فندق على النيه

[المجهول]

الاسبوع الماضي كنت في القصيم … حاضر زواج واحد من الزملاء … وفي القصيم نمت في فندق القصيم … بيني وبينكم تعبان ومالي خلق ادور فندق غيره … خذت منهم غرفه تعبرني هالليله … وطلعت للغرفه وتمددت على السرير ماجاني نوم … الجدران مشققه اشوف معها السيارات الي في الشارع … وبصراحه كل خوفي ان الفندق يطيح علي … قلت ياولد مالك الا التلفزيون .. اقعد تفرج عليه يقطع الوقت … التفت اللين ذيك الحصاله الي حاطينها على الماصه وكاتبين عليها تلفزيون … وشبكته على الكهرب واشتغل صار تلفزيون … قلت المشكله وين الريموت منيب كل دقيقه قايم اطقه على قناة ابغى اطقق فيه وانا متمدد على السرير … مسكت التليفون ابطلب من الرسبشن ريموت … قلت الو لو سمحت وتوني مابعد كملت كلامي الا وباب الغرفه يطق …. قلت لراعي الرسبشن دقيقه ابشوف من الي يطق الباب … فتحت الباب والا ابو هنود واقف عن الباب ومعه عود مكنسه … لطخت الباب في وجهه ورحت ابطلع المسدس من الشنطه .. الا وهو يدخل وراي يهز راسه مافيه خوف مافيه خوف بابا … قلت له وش تبي … مد لي عصى المكنسة وقال خذ … قلت وش هذي قال هذا ريموت … انت نوم على السرير بعدين غير قناة مافيه قوم (ياروحي ياالتكنلوجيا ) … والله الخدمه عندهم ماشفت مثلها … رحت وسكرت سماعة التلفون .. وجلست بعصاي اطقق في هاالقنوات … بس المشكله انا خرمان شاهي … دقيت على الرسبشن وقلت له لو سمحت ابغى وتوني ماكملت كلامي الا باب الغرفه يطق … قلت لراعي الرسبشن دقيقه ابفتح الباب وارجع لك … فتحت الباب والا هذا ابو هنود معه الشاهي .. .. والله الخدمه الي مافيه مثلها .. خدمه على النيه … رحت وشكرت الرسبشن وسكرت السماعه … وقعدت اقعب من هاالشاهي واطقق بعصاي في القنوات … قلت ياولد ماكنك جيعان خل اناظر وش الاكل الي عندهم .. وبيني وبينكم كنت مشتهي سمك مشوي … يوم جيت ابرفع سماعة التلفون اتصل على الرسبشن علشان اطلب السمك … الا والباب يطق (حرام والله هالخدمه على هالفندق) فتحت الباب والا هذا ابو هنود في يده سمكه مشويه ماسكها بذنبها وتدودل في الهوا بدون صحن وبدون شي .. مدها في يدي وراح .. اول مره اشوف خدمه على النيه … عطيت ابو هنود ابريق الشاهي الفاضي والبيالات يوم توه بيروح قلت لنفسي خل اقوله يجيب لي أي شي احلي به عاد انا اموت في شي اسمه حلا … وما امداني اكمل امنيتي الا وابو هنود ملتفت علي ومعه ابريق الشاهي والبيالات بين يديه .. قال لي صديق يبغى حلى قلت ايه … لقاني ضهره وقال شف مخبات الصروال الى ورى فيها حلا طلعها … المهم صارت كليجا طلعتها … وكلت السمكه وحليت بالكليجا ….ثم تمددت على السرير … وقعد الشيطان يلعب براسي … وقعدت اتخيل لو تطق الباب هالحين بنيه … وما بعد امداني اكمل تفكير الا ابو هنود معه فاتورة الفندق ويقولي برى … انت مخ خربان بعدين انت سوي مشكله للفندق .. وعطاني فاتورتي وباقي حسابي … وطلعني برى الفندق … وطلعت بسيارتي حمقان ابي الرياض … امشي 160 …. قلت ياولد ليش ما اعبي بنزين … وما امداني اكمل تفكير الا راعي السياره الي يكبس وراي بالنور يبيني اوقف … قلت بس هذا ابوهنود حق الفندق اكيد يبي يعبي لي بنزين … واسفط الطبلون 170 180 200 والرجال وراي يكبس …. تعدينا المجمعه والرجال وراي يكبس …. وصلنا حول الرياض وموتري فضى بنزينه والرجال ملحم فيني ويكبس … قلت خل اوقف اوريك شغله ابو هنود هذا … يوم وقفت وقف … وحول اليينه ولد شباب من اهل القصيم … قلت له خير وش تبي … قال انتبه يالشيخ ترى لوحة الياره بتطيح … شفتو طيبتهم وين وصلت حدود الرياض ولو انه بغى يقلبني مرتين …. يوم توه مديور وراجع للقصيم اللين ذاك الي يشر في الخط … قلت خل اوقف اركبه يسولف معي … ويقطع الخط علي… يوم ركب اليين ريحته تعثور … سكران
ـــــــــــــــــ
بعدين ابكمل لكم سواليف هالسكران وش قال وش رايه في الي حاصل
ــــــــــــــــــــ
من احب مناطق المملكه لقلبي القصيم .. واحسن ناس هم اهل القصيم