كشتتنا في اجازة الربيع

عبدالعزيز · 23-02-2010, 07:27 PM

السلام عليكم ورحمة الله وبركاته

مساء الخير على الجميع ..

كيف حالكم ان شاء الله مرتاحين

اعتذر في البداية عن تأخير طرح الموضوع لكن مثل منتم عارفين الوقت في سدير محسوب علينا منب فاضي للصور لاحقين على نجران ونمخمخ على الصور لاسيما انها حول 1000 صورة

انطلقنا من سدير الحبيبه يوم السبت الماضي 29/2 الساعه 10 صباحا حتى يوم الثلاثاء الساعه 9 مساء رحلة 4 ايام

فليناها يالله لك الحمد ضحكنا وسمرنا وشمينا ريحة الربيع وسوينا كل شي << لاتلومونه مكبوت في نجران

الرحلة شملت الصمان من جهة ام رقيبه الحصبيات - ام عشر - البسيتينات - البريكة

اتمنى ان ينال التقرير اعجابكم واعتذر على القصور

مسكنا طريق الحفر وتعدينا ام رقيبه جينا ندخلها وقلنا في الرجعه ان شاء الله لكن للاسف مادخلناها جينا في الليل بس مبطي عنها لي 4 سنوات بس نشوفها من بعيد صراحة خبال تطور قوووي مره مع اني ضد هالخرابيط

تعدينا ام رقيبه وفرقنا يمين بعد المحطة

لا صح قبل مانتعداها دخلنا المحطة وتزودنا بالزاد والوقود

المهم شفنا صرافة في سيارة الصدق جازت لي الفكرة وافكر اني افتح بنك عشان هالحركة

نزلنا البر مشينا تقريبا حوالي 15 الى 20 كيلو وصلنا لاقرب الفياض طبعا مانبي نتنعفق اول شي نبي نوصل بدري عشان نذبح ذبيحتنا ونعين من الله خير

وصلنا قرابة الساعه 4 وهذي صورة على السريع للفيضه

المهم جاء وقت سفك الدماء

تم الذبح بنجاح

ناظروا على السريع ولا تدققون نص اللحم رايح وطي مع السلخ

المهم قطعنا لحمها وحطيناه في الثلاجة وضبطنا امورنا وتقهوينا وتعشينا في نفس الفيضة

يوم جاء بكره توجهنا للحصبيات ودخلنا زياده صراحة مسه والطريق يحوم التسبد مانمر على فياض ولا شي

وصلنا بعد جهد جهيد وطريق اشهب الهب

وصلنا للفباض وقمنا نتمشى وهذي بعض الصور

ياحليلهن ذا القعدان ماخذين راحتهم للاخر

هذي فيصة العودة تقريبا احسن شي في الحصبيات << سبحان الله اي شي اسمه العودة زين مدري وش السر

صورة لنفس الفيضة من الاعلى

خصصنا يوم للشوي لازم نغير عن الكبسات

قطعنا اللحم وجهزناه في الاسياخ

الصور تتحدث << يعني لحم على الفحم وش تبون اقول

تعشينا ونمنا .. واشرقت الشمس لتعلن عن يوم جديد

واحد من الشباب متحمس وجايب طحين وعدته يبي يخبز لنا ومحدثكم ماعنده مشكلة انواع التعزيز << يعززون عشان يضحكون لاصار مهوب زين شعب سعودي

لاتتدققون في التدوير لان الرجال سوى مصطلح هندسي جديد

هذا يسوي خبر وهذا يحمس الكبدة وهذا جالس يلعب عليهم ويصور << مهوب تصدقون والله كارفيني في تعسيل الواعين بس يالله لاجل عين تكرم مدينه << ابد ابد ماله دخل

والله الخبر مش بطال كويس والله

هذا رفيقنا جالس في فرن المخبز

المهم انا اكتشفت ان ماودك تسوي شي عند بزران لانهم يقلدون

قال واحد من الجمهور يعني اللي يتفرجون قال بسوي فطائر قلنا سو فطائر وش ورانا

مابي اوريكم صورتها بعد ماخلصت عشان ماتنظلونه << ترى يافلان منب فاضي ارقع لك كل يوم

مشينا من الصمان وبنطلع لام عشر .. طبعا بنطلع عند محطة البطيحانيه ونمسك طريق ام عشر

المهم بعيده والله حول 50 كيلو لاننا دخلنا كثير

مالكم في الطويله << ماسك بهم خط وتقول مالكم في الطويله

قطعتنا سكة الحديد الجديده الظاهر انها رايحة لجدة صراحة شغل عدل

تذكرون راعي الفطائر

أنبه ضميره ودرى انه غلطان ولا يمكن اننا نسامحه فقرر قراره النهائي انه ينتحر

مابي اكذب عليكم واقول اننا نصحناه ماينتحر لاننا حاسين كلنا بغلطته

عاد قال بجلس لين يشتغل القطار الجديد قلنا سو اللي تبي اهم شي لن تنجوا من فعلتك ايها الاحمق

مشينا شوي لين طحنا في مصنعهم وشغلهم

توكلنا على الله ومسكنا الخط ومشينا تقريبا 60 كيلو الى ام عشر

صورة الهجرة من فوق

وهذي روضتهم مشبوكة عند الديره

احسن ربيع بس ماشاء الله بس ماتندخل

دخلنا للشعيب وفيه فياض حلوة اعتبره الافضل مثل البريكة بس البريكة زحمه مره عالم وقلق

صور منوعه لبعض فياض ام عشر

صورة لجلستنا تعرفون الشمس حاره

مشينا للبسيتينات والبريكة بعد النوم في ام عشر

وهذي صورتين للبسيتينات

للاسف جينا للبريكة والجو كدره شوي وعج والربيع طالع اشهب

لكن الحمد لله شبعنا من الربيع 4 ايام

اليكم بعض الصور من البريكة

اعجبتني حركته في صندوق الهايلوكس

مشينا متجهين الى الديار

مرينا على فيضة حلوة قبل النفود

دخلنا النفود بنطلع على مشذوبه اقرب طبعا قطعنا تقريبا 40 كيلو نفود لانه يختصر الكثير

صراحة مناظر خطيره في الرمل ربيع وفله

وصلنا بسلام قبل المغرب لمشذوبه

تقهوينا يوم جاء المغرب عدنا الى الديار محملين بالغبار والتعب

اعتذر على الاطالة .. واتمنى ان ينال التقرير اعجابكم

The End · 23-02-2010, 07:30 PM

مآآآآآآآآآآآآآآآآآآآآآآآآآآآآآآآآآآآآآآآشآآآآآآآآآ آآآآآآآء اللهـ

رحلهـ موفقهـ
مشكور أخوي

الحق حق · 23-02-2010, 07:37 PM

تقرير بصراحة رائع جدا جدا

اشكرك

الرااحل · 23-02-2010, 08:03 PM

ماشاء الله والله الربيع رائع,,,,

تقبل مروري

رعشة شنب · 23-02-2010, 08:41 PM

ياسلاااااام

طلعه ولا احلى

وتغطية جميلة يابعدي

وخاصه الخبز هههههه

أبو داحم · 23-02-2010, 11:55 PM

ماشاءالله رحله جميله ...

الجنوبي 2000 · 24-02-2010, 02:48 AM

هلا والله ابو العز يا اخوي مافيك خير تسير وهنا فيها هههههه

ما شاء الله تبارك الله رحلة جميلة

لاهنت عليها

بس ليه ما صورت وانت تذبح الذبيحة ههههه

او على قولة حمد ما يتحملون يشوفون الدم ههههههه

لك الود والتقدير يا الغالي

اهنئيك على الرحلة الرائعة

الله يديمها امين

لاهنت