الباستاآآآ .. عذاااب تهببببل =)

شموع · 21-07-2010, 04:54 PM

..... السلام عليكم .....

اليوم عاد جبنالكم موضوع طويل عريض إن شاء الله يعجبكم .

كل الناس يحبون المكرونه إلى الحين ماقد قابلت أحد وقاللي ما أحب المكرونه صح !!؟ الموضوع هذا بيكون عن المكرونات و بعض الصلصات المعروفه الأصليه !! كل شي سيدا من إيطاليا .

المكرونه تجي نوعين طازه وناشفه ، الناشفه مهيب مكرونه طازه بس نشفوها لأ كل واحد غييييييير وكل واحد منهم له طعم و مواصفات غير الثاني وكل واحد ينطبخ ويتصلح بطريقة شوي تختلف عن الثاني .
في الجزء هذا بس بتكلم عن المكرونات الناشفه كون المكرونات الطازه يمكن تخوف ناس شوي في الجزء الثاني بعد عمر طويل إن شاء الله بنتكلم عن الطازه.

المكرونه الناشفه مصنوعه من السميد أو القمح القاسي + مويه وملح بس. يعجنونها في مكينه خاصه بعدين يضخون العجينه في فتحة وهي اللي تعطي شكل المكرونه ، غالبا محد يسويها في البيت ، وشلون يسون الأشكال ؟ يغيرون شكل الفتحة بس كذا .
سميد القمح يخلي المكرونه هنا قاسيه وهذا شي زين طبعا في هذي المكرونه.

المكرونه الطازه مصنوعه من طحين القمح الأبيض موب سميد + بيض وملح. تنعجن باليد و بعدين تتمرر على مكينه تفردها إلين ماتصير نحييييفه بعدين تنقص.
المكرونه هذي تجي ليييينه ولذيذة عشان فيها بيض وفيها ميزه إنها تشرب الصلصة اللي تنحط معاها .

إختيار المكرونه :

كثير ناس يعتقدون إن نوعيه المكرونه ما تفرق تفرق ونص ولا يهمكم الماركات أو مكان الصنع موب كل مكرونه مصنعه في إيطاليا زينه ... ، المكرونه الزينه هي اللي تخللي الصلصة تلصق عليها بدال ما تبقى في الصحن عشان كذا كل ما كانت المكرونه خشنه من برا كل ماكانت أحسن وكل ما كان فيه تضاريس كل ماكانت تمسك الصلصة أحسن وكل ما كانت من نوعيه أفضل ، فهمتوا !!
زي ماقلت المقادير حقت المكرونه الناشفه وحده بس الفرق هو في طريقة التصنيع ، زي ماقلت بعد فوق فيه فتحة تطلع منها المكرونه صح، هذي الفتحة مصنوعه من النحاس ولازم تتغير داااايما ، عشان الشركات توفر كون النحاس غالي صاروا يستخدمون بلاستك بدال النحاس كونه أرخص وأقوى ، طيب وش الفرق ؟؟؟ شوفوا الصورة

اللي على اليمين نوعيه جيده كونه فيها شوي تضاريس فيه بعضهم تجيك نااااااعمه من برا بعدوا عنها . اللي على اليسار نوعيه ممتاااااازه ومستخرجه من فتحة نحاس لاحظوا كيف خشنه من برا ، طبعا هنا وريتكم البيني بس كل مكرونه تمسكونها بتلاقون نفس الشي . دوروا على مكرونه خشنه .....

طبخ المكرونه :

كثير ناس تطبخ المكرونه بزيت وبهارات وخرابيط ثانيه صح كلنا نسويها بس لعد تعيدونها لاتحطون زييييييت ولاتحطون بهارات ولاتحطون ماجي تكفوووووون !!! بس مويه وملح . اللي يقول إن المكرونه بتلصق أنا أضمنلكم إنها ميب لاصقة و الزيت للمعلوميه موب مانع المكرونه تلصق !!! طيب ليش لأ ؟؟ اللي يسير إن الزيت بينخلط مع المويه في البدايه صح بس أول ما تنشفين المكرونه الزيت بينخلط فوق المكرونه ويلصق عليها و هذا بيخلي الصلصة ماتلصق على المكرونه عشان الزيت !! فهمتوا ليش يعني لي ساعه أكتب فوق كيف تشرون مكرونه تلصق الصوص عليها وبعدين تحطون زيت كنكم ماسويتوا شي

إستخدموا قدر كبير للسلق عشان المكرونه تتحرك فيه بحريه ولكل نص كيلو مكرونه ٦ لتر مويه باااارده أو أكثر مافيه حد أكبر للمويه كل ما زودتي كل ماكان أحسن ، الملح ذوقي المويه حطي ملح إلين يسير طعم المويه مالح . لاحظوا إني قلت مويه بارده كثير ناس تستخدم مويه من غلايه المويه عشان أسرع ، دايما أستخدموا مويه بارده أو دافيه بس موب مغليه ، عشان الحديد حق الغلايه يعطي أحيانا طعم صدأ للمويه وهذا بيعطي طعم صدأ للمكرونه وترا العمليه ما تاخذ وقت كثير . حطي المكرونه وحركيها في البدايه إلين ما ترجع المويه تغلي من جديد بعدين خلاص! المويه هي اللي بتحركلك إيها .

بعد ما تستوي المكرونه نشفيها وبعدين حطيها على الصوص على طول ، حاولي دايما إن المكرونه و الصوص يقظون بنفس الوقت ، لا تغسلين المكرونه بمويه بعد ما تنشفينها على طول حطيها على الصوص ، خليها تغلي شوي يمكن دقيقة في الصلصة بعدين بعدين على طول قدميها ، المكرونه المفروض تنوكل في وقتها ما ينفع بعد ساعة .

متى تستوي المكرونه ؟؟؟؟ كثير ناس يقولون سؤال غبي بس والله العظيم هذا يسوي كل الفرق إطبخي المكرونه وذوقيها كل شوي ماعليك باللي مكتوب في العلبة إطبخي المكرونه إلين ما يروح طعم النشا منها بسسسسس المكرونه المفروض تكون شووووي قاسيه . يسمون المرحله هذي بالإيطالي " آلدينتي " Aldente ومعناها إن المكرونه تعطي شوي مقاومه للسن ، المكرونه اللينه يروح طعمها في الصلصة ويسير كأنك تشربين شوربه بدال مكرونه ، جربي ولو مره وحده وبتشوفين الفرق . فوق أنا قلت إن المكرونه تنوكل في وقتها وهذا واحد من الأسباب كون المكرونه بتشرب مويه من الصلصة وتسير لينه بزياده .

النقطة الأخيرة بخصوص كميه الصوص للمكرونه ، الصوص المفروض يكون لاصق في المكرونه نفسها ما يكون قاعد في الصحن دايما إنتبهي إن كمية الصوص ما تكون كثيييييرة بالنسبة للمكرونه ، هذي تجي مع الخبرة مافيه كميات محدده بس يقولون إن المفروض إذا أكلتي المكرونه ما يبقى صوص في الصحن .

الخلاصة :

* إشترى مكرونه تكون خشنة قدر الإمكان .

* إطبخيها بمويه كثييييييييره وملح بس بدون زيت أو أي شي ثاني .

* إطبخيها إلين تصير آلدينتي بس .....!!!

* نشفيها وعلى طول على الصلصة لا تغسلين المكرونه أبدااااااا .

* قدميها وكوليها حااااارة ......

لحد يرد .....

شموع · 21-07-2010, 04:55 PM

الحين قظينا من المكرونات وجاء وقت الصلصات أول صلصة هنا هي صلصة الطماط الأساسيه ، هذي الصلصة المفروض تكون في الثلاجة أو الفريزر لأنها أساس أي صلصة تستخدم طماط . ليش قلت أساسيه ؟ لأنه بتعديل هذي الصلصة تسوين ألف مليون صلصة سواء للمكرونه أو غيرها ، غير طبعا إن الصلصة تستخدم لحالها عشان كذا الصلصة هذي جدا جدا مهمه ، بوريكم كيف تسوون ٦ صلصات من الصلصة هذي لحالها .

صلصة الطماط الأساسيه بالرغم من إنها مفيييييييده جدا في المطبخ جدااااا جدا سهلة ، تعلمتها من طباخ إيطالي يدررس الطبخ الإيطالي لا وعاش و أنولد في إيطاليا يعني صدق أصليه .

أهم شي هنا هو نوعيه الطماط ( كونها صلصة طماط ) و إنكم تنتبهون لشوي تفاصيل بسيطه .

إستخدموا طماط معلب !! فيه ألف سبب وسبب أول شي هو السهوله و التوفر ، كل بقاله فيها طماط كامل صح !! غير كذا الطماط المعلب يجيك مقشر بينما الفرش أو الطازج لازم تسلقينه عشان تشيلين القشر بعدين تحطينه في ثلج بعدين تقشرينه مرررررره مشوار .
السبب الثاني والأساسي هو الطعم ! الطماط موسمه جداااا قصير وماتلاقون طماط لذيذ إلا في الصيف باقي السنه الطماط يجي حامض الطماط المعلب يكون معلب في موسمه وهذا شي ممتاااااز وغير كذا الطماط من الأشياء اللي تتعلب بدون مواد حافظه . باقي عاد إنكم تعرفون وشلون تختارون الطماط المعلب . سهل جدا أقرأوا المكونات إذا لقيتوا حامض الستريك أو citric acid مكتوب على العلبة أو ملح أو كلورايد الصوديوم أو salt أو sodium chloride لا تستخدمونه ، لأن هذي إضافات تنحط إذا إستخدموا طماط ما أستوى يعني بالعربي بعدوا عنها . المفروض المكونات يكون فيها طماط و عصير طماط بس !!!! للسعوديين فيه نوع إسمه الطائي جدا ممتاز دايما كنت أستخدمه بس عموما أي نوع مافيه الأشياء اللي فوق غالبا ممتاز .

دايما في وصفات الصلصة تلاقون سكر صح!!؟ ليش ؟؟؟ عشان يشيل المرارة و الحموضه اللي في الطماط ، المرارة تجي من حبوب الطماط و الحموضه من الطماط اللي ما أستوا . عرفتوا كيف تختارون الطماط باقي الحبوب وشلون نشيلها ؟ في إيطاليا يستخدمون جهاز خاص ماعندي بس أستخدم أنا الطاحونه اليدويه زي الصورة اللي تحت و أحط القرص على أصصصصغر فتحة وبتلاقون الحبوب و الجلد باقي و الصلصة موب محتاجة سكر .
طيب واللي ما عنده طاحونه يدويه ؟؟؟ الأفضل إنكم تشرون جدا رخيصة ولها ألف إستخدام في المطبخ ، بس فيه حل طبعا صفوا عصير الطماط من العلب ولا تجدعونه بعدين بيدكم فكوا الطماط حبه حبه وشيلوا الحبوب اللي فيها و أجدعوها بعدين قطعوا الطماط بالسكين أو بيدكم وكملوا عادي .

شي ثاني فيه ناس كثييييييييييييير تستخدم قدور ألمنيوم لا تسوون الصلصة بقدر ألمنيوم ، الطماط حامض و الألمنيوم يتفاعل مع الحموضه ويعطيك طعم حديد في الصلصة نصيحة والله لا تسونه فيها إستخدموا قدر ستانلس ذاك اللي يجي يلمع ويفضل يكون ثقيل من تحت .

الحين نجي للمقادير و الطريقة :

المقادير :

٦ علب طماط معلب

نص علبة صلصة طماط

بصله كبيرة مقطعة صغار

٦ فصوص ثوم مقطعة شرايح نحيييييفة

شوي ملح

زيت زيتون

ريحان طاااازج !!!! أو أوريجانو ناشف ( إختياري )

في القدر وعلى نار هاااديه سخني شوي زيت وحطي البصل عليه + رشة ملح ، خليه يطبخ على نار هااااديه إلين ما يبدأ البصل يقلب شفاف موب ذهبي !!!!! بس شفاف زي كذا حوالي خمس دقايق .

بعدين حطي الثوم الشرايح وحركيه حوالي نص دقيقة بس بعدين حطي الصلصة وخليها تطبخ إلين تطلع ريحتها شوي بعدين بالطاحونه اليدويه حطي الطماط علبه علبه الله يعينك عاد زي كذا .. وإطحنيها إلييين ما يبقا إلا القشر و الحبوب بعدين العلبه اللي بعدها وكذا .

بعد ما تحطين كل الطماط حطي رشة ملح ثانيه و خلي الصلصة تغلي غليه جدااااااا خفيفة لمدة ٤٥ - ٥٠ دقيقة أو حتى أكثر إليييييين ما تثقل مع التحريك كل شوي طبعا . بعد ما توصل للطعم اللي تبينه طفي النار وحطي رشة زيت زيتون كبيرة + قطعي شوي ورق ريحان بيدك + فلفل أسود شووووي لو تبين طبعا .

بس هذي الصلصة الأساسية !!! طبعا الكمية هنا كبيرة وزعيها على علب وحطيها في الثلاجة تقعد حوالي شهر أو الفريزر سنة .

شموع · 21-07-2010, 05:01 PM

الحين نجي للوصفات ....

*** سباقيتي مارينارا ***
*** Spaghetti Marinara ***

المقادير :

صلصة طماط اللي فوق + مكرونه إسبقيتي + زيت زيتون + ريحان طازج + جبن بارمان .

الطريقة : سخني الصلصة و أسلقي المكرونه زي التعليمات اللي فوق بعدين نشفي المكرونه ، حطيها على الصلصة خليها تطبخ شوي معاها بعدين رشي زيت زيتون وجبن بارمزان .

تاخذ بالضبط ١٥ دقيقة لو عندك الصلصة جاهزة .وطعمها لا يوووووصف .

*** صلصة البيتزا ***
*** Pizza Sauce ***

إستخدمي نفس الصوص ( صلصة الطماط الأساسية ) اللي فوق إطبخيه شوي على النار إلين ما يثقل شوي وبعدين قطعي عليه فص ثوم مقطع شرايح نحيفه + رشة زيت زيتون + ريحان طازج + أوريجانو في النهاية هذا راجعلك عدلي عليها على كيفك بس هذي دايما أستخدمها وجدا ممتازه .

*** بينني بصلصة الروزيه ( الصوص الزهري ) ***
*** Penne Rose ***

واحد من أطعم الصلصات بالنسبة لي وسهل جدا .

المقادير :

مكرونه بيني حوالي نص كيلو

حوالي ٣ أكواب من صلصة الطماط

نص كوب قشطة خفق أو أكثر حسب الرغبة .

بقدونس للتزيين

أسلقي المكرونه بالطريقة اللي فوق .

بعدين سخني الصلصة إلين ما توصل غليه خفيف وصبي عليها القشطة وخليها تطبخ على نار جدااا هاديه . ذوقيها و عدلي على راحتك .

نشفي المكرونه وحطيها مع الخلطة زي العاده وزينيها بالبقدونس و البارمزان .
للأسف ما أمداني أصور العيال جوعانين

*** بينني أرابياتا ( صلصة الشيطان ) ***
*** Penne Arrabiata ***

هذا الصوص رهيب خصوصا للي يحب الأكل الحار .

المقادير :

نص كيلو مكرونه بينني
٤ أكواب من صلصة الطماط
فصين ثوم مقطعة صغااااار
ملعقتين شاهي فلفل أحمر مجروش اللي يجيك شوي خشن أو حسب الرغبه.
زيت زيتون
جبن بارمزان
بقدونس مفروم

الطريقة :

في قدر نسخن الصلصة بعدين في قدر ثاني نسخن الزيت على حرارة وسط بعدين نحط الفلفل و الثوم ونطبخهم يمكن نص دقيقة بعدين نحط عليها الصلصة ونخليها تطبخ معاهم شوي .
نسلق المكرونه ، نصفيها ، نحطها على الصوص و نقدمها مع البارمزان المبشور و زيت الزيتون و البقدونس المفروم .

*** لينقويني بوتانيسكا ***
*** Linguine puttanesca ***

لا تخافون الأنشوجه ماله طعم في الصلصة جربوه منتب نادمين .

المقادير :

نص كيلو مكرونة لينجويني

نص كيلو زيتون كلماتا بدون عبس

٣ ملاعق كبار كابر

٤ شرايح سمك فيليه أنشوجه معلب

٤ أكواب من صلصة الطماط

فصين ثوم مقطعة صغار

زيت زيتون

بارمزان

بقدونس أو ريحان

الطريقة :

سخني الزيت على حرارة وسط وحطي الثوم و الكابر و الزيتون ، أطبخيهم شوي بعدين حطي الصلصة و أطبخيها معهم ، أسلقي المكرونه ، نشفيها ، و حطيها عالخلطة .

زينيها بزيت زيتون ، بارمزان ، و أعشاب .

*** سباقيتي مع كرات اللحم الإيطاليه ***
*** Spaghetti with Italian Meatballs ***

اللي ماقد جرب يسوي كرات لحم بالبيت يجرب الحين والله فرق ياناس و الحلو فيها تسويي كمية كبيرة وتتفرز زيييين يعني سووها مرة كل ٣ شهور مافيها تعب .
الطريقة هذي أضمنها شخصيا والله تجيكم طريييييييييييية ولذيذة .

المقادير :

بصلة كبيرة مقطعة صغار

٥ فصوص ثوم مقطعة صغار

٤ ملاعق كبار أعشاب طازه ( أي شي على راحتكم أنا أستخدم بقدونس + ريحان )

١/٣ كوب جبن بارمزان مطحون يفضل نوع بارميجانو ريجانو

كوبين خبز أبيض مقطع مكعبات حوالي ١ إنش بدون الحواف ، خبز فرنسي أو صامولي .

كوب حليب

٧٠٠ جرام لحم بقر مفروم
٣٥٠ جرام لحم غنم مفروم
٣٥٠ جرام لحم عجل مفروم ينفع تستخدمون نوع واحد بس أو نوعين بس أول مرة على الأقل جربوها كذا .

بيضة

ملعقة إلي ملعقتين شاهي فلفل أحمر مجروش

ملح وفلفل أسود

الطريقة :

أول شي على نار هاديه حطي شوي زيت زيتون و أطبخي البصل إلين يقلب شفاف بس مع رشة ملح بعدين حطي الثوم و الأعشاب و أطبخيهم دقيقة بس . بعدين شيلي القدر من النار وخلي البصل يبرد شوي .

في صحن نظيف حطي الخبز وصبي عليه الحليب وخليه يشربه لمدة ١٠ دقايق .

الحين أخلطي اللحم مع بعض شوووووووي شووووووي هذا اللي يخلي كرات اللحم قاسيه بأطراف أصابعك بس أخلطيها شوي .

الحين نشفي الخبز من الحليب حاولي تنشفين الخبز بيدك قد ما تقدرين بعدين فتتي الخبز بيدك على خلطة اللحم .

الحين حطي باقي المكونات على اللحم و الخبز : حطي البصل و الثوم الباردات بعدين البارمزان ، البيض ، الملح و الفلفل بعدين الفلفل الأحمر . وأخلطي بيدك شووووي شوي بأطراف أصابعك .

الحين فيه حركة حلوة جيبي شوي لحم و أطبخيه عشان تجربين الملح صدقيني أحسن من إنك تسوين كل اللحم وتكتشفين إنك حطيتي شوي ملح .

بعدين سويي اللحم على شكل كور وحطيه في صينية فرن مبطنة بورق زبده أو قصدير مدهون بزيت ، حاولي تصير بعاد عن بعض شوي و حاولي تصير كلها بنفس الحجم
الحين لو تبين تفرزينها حطيها في الفريزر إلين تجمد بعدين شيليها من القصدير وحطيها في علبة . لو تبين تاكلينها الحين حطيها في الثلاجة أو طبعا كولي شوي وخلي شوي على راحتك .

بس قظينا من الكور ....

الحين نجي لطبخها :

بتحتاجين :

كوبين صلصة + ٢٠٠ جرام مكرونه إسبقيتي + بارمزان وزيت زيتون

يمديك تسوينها في الفرن على حرارة ٣٧٥ فهرنهايت إلين ما تستوي حوالي ٢٥ دقيقة ( طبعا يعتمد على حجم الكور ) أو لو تبين أنا شوحتها مع شوي زيت أول بعدين حطيتها في الفرن . زي كذا :

بعدين تسخنين الصلصة وتحطينها مع الكور زي كذا :

أسلقي المكرونة ، صفيها ، أخلطيها مع الصلصة و قدميها ........

شفتوا كم صوص سويت من صوص الطماط لحاله !!!! عشان كذا أقول جداااااااا مهم .... ولسا بعد له ألف إستخدام .

لحد يرد باقي

شموع · 21-07-2010, 05:05 PM

الحين نغير شوي عاد من الطماط .

*** سباقيتي آليو إي أوليو ( بصلصة زيت الزيتون و الثوم ) ***
*** Spaghetti Aglio e Olio ***

من أشهر و أسهل الباستات الرومانيه جدا جدا سهلة و لذيييييييذة خصوصا للي يقدرون الثوم وزيت الزيتون ، وجدا خفيفة .

فصين ثوم مقطعة شرايح نحييييفه

١/٢ معقة شاهي فلفل أحمر مجروش

٦ ملاعق كبار زيت زيتون

٢٠٠ جرام مكرونه إسباقيتي

جبن بارمزان

شوي بقدونس أو ريحان للتزيين

الطريقة :

جهزي مويه السلق للمكرونه بعد ما تغلي حطي مقلة على حرارة وسط مع نص زيت الزيتون و الثوم و الفلفل وخليهم إلين يبدأ يطبخ الزيت شوي أطبخي الثوم نص دقيقة بعدين طفي النار لا تخلينه يقلب بني بيسير مر .

أسلقي المكرونه إلين ما يبقى شوي على درجة ال ألدينتي ، بعدين شيلي نص كوب من موية السلق حقت المكرونه .صفي المكرونه وحطيها على الزيت و الثوم ، الحين رجعي الحرارة على وسط وحطي باقي زيت زيتون و شوي من موية السلق حقت المكرونه و رشة ملح ، أطبخي المكرونه إلين ما تروح المويه ، بعدين رشي البارمزان و الأعشاب و ذوقيها عشان الملح .

قدميها مع زيادة بارمزان و زيت زيتون

التقديم للأسف مش ولا بد بس ما أمداني والله كنت جوعان أتذكر .

الحين نجي عاد لصوص البيستو جدا سهل ما يبيله شي و رهيب مع أشياء كثير ( جربوه مع السندوتشات ) .

*** صوص البيستو ***
*** Pesto Sauce ***

بيستو معناها معجون بالإيطالي ببساطة أي شي فيه : مكسرات + أساس + بارمزان + زيت زيتون إسمه بيستو الأساس هنا ينفع ألف مليون شي أنتم ألفوا اللي تبون . ريحان ، بقدونس ، ميراميه ، نعناع ، حبق ، طماط مجفف ، زيتون . فيه مليون شي ثاني بس هذا اللي أذكره الحين .

البيستو اللي بسويه هنا بالريحان و البقدونس طبعا ما ينفع مجفف هنا كل شي لازم طازه . لو ما عندكم ريحان دوروا زيييين بس في هذي الحاله الحبق أو النعنان بديل حلو ، اللي ما عنده بقدونس عاد مشكلته .

المقادير :

١/٣ كوب جبنة رومانو ينفع تبدلونها ببارمزان
٢/٣ كوب بارمزان مطحون
فص أو فصين ثوم
كوب ورق ريحان
نص كوب ورق بقدونس
١/٤ كوب مكسرات أنا أستخدمت هنا لوز بس ينفع صنوبر أو أي مكسرات
١/٢ كوب زيت زيتون
ملح حسب الرغبه

أول شي بسوييه إني بحمص اللوز ينفع بالفرن بس أسرع على النار زي كذا :

شيلوه من النار وخلوه يبرد شوي بعدين في الخلاط أو طاحونة الحمص ، حطوا الثوم وأخلطوه شوي ، حطو اللوز و أخلطوه بعدين حطوا كل شي ما عدا زيت الزيتون و أخلطوهم شوي ، الحين صبوا الزيت و الخلاط يشتغل إلين ما يصير الكثافة اللي تبون بعدين زودوا الملح حسب الرغبة .

وبس هذا البيستو حطوه مع السلطات فوق الشوربات مع السنوتشات خصوصا الموزاريلا ، سوو فيه اللي تبون ....

لحد يرد .........

KING THE NET · 21-07-2010, 06:02 PM

السلام عليكم ورحمه الله وبركاتة

انتظرت فترة من الزمن للجزء الاخر ولم ينزل؟؟
على العموم الموضوع 100% أهنيك على الموضوع الراقي
تحياتي

ضاد · 22-07-2010, 12:51 PM

و الله ياللي كاتبه الموضوع شكلها خبيرة اكل ايطآلي ..

و لا مو خبيرهـ و بس خبيرهـ ذوآقه شكلهآ حقت مزآج

الموضوع مرررهـ بطل و شغل متعوب عليه ..

انا فعلاً من عشآق البآستآ ~

شكراً !!

شموع · 22-07-2010, 01:39 PM

وصلنا الآن للجزء الأخير و المفضل لناس كثاااااااااااااار .....

الباستات بالكريمة ..............

معشوقة الجماهير الفيتوشيني ....

*** فيتوشيني ألفريدو ***
*** Fettuccine Alfredo ***

لا ينصح بهذي المكرونه أكثر من مرة في الشهرين كنك شايل بلك في بطنك ....
الغريب إن فيه ناس تتفلسف واجد فيها ، ياناس مافيه أي أكله إيطاليه فيها كمون أو كركم أو حتى كزبرة .

شخصيا المكرونه هذي أحبها بالفطر أو ساده أو بالربيان، الدجاج برأيي يخربها

مقاديرها سهلة :

أصبع زبده

كوبين قشطة خفق قصيرة الأجل

فطر حسب الرغبة لاااااازم طازج

فصين ثوم مقطعة صغاااااار

٣/٤ كوب بارمزان

ملح وفلفل

حوالي ٣٠٠ جرام مكرونه فيتوشيني

الطريقة :

أغلي مويه في قدر كبير عشان المكرونه. مع ملح طبعا ....

بنص الزبده أطبخي الفطر مع شوي ملح بعدين حطي الثوم و أطبخيه شوي بس إلين ما تطلع ريحته ، بعدين حطي القشطة وخليها تغلي غليه خفييييييييييييفة بس مع التحريك كل شوي طبعا ، حطي شوي بس فلفل أسود و بعدين حطي البارمزان عليها وذوقيها يمكن تحتاج ملح يمكن لأ لأن البارمزان مالح أصل.

أسلقي المكرونه إلين ما تصير آلدينتي صفيها وحطيها على الصوص ، خليها تطبخ شوي بعدين قدميها مع زيادة بارمزان و بقدونس مفروم .

أستمتعي بأطعم مكرونة .......

لو تبونها ساده لا تحطين الفطر بس ، لو تبينها مرررررة ساده لا تحطين الثوم ولا الفطر بس . شفتوا كيف سهالات

لو تبونها بالربيان بدال الفطر أطبخي شوي ربيان بالزبده مع ملح وفلفل أول ما يقلب لونه برتقالي شيليه في صحن عشان ما يجيك ناشف ، كملي الفيتوشيني نفس الشي و بعدين رجعي الربيان آخر شي عشان يحتر شوي بس .

*** أورشيتي مع صوص كريمة البيستو ***
*** Orecchiette with pesto cream Sauce ***

الأورشيتي هي المكرونه اللي تشبه الأذان إسمها أصلا الأذان الصغيرة , الحلو فيها إن شكلها يسمحلها تمسك كمية صوص كبيرة . الصوص هنا صوص كريمة البيستو تغير شوي عن الألفريدو جربوه مره منتب نادمين .

المقادير :

٢٠٠ جرام مكرونة أورشيتي أو بيني لو ما عندكم

كوبين قشطة خفق

٥ ملاعق بيستو

ملح وفلفل

بارمزان

ريحان و زيت زيتون للتزين .

في مقلة حطي القشطة و خليها تطبخ على غلية خفيييييييفة أنتبهي لا تخلينها تغلي عشان ما تفصل القشطة . خلوها إلين ما يقل حجمها لحوالي الثلث .

الحين أسلقوا المكرونة و طفوا النار على القشطة ، إذا باقي شوي على المكرونه رجعوا القشطة للغليه الخفيفة وحطوا البيستوا وأخلطوا زين . وذوقوا الصوص وعدلوه .

إذا أستوت المكرونه شيلو نص كوب من موية السلق بعدين صفوا المكرونه . وحطوها على الصوص .
زيدوا شوي مويه لو لقيتوا إنه يحتاج ، يعني لو لقيتوا الصوص شوي زودوا مويه شوي بس .

قدموها مع ريحان ، بارمزان ، وزيت زيتون .

الحمد لله خلصت ...................

إن شاء الله يكون الموضوع أعجبكم وإذا لقيتوا أي أخطاء سامحوني تراني لي ساعتين أكتب والله ، أي خطوة مبهمة قولولي عليها أوضحها إن شاء الله ...