يالله عفوك يوم تصفـية الحسـاب
يوم حصاد لما زرعنا في السـنين
يوم الحشر قرب ولا معـنا زهاب
اليوم في الـدنيا وبكـرة راحلين
نجني ذنوب ونرتجي عفو وثواب
وعلى نصـر ربي لنا مستعجلين
تدرون ليه آمالنا كنها سـراب
تدرون ليه النصر سيف الأوليين
الأوليين أعمالهم وفـق الكـتاب
قاموا عليه وباعوا الـدنيا بـدين
وحنا غفلنا بين مـالـذ وطـاب
والنصر سيف ما يسله غـافـلين
نصبح على شوف انتهاكات وخراب
ونمسي على دمـع وتنهات وونـين
بصدورنا شي تذوب اله الهضاب
وأفعالنا والواقع رياح .. وطحين
وعلى العيون من الفتن مثل الضباب
معـد درينا من يسار ومن يمـين
ما للضيف الا الدعا لو ما يجـاب
ما غيره الا الشوف مكتوف اليدين
يالله زلزل تحت الأعداء التـراب
والطف بنا واحقن دماء المسلمين
ندعوك يا قادر على جعل السحاب
جـيش لنصـرة قلة مستضعـفين
أغرقهم بنوع من أنواع العقـاب
غرق الغلام اللي يحسب انه فطين
لوما عصى نوح نجا به في رحاب
سفينته وأمضى معه في العمر حين
لكنه اختار الخساره والذهـاب
اصنع بهم صنعك به وانت المتين
والا اخذهم يا مجري سود الحقاب
أخذ العجوز اللي بقت في الغابرين
ذوقـهم اللـهم أنواع العـذاب
اللي عثوا في أرضك أمن المفسدين
وألطف بمن لبسوا من التقوى ثياب
عبـادك المسـتهدفين المـتقـين
تكالبت علـيهم أنياب الذئاب
ولا غير عونك يا معين الصابرين
من بينهم شيبه يعجزون الشباب
من وقفته من طولها في الركعتين
ومن بينهم بنت تون بلا حجاب
أحجابها لفوا به الجرح المكـين
وطفل عن عيون أمه الثنتين غاب
تبكيه عين وتلتفت لأخيـه عين
من هول ما يجري لهم شاب الغراب
ياوسع حلمك وانت ما فوقك مدين
أدعيك وانت ادرى بحال أهل المصاب
وأمد كفي لك يا أكـرم الأكـرمين