ليته فيني ولافيك
يمه وانا لجروح الايام مرباع
هاتي همومك لاتنامين بهموم
يمه لو ان العمر يشرى وينباع
لااعطيك عمري ماتمنى ولايوم
اخذيه كله واتركي كل الاوجاع
اعطيني يايامه السهر واخذي النوم
ياكم وكم فليت للضيقه شراع
لاني بصاحي ولاني بمنجوم
من المحات راحت انصافي ارباع
اروح وارجع واقعد شوي واقوم
ازورك اضحك كن ماني بـ ملتاع
وانا بليا( قلب )ومحطم (اعزوم)
وكل الكلام اللي على خاطري ضاع
وفي خاطر عيوني سواليف واعلوم
سلامتك ياأعز من شالت القاع
ماصابك من الله مقدر ومقسوم
كلي شرف لاصرت فـ رضاك طماع
ارضيك ماني في رضا الناس ملزوم
ليت المرض يفطر عليه الا جاع
وعن عافيتك يدور الاجر ( ويصوووم ) ...!