كشتة مع عضو

[رحيق الياسمين]

بسم الله الرحمن الرحيم .

السلام عليكم ورحمة الله وبركاته .

موضوعنا اليوم كشتة مع عضو من أعضائنا الكرام إلى البر .

ويجاوب لنا ع الأسئلة التالية .

إليكم الأسئلة :

تم تصغير هذه الصورة. إضغط هنا لمشاهدة الصورة كاملة. الصورة الأصلية بأبعاد 640 * 480 و حجم 114KB.

1_متى أخر مرة طلعت للبر وإلى أين .

2_أي مكان تحب أن ذهب له , وهل تذهب وحدك /ي أو مع الأهل والأصدقاء , و أيهما تفضل .

3_ أطول مدة قضيتها بالبر وأقصر مدة .

4_ هل تقطع مسافة طويلة للوصول لمكانك المفضل .

5_ هل تخطط للكشتة مسبقاً .

6_أي منطقة تحب أن تكشت فيها روضة أو نفود أو جبل أو بجوار شعيب .

( مكانك المفضل )

* مكانك المفضل والقريب من مدينك أوصفة لنا بالتحديد وأقرب مكان تتزود به من الماء والمواد الغذائية .
*أحب مكان ذهبت إلية , والأفضل صورة .

* من تحب أن يكشت معك وكم عدد من يرافقوك .

* هل البر يزيح عن صدرك الهموم وترجع برووح ونفسية و نشاط.

( موقف محرج)

*موقف حصل لك بالبر وكنت لوحدك .

*موقف حصل لك مع من ترافقهم وكيف تصرفت وهل يتكرر معك دائما او معهم .

*موقف حصل لاصحابك واخذت منه عبره .

( أدوات البر الأساسية )

* ما هي أدواتك للبر الأساسية .

* أدوات تحتاج إليها وحصل إنك نسيتها .

( طبختك المفضلة )

* طبخة تسويها بالبر وتحبها .

* حصل أن نسيت شي من أغراض الطبخ .

* هل تحب أن تطبخ أو يطبخ لك .

( موقف مع التغريز )

تم تصغير هذه الصورة. إضغط هنا لمشاهدة الصورة كاملة. الصورة الأصلية بأبعاد 640 * 359 و حجم 30KB.

* موقف لك مع التغريز .

* ماهو شعورك عندما ترى أمامك غراز .

* السيارة التى تقهر التغريز والسيارة التى تخذلك .

كشته خييييييير جميعاً.. وان شاءلله ايكون الموضوع خفيف عليكم

وبآلنسبة للصور عآدي لو تحطون صورة وحده..
نروح نجيب الاداره نحركم شوى
مممممممممممممم
شرفنى مديرنا العزيز هنا
والله لايهنك اذا خلصت اسحب لنا واحد يجاول

[رحيق الياسمين]

ومازلنا قي انتظر مديرنا العزيز

[سعود الخليل]

1_متى أخر مرة طلعت للبر وإلى أين .

آخر مرة طلعت للبر الخميس الماضي وكانت في مخيمنا بالتويم ..

2_أي مكان تحب أن ذهب له , وهل تذهب وحدك /ي أو مع الأهل والأصدقاء , و أيهما تفضل .

أحب الأماكن اللي فيها ربيع زين وخصوصاً اذا كانت الأجواء معتدله .. ولا احب اروح بلحالي ابد << ارتاع هع .. والكشتات البعيده اروح مع الشباب والقريبه مع الأهل ..

3_ أطول مدة قضيتها بالبر وأقصر مدة .

ما احب اطول بصراحه ويمكن اطول مدة كانت خمس ايام في الدهنا ...

4_ هل تقطع مسافة طويلة للوصول لمكانك المفضل .

اذا كان المكان يستاهل مافيها مشكلة لو كان بالشمال او الجنوب او في الصمان .. المهم يكون يستاهل المشوار ..

5_ هل تخطط للكشتة مسبقاً .

اذا كانت الكشته طويلة لازم تخطيط وترتيب أما خفافية .. شغل وامش ..

6_أي منطقة تحب أن تكشت فيها روضة أو نفود أو جبل أو بجوار شعيب .

أحب الريضان مثل الصمان لانها تكون مفتوحه وممكن تغيرالمكان بسهوله ...

( مكانك المفضل )

* مكانك المفضل والقريب من مدينك أوصفة لنا بالتحديد وأقرب مكان تتزود به من الماء والمواد الغذائية .

المكان المفضل والقريب لي هو المخيم في شعيب القويطير بالتويم <<< والله يحيي الجميع في اي وقت نتشرف بطلتهم ..




*أحب مكان ذهبت إلية , والأفضل صورة .
أحب مكان زرته هو الصمان وبصراحه ايام الربيع ماله مثيل ..

* من تحب أن يكشت معك وكم عدد من يرافقوك .

احب ربعي القريبين مني في الكشتات ابو عبدالرحمن - ابو زياد - ابو خالد << الثلاثي المفضل في الكشتات بالتأكيد .من غير قصور بالباقين .

* هل البر يزيح عن صدرك الهموم وترجع برووح ونفسية و نشاط.

بالتأكيد فيه سعة الصدر والفله والوناسه ويكفي اننا نبعد عن الكمبيوتر والغثا اللي فيه

( موقف محرج)

*موقف حصل لك بالبر وكنت لوحدك .

المواقف بس والله ما اذكر شي محدد الآن ..

*موقف حصل لك مع من ترافقهم وكيف تصرفت وهل يتكرر معك دائما او معهم .

مره من المرات طالعين من ام رجوم بنروح للتنهات في الليل والمشوار تقريباً 30 كلم عن طريق البر وأول مره نروح مع الطريق المهم مسكنا الخط ونمشي ونمشي ليييين ضيعنا الطريق وطحنا في الدهنا وغرزنا وبعد ساعة من الحفر والدفن طلعنا الحمد لله وقلنا يالله نكمل المشوار ونمشي لنا يجي نص ساعة لين وصلنا ... بس وصلنا لام رجوم ثانية <<< مع قلبة الراس رجعنا بدل ما نكمل المشوار ههههههه

*موقف حصل لاصحابك واخذت منه عبره .

تعطل السيارة في البر وهذي مشكلة كبيرة خصوصاً اذا كانت معك سيارة وحده والمشوار بعيد !! علشان كذا يفضل في الكشتات البعيدة تكون سيارتين ويكون معهم اجهزة تواصل ( كنود) وجارمن . للإحتياط ..

( أدوات البر الأساسية )

* ما هي أدواتك للبر الأساسية .

ابد حسب الكشته اذا كانت خفافية اخذنا عدة الشاهي والقهوة .. واذا كنا بنطول لازم نجهز كل شي من إلى .. وأهم شي المزات << البساكيت هع

* أدوات تحتاج إليها وحصل إنك نسيتها .

ياكثر ما ننساها وهي الاسعافات الاولية فيصير فيه جروح واصابات نتوهق معها دايم .. والله يعين ..

( طبختك المفضلة )

* طبخة تسويها بالبر وتحبها .

الكبسه رقم واحد ... وعقبها المكرونه واي شي يجي خصوصاً المقبلات مرق وخضار وغيرها ...

* حصل أن نسيت شي من أغراض الطبخ .

ياكثر ما ننسى ...

* هل تحب أن تطبخ أو يطبخ لك .

اذا كان فيه بعض الشباب المميزين في الطبخ اكون معاوني معهم لكن اذا كان الدعوى عشى مكرونه او مرق يبشرون بعزهم ..

( موقف مع التغريز )

تم تصغير هذه الصورة. إضغط هنا لمشاهدة الصورة كاملة. الصورة الأصلية بأبعاد 640 * 359 و حجم 30KB.

* موقف لك مع التغريز .

الله من مره خصوصاً ايام المطامر في النفود والدهنا ... لكن اكره شي هو التغريز في السيول !! انواع البربسه والتلطيخ بالطين !!!

* ماهو شعورك عندما ترى أمامك غراز .

اذا كان لازم أمر عليه فلازم آخذ احتياطي ولا افضل شي غير الطريق ان امكن وريح بالك ..

* السيارة التى تقهر التغريز والسيارة التى تخذلك .

ما مثل الجيب اكيد ... وابعد عن السيارة النكبه اللي مافيه دبل ولا عزم قوي ..

[رحيق الياسمين]

المشاركة الأصلية كتبت بواسطة   * هل البر يزيح عن صدرك الهموم وترجع برووح ونفسية و نشاط. بالتأكيد فيه سعة الصدر والفله والوناسه ويكفي اننا نبعد عن الكمبيوتر والغثا اللي فيه

الغثاء الله يستر من يقصد مديرنا

المشاركة الأصلية كتبت بواسطة   * أدوات تحتاج إليها وحصل إنك نسيتها . ياكثر ما ننساها وهي الاسعافات الاولية فيصير فيه جروح واصابات نتوهق معها دايم .. والله يعين ..

اجل تتضربون وين يجئ منه الجروح(برااااااااا
الله يعطيك العافيه مديرنا على قبول الدعوه
ما جبت لنا واحد
خلاص نجيب
مشرفنا العزيز

حمدوالد ابوحمد

[أبو حمـد]

وعليكم السلام ورحمة والله وبركاته ،،

وشكراً اخت رحيق الياسمين لإتاحة الفرصة مع هذا المتصفح الجميل ،،

1_متى أخر مرة طلعت للبر وإلى أين .
طلعت للبر يوم الخميس الماضي ،، تمير ،،

2_أي مكان تحب أن ذهب له , وهل تذهب وحدك /ي أو مع الأهل والأصدقاء , و أيهما تفضل .
بر تمير ،، اروح ويا الوالد وربعه والأخوان ،،

3_ أطول مدة قضيتها بالبر وأقصر مدة .
اطول مدة تقريباً أسبوع ،، واقصر مده ساعات معدودة ،،

4_ هل تقطع مسافة طويلة للوصول لمكانك المفضل .
المسافة تقريبا 120 كيلو من الرياض لتمير ،،

5_ هل تخطط للكشتة مسبقاً .
الكشته بالنسبة لي الذهاب لبر تمير ،، فهي كشته مجدوله ما تبي تخطيط ،،

6_أي منطقة تحب أن تكشت فيها روضة أو نفود أو جبل أو بجوار شعيب .
البر المفتوح مد النظر ،،

( مكانك المفضل )

* مكانك المفضل والقريب من مدينك أوصفة لنا بالتحديد وأقرب مكان تتزود به من الماء والمواد الغذائية .
مكاني المفضل البر حول خزه ،، هذيك المنطقة قريبه من الرياض ونجيها دوم ،، برها مفتوح مد النظر وهواها جميل ،، ولنا مخيم هناك ،، فصارت قصة عشق نبتت وياي ،، ونادر يمر أسبوع ما اجيه ،، والنفس وما تهوى ،، واقرب مكان تمير احيان امرها اشتري منها لمن انسى غرض ،، أو من محطة العتش ،،

*أحب مكان ذهبت إلية , والأفضل صورة .
أحب لينه ،، بس ما عندي صوره لها ،،

* من تحب أن يكشت معك وكم عدد من يرافقوك .
الوالد وربعه ،، تعودت على مرافقتهم وسواليفهم توسع الصدر ،، وعددنا بالعاده سبعه ،،

* هل البر يزيح عن صدرك الهموم وترجع برووح ونفسية و نشاط.
أيه أكيد ،، خاصه لمن يكون اللي معك راعين سواليف وفله ،، ومنظر البر جميل مد النظر ،، فلما ارجع الرياض اجلس انتظر متى يجي الخميس الجاي ،،

( موقف محرج)

*موقف حصل لك بالبر وكنت لوحدك .
اتذكر مره ،، كان يوم خميس ،، ما انساه ذاك اليوم ،، كنت دخلت اتمشا بالبر حول تمير ،، وكان الوقت بداية الصيف والجو صافي مابه سحاب ولا شي ،،

فمع العصر جا سحاب برقه ورعده ما يفصل ،، والدنيا صارت سودا ،، كان السحاب جاي من غرب ،، وكان الهوا اللي معه بارد جداً ،، فما كان فيه شجر ولا شي احتمي فيه ،، اتجهت يم أبل بعيده عني ،، وخلاص السحاب فوقي وصلني ،،

وفجأة جا صاحب الأبل بسيارته وكان معه جمس ،، والله يجزاه خير لمن شافني من بعيد جا يمي وركبت معه ،، فلحظة ركبت السياره والبرد قال خذ عندك استمر ربع ساعه تقريبا ،، وستر الله علي ولا كان رحت فيها ،،

*موقف حصل لك مع من ترافقهم وكيف تصرفت وهل يتكرر معك دائما او معهم .
ما اتذكر مواقف معينه ،، يعني مواقف عادية ،،

( أدوات البر الأساسية )

* ما هي أدواتك للبر الأساسية .
الحطب والمعاميل والمويه والغاز هذي اساسيه ولازم تكون موجوده دوم ،، خلاف ذلك الأكل وكذا نحمله معنا من الرياض ،،

* أدوات تحتاج إليها وحصل إنك نسيتها .
ايه ياما نسيت اغراض ،، واكتشفها لمن اوصل هناك ،، وجميعها تتعلق بالطبخ ،، لأني أنا المسؤول عن الطبخ ،، فاحيان انسى القهوه او الشاي او الزيت او اللحم او البصل ،، او يخلص الغاز واضطر اطبخ على الحطب ،،

( طبختك المفضلة )

* طبخة تسويها بالبر وتحبها .
الكبسه ههههه ،، سهله احمس البصل ثم كب كل شي بالقدر لين يستوي اللحم او الدجاج ثم كب الرز ،، عاد حظك نصيبك اما احترق الرز او طلع مالح ،، ولا اعرف اسوي غيرها ،،

* حصل أن نسيت شي من أغراض الطبخ .
دائماً تصير ،، ونادر اخذ معي اغراض الطبخ كاملة ،، لازم انسى شي ،، رغم حرصي وتفقدي للأغراض ،،

* هل تحب أن تطبخ أو يطبخ لك .
انا المسئول عن الطبخ ،، ووالله أني ارحمهم الوالد وربعه لمن اقدمه لهم ،، اما يكون الغدا زايد ملحه او محترق ،، بس احلا شي فيهم انهم يجاملون ويمدحون طبخي ،، يمكن لانه ما عندهم غيري هههه

( موقف مع التغريز )

* موقف لك مع التغريز .
ايه موقف ما يتنسي ،، كنت ايامها بالثانوي ،، فطلعت من الرياض بعد الفجر وكان رمضان ،، لمن جيت طريق رويغب ،، خشيته لين وصلت هجره صغيره اسمها الخاتله ،، وهناك خشيت البر ناوي اروح لتمير مع البر ،، وكنت امشي بلهون اتمشى ،، ولمن توسطت البر غرزت السياره ،، وكان رمضان مافيه احد حولي ،، فتعبت كثير وانا احاول اطلع السياره ،، ومع الضحى مر واحد معه ونيت شافني وجا وربط السياره وطلعها ،، وحرمت بعدها اخش هاك البر ،،

* ماهو شعورك عندما ترى أمامك غراز .
اتذكر الموقف اللي صار لي ،، فاما ازيد سرعة السياره او اتجنبه ،،

* السيارة التى تقهر التغريز والسيارة التى تخذلك .
حقيقه أي سيارة ممكن تطلع من أي تغريز لما تكون كفراتها هواها قليل والسياره مسرعه ،، لأنه تفرش الكفرات وما تغرز ،، والسيارة اللي تخذل أي سياره تكون مهديه بالبر ممكن تخذل صاحبها وتغرز ،، خاصه إذا كان مابها دبل ،،

والله لايهنك اذا خلصت اسحب لنا واحد يجاول

بودي استضافة أخوي فيصل المرشد ،،

شكراً لكم ،،

[رحيق الياسمين]

المشاركة الأصلية كتبت بواسطة   * طبخة تسويها بالبر وتحبها . الكبسه ههههه ،، سهله احمس البصل ثم كب كل شي بالقدر لين يستوي اللحم او الدجاج ثم كب الرز ،، عاد حظك نصيبك اما احترق الرز او طلع مالح ،، ولا اعرف اسوي غيرها ،،

اهم شئ معكم خبز وماء يغمسونه وباكلون ارحم من طبخك
رحمت للي يطلع معك
يعطيك الف عافيه مشرفنا حمد
على قبول الدعوه
لك احترمى وتقديرى
وقريبنا راح نستضيفك في برنامج اخر

[رحيق الياسمين]

بنتظر الاستاذ
فيصل المرشد

[قلم صريح]

1_متى أخر مرة طلعت للبر وإلى أين
يمكن من عشر سنين و أكثر
إلى إحدى الهجر

2_أي مكان تحب أن ذهب له , وهل تذهب وحدك /ي أو مع الأهل والأصدقاء , و أيهما تفضل .

شغل في إحدى الهجر, أضطررنا الى التخييم عدة أيام و لم تكن كشته , شغل و وجع راس

3_ أطول مدة قضيتها بالبر وأقصر مدة .

خمسة أيام , و مافيه غيرها

4_ هل تقطع مسافة طويلة للوصول لمكانك المفضل .
مالي مكان مفضل

5_ هل تخطط للكشتة مسبقاً .

أقول منيب أروح علشان اخطط

6_أي منطقة تحب أن تكشت فيها روضة أو نفود أو جبل أو بجوار شعيب

في حوش بيتنا

( مكانك المفضل )

* مكانك المفضل والقريب من مدينك أوصفة لنا بالتحديد وأقرب مكان تتزود به من الماء والمواد الغذائية .

البقالة اللي جنب البيت, على الشارع العام




*أحب مكان ذهبت إلية , والأفضل صورة .
سطح البيت و صورة القمرا

* من تحب أن يكشت معك وكم عدد من يرافقوك .

انا ماحب أحد يكشت معي لأني ماأكشت
أصلاً

* هل البر يزيح عن صدرك الهموم وترجع برووح ونفسية و نشاط.

إذا كان اللي عايش في البر أنزاح عن صدره الهموم و يزيده نشاط ؟

( موقف محرج)

*موقف حصل لك بالبر وكنت لوحدك .

لم ينزاح عن صدري الهم و لم استعيد نشاطي , من أولها أركد ,

*موقف حصل لك مع من ترافقهم وكيف تصرفت وهل يتكرر معك دائما او معهم .

تروح على قولتكم ينزاح عن صدرك الهموم و ترجع بنشاط , وتضيّع ومواقف محرجة, وشلون تجي

*موقف حصل لاصحابك واخذت منه عبره .

العبرة لمن أعتبر قبل أن يعتبر ,

( أدوات البر الأساسية )

* ما هي أدواتك للبر الأساسية .

عي إذا قالوا يالله , أفضل أداة

* أدوات تحتاج إليها وحصل إنك نسيتها

أروح للبر علشان انسى أدوات أحتاج لها , خوش

( طبختك المفضلة )

* طبخة تسويها بالبر وتحبها .

إذا رحت ذيك الساعة

* حصل أن نسيت شي من أغراض الطبخ .

أقول الله لا يشقينا

* هل تحب أن تطبخ أو يطبخ لك .

سبحان الله , في البيت مايشيل ملعقته اللي ياكل بها للمطبخ , و في البر يقطع البصل

( موقف مع التغريز )

تم تصغير هذه الصورة. إضغط هنا لمشاهدة الصورة كاملة. الصورة الأصلية بأبعاد 640 * 359 و حجم 30KB.

* موقف لك مع التغريز .

التغريز جايك و لا انت رايحن لمه

* ماهو شعورك عندما ترى أمامك غراز .

لو كنت رايح حط قدامي تغريز

* السيارة التى تقهر التغريز والسيارة التى تخذلك .

اللي ماتروح للتغريز
****
بارك الله فيك على الدعوة الطيبة

[رحيق الياسمين]

مو راعى بر الاستاذ فيصل
مشكور على استجابه الدعوه
ندعو مشرفنا العام (عبدالله الفارس)

[عيون عسليه]

بسم الله الرحمن الرحيم .

السلام عليكم ورحمة الله وبركاته .

إليكم الأسئلة :

تم تصغير هذه الصورة. إضغط هنا لمشاهدة الصورة كاملة. الصورة الأصلية بأبعاد 640 * 480 و حجم 114KB.

1_متى أخر مرة طلعت للبر وإلى أين .

الخميس اللي راح موب هاذا الي قبله حتى لوقلت ماراح تعرفون بالضبط وين جبال
2_أي مكان تحب أن ذهب له , وهل تذهب وحدك /ي أو مع الأهل والأصدقاء , و أيهما تفضل .

اكيد الاهل

3_ أطول مدة قضيتها بالبر وأقصر مدة .
اطول مده == يومين بمخيمات الغضا بعنيزه
اقصر مده يمكن ساعه ساعتين

4_ هل تقطع مسافة طويلة للوصول لمكانك المفضل .

والله اذا حصلت ماتنعاف احب السفريات والكشتات << اشك اني بنت =بس وش اسوي احب الدوجه

5_ هل تخطط للكشتة مسبقاً .

اييييييييييييييه اكيد اذا كان الجو خيال مايحتاج اغث ابوي ادق عليه وجب دجاج مبرد للشوي هههههههههي عشان نكشت

6_أي منطقة تحب أن تكشت فيها روضة أو نفود أو جبل أو بجوار شعيب .

جبال =نفود بس ابوي يفضل الشعيب واغلب شي نطلع له

( مكانك المفضل )

* مكانك المفضل والقريب من مدينك أوصفة لنا بالتحديد وأقرب مكان تتزود به من الماء والمواد الغذائية .قلت لكم ماراح تعرفون
واق رب مكان نتزود فيه اكيد نمر وناخذ اغراضنا من محطتنا قبل نمشي
*أحب مكان ذهبت إلية , والأفضل صورة .
باخر الموضوع موجوده الصور

* من تحب أن يكشت معك وكم عدد من يرافقوك .

اهلي والله = انا وامي واختي وابوي واخواني اللي يحبونن كثر الدنيا ههه
وعقبال مع<<

* هل البر يزيح عن صدرك الهموم وترجع برووح ونفسية و نشاط.
ايه اكيد ومايعرف هالشعور الااللي يطلع للبر ++ موب مثل المرشد استاذنا فيصل بسطح بيتهم >>> هههي دعابه دعابه بدون زعل

( موقف محرج)

اممممممممممممممممممم

*موقف حصل لك بالبر وكنت لوحدك .

*موقف حصل لك مع من ترافقهم وكيف تصرفت وهل يتكرر معك دائما او معهم .

*موقف حصل لاصحابك واخذت منه عبره .

( أدوات البر الأساسية )

* ما هي أدواتك للبر الأساسية .

عزبه -دافور=مسحات -ركابه =فرشه =مويه =ودايمن كل شي ناخذه احتياط

* أدوات تحتاج إليها وحصل إنك نسيتها .
والله دايمن اكون حريصه بتجهيز الاغراض

( طبختك المفضلة )

شوي دجاج

* طبخة تسويها بالبر وتحبها .

رز =شوي دجاج رز=سمك وبعد احب الكراث مع الخبز والجبن والشاهي>> مهنا غناة هههه

* حصل أن نسيت شي من أغراض الطبخ .

نادرا بس اذكر وانا صغيره نسينا بريق الشاهي وسوينا الشاهي بقدررر>>> ههههي تحشيش

* هل تحب أن تطبخ أو يطبخ لك .

والله اكيد احب احد يطبخ لي بس ابوي دايمن يفضل انا اطبخ لهم وانا والله ارحمه
بس اللي يقهرن اختي العصقوله الكبيره انا اطبخ << وهي متمدده << ابو الكرف

( موقف مع التغريز )

تم تصغير هذه الصورة. إضغط هنا لمشاهدة الصورة كاملة. الصورة الأصلية بأبعاد 640 * 359 و حجم 30KB.

* موقف لك مع التغريز .

مره كنا طالعين نفود وغرزنا وعقب ماطلعنا ابوي الله يخليه مدري وشلون قال ولاقدامنا نفود لف وطررررررررررررراخ رووس اخواني الصغار بالقزازه والقزازه تشطبت ههه مكان روسهم يقطع من الضحك

* ماهو شعورك عندما ترى أمامك غراز .

عادي وناسه

* السيارة التى تقهر التغريز والسيارة التى تخذلك .

والله مااعرف الااليوكن حقنا

كشته خييييييير جميعاً.. وان شاءلله ايكون الموضوع خفيف عليكم

وبآلنسبة للصور عآدي لو تحطون صورة وحده..

خخخخ بيت حمودي اخوي من قده ولايفوتكم العودان اللي بالزاويه يقول الحطب هاذا

ومشكوره اختي رحيق

وماعليش عزمت نفسي على هالموضوع بس
اعجبني وحبيت ارد

تقبلي مروري

[رحيق الياسمين]

المشاركة الأصلية كتبت بواسطة عيون عسليه   بسم الله الرحمن الرحيم . السلام عليكم ورحمة الله وبركاته . إليكم الأسئلة : تم تصغير هذه الصورة. إضغط هنا لمشاهدة الصورة كاملة. الصورة الأصلية بأبعاد 640 * 480 و حجم 114KB. 1_متى أخر مرة طلعت للبر وإلى أين . الخميس اللي راح موب هاذا الي قبله حتى لوقلت ماراح تعرفون بالضبط وين جبال 2_أي مكان تحب أن ذهب له , وهل تذهب وحدك /ي أو مع الأهل والأصدقاء , و أيهما تفضل . اكيد الاهل 3_ أطول مدة قضيتها بالبر وأقصر مدة . اطول مده == يومين بمخيمات الغضا بعنيزه اقصر مده يمكن ساعه ساعتين يمه تنامى في البر 4_ هل تقطع مسافة طويلة للوصول لمكانك المفضل . والله اذا حصلت ماتنعاف احب السفريات والكشتات << اشك اني بنت =بس وش اسوي احب الدوجه عندك شك تحذف اميلها 5_ هل تخطط للكشتة مسبقاً . اييييييييييييييه اكيد اذا كان الجو خيال مايحتاج اغث ابوي ادق عليه وجب دجاج مبرد للشوي هههههههههي عشان نكشت 6_أي منطقة تحب أن تكشت فيها روضة أو نفود أو جبل أو بجوار شعيب . جبال =نفود بس ابوي يفضل الشعيب واغلب شي نطلع له ( مكانك المفضل ) * مكانك المفضل والقريب من مدينك أوصفة لنا بالتحديد وأقرب مكان تتزود به من الماء والمواد الغذائية .قلت لكم ماراح تعرفون طيب ليش رازه خشتك اجاوبي وانتى ماراح تقولى واق رب مكان نتزود فيه اكيد نمر وناخذ اغراضنا من محطتنا قبل نمشي *أحب مكان ذهبت إلية , والأفضل صورة . باخر الموضوع موجوده الصور * من تحب أن يكشت معك وكم عدد من يرافقوك . اهلي والله = انا وامي واختي وابوي واخواني اللي يحبونن كثر الدنيا ههه وعقبال مع<< !!!!!!!!!!!!!!!!! * هل البر يزيح عن صدرك الهموم وترجع برووح ونفسية و نشاط. ايه اكيد ومايعرف هالشعور الااللي يطلع للبر ++ موب مثل المرشد استاذنا فيصل بسطح بيتهم >>> هههي دعابه دعابه بدون زعل ( موقف محرج) اممممممممممممممممممم *موقف حصل لك بالبر وكنت لوحدك . *موقف حصل لك مع من ترافقهم وكيف تصرفت وهل يتكرر معك دائما او معهم . *موقف حصل لاصحابك واخذت منه عبره . ( أدوات البر الأساسية ) * ما هي أدواتك للبر الأساسية . عزبه -دافور=مسحات -ركابه =فرشه =مويه =ودايمن كل شي ناخذه احتياط * أدوات تحتاج إليها وحصل إنك نسيتها . والله دايمن اكون حريصه بتجهيز الاغراض هين عادى ( طبختك المفضلة ) شوي دجاج * طبخة تسويها بالبر وتحبها . رز =شوي دجاج رز=سمك وبعد احب الكراث مع الخبز والجبن والشاهي>> مهنا غناة هههه كراث اجل ههههههههههههههههههههه * حصل أن نسيت شي من أغراض الطبخ . نادرا بس اذكر وانا صغيره نسينا بريق الشاهي وسوينا الشاهي بقدررر>>> ههههي تحشيش وش نوع الحشيش * هل تحب أن تطبخ أو يطبخ لك . والله اكيد احب احد يطبخ لي بس ابوي دايمن يفضل انا اطبخ لهم وانا والله ارحمه بس اللي يقهرن اختي العصقوله الكبيره انا اطبخ << وهي متمدده << ابو الكرف ( موقف مع التغريز ) تم تصغير هذه الصورة. إضغط هنا لمشاهدة الصورة كاملة. الصورة الأصلية بأبعاد 640 * 359 و حجم 30KB. * موقف لك مع التغريز . مره كنا طالعين نفود وغرزنا وعقب ماطلعنا ابوي الله يخليه مدري وشلون قال ولاقدامنا نفود لف وطررررررررررررراخ رووس اخواني الصغار بالقزازه والقزازه تشطبت ههه مكان روسهم يقطع من الضحك * ماهو شعورك عندما ترى أمامك غراز . عادي وناسه * السيارة التى تقهر التغريز والسيارة التى تخذلك . والله مااعرف الااليوكن حقنا كشته خييييييير جميعاً.. وان شاءلله ايكون الموضوع خفيف عليكم وبآلنسبة للصور عآدي لو تحطون صورة وحده.. خخخخ بيت حمودي اخوي من قده ولايفوتكم العودان اللي بالزاويه يقول الحطب هاذا ومشكوره اختي رحيق وماعليش عزمت نفسي على هالموضوع بس اعجبني وحبيت ارد تقبلي مروري

يعطيك العافيه دوبااااااااا
صور روعه
احسن من الاستاذ عبدالله للي سحب علينا
منوره عيون

[عبدالله الفـارس]

1_متى أخر مرة طلعت للبر وإلى أين .

قبل شهر تقريباً , صلبوخ


2_أي مكان تحب أن ذهب له , وهل تذهب وحدك /ي أو مع الأهل والأصدقاء , و أيهما تفضل .

أي مكان نظيف و هادي و مع الأهل غالباً


3_ أطول مدة قضيتها بالبر وأقصر مدة .


4 أيام و أقصر مدة عصريات الخميس و الجمعة


4_ هل تقطع مسافة طويلة للوصول لمكانك المفضل .


لا مب مرة يعني أكثر شيء 200 كيلو


5_ هل تخطط للكشتة مسبقاً .


بالتأكيد


6_أي منطقة تحب أن تكشت فيها روضة أو نفود أو جبل أو بجوار شعيب .


مافيه مكان محدد بس الغالب في الرياض








* مكانك المفضل والقريب من مدينك أوصفة لنا بالتحديد وأقرب مكان تتزود به من الماء والمواد الغذائية .
*أحب مكان ذهبت إلية , والأفضل صورة .


مثل ماذكرت مافيه مكان محدد , أحب مكان ممكن شعيب النميساء بروضة سدير


* من تحب أن يكشت معك وكم عدد من يرافقوك .

ربعي القريبين و خصوصا ً الي بيني و بينهم ميانة


* هل البر يزيح عن صدرك الهموم وترجع برووح ونفسية و نشاط.


جداً : )


( موقف محرج)




*موقف حصل لك بالبر وكنت لوحدك .


ْْ,,


*موقف حصل لك مع من ترافقهم وكيف تصرفت وهل يتكرر معك دائما او معهم .
*موقف حصل لاصحابك واخذت منه عبره .


وفاة طفلة أحد أقاربي في حادث انقلاب دباب !!





( أدوات البر الأساسية )





* ما هي أدواتك للبر الأساسية .


الكاميرا أهم شيء بالنسبة لي ^_^


* أدوات تحتاج إليها وحصل إنك نسيتها .

يمكن شاحن جوال السيارة


( طبختك المفضلة )





* طبخة تسويها بالبر وتحبها .

صراحة ماقد حصل و طبخت بالبر


* حصل أن نسيت شي من أغراض الطبخ .


..

* هل تحب أن تطبخ أو يطبخ لك .

..

( موقف مع التغريز )



* موقف لك مع التغريز .

قبل شهرين على طريق الشرقية غرزت بالجمس بس الحمدلله ماقصر راعي سطحه الله يجزاه خير أنقذ الموقف !


* ماهو شعورك عندما ترى أمامك غراز .

بالطبع بحاول أقدم له المساعدة باللي أستطيع عليه


* السيارة التى تقهر التغريز والسيارة التى تخذلك .

مالي خبرة في السيارات :\


يعطيك العافية أختي رحيق الياسمين و شكراً للجميع

استمتعت بتواجدهم و عذراً لتأخري

تحيتي

[رحيق الياسمين]

المشاركة الأصلية كتبت بواسطة   ما هي أدواتك للبر الأساسية . الكاميرا أهم شيء بالنسبة لي ^_^

شكلك اجل ماجربت العطش

[QUOTE
* طبخة تسويها بالبر وتحبها .

صراحة ماقد حصل و طبخت بالبر ][/QUOTE]
للي يطلعو معك اجل رخوم ومدلعينك(برااااااااا
يعطيك العافيه
على استجابه الدعوه
لك احترامي

[رحيق الياسمين]

نجيب






















قمر الزامل

[عذبة الصفات]

1_متى أخر مرة طلعت للبر وإلى أين .
يمكن من شهر رحنا لوراط في سدير

2_أي مكان تحب أن ذهب له , وهل تذهب وحدك /ي أو مع الأهل والأصدقاء , و أيهما تفضل .
اكيد مع اهلي او مع اقاربي يعني مع ناس نمون عليهم

3_ أطول مدة قضيتها بالبر وأقصر مدة .
بصراحه انا مااحب اطول في البر
يعني مثلا نروح نتغدى فيه والمغرب نرجع

4_ هل تقطع مسافة طويلة للوصول لمكانك المفضل .
لا حدنا بران سدير
بس ابوي اذا كنا موب معه يروح لاماكن بعيده بس اذا صرنا معه مانحب نروح بعيد

5_ هل تخطط للكشتة مسبقاً .
لازم

6_أي منطقة تحب أن تكشت فيها روضة أو نفود أو جبل أو بجوار شعيب .
احب فقط شعيب سدير((متعصبه
مثل شعيب وراط والشوكي وروضه نوره

( مكانك المفضل )

* مكانك المفضل والقريب من مدينك أوصفة لنا بالتحديد وأقرب مكان تتزود به من الماء والمواد الغذائية .
احب محطه العتش
*أحب مكان ذهبت إلية , والأفضل صورة .
والله مافي مكان محدد
وترى انا موب راعيه بر ابداااا
احب اروح له بس وقت الامطار

* من تحب أن يكشت معك وكم عدد من يرافقوك .
اكيد اهلي او بعض الاقارب

* هل البر يزيح عن صدرك الهموم وترجع برووح ونفسية و نشاط.
على حسب البر

( موقف محرج)

*موقف حصل لك بالبر وكنت لوحدك .

*موقف حصل لك مع من ترافقهم وكيف تصرفت وهل يتكرر معك دائما او معهم .
في موقف حصل لي لماكنت في 2 ثانوي كنا طالعين مع اقاربنا للبر وجايبين دباب وركبت وكنت مسرعه وماحسيت الا وانقلب فيني الدباب وطاح فوق رجلي وانكسرت وجتني انواع الكدمات والمشكله كان المستشفى بعيد وجلست ساعتين وانا اتلوى في السياره من الالم بصراحه هالموقف مستحيل انساه مع ان مر عليه 7 سنوات

*موقف حصل لاصحابك واخذت منه عبره .

( أدوات البر الأساسية )

* ما هي أدواتك للبر الأساسية .
اهم شي المويه والببسي والمكسرات
ترى ماعندي خبره في اغراض البر

* أدوات تحتاج إليها وحصل إنك نسيتها .
اذكر قد نسينا الملح

( طبختك المفضلة )
يعجبني الشوي في البر

* طبخة تسويها بالبر وتحبها .
ماعمري طبخت فيه

* حصل أن نسيت شي من أغراض الطبخ .

* هل تحب أن تطبخ أو يطبخ لك .
اكيد يطبخ لي
احب اطبخ في البيت موب في البر

( موقف مع التغريز )

تم تصغير هذه الصورة. إضغط هنا لمشاهدة الصورة كاملة. الصورة الأصلية بأبعاد 640 * 359 و حجم 30KB.

* موقف لك مع التغريز .

* ماهو شعورك عندما ترى أمامك غراز .
ارحمهم

* السيارة التى تقهر التغريز والسيارة التى تخذلك
ماعندي خبره
مااعرف الا سيارتنا لاندكروز
بس اتوقع للبر تنفع له سياره جيب عشانها مرتفعه