[align=center]
يسعد صباحكم/ مساكم
هذي قصيده للشاعر فالح الايداء
واتمنى ان ترتقي لتنال الرضى منكم
صبي سواليفك مطر داخـل حشـاي
أبنطفـي مليـت كثـر .. إشتعالـي
يابسمة عيون الشعر صوتك غنـاي
يذوب مـن سكـر سؤالـك مقالـي
تعالي اسقـي ماذبـل فـي حنايـاي
يمكـن يقـوم بنفحـة الـود فالـي
تعبت أفح من السهر لجت اعضـاي
لين أنتحيت و صارجرحـي ضلالـي
أحترت وأقلقت الشعر مـن سوايـاي
يقنب علـى كـف الإجابـة سؤالـي
ياغربتي وين اللقـاء تهـت ويـاي
لا كشـرت للوصـل سـود الليالـي
أشرب فناجيل الفرج ..وأسمع رضاي
يفتح علـى صـدر الألـم بإنفعالـي
والبسمة اللي حايـره فـي شفايـاي
ماتنقتـل وأسـراب الأحـلام بالـي
لوحسرتي صارت محيطي ومرسـاي
أمـوت ماتسمـع تعابيـر حـالـي
بالبوح علمت الحـزن بحّـة النـاي
وبالصبرعلمـت الزمـان إحتمالـي
وبالدمع علمت السهر قصـة بكـاي
من زحمتي كني مـن الهـم خالـي
لجلك نثرت الروح من كـف يمنـاي
وأشرب صدى صوت العتب شئ حالي
لولاك ماسـال الشعروأنـت لـولاي
ماصرت كلك بالعشـق رأس مالـي
ياأول دروب الغـلا وآخـر خطـاي
أنت المطر وأنـا البـروق إشتعالـي
وأنت الحياة الزاهيه وأنـت منفـاي
ياأعز وأغلى ماسكـن فـي خيالـي
وكن المصير اللي مضى يشبه الجاي
لاتنشغل صاحبـك صـدره شمالـي[/align]