أدب الرحلات .....مع العربجي !!!!!!!

[ملاعب الأسنة]

انطلقنا من الرياض متجهين شمالا ً قاطعين طريق الملك فهد الذي لا تكون الزحمة فيه جميلة
الا اذا ذهبنا لسدير ..............وعند تلك المحطة التي كان فيها ذئاب كان توقفنا .


ككل مرة نتهاوش على اللي يحاسب ............ الكل يريد ان يكون حاتم هذه الرحلة .


عبينا الوقود واتجهنا الى حيث سدير .........عند مفرق تمير كان موعد لفتنا ؟


اول ماواجهنا البندق او التبسي ؟؟؟؟ والله ما ادري نسيت ..........


وفي تمير كان العجب ......... محل بيتزا وفي تمير !!!!! لا لا لا لا لا


راينا المحلات والمحطة اللي في آخر تمير جهة عشيرة ........واللفة اللي توهق اللي ما يعرف تمير !

طبعا اذا كنت تعرف من اهل تمير احد وتخاف من الاحراج فيجب عليك ان تحكم اللطمة جيدا .....لأنه يبي يحرجك بكرمه ,...........

وهذي عادة اهل سدير كلهم ...........

ثم تجولنا قليلا وخرجنا .............. باتجاه عشيرة ..........

حقوق الاكمال غير محفوظة فمن اراد ان يكمل يكمل

[أبوعلي]

على كل حال لو كنت أعرف أسدير ردات عليك ولكن حضك قوي عللا كل حال لك مني أحلا تحية ودوماعلى الخير نلتقي

[ابن الجزيرة]

ويوم وصلنل لعشيرة قلت للشباب لازم تقلطون عندنا في المجمعة وتوجهنا لديرتي حبيبتي المجمعة وعلى قولة العربجي كود تدق لطمة عشان ماحد يعرفك ويلزم عليك ,ودخلنا احد المساجد عشان نبي نصلي فيهاومن سوء الحظ ذاك المسجد مافيه دورات مياه وقلت للشباب الله يخلي لنا البرحة اللي جنب المسجد نقضي بها اللازم وتوضينا وتوجهنا للمسجد وحنا طبعا داقين لطم ويوم شافنا الشايب (المذن) وحنا كذا (اغلب ماذنة المجمعة شياب رجل في الدنيا ورجل في القبر) قال ياعييلي سلامات عساما شر مروحين00000000وانا مادري جيت ابصرفها انا وجيت اكحلها وعميتها قلت ياعم لا ابد الشباب مزكومين ويخافون يعدونك قال مهوب مشكلة (والله اللي حجرنا) نطفي المكيفات ةفكوا لطمكم ويوم قال كذا اشرت للشباب (الهجة) وهجينا وماتشوف واحدنا الاغبرته وراه ونعاله تحت ابطه ونهج ونركب السيارة وصلينا في والله مادري نسيت (من عوامل التعرية)وقلت للشباب مالنا الامزرعتنا نبي نزبن فيها لاينشبن لنا احد ونروح للمزرعة ولافيه واحد من الجماعة قال ابصيد لكم ونتغدى جميع قلنا خلاص والله الوهقة وراح وصاد الرجال وهومعروف بالبخل عند الجماعةويوم جاء ويقرب ويطبخ وكل ماقالنا شي هزينا روسنا تقل هنود(ايه) ويوم خلصت الطبخة الله لايعيدها منطبخة وكان حصة الواحد منا ثلث دخلة (مع الكرم) واحترينا متى نقضي من الغداء قصدي المجاعة وشكرنا الرجال على المجاعة ومشينا وانا اقول للشباب معليش استروا ماواجهكم(الله يفشله هالدبشة) الله لايعيدها من جية في المزرعة::

[ابن ماضي]

ونفر الموتر متجهين للروضة عشان يقالكم نستجم تحت شلالات نيقارا المهم صلنا والشلال يدهر قلنا نجلس ساعتين نهضم هالطبخة وتسدحنا في الثيل ولا درينا الا ويجون شباب عليهم بناطيل ينفخون علينا وياهوشون فينا انا ما قهرني الا واحد لابس تكميله بنطلون برتقالي وفنيله كم طويل وحنا في القيض وسره طالع من زين الطبايع واخوايي فقو خششهم وطارت بوهتهم ( افا امحق شنبات ) !! وجى يسحب كرشته ويقول(انتئم ايه اللي مئعدكم يالله فزو اوومو دا المكان بتاعنا ) وجى الثاني وينافخ ( ايش فيه هازا فيه مكان انا ورفيق بس ) وجى الثالث ( يا زول اختشي على دمك وقوم ) المهم طلعوا لوحات احتجاج ويهتفون ويقولون المتنزهات في سدير عيب يجيها اهل سدير بس من حق المقيمين , ايوالله ونتذكر انه عيب وندق اللطم مره ثانية لاحد يشوفنا من اهل الديرة واللي عض ثوبه وركب السيارة واللي في التنده من الروعة ودحيم عشق الموتر بالاول ويمشي مليون ......................

[ملاعب الأسنة]

نشكر المشرف المميز على تثبيت الموضوع .............


واشكر الاخوة لتفاعلهم ............. ونرجو من البقية المزيد

[اتيكا]

ألين وصلنا مزرعتهم وجلسنا فيها المغرب
وبعد العشاء تهاوشنا على من يصلح العشاء كلاً يقول أنا أعرف أطبخ
وتعاونا في تصليحه أحد يقطع البصل وحد يحمسه وحد يحط الملح وحد يكب الرز
المهم طلعت كبست يحبها قلبك ( أشوا أنكم من تم معنا كان تنومون جوعانين أريح لكم )
جلسنا وتعشينا وعينا من الله خير وشبينا علي الشاهي وقعدنا في الدكه
وقام دحيم وشغل الكنود وقعد يفرفرفيه وسمع ناس من أهل تمير يسولفون عن الصيد والنزل وأن فيه اليوم صيد ومن ها الكلام

صكت في روؤسنا أننا نروح نصيد بأنفسنا لأننا ماشبعنا من دخل الرجال
أخذنا نجهز العزبه وكل شوي نذكر شئ ناسينه
قال واحد منا أنا خابر في منتدى سدير قسم خاص بالرحلات والصيد وكل شئ فيه
حتى أن واحد حاط فيه جدول يبين فيه جميع مستلزمات الرحلات
والله ماصدقنا خبر ورحنا لديرة ودخلنا على منتدى سدير ومنه على منتدى الرحلات والصيد وأطلعنا عليه ودورنا على الجدول وطبعناة
وأخذنا نجهز عزبتنا على أساس ماهو موجود في الجدول علشان ماننسى شئ
وأخيراً صارت العزبه جاهزة ماعد باقي ألى ندور على الأسلحة ألى عقب العام مايندرى وينهي موزات فيه
بعد البحث وجدناهن وأخذنا ننفخهن من الغبار ونمسحهن وولمنا الفشق بعد

قال العربجي ترى الصيد يبيله قومه من فجر
قلنا له حطنا على يمناك متى مابغيتنا نمشى قومنا
وتسدحنا كل واحد في مرقدة ويحلم كم يايصيد من طير
ويوم أذن الفجر الأول ونتقاحص ( لوها قومه لصلات ماقمنا بها السرعه الله لايعاقبنا )
وركب سيارتنا وأتجهنا لتمير وصلينا الفجر في جامع الديرة ألى على الخط
ومنه توجهنا على مبايض ومنها على الشحمه ثمن توجهنا على شعيب الأعصل
وألحن رايحين نشوف سيارات رايحة وسيارات رادة تقول صارالخط السريع يمر بشعيب الأعصل من كثر العالم ألي فيه
دورنا على محل نقعد فيه مالقينا كلش محجوز

قلنا مالنا إلى الشجيرات الصغار ألي برى الشعيب
قمنا ندور وندور فيهن ولقينا حمام قميري بس مهوب واجد
ويوم ناظرنا وإلى الساعة تسع مادرينا بالوقت راح بسرعه
ونقعد تحت طلحه أم الطيور ونصلح فطورنا على قميري يحبه قلبك

ويوم جت الساعة عشر تقريباً ونشغل لم الشوكي يذكرون الصفاري فيه بكثرة
وصلنا حول الساعة عشر ونصف وقمنا ندور ونحوس ما ينشاف الصفاري في الطلح
لكن الصفارات حبيبه تعلم على روحها إذا جينا حولها طارات وعلمتنا وين مكانها

المهم صدنا منه قاسمت الله ومعه بعد قميري
يوم جت الساعة ثلاث نزلنا مع طلعت أم الأرشه وسوينا غدانا في الطلحه ألي في روضة نورة


ويوم جت الساعة خمس العصر وإلانا متغدين وشبعانين والحمد الله
بعد ذالك أتفقنا أننا نروح لم ........

[أبو ماهر]

.


نروح لم البركة ونسبح فيها في مزرعة عم واحد من العيال ايلين يذن المغرب ثم تقهوينا
ذيك القهوة الي مايضبطها الا ابو هنود الي في المزرعة ثم مسكنا الجادة ثم رحنا لم سوق سدير مول
الي في الحوطة ورحنا للمحل الي إذا صار محراب المسجد في وجهك فهو على يمناك رحنا نصلح نعال
واحد من العيال انقطعت نعلته المهم وحنا طالعين من محل التصليح النعال وشفنا قصر الاهالي مولعه لمباته
ونزل واحد مننا يبي يعرف منهو عرسه(سديراوي أصلي)ثمين وحنا جوعانين قلنا يولد لو طلبنا عشى
وين بنتعشى فيه عاد تهاوشنا كل واحد يحاسب وبعد ماخذنا العشى تورطنا قلنا وين نبي نتعشى فيه
وخطرة لي فكرة قلت البساط ورى المرتبه قلت للعيال مشينا لم حديقة الربعة نتعشى فيها عاد توهم مزبطينها
وتعشينا في الحديقة وحنا طالعين نبي نرقد في العبلة وتونا طالعين من الحديقة وصلنا الحصون ثم تذكرنا ان حنا
ناسين البساط ويوم عودنا ولا نلقا عند التمثال الربعة تفتيش وقالوا لي رخصة واستمارة انا عطيتهياه واثنين من الشباب ناسبن اثبتاتهم ورحنا ملح ثم قال ترقدون عندنا...

أكمل؟؟؟

[ملاعب الأسنة]

شكر من اعماق القلب لكل الأعضاء اللي شاركوا .............

وشكر خاص للجريوي ..............


وقبل لاأنسى شكرا على مروركم من هنا


==========================

ومسكونا .........ومن السيارة نزلونا .........وتهاوشت انا واتيكا وقلت له ...موب لو اننا قاعدين

في تمير ولا تلطمنا كود احد يعزمنا ......... هذا اللي استفدنا من امير والحصون


المهم مشونا لأنهم اصلا ما مسكونا الا علشان يعرفون من نحن ...........

طار النوم ...........قلنا ياناس وش الدبرة ؟؟؟ قلنا بس ......... بيوت الطين نتمشى فيها ( مسكة )

والا العنانية والا وش رايكم ........... السد .......فاضين وطاير النوم عنا .........


قلنا ما بدهاش .......... الى دار التمارا مشينا وتمشينا شوي ......... وعدنا طلعنا من تمير الى عشيرة !!!

:
يمديكم هاللفة كلها علشان اعود للمكان اللي وقفت فيه ........ يا اخوي اتعبتوني من المجمعة للروضة

ثم مبايض ثم الشحمة ثم الشوكي ثم الحصون ........... شوي شوي علينا



المهم رجعنا والا هالأنوار يمين ويسار ( طبعا باتجاه عشيرة الان ) الشباب كل شلة كاشتة تشوي

وتتقهوى وسهر في هالبر ........ وصلنا عشيرة والا المحطة االي فيها اغاني وشيشة ( وينكم يا اهل عشيرة عنها !!!!!!!!!!!! )

مشينا بهدوء في هالليل والهواء اللي ماهنا باحسن منه ( بدون لطم طبعا ) الشيبان ناموا

وقام واحد من الربع يقصد علينا ......... وطبيعي يعني لاتتوقعون ان الهدوء يبتل

سديراوية ما يستانسون الا بالطقاق ........... تهاوشوا واحد يقول نبي ثادق والآخر يبي الحوطة ........
..................

كملوا ............... تعبت ..............لكن ياليت ما يكون الموضوع بس سواليف ودنا

يعني بسواليف وذكر لمعالم سدير ......... هذا المطلوب وسلامة حبايب قلبي

[ربى الجنان]

ماعليش شباب ممكن مداخله ؟؟؟

طبعا ماننسى عشيرة الصغينونه وعلى قولتكم التسجيلات اللى فيها والشيشه اللى نصف بزران عشيره عندها
مدرى وين الناس عنها ؟؟؟؟؟....والبقالات ياحليلها الوحده كبر قوطى الصلصه ....والحديقه اللى على جنب من داخل عشيره اكل عليها الزمن وشرب وناام بعد القايله ....والمجمع اللى يبنونه ماشاء الله مسرع قوموه؟؟
طبعا اهو مجمع مدرسة اولاد من الابتدائى الى الثانوى .....وسط عشيرة ...بالضبط ....
وفيها مطبخ للذبايح ..ومحل بيع دجاج للشوى والمندى ===>مدرى وش دخلنى !!!
وبيفتحون مغسله شفت اللوحه ويقولون بوفيه بعد ..........====>ملك تميم من عشيره خلوووه يكمل

وتمير ...ياحليل شلالهم ووش زينه ....والحركه اللى يسوونها قدامه ...مدرى وش اسمها شكله جلسات بس للرجال اكيد تقطع رجل الحرمه لو تطبه
وفيها محلات مهيب شينه للحاجات الخفيفه ...وعندهم ثيل يقعدون فيه الرجاجيل من 10 وبعد بس وين فيه مدرى ....
اوووووووووووووه نسيت المخطط الجديد ماشاء الله فلل على كيف كيفك ...
وتنقسم تمير الى قسمين العزيزيه والخالديه ........
وتتميز العزيزيه بوجود القبيلين بس ====>ياربيه لاحد يزعل بس معلومه غريبه !!!!
مدرى وش بعد هذا اللى اعرف يكمل الباقى اتيكا هو من تمير ====>وهقته
والحووووووطه عندهم اسواق حليوووووووووووووة قيصرية الزكرى والمنقور ومحلات التويجرى
ومحلات المعازيم واقمشه ووووونسيت
وماشاء الله قصر ابو حمد يدهر عروووس اللهم لاحسد ...وفيه بعد قصر ثانى مدرى وش اسمه نسيت ..
وماشاء الله الكليه الجديده ....على البركه ياهل الحوووطه
وووووووودرو احد يكمل عن الحووووووطه
والروضه ماشاء الله ربيع عندهم

والله وش زينها الروضه حركااااات
والحريق ياحليلها صغينووووووونه ....


وهذا اللى اعرف ...

[kaleed]

أخوي العربجي


والله غطيت على حمد الجاسر وعبدالله بن خميس


أخوى / أتيكا

والله أنك شهوتنى الله يقطع بليسك


على فكرة ودى تقولنا عن الطيور المصيودة بالصورة وأنواعها ووشلون كان طعمها ومتى صدوتها


ياشباب

ولا واحد فيكم جاب طارى الخطامة يعنى تمير والروضة وعشيرة والحوطة معليش مسموحين


والله ونفر الفياجرا متجهين الى عروس سدير - الخطامة - كأنى سمعت واحد يقول كثر منها


والله قعدنا نتجول على معالم الخطامة السياحية وأهمها معجزة القرن العشرين الجبل المخروق الذى يفصل الخطامة



القديمة عن الجديدة ثم زرنا الحديقة الغناء داخل الخطامة ثم شرينا من مجمع أبوغانم التجاري


وخذ نا شاهينا وقهوتنا ورحنا الى الطريق الدائري الواصل الخطامة مع الحوطة الشقيقة


وبعد رحنا الى بيت الأمير / بن مغامس وسلمنا عليه وعطا كل واحد فينا منحة أرض


في أرقي أحياء الخطامة ( ترى كلها بيتين ) وقضينا باقي اليوم في نخل مليحة


حيث الخضرة والماء والوجة الحسن


وأترك الفرصة لباقي الشباب من مختلف مدن سدير الحبيبة لوصف رحلاتهم

[sound]http://www.fanateq.com/audio/damaam_2/ALL_damam_2.ram[/sound]

[اتيكا]

الصور تغني عن الكلام

[ملاعب الأسنة]

هلا اخوي خالد .........شكرا شكرا على الاطراء ......احم ......واحدصدق


المتميز الأخ المبدع اتيكا يكفي نقول .......تسلم .......ما نقدر على غيرها .



الله يخلي لنا اهل تمير وتمير .

[الغلا]

تمير
لتمير موقع متميز اذ تحيط به الرياض الخصبه من جميع الجهات

مثل
روضة التنهات

روضة الخشم


روضةنوره


روضةالحقاقه


روضةام الشقوق


روضةام قلبان وغيرها كثير

وبها غابات واوديه مشهوره مثل الشوكي

والارطاوي والترباعه .....

فهي منطقة متنزهات موسميه لاهالي نجد


ومن اهم معالم تمير الاثريه

حامي القصيرات

سور الجماعه

المرقب

المراجيم

قصر كاظم

جبل خزه

قارة بلبيل


وقد اشتهر اهل تمير بالكرم منذ القدم ،وهو دليل السخاء

والرغبه في البذل والعطاءواشتهرو بالشجاعه

وبقوة الترابط الاسري وطاعة الوالدين واحترام كبار السن

وتقديمهم في كل شي

ومن العادات الطيبه في مجتمع تميروالتي حث عليها الدين

الحنيف ومازالت موجوده، صلة الاقارب ومعاودة الجار والسؤال

عنه وزيارة المريض

وكان هنا ترابط كبير بين افراد البلده،

فكانو يحرصون على اجابة الدعوهوتقديم العون للمحتاج


[poet font="Simplified Arabic,14,red,normal,normal" bkcolor="" bkimage="" border="none,2,gray" type=2 line=200% align=center use=ex char="" num="0,black"]

الرايه البيضا لكم يا اهل تمير= بالطيب والنوماس تستاهلونه

تستاهلون المدح في كل تعبير= ونشيدبالطيب اللذي تفعلونه

صفوة رجال من رجال مناعير = اختارو منزال العلا يسكنونه

عسى مراويح السحاب المباكير =لصار فوق تمير تمطر مزونه

[/poet]