ياللي تواعدني ولا عمرك أوفيت
وأنا أحسبك للوفاء رمز وشعار
مليت من كثر المواعيد مليت
زودت في هجرتك و زودت الأعذار
أبعدت عني يامنى العمر وأقفيت
خليتني كني على لاهب النار
طيفك يلاحقني ليا أصبحت وأمسيت
الله يعين اللي على البعد صبار
وسط الحشا يامنيتي صار لك بيت
محلك عيوني لا ضاقت بك الدار
أنته مناة العمر لا من تمنيت
أنت الذي مختارك القلب ماحتار
تخطي علي وأسامحك كل ما أخطيت
أرضيك ياعمري ولو صار ما صار
بالوصل عاملتك وبالهجر جازيت
ما أصدق بهرج العواذل والأشوار
والنوم فارقني معك ما تهنيت
أسري مع الهاجس و ياخذ بي مشوار
لا شفتني بالدرب قفيت وصديت
هذا ولك عندي معزة ومقدار
ونيت من هجر المحبين ونيت
هذي ظروف الوقت وظروف الأقدار
قطفت لك من باقة الشعر وأهديت
أهديت لك يا صاحبي زين الأشعار