هل تأكل من طبخ الشغالة؟ولماذا؟

[ســــامـــيـه]

السلام عليكم ورحمة الله وبركاته

وبعد السلام أطرح بين أيديكم هذا الموضوع ... لأهميته ..
و اريد من خلاله تسليط الضوء على طبخ الخادمة في البيت؟؟

إليكم الموضوع.....

نحمد الله ونشكره على النعمة التي انتشرت في أرجاء المملكة ولعل من بين
ظواهرها(الجيدة أو السيئة) اعتماد الكثير من الأسر على الخدم بل إن بعض الأسر لديهم أكثر
من خادمة ومن المهام التي تقوم بها الخادمة المنزلية ما يلي:-

- التنظيف بكافة أنواعه للمنزل والأدوات والملابس وغيرها.

- الاهتمام بلبس الأطفال ونظافتهم.

- رعاية الأطفال الصغار أثناء غياب أمهاتهم.

- الطبخ بكافة درجاته...

الحالة:-

يتفاوت الناس في الاعتماد على الخادمات أو الشغالات فهناك أُسر تعتمد كلياً على
الخادمة حتى في الطبخ وهناك آخرون محرم على الشغالة الاقتراب من عملية الطبخ و
هناك فئة أخرى تعمل الشغالة كل شيء(تطلع الدجاج وتقطعه وتقطع البصل والطماطم وتقطع السلطة وتذوق الملح وتحرك وتقصر أو تزيد على الغاز وتجهز السفرة وتغسل الصحن وتأتي بعد ذلك المحروسة و(تنسب) الرز في الصحن اللي ماسكته الشغالة ثم تأخذه منها وتحطه على السفرة أمام الزوج العزيز.. والزوج مبسوط من طبخ زوجته الرائع..

السؤال هو ... وهذا هو الموضوع..:-

هل تأكل من أكل الشغالة؟ولماذا؟

أليست أمامك في المنزل ومفحوص عليها بمعرفتك ومتأكدين من نظافتها,
ولماذا تأكل من أكل المطاعم وأنت تعرف مدى قذارة بعض عمالتهم (أدخل داخل وتعرف كيف النظافة والأشكال!!).

على الجانب الأخر
هناك ربات أُسر ليس لديهن وظيفة ومع ذلك يعتمدن على الخادمة في الطبخ وبشكل كبير؟لماذا هذا القصور في أداء هذه الأمهات وبناتهن المفترض تعلمهن الطبخ حتى لا يتعلمن في بطون أزواجهن الجدد وبالتالي قد يتم تسريحهن من أول يوم لأنهم يقولون (أقرب طريق لقلب الرجل بطنه).

أريد أن أعرف وبكل صراحة ما هو الممارس في منزلك أخي .. أختي و
رأيك الشخصي في هذا الموضوع ولماذا؟؟
واقعية إجابتك تعطيك دائماً راحة نفسية وكسراً لحواجز موجودة!
آمل التركيز على عملية الطبخ فقط..

أ{جوا الرد بمصداقية.. لأنه موضوع مهم


منقووووول ببعض التعديلات........

[سعد القاسم]

لا .... ....

اطبخ انا ولا اكل من يدها ..

[ســــامـــيـه]

مشكور على الرد أخوي سعد

وهذا يسمونه الإعتماد على النفس

وياليت كل الشباب كذا

فيه شباب حتى كاس الموية مايشيلونه بعد مايشربون..



......

نشووووف آراء الأعضاء الباقين..

أبي أسمع من الباقي........

[ريناد]

في بيتنا الشغاله مافي امل تطبخ حتى الشاهي والقهوه ماتجيهم

لكن من ناحيه اني آكل من طبخ خدامه فممكن لان صعبه تتنعفقين على الناس

من مسويه انتي والا الشغاله؟؟

ففي بيت جدتي تطبخ احيانا الشغاله وناكل وش نسوي بعد نكبه حتى ذا اسراف
تدرأ المفاسد لتعم المصلحه>> وش دخل ذي

وجتنا فتره في بيت جدتي مانشرب القهوه الي تسويها نسوي (اننا ) نحن

وصادقه الشغاله اهون من ذا العامل اللي متوزي وما ندري يده عقب وشو

اما الشغاله يدها معظم الوقت في الصابون بس الخوفه مو من هنا الخوفه لا تحط شي في الاكل

شغاله خالي من بعيد طاحنه قزاز وحاطته مع الجبن بوك <<لاتنسون المقاطعه

مشكوووووره يالغاليه عالنقل وماتلاحظين اني ماخده راحتي

تحيه

[فهد المنيع]

انا بصراحه نفسياً ما اقبل طبخ الشغاله وهالشي ماهوب استحقار لها او شي من هالقبيل لانها انسانه قبل اي شي لكن سبحان الله نفسي ما تقبل اكلها ويمكن لان بيتي ما فيه شغاله ومن قبله بيت اهلي ما فيه هو اللي خلاني اكرهه ..

عموماً فيه بيوت عادي ياكلون من طبخ الشغاله ويمكن صارت عاده من الصغر او يمكن ظروف الاسرة تحتم عليهم ياكلون من يدين الشغاله


انا مع سعد القاسم اطبخ بيدي ولا اكل من يدها


شكراً اختي

[مشــاعر]

السلام عليكم..


انا الصراحه آكل ولا ادري امي والا الشغاله الي مسويه الاكل ,, ههههههههههههههههه<<===تكفين ياللي تاكلين من البيت دايم ,,
بس هي الي تحط لي الغدا وتجيبه لي ,, ومعلمتها ان ماتحط لي في الصحن الا وهي مغسلته,,

تحيتي لكم

[المعنّى]

انا من ناحيتي اذا كانت الشغالة نضيفة ومرتبه عمرها يعني من ناحية النضافة والدرابه اكل من طبخها

اما اذا جت وسخه وريحتها تحوم الكبد فما فيه امل .


سؤال للشباااااب الي يقولون لا طيب منت تاكل من مطعم وشغل ابو هنود الي ساعة يده في خشمه وساعة

يحك ظهره وساعه يقطع بها بصل او يحرك بها شكشوكه او يخلط الشورما برجوله الله يعز النعمه

مو الشغاله الي في البيت اظمن خصوصا ان فيه عليها اشراف من قبل راعية البيت .

[طباخ اللون]

ما احب اكل الخدامات وافضل طبخ الاهل والمطاعم عليها

المعنى شكلك ما تعدى مطاعم ابو هنود ههههه فيه مطاعم انظف من الي تجيهم واكبر وعندهم طباخين وطهاة معهم شهادات يعني ارخ الريال وخل عنك سندوشات البيض المقلي الي نصفها زيوت ههههههههه امزح

[المعنّى]

ميراندا

انا اتكلم عن المطاعم كلها والريال ما قام ولا قعد عندي يا بعدهم

وانا اذا بغيت اطلع لمطعم اعرف المطاعم كثير وخصوصا المطاعم الصينية بس انا اتكلم عن المطاعم عامه

واعتقد ان الخادمه احيانا انضف من الي في المطاعم خصوصا اذا كانت مسلمه اما الي في المطاعم ما تعرف وش

ديانتهم .


وخل عنك المطاعم طيب المخابز والا انتو ما تاكلون خبز وقرصان من برا ؟ هههههههه

[طباخ اللون]

حنا ناكل من خبر لا تمسه الايادي هههههههه سوا فيها

يا رجال لو نبي ندقق كان نقصر خذ عندك المويه الي تتوظا بها تلقى الخزان فيه برصي ميت واللبن طايح فيه ابو جعل ووخروه منه الشركه وحطوه لك في علب وشربته مع كبسة لحم وانسدحت في محلك ههههههه والا بسكوت الشاهي عاجنه سويدي وهو سكران وعلبوه وجابوه لك تغط في بيالتك وتلطه عقب عصر هههههههه يعني الاخت حددت موضوع الشغاله وتكلمنا عنه
لكن صدقت بعض الشغالات انظف من حقين المطاعم بس اهم شي اذا مرت من جنبك ما تشم ريحة صنقه ههههههههه

اهم شي النظافة والا الشغاله مثلها مثل غيرها


مشكور حبيب البي وما ننسى نشكر صاحبة الموضوع

[سديراوية]

والله انقرف من الخدامات انا

حداها حدها تـنظف وترتب وتشيل وتحط

اما ساالفه انها تطبخ فـ لا والله

امي بس تخليها تقشر بطاطس مثلا ..

او شي غير مباشر في الأكل


بيني وبينكم .. انا ماااا اقبلها ابد ابد ابد

وآآآكل من برى >>> تناااقض

انا اقولكم ليش ..

لأن اللى يسوون الأكل برى انا ما اشوفهم .. وانا ادري ان اكلهم لذيذ >> بس مو كلهم

لكن اللى في البيت خدامات اندونيسيات و فلبينيات ومن هالنوعيات

وانا اعرف انا اللى من شرق آسيا ما ياكلون الا سحالي .. وسلاحف .. وحياياا

يعني بصراحة شي ما يشجع اني آكل من يدينهم


ادري كلام متناقض

لكن وش نسوي عاااد

يسلمو على الموضوع

[مرهف الإحساس]

السلام عليكم

بالنسبة لي ( ما أواااطن الشغالة تقرب لي أكل )

سبحان الله ما اقدر اقبل منها أبد !! مع انهم يقولون انها نظيفة ويدينها دايم في ( المجلى ) إلا اني ما استسيغ طبخها

أبد أبد ..

لدرجة اني لو أشوفها شايلة صحن فيه أكل أو شيء من هذا القبيل خلاص تنسد نفسي عالآخر ...

عساي اقبلها تنظف ملابسي وترتب غرفتي <<< الله يعفو ويتسامح !!

وبعدين اللي في المطاعم أكلهم حلو ويكفي انهم جايين بفيز ( طباخين ) مو عمال نظافة ويطبخون !! وحنا نشوفهم قدامنا يشتغلون في أغلب المطاعم ...

طبعا لي قناعتي الشخصية في رفضي لطبخ الشغالة ومن ذلك :

ان الشغالة لم تأت إلا لتكون عاملة تنظيف في المنزل لا ( طباخة ) !!!

وهذا قد يدخل في ذمة مكفولها أو مكفولتها اذ أنه من جانب الولاية عليها لا يجوز تكليفها بعمل غير عملها

وبعض الحريم يتحججون ويقولون انها هي تبغى تطبخ من نفسها <<< والله ما قد خبرنا هالشي !!

في المقابل >> أتلذذ بالأكل اللي تسويه أمي أو أخواتي واستسيغ اي شي منهم حتى لو كان محترق !!!


شكرا لكِ أختي مون على الموضوع الرائع ...

وأعتذر على الاطالة ..

[بدر]

انا عن نفسي ما احب الشغالات من الاساس...

وعشان كذا حتى الطبخ منها ما ابيه..

والف شكر يا قمر سدير على تواصلك الرائع...

[سديراوية]

المشاركة الأصلية كتبت بواسطة مرهف الإحساس   وبعدين اللي في المطاعم أكلهم حلو ويكفي انهم جايين بفيز ( طباخين ) مو عمال نظافة ويطبخون !! وحنا نشوفهم قدامنا يشتغلون في أغلب المطاعم ... ..

بهاذي .. جبتــها

[مرهف الإحساس]

شكرا سديراوية على الدعم


تصبحون على خير