مـذّكـرات مجهول !!

[أسد نجد]

الحلقــة الثــامنــة

ليالي رمضان

عندما يحل رمضان ضيفاَ عزيزاَ وغالياَ علينا تتبدل الإستعدات وتختلف الحياة ..
كما يحدث حالياَ لكن الفرق ذيك الأيام ..
ماهناك انوار بالحارات ...
لاتوجد انوار إلا بالشوارع الرئيسية .. السهر فيه على خفيف ..
والنوم ضروري عشان نقوم لصلاة القيام ونتجمع عند المسجد نسولف وندخل للصلاة إذا ركع الركعة الثانية ..
عشان إذا سلم الإمام نجلس نتقهوى شاهي وحليب وقهوة ...
وكنا نصب الشاي والقهوة و الريس (المذن) يحّدث (يقرأ) من كتاب قديم على الطريقة النجدية ..!
كثير من الشباب والمطوع يقرأ , تشوف كل واحد منهم (ينود ) يهز رأسه من النوم ..!

الصيام كان صعب بالحيل .. النهار طويل ودرجة الحرارة 45 درجة آنذاك ...
احسن شيء النوم في خاوة المسجد(بدروم المسجد ) فيها برودة طبيعية احسن من البيوت ..!
نعاني كثيرا من قلة الإمكانيات ...! البيت مافيه إلا مكيف صحراوي واحد بالمجلس ...
وتجتمع كل العائلة عند المكيف الصحراوي وينامون عنده ..!
المساكين اللي ماعندهم إلا مروحة حالتهم كانت صعبة ...
كل شوي يرشون الماء على رؤسهم ...فالعطش كان السائد ..!

بعض عيال الحارة صايمين عند اهلهم لكنهم مفطرين بالشارع ..! يأكلون ويشربون ..
وإذا جو يرجعون للبيت ..تظاهرو بالعطش ..عشان يقولون اهلهم (والنعم بعيالنا اللي يتحملون الصيام )
على مين ! خخخخخخخخخخخ

اتذكر يوم كنت أصوم (صوم الديك والدجاجة ) على قولة جدتي ربي يرحمها ...
كانت الحرارة لاتطاق إطلاقاَ فالصائم يتعرض لحالة من الخمول لامثيل لها قبل الإفطار بسبب العطش ...!
مرة من المرات الوالد شافني العب كورة قبل آذن المغرب ..!
ضحك كثيراَ وقال لي ذات مرة ...(ماخبرنا ياوليدي ان الصائم المنهك والمرهق ) يلعب كورة بهذي الشمس ؟؟

وقتها كنت صغير ولم ادرك من كلامه ان يقصد (مستحيل اصدقك ) إنك صايم ..!
رديت عليه وانا اركض وقلت له عند اعيال الحارة ...ايه يابه ...
انا صائم احسن من ذولا كلهم ...!! خخخخخخخخخ >>> عندي ان ابوي مصدق كلامي ..!!

لكن رمضان رهيب فيه محلبية (تطلي ) وسمبوسا ابويمن !!

والله لو تشوفون الذبان وشلون يتجمعون على (الحليوا ) و(السمبوسة ) والتوت اللي يبيعة ولد الحارة او بنت الحارة ..!
وعلى قولتهم (توت من ذاقه مايموت )

كنا نتجمع عند الماصورة بالحارة ...! والليل اظلم وحالك مافيه نور ..
كل الناس هاجعين , المهم يجون (العيارى )
كانوا اربعة اخوان من عائلة العييري محسوبين على اخوان الديرة..
يلاحقون الشباب اللي يتجمعون بالحارات,
معهم ديهاتسون غمارتين يقولون جميع بصوت واحد صلووو صلوووا
و خذ يامطارد بينهم وبين الشباب...!
مافيه اماكن لترفيه الشباب ..ماعند الشباب إلا التجمع والتسكع بالشوارع ...!
والعيارى مالهم خلق تجمعات ,
الشباب مثلهم مثل الهيعة ( الهيئة ) !!

لو تشوفون المساجد وشلون تكون عامرة بالمصلين والمصليات ..!
تشوف الحريم وهن يطلعن متلففات ..ويروحن للمسجد ..وقت التراويح والقيام ...!

للحديث بقية ...عجزت اكمل من النوووم دخت واحولت عيوني