البارحة يوم العباد رقود
والنوم مايطري على بالي
مجروح روح وخاطري ملهود
ياناس خلوني على فالي
تبكي عيوني والدموع شهود
اي والله ابكي صاحب غالي
يازين مالك من عذابي زود
ارفق بحالي يابعد حالي
ودي بوصلك يانعيم العود
ودي ولكن ما تهيا لي
اللي ذبحني بالعيون السود
من قبل اعرفه خاطري سالي
ترى المحبه ما بها منقود
والله فلا اسمع هرج عذالي
ياعود ريحان عليه ورود
ومنين ماهب الهوى مال
هبي بريحه ياهبوب النود
يطفي بعض همي وغربالي
الحب يذبح والشقا محدود
ماهي سواليف على الخالي
يامنوتي ياغاية المقصود
زولك يورى لي ويبرا لي
* ديوان الشاعر احمد الناصر