الرصيع المبلول باللبن والبصل (صور)

[طالبة الشهاده]

بسم الله الرحمن الرحيم
السلام عليكم
من مطبخي اقدم لكم طريقة الرصيع
والرصيع أكله من تراث سدير وهو عباره عن خبز من دقيق البر مرصع على المقرصه او ما يقوم بمقامها ومن ثم يشرب باللبن والبصل

والمقادير

5 حبات بصل بحجم متوسط
لتر ونصف او حسب الحاجه لبن
فلفل اسود ملح او مكعب ماجي
عجينة الرصيع (4 كاسات دقيق بر خالص ، شوية ملح ، ويعجن بماء حتى تتكون عجينه متماسكه و قاسيه نوع ما)

بعد عجن العجينه تترك لترتاح لنصف ساعه على الاقل ثم تكور كور بحجم البيضه او اليوسفندي<<< يازين الوصف مثل اللي بالصوره، ويغطى ويترك الى ان يتم عمل البلول
وتسخني المقرصه



الان بدأ الجد
افردي كل حبه بالفراده مثل اخيتكم والا بيدينك اذا انت ظفره طيرها في الهوا



وتكون بهالحجم ولا تكون متينه ولا رهيفه



هذه وهي على المقرصه والظفره تخليها مدوره لكن استروا ما واجهكم





هذا بعد ما انتهينا من خبز الرصيع




نجي الان للبلول (المرق) و هو ان تقطعي البصل مكعبات صغيره وتحمسيه في زبده




ثم ارش عليه الفلفل الاسود و ا تركه على نار هااديه لا يصفر ولا يحمر انتبهي !! بس يذوب
بعدين صبي عليه اللبن





واضيف عليه الملح او مكعب ماجي واذا احتاج زيادة فلفل اسود او اخضر او احمر



ونتركه يطبخ على نار هادية مده ماتزيد عن الثلث ساعه

[طالبة الشهاده]

نبدا الان في بل الرصيع



وهنا الطبقه الثانيه



هذا الشكل بعد الرش بعدين نحطه على النار بس من 7-10 دقايق الى ان يشرب المرق






[size=3]
الان جهز



والله يا طعمه مسكت احسن من شكله جربوه

تعبت مره من تحميل الصور
ادعولي

[miss sudeer]

تسلمين اختي على هالطبخه !

يبيلها قومه من الصبح وحليب حار

[مرهف الإحساس]

هذي كورن فليكس مب رصيع


تسلمييييييييييين أختي طالبة الشهادة



تحيااااااااااتي لك

[طالبة الشهاده]

مس سدير تسلمين قلبي على المرور
ومشكووره حبيبتي

[طالبة الشهاده]

الاخ مرهف الاحساس
أجل كورن فليكس هههههههههههه
ايه هذا كورن فلكس الاولين طبيعي 100%
اجل مثل كورن فليكس الحين اللي ما ندري وش محتوياته!!!

وشكرا على المرور

[سعد القاسم]

ايه كذا الصور ولا بلاااش

[طالبة الشهاده]

جزاك الله خير اخوي سقم على المرور

[وادي سدير]

اختي طالبة الشهاده

طبق رصيع رائع

تسلم اياديك

وتسلمين على هالطبق اللي يدل على الاصاله

للاسف ان الكثير من اخواتنا معد يبن الاطباق اللي تبي شغل كثير وقومه بدري

[طالبة الشهاده]

العفو اخوي وادي سدير
وجزاك الله خير
وبالعكس ترى الرصيع ما يبيله قومه بدري الامر تغير الله المستعان
انا بديته الساعه 1ونص لظهر و اكلناه بعد صلاة العصر
يمكن العصيد اللي يحتاج وقت لكن ممكن نبدأه الساعه 10 الصباح وناكله بعد صلاة العصر مباشره اذا كانت الكميه قليله اما الكثيره فتحتاج وقت اكثر

[مرهف الإحساس]

اختي طالبة الشهادة

من جد شغلك رووووووووووووووووعة

والله يا أمي بتنبسط على هالاكلات الشعبية اللذيذة



تحياااااااااااااااتي لك وواصلي عطاءك الناري اللامحدود

[مشــاعر]

الله شكله يشهي

انا امس رايحه عرس

الله يعطيس الف عافيه

والله كاني عجيز ماخذه مرقوق وجريش ومفلق

ومااخذت الا ورق عني غير هالاشياء


لا ومن زود الفلاحه احبهم بس مااعرف اسويهم