( قصة.. قصيده ) للدانه..

[دانة القصيد]

السلام عليكم ورحمة الله


هذي قصة المثل الشهير أو بالاصح الابيات الجميله التي دائمآ

مانسمعها أو ننرددها
( ياليتنا من حجنا سالمينا )

أتركم مع القصه...


الحقيقه مدري أن كان سبق أنها أنكتبت هنا

بس أعجبتني مررررررره...

وهي على ذمة الراوي وهو( شمري )؟


مســاءكم ..|.. صباحكم ..الخيــر جمييعا


القصيـدهـ نابعهـ من موقف حصل للشاعر بصري الوضيحي

الشمري وهو رجل مسن ( عود )


كان بصـري من أجمل الرجال في صباه فاوغل في هواء البنـاتـ ومضى به
قطار العمر ويومن كبــر الرجال خذوهـ عيـالهـ للحج واثناء الطواف ويومن جاء بيحب الحجر الاسود
إلا بخد بنت ٍ فيها الجمال اوصاااااف اقرب لهـ من الحجر فقبل خدها ، وعــاد اللي حولهـ صاحو بهـ ..:


تاه العود !!


تاه العود !!


تايه يالعود تايه ..


فقــال : التايه اللي حججني وهو يعرف أن غبار السنين مامحا خضـار قلبي ،
بعد هالحادثهـ قال متـذكر ..:




التايـه اللـي جــاب ..بـصـري يقـنـه
جدد جروح .. العود و العـود قاضـي


جيـنـا نـحـب ..ونطـلـب الله.. جـنـه
جنة نعيمٍ .. يوم يبس .. اللحاظـي


ياليت ..كانت حبتـي .. فـي معنـه
يوم العيـون عـن الخوامـل غواضـي


يامـن يعاونـي ..علـى وصــف كـنـه
اشقح ..شقاح ..ولاهقٍ ٍ بالبياضي


لا ريحـتـه .قـشـرا ولا هي..مصـنـه
ريح النفل بمطمطمات .. الفياضي


ونـهـود.. للـثـوب الحـمـر شولعـنـه
حمرٍ ثمرهـنٍ واقفـاتٍٍ.. غضاضـي


و الخـد .. ذابـوح ..القـلـوب المـرنـه
بـراق مـزنٍ لاعــج الـلـون ..يـاضـي


ياليت .. لو سني على وقم سنـه
بايـام مـا بينـي .. وبينـه .. بغاضـي


ايام جلـد.. الذيـب عنـدي .. محنـه
نصبح وزرق الريش لهـن انتفاضـي


وا جـرح قلبـي جــرح وادٍ .. وطـنـه
غـر المـزون اللـي وطـنـه وفـاضـي


والبيـض قبلـي محسـنٍٍ.. عذبنـه
ونمرٍٍ على وضحا جرا له عراضـي


والبيض .. كم مـن واحـدٍٍ يبسنـه
يبست شماليل العذوق النفاضـي


عـزي . لمـن غـر ..الثنـايـا .. كـونـه
واركـن علـى كبـده كوايٍـا اعراضـي


شوفي بعينـي و الخـدم .. يركبنـه
بنـت الشيـوخ مخدميـن الحياضـي


على اشقحٍٍ من زمل ابوها مظنه
ركبت عليـه اتشنطـحٍٍ باعتراضـي


بمشجرٍٍ من سـوق هجـرٍ ..مغنـه
علـى خياطـه نـاب الارداف راضــي


وين انت يالمشفٍي على طردهنـه
انا طويـت ارشـاي واقفيـت قاضـي


أحــدٍ يطـيـح بـنـار وأحـــدٍ ..بـجـنـه
وترى الحظيظ اللي له الرب راضي




ويقال ان بصري يومن رجع لأهله نشـدوهـ جماعته وشلون الحج معكـ يا

بصري..!!


فقال مقولته المشهوره:





ياليتـنـا مــن حجـنـا .. سالميـنـا
كان الذنوب اللي علينا خفيفـات


رحنـا نبـي نخفـف ذنــوبٍ عليـنـا
وجينا وعلينا كثرها عشر ..مرات



اتمنى لكم الفائده************"" واعذروني ان كان هناك اخطاء


فالعهده على الراوي هنا....


تحياتي
الدانه

[سعود الموسى]

شـكــ وبارك الله فيك ـــرا لك ... لك مني أجمل تحية .

[الوافيـ]

ياليتـنـا مــن حجـنـا .. سالميـنـا
كان الذنوب اللي علينا خفيفـات


رحنـا نبـي نخفـف ذنــوبٍ عليـنـا
وجينا وعلينا كثرها عشر ..مرات


قصيده جميله بوصف قهر كبر العمر وملى الشيب وعلى مقولة ....ياليت الشباب يعود يومن ...
جزل المعاني بجزل نظمها واسراد القصه بابيات توحي ...(بانه قلبه اخضر)..
صراحه هي قصه غريبه الموقف الي صار يحير شوي (لكن مافي غريب بعالمنه) ..وهي لاتصدق او تكذب ..ومثل ماقلة على ذمة ناقلها,,,
قصيده جميله واختيار اجمل...

[ذياب العصيمي]

اليتيمه دانة القصيد

الله يعطيك العافيه على

النقل المميز

تقبلي مروري..