[بنت الاصول]

الشاعر ابراهيم بن جعيثن *


البارحة ليلي عسى الله يعودة
يازين وصل الليل ما بين الاحباب

جيت الحبيب اللي وفت لي وعوده
ماصار لي منبوز الارداف كذاب (1)

واليا مكانه خاليا من حسوده
بدا لي التحية من على هجة الباب (2)

خليت به يوم الزواهر شهوده
في ساعة عنا هل الشر غياب

عنده الين الصبح بانت عموده
نادى المصلى بالجماعة والاجناب

خلي على راعي الهوى وش كوده
عليه من هرج العرب ستر وحجاب (3)

شوفه دواي وعلتي في صدوده
ودواه شوفي والمودة لها اسباب

الله يديمه لي ويبقي سعوده
والبيض عقبه لو صفن قلت ما ناب (4)

قالوا عشيرك ياولد وش زوده
وش نفّله بالزين عن تلع الارقاب (5)

من قولهم تو النظر به نعوده
لقيت مابه شئ من الشين ينعاب

تسمعوا وصفه وهذا وجوده
ياطا بحدب منهن الروح تنذاب (6)

والساق زملوق سقنّه مدوده
في منبته ما هزعه كل هباب

وانف قسم صافي خدوده وسوده
وخرس بلا كحل مضاليل واهداب (7)

جيده ونهده محفياته جعوده
وغر مناظيم عذبات وعذاب

لا طول لا قصر بمشيته ركوده
لا دق لا عبج مثانيه ورغاب

وتالي وصوفه ما حصينا عدوده
للقلب نهاب وبالناس لعاب

الشف يمه كل خيط يقوده
ويلويه عن غيره لواليب دولاب

هني من مثلي لمثله يفوده
هذا الوكاد وكثرة الهرج ما جاب

ما دام جسمي ما لجا في لحوده
ما انساه وهروجه عجاريف وعجاب

وصلاة ربي عد مارزم رعوده
على النبي ماطقوا البدو منساب