العيد وما ادراك مالعيد ..!
حققونا بققونا ..لاجاء ابونا حققناكم
لا زلت اتذكر العيد في الصغر ..كنا نلبس الثياب الجديدة ..!
ونطوف الحارات لنقرع ابواب الجيران ونردد
( حققونا بققونا لاجاء ابونا حققناكم )
منهم من يعطينا حلاو وسبال وقريض ..!
ومنهم من يفتح الباب ويطردنا ..!!
المهم ان الناس ماعندهم مشكلة باللي نسويه يعني متعودين على هذا الأسلوب ..!
اخطر مايواجهنا بعد ان نحصل العطايا والهبات من الجيران ..
هو مايفعله(العيال اللي اكبر منا)
يقومون بالسطو (وتشليح ) كل ماجمعنا ..!
ونطلع من المولد بلاحمص ..!
ويروح كل اللي حصلنا لغيرنا
نجي لأهلنا نصيح نقول اخذوا منا العيال (حقاقنا )
وبكل برود تقول الوالدة (قلعتكم ) وشوله تروحون تزعجون الناس ببيوتهم ..!!
لم نكن نملك حينها العاب نارية ..
ماعندنا إلا (طرطعان بدائي ) حالتنا حالة نفرح بالعيد
إذا رحنا لخوالي ..نلعب بالمزارع ونرقى للشجر نطلع مفارخ ...
(والمفارخ هي صغار العاصفير ) نطلعهن من العش ونذبحهن ونشويهن ونأكلهن كأننا في احسن الكشتات والوناسات ...!
لاملاهي ولا ألعاب ولاغيره ...!