طار الكرى عن مـوق عينـي وفـرا
وقزيت من نومـي طرا لـي طـواري
وابديت من جاش الحشـى مـا تـدرا
واسهرت من حولـي بكثـر الهـذاري
خـط (ن) لفانـي زاد قلبـي بـحـرا
من شاكي(ن) ضيم النيـا والعـزاري
سر يـا قلـم واكتـب علـى ماتـورا
ازكا سلام(ن)ل لابن عمـي مشـاري
شيخ (ن) على درب الشجاعه مضرا
مـن لابـه يـوم الملاقـا ضـواري
يامـا سهرنـا حـاكـم(ن) مايـطـرا
واليوم دنيـا ضـاع فيهـا افتكـاري
اشكي لمن تشكـي لـه الجـود طـرا
ضراب هامـات العـدا مـا يـداري
ياحيـف ياخطـوا الشجـاع المضـرا
في مصـر مملـوك لحمـر العتـاري
من الـزاد غـادي لـه سنـام وسـرا
من الذل شبعان ومـن العـز عـاري
وش عاد لـو تلبـس حريـرن يجـرا
ومتوجـا تـاج الذهـب بـالـزراري
فدنيـاك يبـن العـم هـذي مـغـرا
ولا خير في دنيـا تـورى النكـاري
تسقيـك حلـو(ن) ثـم تسقيـك مـرا
ولذاتهـا بـيـن البـريـا عــواري
اكفـخ بجنحـان السـعـد لا تــدرا
فالعمـر مايقـاه كـثـر الـمـداري
مافـي يـد المخلـوق نفعـا وضـرا
ما قّدر البـاري علـى العبـد جـاري
واسلـم وسلمـي علـى مـن تـورا
واذكرا لهم حالي ومـا كـان جـاري
ان سايلـو عنـي فحـالـي تـسـرا
قبقـب شـراع العـز لوكنـت داري
نعم الرفيـق اللـي صطـا ثـم جـرا
يـودع مناعيـر النشامـا حـبـاري
رميـت عنـي برقـع الـذل بــرا
ولا خير في من لا يـدوس المحـاري
يبقـى الفخـر وانـا بقبـري معـرا
وافعال تركي مثـل شمـس النهـاري
احصنت نجـد عقـب ماهـي تطـرا
مصيونه عـن حـر لفـح الهـذاري
نزلتهـا غصـب(ن) بخيـر وشــرا
وجمعت شمـل(ن) بالقرايـا وقـاري
والشرع فيهـا قـد مشـى واستمـرا
ويقرى بها درس الضحى كـل قـاري
زال الهـوى والغـي عنهـا وفــرا
ويقضي بها القاضـي بليـا مصـاري
وان سلت عن من قالي لـي لا تـزرا
نجد غـدت بـاب(ن) بليـا سـواري
ومـن امـن الجانـي كفـا ماتـحـرا
وتـازي جريمـه بالقريـا وقــاري
واجهدت في طلـب العـلا ليـن قـرا
وطاب الكرى مع لاسعـات الخـزاري
ومن غاص غبات البحـر جـاب درا
واضوت مصابيح السرى كل سـاري
وانا احمد اللي جـاب لـي ماتحـرا
واذهب غبـار الـذل عنـي وطـاري
والعـمـر مـايـزداد مـثـقـال ذرا
عمر الفتى والرزق فـي كـف بـاري
وصـلاه ربـي عـد ماخـط بالـرا
على النبي ما طـاف بالبيـت عـاري