وصلنا الآن للجزء الأخير و المفضل لناس كثاااااااااااااار ..... الباستات بالكريمة .............. معشوقة الجماهير الفيتوشيني .... *** فيتوشيني ألفريدو *** *** Fettuccine Alfredo *** لا ينصح بهذي المكرونه أكثر من مرة في الشهرين كنك شايل بلك في بطنك .... الغريب إن فيه ناس تتفلسف واجد فيها ، ياناس مافيه أي أكله إيطاليه فيها كمون أو كركم أو حتى كزبرة . شخصيا المكرونه هذي أحبها بالفطر أو ساده أو بالربيان، الدجاج برأيي يخربها مقاديرها سهلة : أصبع زبده كوبين قشطة خفق قصيرة الأجل فطر حسب الرغبة لاااااازم طازج فصين ثوم مقطعة صغاااااار ٣/٤ كوب بارمزان ملح وفلفل حوالي ٣٠٠ جرام مكرونه فيتوشيني الطريقة : أغلي مويه في قدر كبير عشان المكرونه. مع ملح طبعا .... بنص الزبده أطبخي الفطر مع شوي ملح بعدين حطي الثوم و أطبخيه شوي بس إلين ما تطلع ريحته ، بعدين حطي القشطة وخليها تغلي غليه خفييييييييييييفة بس مع التحريك كل شوي طبعا ، حطي شوي بس فلفل أسود و بعدين حطي البارمزان عليها وذوقيها يمكن تحتاج ملح يمكن لأ لأن البارمزان مالح أصل. أسلقي المكرونه إلين ما تصير آلدينتي صفيها وحطيها على الصوص ، خليها تطبخ شوي بعدين قدميها مع زيادة بارمزان و بقدونس مفروم . أستمتعي بأطعم مكرونة ....... لو تبونها ساده لا تحطين الفطر بس ، لو تبينها مرررررة ساده لا تحطين الثوم ولا الفطر بس . شفتوا كيف سهالات لو تبونها بالربيان بدال الفطر أطبخي شوي ربيان بالزبده مع ملح وفلفل أول ما يقلب لونه برتقالي شيليه في صحن عشان ما يجيك ناشف ، كملي الفيتوشيني نفس الشي و بعدين رجعي الربيان آخر شي عشان يحتر شوي بس . *** أورشيتي مع صوص كريمة البيستو *** *** Orecchiette with pesto cream Sauce *** الأورشيتي هي المكرونه اللي تشبه الأذان إسمها أصلا الأذان الصغيرة , الحلو فيها إن شكلها يسمحلها تمسك كمية صوص كبيرة . الصوص هنا صوص كريمة البيستو تغير شوي عن الألفريدو جربوه مره منتب نادمين . المقادير : ٢٠٠ جرام مكرونة أورشيتي أو بيني لو ما عندكم كوبين قشطة خفق ٥ ملاعق بيستو ملح وفلفل بارمزان ريحان و زيت زيتون للتزين . في مقلة حطي القشطة و خليها تطبخ على غلية خفيييييييفة أنتبهي لا تخلينها تغلي عشان ما تفصل القشطة . خلوها إلين ما يقل حجمها لحوالي الثلث . الحين أسلقوا المكرونة و طفوا النار على القشطة ، إذا باقي شوي على المكرونه رجعوا القشطة للغليه الخفيفة وحطوا البيستوا وأخلطوا زين . وذوقوا الصوص وعدلوه . إذا أستوت المكرونه شيلو نص كوب من موية السلق بعدين صفوا المكرونه . وحطوها على الصوص . زيدوا شوي مويه لو لقيتوا إنه يحتاج ، يعني لو لقيتوا الصوص شوي زودوا مويه شوي بس . قدموها مع ريحان ، بارمزان ، وزيت زيتون . الحمد لله خلصت ................... إن شاء الله يكون الموضوع أعجبكم وإذا لقيتوا أي أخطاء سامحوني تراني لي ساعتين أكتب والله ، أي خطوة مبهمة قولولي عليها أوضحها إن شاء الله ...