أبحر ببحر الوجد
يا حاكمْ بين المعاليق دولتك
وحبي جيوشك يابقايا سنيني
ياللي هوى بالي كلامك وشوفتك
سيف النيا الذبّاح بينك وبيني
كم لك بلندن تنثر الورد خطوتك
وأنا بنجد تنثر الدمع عيني
وأسامر طيوفك وناري وغرتك
وأشرب فناجيل الهلاك بيميني
وأبحر ببحر الوجد وأعزف محبتك
ويبكي الورقا لك الله حنيني
عليك ياللي تجهر الشمس طلتك
وتفرح وتشرح كل صدراً حزيني
البعد ناراً موتها بس جنتك
والشوق يجرح كل جنبٍ متيني
أرحم خفوقٍ صايراً في ولايتك
يبغاك وانا ابغاك وانته تبيني
عجّل علينا لا تطوّل بغيبتك
قدام لا نزّاع الانفس يجيني