[رحّال]

الحزن في صوتك أزعج ساكني

لين صار الكون من حولي حزين

غصب عني حزن صوتي هاجني

لين خلى عاصي المعنى يلين

وأمتثل حرف القصيد وعادني

وانسكب حِزنك على شِعري حنين

شلت أنا حزنك وحزنك شالني

تكتم الصرخة وينساب الأنين

شفت حزنك كيف حزنك شافني

كيف داهم خلوتي في لحظتين

طير أنا مثلك زماني ضامني

جرحتني مثلك سيوف السنين

صابك اللي من زمانٍ صابني

في معاليق الحشى جرحه دفين

كلما ودعت همٍ زارني

من عذاب الوجد بياح الكنين

الفرح عقب الصداقة عافني

وخافت البسمة على وجهي تبين

طيري ياللي صوت حزنك هاضني

الله اللي ينتصر للصابرين