يشوق العين شوف اللي بقى من شامخ الأطلال
وألاقي في سككها كل ذكرى عشقها غالي
أسوق أقدام شوقي للبيوت وخاطري مازال
يعيش بشوفهن ذكرى طفولة تحفظ آمالي
عزيزة يا بيوت الطين لك وسط الحشا منزال
أمرك و أترك دموع الغلا تحكي لك أحوالي
أجي لك كل ما جا للحزن في داخلي مدهال
و أجي لك كل مافاض الحنين لشوف مدهالي
أروح البير لين إني أوقف عند حد الجال
و أطل بوسطه ودمعي تناثر فيه من عالي
وأمر السكه اللي في وسطها حفرة المصقال
و أنا أغلى شي ملكته وقتها هو كسب مصقالي
فقدت بها رفيق ٍ لا لقيته قال كيف الحال
رفيق ٍ وافي وطيّب ولا قد غاب عن بالي
واجي عند الشعيب اللي يمر بديرتي لا سال
هنا ذكرى وقوفي في وسطه وسيله قبالي
و أروح لبيت عمّي و إن طلعت أمر بيت الخال
وأروح لجدتي وأطلع وفي مخباتي ريالي
أطير بفرحتي واللي سالني قلت معي ريال
وأروح اشري من الدكان توت مثلج وحالي
وأروح لبيت جيراني وأدوّر وينه المدخال
أنا أذكر يوم أنا صغيّر نسيت بوسطه نعالي
هنا أذكر معاليق السراج وحوله المنخال
وهناك الدلة اللي عندها مكسور فنجالي
وهنا فراش الحصير اللي جلس به مستريح البال
ينام وما بقلبه شي للأول ولا التالي
كفاية .. بطلع من البيت يوم إنه بدا ينهال
مع إني صرت أحس إن التراب دموع تنهالي
عسى الله يرحم اللي مات منهم طيبين الفال
ويجمعنا معاهم في وسط جنات وظلالي
تمر سنين من عمري وأردد للملا موال
ترى اللي ماله أول ماله بهذا الزمن تالي