يقول ابن تويم رحمه الله :
اليوم انا غادرت سوق الطايف
متوجه لجده مع المندوب
سلام ياربع خبركم جانا
التلفون اسرع من المكتوب
مير اسمحوا لي واسمعوا جوابي
بغى يضللي ضارب ومضروب
ركبت لي في موتر(ن) سواقه
مركي عليه الساق والعرقوب
يدعس على البنزين دعس بقوة
واللي معه واللي وراه ركوب
رغم انهم يقلون هد اعصابك
مايهرج لهم غير بالمقلوب
وقلت ياسواق لا تقلبنا
وراك مسرع كنك الهبوب
اعدل عن السرعه وخلك ريض
ان كنت سواق(ن) على المطلوب
قال انت يابن تويم وشبك خايف
ماكن مع بعض الرجال قلوب
ليتك تفارقني وتلقى غيري
مانته على سيارتي مغصوب
قلت ارع نفسك واتق الله فينا
لاترتكب جريمة وذنوب
بعدين تمسي فالقبور لحالك
والا تضللي فالسجن مصلوب
قال السهر جاب المرض لعيوني
مير الصبر عند اللزوم وجوب
لا ياعيوني عن منامك جوزى
لو كان دمعك وابلن وسحوب
وقلت ياسواق خلك عاقل
عكرت معنا صافي المشروب
الهنجله والدنجله مابيها
خل المناقش بيننا باسلوب
قال انت وشبك ناشب(ن) في حلقي
اقلقتني ولانويت تتوب
مالك ومالي خلني في حالي
وراك تتعبني وانا متعوب
قلت الحقيقه مامعك نتيجه
نار الحماقه جمرها مشبوب
لاواعنا السواق من دخانها
تحسبك غالب وانته المغلوب
الظاهر انك مفطر بهريسه
والا لابدك مفطر(ن) معصوب
والا تبى البراد والتعميره
البعض منها شربها مرغوب
اهدي لكم يالسايقين نصيحه
ياهل الشمال وياهل الجنوب
وياللي بشرق المملكه وبغربها
وياللي مشيتوا مع وسيع دروب
مشي السلامه خير من مشي الخطر
ماكل شاة ديسها حلوب
ولانقول انه يغذي طفلها
نعرف طلوع الشمس والغروب
ياسامعين القصه وتفصيلها
وابيات شعر(ن) وزنها منصوب
ماقل دل ورمزها نيشا نها
والشمع يجمد والعسل يذوب
عبرت عما سار لى في رحلتي
مع سايق(ن) فى سواقته عذروب
هذي عذاريبه وهذي قصته
وختامها صلوا على المحبوب