[بنت الاصول]

الليل يسري .. بين هم.. وكلايــف
والصبح يطلع والشقا فيه مخلــوف
اعيش مابين الرجا والحسايــــــف
والوقت له دورات وأيامي تطــوف
وتقول لي بالحب وش كنت شايـــــف
الهم.. والحرمان.. والجرح ..والخوف
ماعاد لوجيه الليالي طرايـــــف
سرى النديم وجوني همومي ضيــــوف
وانا وحزني والقصايد ولايـــــف
مكنتهم بالعقل والروح والجـــوف
وقلطتهم وسط الضلوع النحايـــف
واكرمتهم بأحلامي سمان وضعــــوف
وعديت في عالي نبا كل نايــــــف
وجريت من صدري على سـيرته اوووف
وبيّحت سدّي والمدامع ذرايــــــف
وكتبت من دمعي على اوراقي حروف
اول لقانا بإبتسامة شفايـــــف
وآخر لقانا صدّ..وأعذار.. وظروف
البعد واقع واصبح الوصل زايــف
وصرت الغريب وهاجس الليل معروف
ماقلت لك: قلبي من الحب عايــــف
وتقول لي: جرب معي واترك الخــوف
شف غيرها ..والا اترك القلب خايف
الوضع قدامك عن الحال مكشــــوف.