بداياتي / تقول والدتي الله يحفظها والعهده على الرواي (( الراوي امي )) أني من مواليد مستشفى المملكه ولكني شكيت بكلامها لأني اعتقد ان هالمستشفى مفتتح قبل ولادتي بفتره واكيد اني مولود بمستشفى اجدد منه ،،، ولكن هذا ما يمنع اني اكون توي صغير ،،، ويقولون انه بيوم ولادتي كان برمضان وفي بدايته تحديداً يعني مثل اللي يقول لامه افطري بالقوة ،، ولكن وبالرغم من هذا التوقيت الا أن طلتي نست امي وابوي توقيتي السيء ،، فقد ولدت بشعر ناعم واشقر وبشره بيضاء كبياض الصيج إذا نظفتها وعيون كحليه وكأني بنانسي عجرم كانها تقرى موضوعي كأني بها منقهره من لون عيوني ،،، ولكن بعد ما حصل ابوي كل هالألوان فيني راح للمكتبه اللي عند بيتنا وشرا علبتين تشكيله خشبيه وتقول امي انه شراها على اساس إذا جاني مشخ ابوي يرجع بويتي على طول (( صرت ددسن مهوب غويمض )) ،، عموماً المميزات فيني من صغري كثيره ولكن سلبياتي غطت عليها واصبحت شبه منعدمه ،، ولعل اهم مميزاتي على قولة الروائي اني كنت اعرف اطلع يدي من المهاد لحالي وأسرق حلاو البقر وأرجع يدي للمهاد وأترك اللي عندي بالغرفه كل واحد يتهم الثاني
سألت أمي يوم / وش أهم ميزه فيني يوم كنت مولود ؟؟
قالت / أهم ميزه فيك أن كل حرمه تجي تشوفني تحط تحت راسك خمسين والا ميه ،، ويوم ان الاربعين خلصت لاحظت اني حصلت شي اكثر من قيمتك وانا امك يعني لو بعتك ذيك الايام ما جبت ربع اللي جمعته ،، وبصراحه بعد كلامها تأكدت اني اول مره انفع وحتى لو كان لا إرادياً
مرحلة الطفوله / طفولتي من جد كانت تعيسه (( على فكره كلهم يقولون كذا حتى لو طفولته احسن من طفولة ياسر عرفات )) ،،، فأنا نشأت في حي شعبي جداً وحينما كنت في السادسه (( جيم )) من عمري بديت اطيح بالدجه والسعسعه بالشوارع ولكني لم أكن ببعيد عن بيتنا ،،، وكانت انام عند جيراننا أكثر من بيتنا ،، وكنت دايم العب مع عيالهم ،، ومع ان وسائل الترفيه لم يكن لها ذاك الوجود كما هو الحال ذا الحزه الا أنني كنت القى ما أشغل به نفسي انا و محيميد ولد الجيران واخته مها واللي كانت تكبرني بسنتين بينما محيميد في عمري بس امه جايبته بعيد الأضحى وعنده اخو كبير شوي سبيكه ويقولون انه يوم جابته امه وشافه بالمهاد يحسبه لحمه ولفه بكيس ناوي يعطيه الجيران ،، بس الله ستر ولحقت عليه امه بآخر لحظه ،،، وعندما كانت الإجازه ما كانت الناس تسافر ذيك الأيام وكنا انا ومحيميد ومها نقضي وقتنا في عدة العاب لعل على راسها (( واحد طش )) وكنت إذا صرت أنا اللي اعد اسوي حركه حلوه والسبب ان محمد كان يتوزى في أماكن مدري وش تبي لدرجة انه توزى مره وماقدر حتى هو يلقى نفسه ،، أما مها فما تغير مكانها ودايم القاها بسهوله لأنها تتوزى جوا بيتهم وتطل مع فتحه بالباب كنها دريشه من كبرها ،، وكنت اشوفها بس ما (( أطشها )) خايف أخسرها ،، والظاهر أن بوادر الود بيني وبين بنت جيراننا قد نشأت منذ الصغر ولكن عادي كنا صغار اما الحين بدري عليك احد يعطيك وجه حتى لو كانت خدامه
كنت بذاك الوقت القعده لأمي وابوي بس قاهريني ما دلعوني من اني شكلياً استاهل التدليع بس ،، بس هذا الشي ما منعني احب امي وابوي واحب ام جيراننا وابوهم مهوب لسواد عيونهم ولكن علشان مها
حارتنا هذي كان فيها دكان واحد (( تموينات للي ثقافتهم العامية ضحله )) وكان دكان ابوصالح وحاط فيه باكستاني ،، وبعد فتره أكتشف ابوصالح ان ميزانية الدكان مهيب اللي انت تبي وكان ابوصالح وقتها يتمنى انه بيوم من الايام ينافس ميزانية البنتاجون بس إذا تذكر ان ما حوله بترول تراجع
المهم ان الرجال شك ويوم انه دقق بالوضع حصل الباكستاني يسرقه وقام وطرده شر طرده وبصراحه ماكان عنده وقت يجيب واحد بداله يعني مو معقول يترك البقاله طول هالوقت مقفله ،، وحط السواق الفلبيني محل الباكستاني حتى يجي عامل جديد ،، وكانت بالنسبه لنا مشكله لأن الباكستاني كنت انا ومحمد نمون عليه ودايم يسلفنا اما هالفلبيني ابن كلب ما يسلف ،، واللي خربها اكثر انه ماكان مسلم واذا اذن سكر عليه بالدكان ،، المشكله ان ابوصالح كرف هالفلبيني كرف على كيفكم ما بين سواق ويودي ولده صالح للمدرسه 0(( ذيك الايام البنات ما يروحن للمدرسه مع سواق )) ويجيب مقاضي البيت ويفتح الدكان وكل هالامور مع بعض ومايدري وش يلّحق ،، وحاول في ابوصالح الا ان هالشايب يعاند ويقول خلني احلل راتك ،، يوم شاف هالفلبيني الدعوة عناد بدا هو يعاند بعد تدرون وشلون ؟؟
صار يسكر كل وقت ويفتح وقت الصلاة بس ،، بس ترا مو احسن له إذا جوه النوّاب
بدايتي الدراسيه /
ما ودي اقول لكم اني بأول دراستي لحقت على التغذيه وعلى تكميلة وزارة المعارف ،، ولكن بقول لكم شي أهم ،،، اني طول فترة دراستي الإبتدائية كان واللي استمرت ست سنوات (( يعني ما سقطت )) كنت أتمنى شي واحد وكان هالشي هو أقصى طموحي وكان اهم عندي من النجاح ،، وهالشي هو اني اطلع الصبح قدام الطلاب علشان اقول سارعي ولكن للأسف طلعت من الابتدائي واستاذ الرياضه ما طلعني ولا مره
بوقتها او بعد ما راح كم سنه وتحديداً بخامس وسادس ابتدائي بدينا نسوي أحزاب وطبعاً اكثر من ينظم لحزبك عيال حارتكم ،،، وبدت المشاكل وكل واحد يقول للثاني فصفص بقالة حارتنا احسن من فصفص بقالة حارتكم ،، وواحد يقول فريق حارتنا عندهم طقم وانتوا لا ،، والثالث يقول مسجدنا اكبر من مسجدكم (( هذا قاهرني من سمعه قال المذن )) ،،، أما انا فكنت مبسوط من حارتنا وعاجبني كل شي فيها واهم شي ان اهل مها جيراننا ،، بس الشي الوحيد اللي يقهرني واللي كان يصير لعيال الحاره اللي جنبنا وانا لا ان سيارة العسكريم ما توقف عند بيتنا ،، صح انه بريالين بس ولو لازم اذا مرت سيارة عسكريم من عند بيتنا ادبر ريالين بأي طريقه لو اتسلف من فلبيني ابوصالح
وعندما كبرت قليلاً وبقي على تخرجي من الابتدائي شهران ونيف بديت أخطط لمستقبلي صح وكنت اعتقد ان مخي تجاري من جد علشان كذا بديت امارس التجاره من بدري ،،، وكانت اول مشاريعي ان بديت ابيع عند بيتنا بليله وعسكريم توت (( <<< ماادري ليه احس يعور الحلق من بين انواع العسكريم )) ،، وكان مشروعي ناجح من جد وفرشت عند بابنا وطلعت البليله والصحون والملاعق وبديت ابيع ،، وكنت اقول الصحن بريالين او اشتر صحنين بثلاثه مسوي ابي اكسب الزباين ،،، وبصراحه مشى السوق وحطيت جنبي غضاره فيها مويه لزوم تغسيل الصحون والملاعق وجنبها الشطه والخل وقدر البليله مغطيه بفوطه ،، وكنت احرص على السحون والملاعق لا تضيع علشان امي ما تكسر راسي ،، ولكن وللأسف خسرت تجارتي بعد فتره والسبب ان صالح ولد ابوصالح راعي البقاله صار يبيع بليله بصحون وملاعق بلاستيك ولا والصحن بريال ،، وبكذا انهى صويلح اهم مشاريعي وتركت البليله وتفرغت لدراستي حتى تخرجت من الابتدائي ودخلت المتوسط (( أجل ظنك الجامعه ؟؟ )) .
المرحله المتوسطه /
درست المتوسطه وتغيرت علي اشياء كثيره واولها صار عندنا انجليزي ،، بس لقيتها فرصه بحكم ان مها بثالث متوسط وانا جديد على الانجليزي خليتها تدرسني ،، وبصراحه أيام المتوسط كانت افضل من الابتدائي ،،، صح اني كنت داج وما عندك احد والدراسه من جهه وانا من الثانيه ولكن كان فيه مميزات واولها اني صرت عريف الفصل وكابتن الفريق ،، ويوم اني وصلت ثالث متوسط اخذتها بثلاث سنوات وبالتالي اصبحت من الاعضاء المخضرمين بالمدرسه وفي السنه الثالثه حدث شي غيّر مجرى حياتي واعطاني المزيد من الثقه بنفسي وهو اني صرت كابتن منتخب المدرسه وهذا الشي اللي كنت اتمناه لأني كنت ابي اصير مثل صالح النعيمه ،،،، والحمد لله وصلنا لنهائي مدارس حارتنا وصح انهزمنا بس اهم شي الاخلاق لأني باركت لكابتن المدرسه الثانيه يوم فازوا علينا ،،،، وبعد ما طفشوا مني نجحوني بالقوه حتى ان مدرس الجغرافيا مكلم ابوي قبل الاختبار بيوم ومعلمه وش بيجي من اسئله ووش الخريطه ومع كذا سقطت بالجغرافيها ونجحت بالدور الثاني
المرحله الثانويه /
اول سنتين عدت على خير وبالسنه الثالثه بدت المشاكل ،،، قلت لابوي كل اخوياي معهم سيارات الا انا وبعد ما لزمت عليه انا من هنا وامي من هنا تصدق علي وشرا لي دباب ،، وثلكم عارفين شعري اشقر وناعم يطير من الهو وعيوني الخضر صارت بنفسجيه من عج الرياض ولكن مثل ما قلت لكم اهم شي الاخلاق
في إجازة الربيع تزوجت مها بنت جيراننا
وهذا الشي حطمني نفسياً وخلاني اترك الدراسه قبل اخلص الثانوي ،، بس بعدين يوم شفت اخوياي خلصوا الثانوي والجامعه وحصلت وضعهم مثل وضعي ويمكن انا احسن منهم حمدت ربي اني ما ضيعت وقتي
مشكلتي اني تركت الثانوي ونشبت وش اسوي الحين ؟؟
قلت لابوي وظفني وقام يخيرني ويقول / وش تبي وظيفه بس انت آمر ؟؟
قلت له : ما تفرق معي طال عمرك
قال : طيب لو ما لقيت لك الا وظيفه براتب 7 آلاف تقبلها ؟؟
قلت له : امممممممممممم ،، تدري عادي نقبلها والشكوى لله حتى القا احسن منها .
قال : اقول انقلع انت كفوى تتوظف لو بخمسميه ؟؟ (( شانت الاخلاق )) ، الحين الدكاتره ما لقوا وظايف بتجي انت تلقى وظيفه ؟؟ ،،، من قال لك تترك دراستك ؟؟
قلت له : تركتها والا ما تركتها كل واحد ،،، وبعدين انا ما تركتها الا متحطم نفسياً من زواج مها ليه ما حجزتوها لي ؟؟
قال ابوي : وش نحجزها شايفها قاطعه اشاره ؟؟ اقول قم انقلع وخل مها تنفعك يا قيس
حطمني ابوي
بس قلت مهيب مشكله قدني اعرفه من زمان ويمون علي
راحت السنين وجت سنين غيرها والضع على ماهو عليه وملفاتي ملت الدواير الحكوميه والظاهر لو جمعت قيمة الملفات وتصوير الاوراق كان فتحت لي دائره حكوميه لحالي
وحتى العسكريه ما قبلوني مشككين ان امي اجنبيه علشان لون عيوني وشعري (( اشغلنا هو وعيونه وشعره هالنرويجي )) .
درت الدنيا كلها وللأسف ما لقيت وظيفه وبغيت انتحر بس الله ستر ،،، وفي لحظه من اللحظات تمنيت ان اكون فتاة حتى اتزوج واحد ويكد علي وقضينا
من اجل صندوق تتزوجني ؟؟
وبعد ما راحت السنين بدون فايده قررت أني اسوي شي واحد والظاهر مالي الا هالشي ،، وبعد استشارات مع الاهل والزملاء اصدرت القرار المصيري وهو ........
7
7
7
7
7
7
7
7
7
7
7
7
7
7
7
7
7
7
أني أرجع ابيع بليله
رايح فيها
اهات غويمض
ليش الكور اللى جنب حارتنا دايم يلاحقني كني قطو ويسطرني وانا ماسويت شي
ليش العريف يومني في اولى ابتدائي دايم يطلعني مع العابين وانا والله عاقل
ليش ما تحققت امنيتي ويختاروني مع الكشافه والبس لبس الكشافه
ليش دايم ابوي يتقفاني للمدرسه حافي
ليش كل عيال الحاره عندهم اتاري الا حنا
ليش ما زد طلعوني اقرا نشيد في الاذاعه
ليش عيال جيرانا يفصلهم ابوهم ثوب قماش الزبده(احسن قماش هاك الوقت) وانا واخواني ثياب ابو غزالين ( يعني بالعربي شراع)
ليش مازد طلعني استاذ الرياضه في الطابور وانشد النشيد الوطني...لا تصدقون اللى كاتبه من حر ما فيني...
ليش يومني صغير امي ما تروح للتويم الا اخر العطله ويومين ما يمديني استانس
ليش اذا صار ترجم بين حارتنا والحاره اللى جنبنا ما ينفلق الا انا
ليش يوم انحشنا انا وربعي من المدرسه ما مسك الفراش الا انا
ليش دايم اذا بغيت اشوت الكوره اشوت الزفلت وتنقشع رجلي
ليش ابوي ماشرالي سديريه وكوت مثل الناس
ليش تجلدني نوير حقت سوق الحمام وانا ماسويت شي
ليش ابوي ما نقلني لمدرسه علي بن ابي طالب مع عيال الحاره
ليش عيال الحاره يزبرقون سياكلهم الا انا
ليش وليش وليش
اهات واهات
العوض في ولدي غموض ان شاء الله
اسف للاطاله
بس ودي اطلع اللى في قلبي
04-07-2003, 02:49 AM
العرض العادي
