرس ..ماينلام استانس بحريمته وتوافق هو وياااه الحمدلله كل يحب الثاني ويودده لكن المشكله عاد ب ( الاميمه) تقل تضايقت شوي من الوضع(تغار) وهذي فطره عند اغلب الحرييم الكباار خاصة مع عيالهم غصبن عليها بدت إذا جاء الولد عقب الظهر داايخ من الشغل وده يتغدا ويناام قبل يأذن العصر. وأول مايصك باب الغريفه هو والمره إلاّ والوالده رانعتن عليهم الباااب ( تنكيد يعني) قومو صللو يالله وان كان هو ماأذن تطق وتقول قوموا توللمو توضو قبل الاذاان.. ورزح بها لباب ماتواطنهم بالغرفه - تنهبل والولد ماغير ( يقول إنا لله وانا اليه راجعوون ) وش جاه أمي وتطوور الوضع بدت العجيّز إذا منّهم نامو بالليل واوّل مايتواسوون تطق الباب قومو تسننو صلّو صلاة الليل. قومو أوترو.. قومو قومو.وماغير تهجدهم وترجدهم بالليل والنهار المهم الولد تضايق بالحيل تنكّدت عيشته مايدري وش يسوي الوالده صارت قشراء ماتعبّرهم داخليين بالغرفه تنهبل على طول... ومرّه الولد كان عند رفيقن له يقالّه ابوصالح (معرووف بالعياااره )كان يتقهوى ومع السواليف قص عليه السّالفه حقّته مع أمه وشكى على رفيقه ابوصالح حاله قال ابوصالح انا اعرف علاج امّك زيين بس تطاوعن؟؟ قال الولد تكفى اللي تبي بس فكّنا ياشيخ قال أجل ابقوللك : نبي نسوّي خطّه انا وانت بس لازم تطبقها تمام والا ترى تبي تخرب عليك قال الولد .. تكفى قللي المهم قاله الطريقه واتفقو يوم صار من باكر عقب العصر جاء ابوصالح لبيت الولد وطق عليه الباب طق طق طق ابو فلان ابو فلان وبدا يصوّت ابوفلان ( كانت بيوت الاولين صغار بالحيل وهدوء لدرجة ان اللي بالبيت يسمع كلام اللي بالشارع والعكس*) المهم طلع الولد قال ياهلاااااا ابو صالح يالله حيه ادخل اقلط تقهو قال ابوصالح : لاوالله يابوفلان أنا عجل بس جيت ابي منك طلب وابمشي ( طبعا رافعيين اصوااتهم علشان تسمع العجيّز- وهي ماقصّرت جادعتن إذنه تبي تدري وش يبي ابوصالح بولده) قال الولد ادخل يارجال واطلب الّي تبي الّي تبي بس تقهو قال ابوصالح .:. الّي ابي؟؟ ماتردّن قال الولد : والله ماأردّك لو تبي كل بيتي ومابه بس ادخل .. إلاّ شي واحد ماأعطيكياااه قال ابو صالح : وشّو؟؟ هالشي؟؟ قال الولد: لاتجي بس تبي تخطب أمي؟؟ ترى هذي اسمحلي ماأقدر أطلب كل شي إلاّ هذي .. قال ابوصالح : وراااه؟؟ قال الولد : الله يعظّم أجره أميمتي - تقوّمنا لصلات العصر قبل يأذّن وتقومنا نتسنن بالليل . وتقومنا نووتر قبل الفجر . وتقومنا للفجر حريصتن علينا والله مااأفّلبه ابد الله يخلّيها لنا ان شاء الله قال ابوصالح : والله الصّراحه أنا جااين أخطب الوالده أجل قاال الولد : لااااا ياخووي أجل طس لاتقهوى ولاشي مع السلامه . والوالده مهيب معرسه ( كل هالكلااااام والعجيّز تسمع!! ومنهبله) راح ابوصالح والولد صك الباب دخل الولد والى الوالده بوجهه قالت منهو ذااا؟؟ وش يبي؟؟؟ قال ياميمتي هذا خبل سايح وطلب منّي طلب وطردته ( مابقا إلاّ هي بعد) اسكتت وهي منقهره تبي تنفجر وجاء الليل ونامو ولاقامو إلاّ الضحى وجاء الظهر ونامو وماطق عليهم أحد والعصر جاء الولد لأمه قال ياميمتي سلامااات؟؟ ماقوّمتينا للصلات الفجر ولا العصر عسى مااااشر يووه؟؟ قاالت العجييز: قومو أنتم عسااكم للكسااميير خلاااص انا منب دايمتن لكم ومن بعدها ماعاد طقت عليهم وافتكّو منها وهي على بالها بيجي ابوصالح مره ثانيه ياهما لالي !!!!! |
رد: من سواليف الأولين>> لاتفوتكم ,,,
|
رد: من سواليف الأولين>> لاتفوتكم ,,,
ههههههههه
قصه رائعه وفعلا لاقى علاج لمشكلته بس صارت تفوته الصلاة رائعه دائما وابدا فقيده لا عدمناك |
رد: من سواليف الأولين>> لاتفوتكم ,,,
فعلا قصص رائعه ومحبوكه بعد
بشكل جميل دمتي يالغلا على اتحافنا بها |
رد: من سواليف الأولين>> لاتفوتكم ,,,
استمعت جدا ً .. الله يعطيك العافيه |
رد: من سواليف الأولين>> لاتفوتكم ,,,
عزيزاتي
بقايا الذكريات حتماً سأكون شكرا لتواجدكم الراقي لقد طاب لي حضوركم العطر لروحكم عبير الورد |
رد: من سواليف الأولين>> لاتفوتكم ,,,
متصفح رائع وانتقاء اروع غاليتي
شكرا لك |
رد: من سواليف الأولين>> لاتفوتكم ,,,
غاليتي حنين
الروعه اكتملت صورتها بمرورك الجميل الذي أسعدني دمتي بخير |
رد: من سواليف الأولين>> لاتفوتكم ,,,
من سواليف الأولين هذا وحدتن قبلها ياوليدي جعل يومي قبل يومك .. ودايم ترددها .. الوليد قال يمه .. الحين انتي دايم تدعين هالدعا انتي صادزه والا تقولينه بس كذا .. قالت ابداً .. ايه والله صادزه .. المهم راح الوليد قال بشوف امي هي صادزه او لا ( الله من الشر براسه ) ويروح وياخذ له ديك .. وينتفه وهو حي ويطلقه عند امه .. والديك قام بس يروح ويجي من حر نتف الريش .. قالت حميد وشذا .. قال يمه هذا الموت جاين ياخذني ... قالت الام " حميد بالرحى .. حميد بالرحى .. يعني رح لم حميد تراه يلعب حول الرحى .. يوم صار الموت نست قالت ياجعلي بعدك ياوليدي |
رد: من سواليف الأولين>> لاتفوتكم ,,,
وهذي سالفتن ثانيه بعد ... من لسان عمتي ... كان فيه رجل مسافر ويمشي في هالبر لين وصل لديره مايدري وش اسمها المهم انهم كرموه وقالو له اجلس عندنا لاننا شفنا فيك من الخير وانك تصلح إمام لمسجدنا واغروه بالجلسه عندهم بانهم بانهم بيمشون له راتب ... كل شهر فجلس .. وصار يصلي فيهم ويعلم عيالهم قراءه القران .. ويزوج اللي يبون يعرسون ... ( مملتس ) ويفتي اي احدن يساله يعني جامعن كلش الله لا يضره ... وصارو اهل هالمدينه الصغيره يصدقونه بكل شي ... وجاز لهم كلامه ومنطقه ... وصارو تسنهم مسحورين فيه انتفتنوا فيه بشكل غريب جداً ... وهو لوقي زود على نصبه عليهم ... فصدقوه .. ومشى على هالحال لاعبن على هالضعيفين وهم مصدقين الين جا في يوم وجا رجل من مدينه هالرجل ... وجلس بيرتاح وجا وقت الصلاه واصلا هالرجل اللي جاي كان متعلم وفاهم ... يعني يفهم كل شي ما ينلعب عليه ... جا امامهم وبدا في الصلاه ... قرا الفاتحه وبعدها سوره ... بس هالسوره اللي خلت الرجل الجديد تطير بوهته وقال في نفسه وشذا ... مهيب من القران ذي والمشكله ان اهل الحي فيهم جهل وما يعرفون واللي يقرا عقب الفاتحه (( اطعموا مطوعكم من لحم الدجاج . وزوجوه البنت المغناج . تدخلو الجنه افواجاً افواج )) استغفر الله ياربي تنتحنح الرجال يعني ورا ما تعقل وتقرا زي الناس ... وذاك ماعليه من احد مكمل بنخبدزته وركعوا الركعه الاوله ... وبدا بالثانيه وقرا (( اسكتوا ايها المتنحنحون ... فان الشرط اربعون لنا عشرون ولكم عشرون )) وصار سعيد اخو مبارك حزنن طقه طمع الرجال وسكت ... اللي ببينه في هالقصه ... هو ان بعض الناس يخربط على كيفه وياخذ وزر الناس كلهم ... فمن قال لا اعلم فقد افتى .. منقول للأمانه |
| الساعة الآن 05:02 PM. |
Powered by vBulletin® Copyright ©2000 - 2024, Jelsoft Enterprises Ltd. موقع و منتديات سدير 1432 هـ - 1435 هـ
جميع ما ينشر في المنتدى لا يعبر بالضرورة عن رأي القائمين عليه وإنما يعبر عن وجهة نظر كاتبه