الدخـيل عند البـدو

[القاصف]

[align=center]( أنواع الدُخَـلاء عند أغلب القبائل ) :


الأول : الطـريد :
===========
الطريد هو إذا وقع الشر بينك وبين خصيمك ولحقته ؛ وفي أثناء ملاحقه اتجه إلى
بيت أو " قِطين " بدو وهو يستفزع . هنا يجب عليك تمتنِع عنه إذا دخل في حدود
البيت ، وحدود البيت عند البدو هي حَذفة عصى من البيت << وهذا مقياس المسافه .

وإذا صوّبته وهو حول البيت يجيبون رجّال نشيط ويعطونه عصا تقارب عصا الراعي ،
ويخلّونه يرميها بكل قوته ، وإذا تعدّت المكان اللي صُوِّبت فيها الطريد يركبك الحق
ويستقضي منك راعي البيت على حسب العُرف . وإذا ذبحته الرد يكون مربّع ، يعني
القضا أربعه إلاّ إذا جاء فيها صلحه . وإذا هي طقة عصا وتصويب لها غرم مال أو صُلح .

وهذا طريقة دخلِته حلوه إذا كان راعي البيت غايب ؛ يدخل البيت وأنت تلحقه ، ويقومن
الحريم بطرح بيت الشعر عليه كِنايه على أنه صار من حُرمة البيت !
أمّا إذا أصابتك له كانت خارج حدود حذفة العصا فهو ما زبَن ، وخصومته معك تبقى بينكم .

الثاني : المنيع :
===========

المِنيع هو إذا وقعت غزوَه أو معركه وقط خصمك سلاحه أو صوّبته وفقد قدرته على القتال ؛
هنا يستمنع عليك ، ولا يبقى له عندك إلاّ حق الدِخيل اللي هو الحمايه والعلاج إذا لزم .
وعقبها تطلقه بدون لا تضرّه .

والثالث :
اللي له أنواع ؛ هو دخيل البيت أو طِريح البيت اللي يَزبن عليك ويطيح في بيتك :
==========================================

النوع الأوّل / دخيلك وأنت خصمه :
------------------------------------------------
هذا النوع مِن أبرَز معاني الشهامه عند أهل الباديَه .
يعني إذا ذِبَح واحد أحد عيالك تدخله من باقي ربعك . وأولياء الدم ثلاث أيام
يسمونها المهربات ؛ تعطيه فرصه يهرب فيها ويدخل على ناسٍ يحمونه لحد ما
تنعقد جلسة القضاء وينحكم له أو عليه .

النوع الثاني / دخيل " واقف شليل " :
------------------------------------------------------
وهذا إذا صارت الخصمه بين عيال عمك وأنت طرف ثالث يعني ما تقدر تميل مع أحد
ضد أحد في هذه الحاله تدخله " واقف شليل " .
وهو إنك تدخله بوجهك وترافقه إلى أن توصله ناس يزبنونه ، وإذا وصل ينتهي دورك .

والنوع الثالث / طريح البيت :
-----------------------------------------
وهذا النوع أشدّها وأطوَلها مدّه وأكبَرها قدِر .
وهو أن يدخل الدخيل ويطيح في البيت عند راعيه ، وبكذا يدخله .
ودايم الناس تدخل على اللي له قدر . لأن دخيل البيت يبي غير الحمايه ؛ يبي
أحد يتوسّط ويسوق جاهه وماله ، ويحاول يحلّ الموضوع بالحَكمه وتراضي .
او بالقضاء ، وإذا صار الدخيل مظلوم وجايه جور ينصره وتصل للحروب .


وهذي القوانين وضعت عشان لا تكون الدعوى متروكه لثورة الغضب وتصير
أخطاء وتعالج بأخطاء أكبر . ولم توضع لحماية الجاني بقدر ما وضعت لكي تهدّيء
النفوس ويجدون الفرصه والوقت للحل الذي يكون عادل .


منقـول مع التصرّف البسيط ؛ دون المساس بلبّ الموضوع[/align]