ياصاحبي ما يفرقنا ملام وعتب
كيف أهجر اللي نبت له في عروقي عروق ؟؟
إليا تبعتك ترى للقلب عذر وسبب
ياعلّ يجتاح قلبك مثل قلبي حروق !!
قم ولّع الوجد وإجمع من ظلوعي حطب
يا كره برد الحنين وذكريات العقوق ..
معك المسا شكل ثاني والسوالف ذهب
أنا دخيلك عن إسكات ٍ يصدّي الحلوق !!
خذ راحتك وإستبيح من العصب للعصب
حتى بْزعلك أولك فتنة وتاليك ذوق !!
أعذب على الجرح من همس الندا للقصب
لا خالطه نسمة الصبح وشعاع الشروق ..
من علّمك للحزن ما علّمك للغضب
ماضاق صدر السما فمْشاغِبات البروق
إن سولفوا فيك للعاشق كثير العطب
ساحت لك أقصا العظام وعقّب الشوق شوق
وش حيلتي والصبر ريشة بوجه المهب
هايم ولاأدري متى من سكرة الحب أفوق ؟؟
يا أميرة ساكنه بين الهدب والهدب
قيمتْك عندي فديتك من عيوني وفوق
مافيه غيرك حبيب ٍ يستحق التعب
كيف أهملك وأنت تملك عالم ٍ بالخفوق
جيتك من أحلام ليل ٍ لا وعدني كذب
ونطحتني بالنهار وعلم قلب ٍ صدوق .