كيف نتعلم الصيد ؟

[ملاعب الأسنة]

هذا السؤال اوجهه للأخ اتيكا ؟؟؟


كيف وما هي الخطوات لأصبح ( بوارديا) وبماذا تنصحنا ان نبتدا باي نوع من الاسلحة ؟؟


وبعدين كان عندك طريقة لصنع قنبلة ما فيه مانع تعلمنا ؟


سلام عليكم

[المولع]

اسمح لي اتلقف شوي
اخوي قبل كل شي لازم تكون هاوي من قلبك الرمي و الصيد و المطارد
لازم تكون صبووووور لابعد حد و الإ بتتعب .
بأكتب لك كيف تعلمت الرمي شخصيا : بدايتي في الرمي كانت قبل 9 سنوات وكنت اتعلم اساس الرمي والاهم فيه و هو كيفية اصابة الهدف بدقه و بأقل عدد من الفشق ، كنت استخدم بندقية هوائيه لتعلم الرمايه وكانت بداياتي على قواطي البيبسي وينك لامني صبت العلبه كني صايد غزال ، بعدين بدية بالمرحله الثانيه وهي الخروج مع الاصدقاء اهل الخبره وهو اهم شي وبديت ارمي على الصيد في البر وطبعا يخلص الفشق وانا ما صدت شي وبعدين تطورت مهارتي في الرمي ولله الحمد وصرت ارمي على اغلب بنادق الصيد ابتداء بالبندق الهوائيه مرورا بالخرازه و من ثم الشوزن . ومع الوقت و الممارسه و التدريب المكثف (( لين تحول عيونك )) ومع الاختلاط و الخروج مع اهل الخبره تكتسب المهاره اللازمه .
ونقطة البدايه التي يجب ان تبداء منها هي ان تخرج مع احد اصدقائك من اهل الرمي و تخليه يعطيك دروس خصوصيه في الرمي . وارجو اني افدتك مع اني يمكن كثرت عليك الكلام .....
اما القنابل فلا نبيع قنابل ;)

[اتيكا]

أشكرك أخوي ملاعب الأسنة لطرحك مثل هذا الموضوع المهم

كما أشكر أخوي المولع على هالمعلومات القيمة من وأقع التجربه

كيف نتعلم الصيد ؟

العديد من الشباب يحاولون يصيرون بواردية و يرمون صح ولكن لا يستطيعون
لان هناك عدة أمور يجب أن يتبعها الشخص حتى يصبح صياد ماهر (بواردي)

أولاً : يجب التوكل على الله وأن تجعل الله نصب عينيك
فإذا أرادت أن ترمي على طير فيجب أن تذكر أسم الله عليه وأن لاتصيد إلا ماهو حلال صيدة

ثانياً : يجب التسلح بالعزيمة والإصرار ومحاوله الصيد أكثر من مرة
فتعلم الصيد لا يأتي إلا بالتدريب وتكرار المحاولات والخروج مع أشخاص لهم خبرة في هالمجال

ثالثاً : الصبر والتحمل فبعض الشباب يخاف انه ما يصيب الهدف فيصير مضحكه عند ربعه
وبعض الشباب يركب دربيل على البندق عشان يحسن رميه
وهذا عند بعض الناس عيب و يقولون عنك انك غشيم لانك ما تعرف تصيد بدون دربيل
انا في نظري ان هذا الكلام غير صحيح مرة
ليش لان الصيد عموماً سواء اكان بالدربيل او بدونه هو تدريب

رابعاً : الشجاعة والقوة حيث أن الخوف من أهم الاسباب التي تخلي الواحد ما يقدر يصيب الهدف

فكثير من الشباب يخاف من رجفة البندق وبعض الناس تخاف من صوت الطلق و قوته
وأنا لأحظت أن الخوف إلي يصير في عقل الواحد انه متى تطلع الرصاصة فتلقاه إذا ضغط على الزناد يرفع البندق فوق ويظن البعض انه يبي يمتص رجفة البندق . هذا غلط لانك ممكن مع رفعتك للسلاح تخطي الهدف من غير قصد و تصيب إلي وراة ( و هذا اكبر خطأ )

وكذلك قوة الشخص فبعض الشباب لايستطيع حمل السلاح لمدة طويله عند التصويب فتجد أن يديه تترتجف وتنتفض وبذلك لا يستطيع تصويب الهدف


أما بالنسبه لاحسن طريقه للواحد انه يصير بواردي فهي التدريب عن طريق أسلحة خفيفة ( أفضلها الساكتون ) لان ما له صوت يذكر ولا يرجف أبد و خفيف .

وإذا كان الشخص يخاف عدم التصويب على الهدف ، فعليه ممارسة التصويب على مسافات قريبة أولاً ومن ثم البعد شيئاً فشيئاً ، وأنصح باستخدام الليزر للتصويب على الهدف ، مع الاخذ بالاعتبار عدم الاعتماد عليه دائماً .

أمااذا كنت في بداية تدريبك على الطلق لازم تختار وضعية مناسبة
بعض الناس يحب يطلق وهو قاعد و بعضهم وهو واقف و بعضهم مسوي وضع الانبطاح و بعضهم حاط البندق على مركا أو شئ مرتفع و يطلق من عليه. ( هذي طريقة حلوة لوزن السلاح )
كذلك خل وزنك قدام مهوب ورى ( يعني ثبت نفسك في الارض مع ميلان بسيط إلي الامام )

كذلك مسك السلاح شئ مهم في عملية التصويب سواء البندق كانت شوزن أو ساكتون أو خرازة أو رشاش كلها تحط قفا البندق على كتفك ( انتبه تحطه على أعلى الكتف )
و اليد اليسرى على الخشب الامامي للسلاح
واليد اليمنى على الزناد( انتبه تحط يدك على الزناد إلى عند الرمي )
وإذا كان الشخص أشول يعكس بين اليدين

والاخوة الذين عندهم رجفة قليلة مع عدم التحكم باليد أثناء الطلق ، عليهم أخذ نفس عميق جداً ومن ثم كتم النفس عند التصويب ، وإذا أستمرت الرجفة حاول أن تعمل تمرين بسيط جداً لليد والكف وهي القيام بثني الذراع للخلف عدة مرات وتحريك الكف للأعلى والاسفل .
وأهم شىء إذا جهزت و بغيت تطلق خذ نفس من خشمك ثم طلعه شوي شوي من الفم .

ولما يكون السلاح معك لا تنشغل عنه ابداً ولا تحاول تتهوز به أحد من ربعك
عن أبي هريرة رضى الله عنه قال ، قال رسول الله صلى الله عليه وسلم : لا يشير أحدكم الى أخيه بالسلاح فإنه لا يدري أحدكم لعل الشيطان ينزع في يده فيقع في حفرة من النار)رواه البخاري ومسلم .
وفي الحديث الآخر (عن أبي هريرة عن النبي صلى الله عليه وسلم قال : من أشار على أخيه بحديدة لعنته الملائكة ) أخرجه البخاري ومسلم وابو داؤود .


فالبواردي الناجح يجب مراعات التالي عند الرمي سواءا لصيد او للتدريب :
1- عند الرمي على الصيد تأكد أنك إذا أخطيت الصيد أن الطلقه ماتروح و تصيب أحد مثل الرمي بالمزارع أو جنب بيوت شعر او جنب ديره به ناس
2- إذا كنت تمشي على رجليك أو بالسياره تاكد أن ماصوره البندق موجه فوق بعيد عن خوياك أو برا الدريشه إذا كنت بالسياره
3- لا تمزح بالسلاح ابدا حتى لو كنت متأكد إن ما فيه شي لانه كم واحد قتل أعز أصدقائه بسبب المزح بالسلاح
4- لا تجدع السلاح أو تركيه أو تخليه الا وانت مفظي الطلقه اللي ببيت النار لانك ممكن تنسى وتضغط الزناد وانت ماتدري ان السلاح جاهز ثم يروح فيها أشخاص
5- لما ترمي لغرض التدريب حاول ان يكون النيشان بينك وبين طعس او حزم علشان الطلقه ما تروح بعيد ثم تصوبلها أحد
وأهم من هذا كله إنك ماترمي على جسم صلب لأن الطلقه ممكن ترجع عليك أو علىأحد من أخوياك

وتذكر ان السلاح مثل الخوي الغدار ما تأمن متى يغدر بك


هذا مالدي فإن أصبت فمن الله وإن أخطئت فمني والشيطان

ومن كانت عندة زيادة فليتحفنا بها

[ملاعب الأسنة]

جزاك الله خير اخوي المولع ......ولاهنا لقافة خذ راحتك ......


وانت يااتيكا ما ادري وش اقول لك فصلت في الموضوع بشكل لم اتوقعه .......

بل اشياء لم تخطر على بالي .........


جزاك الله خير والله يوفقنا لنكون بوارديين



وشكر كبير لاتيكا

[ابوكريم]

ماعليك زودطال عمرك0

[متعلم]

اسمحوا لي شوي كلامكم كله صح يعطيكم ربي العافيه ولكن أخالفكم بحاجه وحده ولا تضيقون مني ، أكثر الرماه ياخذ نفس طويل ويكتمه ثم يرمي والحقيقه ان اللي يكتم نفسه يقعد منحبس ولا يرتاح وتجيه مثل الذبذبات فتهتز يديه عند الرمي بشكل ملحوظ أو غير ملحوظ ، ولكن الصح خذ نفس ثم خرجه بشكل طبيعي ثم صك فمك الله لا يهينك ثم ارم ما تحس بشي مثل لو انك حبست نفسك ، مع الأخذ في الاعتبار ان التصويب ما يبي تأخير....

وشكرا

[مفتون صيد]

تسلم على هالمعلومه الرائعه يا المتعلم .......... صرت مدرس في الصيد ماشاء الله

[أبو عبد الله]

اولا الله يعطيكم العافية جميعا وثانيا احب ان اضيف معلومة بسيطة قد تفيد الجميع وهي :
اذا اراد الواحد انه يرمي على صيد او شارة فعليه ان يثبت نفسه ويضغط على الزناد بشكل بطيئ جدا بحيث لا يحس هو شخصيا الا بالطلقة قد ثارت وهذه الخطوة مفيده بحيث ان اللي يبي يرمي وضغط على الزناد بسرعة او بقوة فقد يرفع البندق الي الاعلى بدون ان يشعر وبذلك قد يخطئ الهدف اما بالطريقة التي قلتها فانه يكون قد تأكد من موقع بندقه في الطير اللي يبي يرميه ومن ثم تأكد بان بندقه ما ارتفعت على فوق من قوة ضغطته على الزناد وجربوا هذه الطريقة وشوفوا وبعدين لا يرفع البندق على طول اول ما تثور الطلقة لازم يركد شوي وعلى قول دايم السيف خالد الفيصل :
ما يصيد الجوازي قود بخص وضاري @@@ القنص بالركاده والتسرع جهاله

[مفتون صيد]

للرفع للفائدة

[اتيكا]

الـركـادة زيـنـه قـبـل الـرمـي

علشان ماتخسر الطير وتخسر الذخيرة