اليوم ابي اكسرالروتين واترك الشعروالأدب ومااكون
سيدة اعمال اليوم ابي امددرجيلاتي واسولف واوسع الصدر الله من الرواقه
هل انتم مثلي لاتستحون قولوالحقيقه
لا ارى لذة الحياة كما كانت
لا ارى الناس مثلما كانوا
كل شي تغير
مثل ماتغيرت نفوسنا وقلوبنا
حتى الصديق الصدوق الصادق ماعاد تجده
واذا وجدته مايعطيك وجه واذا اعطاك وجه اعطاك من الكلام اللي يلذع
لاتجد الاخ والاخت مثل الاول الكل مشغول
واذا فضى لك يوم غاب عنك شهر
ياخساره كل ماضاق الصدر قلنا اخ بس اخ وينهم ؟
الابناء كانوا مثل العسل حتى كلمة اوف ماتنطق
لأن الله سبحانه وتعالى نهانا عنها
اما اليوم فالتأفف على اللسان دائماً
اف بس اوف وينكم ياعيال اول ؟
المعلم او المعلمه كنا ما نطالع وجيهم ونحترمهم
لو يقولون لنا صلو شرق قلنا ان شاء الله
واليوم الله المستعان صار ينخاف من الطلاب والطالبات
حتى تلاميذ الروضه طلع لهم ريش
اقول لواحد منهم حلوه الهديه اللعبه اللي معك
يقوول هههههههه ابوي جايب لي جوال ولاب صدقيات مو هدية بزران حقتكم
نعنبو بليسكم بزارين لو تعطيني الاستاذه مسطره او ربطه
فرحت ورحت اركض عند امي من قدي
اول كنا نخاف من الطبيب والممرضه
اذا رحنا للمستشفى قلوبنا ترقع من الخوف
شفت من يومين بزارين في المستشفى واقفين طوابير
عند البراد ياخذون بيبسي واللي عند الكافي واللي ياخذ من البوفيهات
الدنيا صارت كشته ماعاد الناس يخافون من شي
من اسبوع نتكلم عن المسيح الدجال وعن المهدي وفتن اخر الزمان
صارو عيالنا يقولون غيرو الموضوع ماعندكم شي يوسع الصدر
اول اذا خسف القمر جانا خوف مو طبيعي
نركض نصلي وعيال ذا الوقت يقولون هذا غضب الطبيعه عادي هذي ظاهره طبيعيه
آآآه يازمان اول وين ذيك الايام
الواحد اذا فاتته الصلاة قام يرتجف واليوم يجمعون صلاة النهار كله من كثر النوم ...لاوالله من موت القلوب
وش رايكم حلوه السواليف مع حبابه
استودعتكم الله الذي لاتضيع وادئعه
كل الغلا